मकवानपुर । विभिन्न १० वटा कम्युनिस्ट घटकहरू मिलेर नेपाली कम्युनिस्ट पार्टी घोषणा गरिएको छ । काठमाडौंको भृकुटीमण्डपमा बुधबार आयोजित कार्यक्रमकाबीच एकता घोषणा गरिएको हो ।
नेकपा माओवादी, नेकपा एकीकृत समाजवादी लगायतका १० वटा दल मिलेर बनेको नेपाली कम्युनिस्ट पार्टीको संयोजकमा पुष्पकमल दाहाल प्रचण्ड र सहसंयोजकमा माधवकुमार नेपाल चयन भएका छन् ।
बुधबार एकता घोषणापछि भएको सम्मेलनमा प्रचण्ड संयोजक र सहसंयोजकमा नेपाललाई चयन गर्न नेता महेन्दराय यादवले प्रस्ताव गरेका थिए । यादवको प्रस्तावलाई हलले ताली बजाएर समर्थन गरेको थियो ।
यसैबीच नेपाली कम्युनिस्ट पार्टीले घोषणापत्र सार्वजनिक गरेको छ। एकता सभामा नवगठित पार्टीको २३ बुँदे घोषणापत्र नेता देव गुरुङले सार्वजनिक गरेका हुन्। पार्टीको एकता सम्मेलनले विभिन्न ९ बुँदे प्रस्ताव पारित गरेको छ।
काठमाडौंमा जारी सम्मेलनले पार्टीको नाम, चुनाव चिह्नलगायतका विभिन्न ९ बुँदे प्रस्ताव पारित गरेको हो । सम्मेलनमा वर्षमान पुन अनन्तले प्रस्तुत गरेका प्रस्तावलाई प्रतिनिधिहरूले अनुमोदन गरेका हुन्।
यी हुन् ९ बुँदे प्रस्ताव
१.एकता प्रक्रियामा सहभागी पार्टीहरूले पार्टी एकता गरेर ‘नेपाली कम्युनिष्ट पार्टी’ निर्माण गर्ने निर्णय गरिएको छ।
२.चुनाव चिह्न ‘पाँच कुने तारा’ राख्ने निर्णय गरिएको छ।
३.एकतामा सहभागी सबै सदस्यहरू अबदेखि नेपाली कम्युनिष्ट पार्टीका सदस्य हुने निर्णय गरिएको छ।
४.एकतामा सहभागी सबै पार्टीका नेताहरूसँग आवश्यक परामर्श गरेर पार्टीका केन्द्रीय संरचनाहरूलाई पूर्णता दिने र संगठनात्मक समायोजन सम्बन्धी काम गर्ने तथा यसअघि सबै घटकका केन्द्रीय समितिलाई समायोजन गरी केन्द्रीय समिति निर्माण गर्ने निर्णय गरिएको छ।
५. केन्द्रीय संरचनाहरूलाई पूर्णता दिने र संगठनात्मक समायोजनसम्बन्धी काम गर्ने अख्तियारी पार्टीका संयोजक र सहसंयोजकलाई दिने प्रस्ताव गरिएको छ।
६.विगतका प्रतिनिधिसभा, राष्ट्रिय सभा, प्रदेश सभा र स्थानीय तहमा नेकपा माओवादी केन्द्र, नेकपा एकीकृत समाजवादी, नेपाल समाजवादी पार्टी, नेकपा माओवादी समाजवादीको चुनाव चिह्नबाट निर्वाचित जनप्रतिनिधिहरू अबदेखि नेपाली कम्युनिष्ट पार्टीका जनप्रतिनिधि हुनेछन्।
७. पार्टी एकतामा सामेल सबै पार्टीहरूको चल–अचल, बैंक मौज्दातलगायतका सम्पत्तिको स्वामित्व र दायित्व अबदेखि नेपाली कम्युनिष्ट पार्टीको स्वामित्वमा रहनेछ।
८. नेपाली कम्युनिष्ट पार्टीको घोषणापत्र पारित गरिएको छ।
९.नेपाली कम्युनिष्ट पार्टीको विधान छलफल र आवश्यक सुझावसहित पारित गरिएको छ।
मकवानपुर । नेकपा (माओवादी केन्द्र) र नेकपा (एकीकृत समाजवादी)सहित ८ वटा राजनीतिक दलले एकताका लागि १८ बुँदे सहमतिमा हस्ताक्षर गरेका छन् । ८ दलबीच नयाँ पार्टीको नाममा सहमति नभएकाे बताइएकाे छ भने चुनावचिन्ह पाँचकुने तारामा सहमति भएकाे छ ।
सहमतिपत्रमा माओवादीका संयोजक प्रचण्ड र एसका अध्यक्ष माधव नेपालसहित नेपाल समाजवादी पार्टीका अध्यक्ष महेन्द्र राय यादव, जनसमाजवादी पार्टीका अध्यक्ष सुवासराज काफ्ले, नेकपा (समाजवादी) पार्टीका अध्यक्ष राजु कार्की, नेकपाका महासचिव चिरन पुन, नेकपा माओवादी स्समाजवादीका अध्यक्ष कर्णजित बुढाथोकी र नेकपा साम्यवादीका अध्यक्ष प्रेमबहादुर सिंहले हस्ताक्षर गरेका छन् ।
आइतबार नेकपा माओवादी केन्द्रको केन्द्रीय कार्यालय पेरिसडाँडामा बसेको पार्टीकाे बैठकमा १८ बुँदे सहमति भएको हो । आगामी १९ कार्तिकमा उक्त ८ पार्टीहरूबिच एकता घाेषणा गरिने भएकाे छ ।
पार्टी एकताका लागि ८ पार्टीले गरेका सहमतिका बुँदाहरुमा के के छन्??
- पार्टीको मार्ग निर्देशक सिद्धान्त : मार्क्सवाद–लेनिनवाद हुनेछ ।
- नेपाली कान्तिको कार्यक्रम : नेपाली विशेषताको वैज्ञानिक समाजवाद हुनेछ।
- पार्टीको तात्कालिक कार्यनीति : पुँजीवादी जनवादी कान्तिका उपलब्धिको रक्षा राष्ट्रिय स्वाधीनताको संरक्षण, सुशासन, सामाजिक न्याय, सामाजिक आर्थिक समृद्धि र रूपान्तरण गर्दै समाजवादको आधार तयार गरिने छ ।
- आन्दोलनको स्वरूप आन्दोलन मूलतः शान्तिपूर्ण हुनेछ। परिस्थिति अनुसार सडक, सदन र सरकार लगायत आवश्यकता अनुसारका सबै मोचाहरु आन्दोलनको मोर्चा हुनेछन् ।
- पार्टीको एकता राष्ट्रिय सम्मेलन : एकता प्रक्रियामा सहभागी सबै घटकहरूका केन्द्रीय समितिहरूको संयुक्त भेलाको रूपमा एकता राष्ट्रिय सम्मेलनको आयोजना २०८२ कात्तिक १९ गते गरिने छ । एकता राष्ट्रिय सम्मेलनबाट पार्टी एकताको घोषणा, घोषणा पत्र र अन्तरिम विधान पारित र केन्द्रीय समितिको गठन लगायतका कार्यहरू गरिनेछ ।
- एकता राष्ट्रिय महाधिवेशन :आगामी ६ महिनाभित्र एकता राष्ट्रिय महाधिवेशनको आयोजना गरिनेछ ।
- केन्द्रीय समितिको गठन : एकता प्रक्रियामा सहभागी भएका पार्टीहरूका साविकका केन्द्रीय समितिहरूलाई समायोजन गर्दै आपसी सहमतिको आधारमा केन्द्रीय समिति गठन गरिने छ ।
- केन्द्रीय समिति भित्रको संरचना : केन्द्रीय समिति, राजनीतिक समिति सचिवालय, कार्य संयोजन समिति हुनेछ ।
- संयोजक र सहसंयोजक : केन्द्रीय समितिमा संयोजक र सहसंयोजक पद हुनेछ । प्रदेश, जिल्ला, पालिका र वडा तहका सबै समितिहरूमा पनि संयोजक र सहसंयोजक व्यवस्था हुनेछ ।
- सहमति र समन्वय एकता : राष्ट्रिय सम्मेलन र एकता महाधिवेशनमा सहभागी हुने प्रतिनिधिहरू, आयोजना, सङ्गठनात्मक संरचनाको गठन सबै आपसी सहमति र समझदारीमा गरिनेछ ।
- सबै तहको पार्टी पङ्क्तिमा एकता समायोजन : सबै तहका पार्टी समितिहरू र जनसङ्गठनहरूमा इन्चार्ज तथा सहइन्चार्ज र संयोजक तथा सहसंयोजकहरु सम्भव भएसम्म एकतामा सहभागी घटकहरूबाट रहने व्यवस्था गरिने छ ।
- दुई तहमा रहनसक्ने : कुनै पनि सदस्यहरू दुई तहको समितिमा रहन सक्ने छन् ।
- पार्टी समितिहरूको सञ्चालन : पार्टी समितिहरूको सञ्चालन सामूहिक नेतृत्व प्रणालीमा आधारित जनवादी केन्द्रियताको सिद्धान्त अनुरूप हुने छ ।
- राजनीतिक प्रतिवेदन र कार्यक्रम : पार्टी एकता घोषणापश्चात् राजनीतिक प्रतिवेदन कार्यक्रम लगायतका दस्ताबेजहरू निर्माण गर्न कार्यदल गठन गरिने छ ।
- सङ्गठनात्मक समायोजन : पार्टी समितिहरू र जनसङ्गठनहरूमा सङ्गठनात्मक एकता र समायोजनका लागि विभिन्न तहमा कार्यदल गठन गरिनेछ ।
- पार्टीको तहगत कार्यकारी समितिहरु: केन्द्र, भौगोलिक र गैरभौगोलिक दुवै तर्फका प्रदेश, जिल्ला, पालिका र वडा तह कार्यकारी हुनेछन्। सङ्घ र प्रदेश निर्वाचन क्षेत्रमा समन्वय समिति हुने र टोल तथा प्रारम्भिक स्तरका समितिहरू सङ्गठन समितिको रूपमा रहने छन् ।
- पार्टीको नाम र चुनाव चिन्ह : पार्टीको नाम………………….. रहने र चुनाव चिन्ह पाँचकुने तारा हुने छ ।
- मतभेद समाधान : वैचारिक राजनीतिक विषयमा एकआपसमा रहन सक्ने मतहरूबारे निरन्तर छलफल गर्दै जाने र एकता राष्ट्रिय महाधिवेशनबाट निष्कर्षमा पुर्याइने छ ।

मकवानपुर । मकवानपुर जिल्लाको जेनजी संयाेजकमा सुगम नेगी चयन भएका छन् ।
त्यसैगरि जेनजी जिल्ला सह-संयाेजकमा निश्चल रसाईली र नवीन परियारलाई जिम्मेवारी दिइएको छ। जेनजी बागमती प्रदेश संयोजक अफ्साना बानुका अनुसार जिल्ला संयोजक तथा सह संयोजक बहुमतको आधारमा छनौट गरिएको हो ।
संयोजक नेगी र सह–संयोजकद्वय रसाईली र परियारलाई सफल कार्यकालका लागि शुभकामना दिदै प्रदेश संयोजक बानुले नयाँ नेतृत्वले जनविश्वास, जवाफदेहिता र पारदर्शिताका सिद्धान्तअनुसार कार्य गर्ने बताइन् ।
मकवानपुर । श्रम संस्कृति पार्टीकाे मकवानपुर जिल्लामा संगठन विस्तार गरिएकाे छ । तीव्रता दिएको छ। धरान उपमहानगरपालिकाका प्रमुख हर्क साम्पाङ नेतृत्वकाे पार्टीकाे मकवानपुर जिल्ला तथा पालिका र वडा तहसम्म तदर्थ कमिटी गठन गरेकाे छ ।
पार्टीकाे जिल्ला तदर्थ समिति संयोजकमा युनेश लामा सिन्तान चयन भएका छन्। संगठनकाे सह–संयोजकमा ध्रुव दहाल, किशोर राना मगर, दिपक सिङ घलान रहेका छन् । यसैगरी सचिवमा मर्सी मोक्तान तथा सह–सचिव भुपेन्द्र राना मगर रहेका छन्। जिल्ला समिति सदस्यहरुमा मोहन वाइबा, महादेव घलान, दिपेन्द्र पुडासैनी लगायत २१ सदस्य रहेकाे बताइएकाे छ ।
त्यस्तै, पार्टीकाे मनहरी गाउँपालिका समितिको संयोजकमा पवन कुमार मोक्तान र सह–संयोजकमा पूर्णहरी अधिकारी चयन भएका छन्। मनहरी गाउँपालिका समिति १९ सदस्यीय रहेको जनाइएको छ। यसैगरी भीमफेदी गाउँपालिकामा दिपेन्द्र पुडासैनीकाे नेतृत्वमा ११ सदस्यीय तदर्थ समिति गठन गरिएको छ।
वडा तहसम्म संगठन विस्तार थालेको पार्टीले भीमफेदी गाउँपालिका वडा नं. ४ मा शिव बहादुर केसीकाे संयोजकमा ११ सदस्यीय वडा समिति गठन गरिएकाे छ । चित्र बहादुर रुम्बा सह–संयोजक रहेकाे समितिमा प्रताप लामा सचिव, र बासुदेउ थिङलगायतका सदस्य रहेका छन्।
जिल्ला संयोजक युनेश लामा सिन्तानका अनुसार श्रम संस्कृति पार्टीले हरेक शनिबार श्रमदान कार्यक्रम सञ्चालन गर्दै आएको छ। “हामी श्रमलाई संस्कृतिको रूपमा स्थापित गर्न चाहन्छौं र यही सन्देश गाउँ–गाउँ र वडा–वडासम्म पुर्याउँदैछौं”उनले भने ।
सिन्तानका अनुसार पार्टीले श्रमदानलाई पनि वडास्तरमा पुर्याउने योजना अघि बढाएको छ । श्रमदान संस्कृतिले समाजमा सामूहिक श्रम र सहयोगकाे भावना विकास हुने पार्टीले विश्वास लिएकाे छ।
मकवानपुर । बागमती प्रदेशका मुख्यमन्त्री इन्द्र बहादुर बानियाँले राजनीति गरेको मानवताका लागि भएकाे बताएका छन् । मुख्यमन्त्री बानियाँले विपन्न दलित एवं एकल महिलालाई घर हस्तान्तरण गर्दै यस्तो बताएका हुन् ।
उनले आइतबार मकवानपुर मनहरी–९ की मिठुमाया सुनारको घर निर्माण गरेर हस्तान्तरण गरेका हुन् । ‘हामीले राजनीति गरेकाे मानवताकाे लागि हाे’ हस्तान्तरण कार्यक्रममा उनले भने ‘गरिबलाई न्याय, गरिबलाई आयको सिद्धान्तमा हामी अघि बढिरहेका छौँ । गरिबमुखी, गाउँमुखी, विकासमुखी र जनमुखी काम गर्न हामी प्रतिबद्ध छौँ ।’
सोही अवसरमा मुख्यमन्त्री बानियाँले बाख्रा पालन गरी जीविकोपार्जन गर्न मिठुमायालाई २० हजार रुपैयाँ आर्थिक सहायता समेत प्रदान गरेका थिए । उनले आफ्नो व्यक्तिगत लगानी र मुख्यमन्त्रीको सुविधाबाट मकवानपुरको राक्सिराङ र कैलाशमा थप २ वटा यस्ता घर निर्माण गर्दैछन् । हस्तान्तरण गरिएको घर सरकारी अनुमान अनुसार करिब ७ लाख लागतको छ । आरसीसी पिल्लर सिस्टमको उक्त घरमा ३ कोठा, शौचालय, बत्ती, पानी लगायतको सुविधा छ ।
मुख्यमन्त्री बानियाँले प्रदेशभरिका १ हजार विपन्न परिवारका लागि प्रदेश सरकारमार्फत घर निर्माण गर्ने योजना घोषणा गरेका छन् । घरसँगै छानामुनि बस्नेको खाना र नाना (रोजगारी) को पनि व्यवस्था गर्न सरकारले आयआर्जनका कार्यक्रम ल्याउने उनको भनाइ छ । मुख्यमन्त्री नियुक्त भएपछि बानियाँले आफ्नो पारिश्रमिकबाट घरबार विहीन विपन्न दलित तथा एकल महिलाका लागि घर निर्माण गरिदिने घोषणा गरेका थिए । सोही बमोजिम उनले सुनारको घर निर्माण गरि हस्तान्तरण गरेका हुन् ।
घर हस्तान्तरण कार्यक्रमा सहकारी तथा गरिबी निवारण मन्त्री बिनु रायमाझी, मनहरी गाउँपालिकाका अध्यक्ष रन्जन कालाखेती, नेपाली कांग्रेस बागमती प्रदेश सदस्य जानकी लामा लगायतको सहभागिता रहेको थियो ।