मकवानपुर । मकवानपुरको बकैया गाउँपालिकामा नेपाली कांग्रेसले संयुक्त पार्टी कार्यालय उद्घाटन गरिएकाे छ । साेमबार कांग्रेस बागमती प्रदेश संसदीय दलाका नेता ईन्द्रबहादुर बानियाँले मकवानपुर प्रतिनिधि सभा १ क क्षेत्रीय कार्यसमिति कार्यालय र बकैया गाउपालिका कार्यसमितिकाे सयुक्त पार्टी कार्यलय उद्घाटन गरेका हुन् ।
कांग्रेस प्रतिनिधिसभा १ प्रदेशसभा (क) का सभापति सुशान्त कुमार श्रेष्ठको सभाध्यक्षता एवं बागमती प्रदेश संसदीय दलाका नेता बानियाँको प्रमूख आतिथ्यतामा बकैया गाउँपालिको हात्तिसुँडेमा भएको पार्टी कार्यालय उद्घाटन तथा पार्टी प्रवेश कार्यक्रममा १ सय ४७ जना नेपाली कांग्रेसमा प्रवेश गरेका छन् । बकैया गाउँपालिकाका ४ वटा वडाका एमाले, माओवादी केन्द्र र राप्रपा पार्टी परित्याग गरी १ सय ४७ जना नेपाली कांग्रेसमा प्रवेश गरेका हुन् । पार्टी प्रवेश गर्नेलाई सभापति बानियाँले कांग्रेसकाे सदस्यता दिएर पार्टीमा स्वागत गरेका थिए ।
कार्यक्रममा बोल्दै प्रमूख अतिथि बानियाँले कांग्रेस भीडको पछाडी हिड्ने नभै नियन्त्रण गरेर राम्रो र सही ठाउँमा अन्य दलहरुसमेत संगै लिएर हिड्ने बताए । कम्युनिष्टहरु जनतालाई झन् विपन्न र गरिव बनाई राजनीति गर्ने पार्टी भएकाले कम्युनिष्टहरुबाट देशमा कहिल्यै समृद्धि नआउने बानियाँले बताए । ‘उनीहरु एमसीसीको बारेमा जनतालाई गलत भ्रम सूचना दिएर गरिव, विपन्न र विकासोन्मुख देशलाई विदेशी शक्ति राष्ट्रले दिएको सहयोगमा खेल्ने गर्छन’ उनले भने ।
कार्यक्रममा कांग्रेस मकवानपुर सभापति बुद्ध लामा, पूर्व सभापति माईकल रामचन्द्र अर्याल, निवर्तमान कार्यबहाक सभापति विष्णु लामिछाने, जिल्ला उपसभापतिद्वय आनन्द कठायत र धर्मराज लामिछाने, सचिव ईश्वर पाठक, जिल्ला सदस्य आनन्दराम पराजुली, महिला नेतृ रिता खनाल, संघीय सभापतिद्वय दामोदर खनाल र लोक मुक्तान, नेपाल विद्यार्थी संघका अध्यक्ष राजु खतिवडा, महिला संघ जिल्ला सचिव निलम देवकोटा, महिला संघ बागमती गाउँपालिका सचिव अप्सरा लामालगायतकाे उपस्थिति रहेकाे थियाे ।
स्थानीय तह निर्वाचनलाई लक्षित गर्दै दलहरूले केन्द्रदेखि प्रदेश र जिल्ला हुँदै स्थानीय तहमा शक्ति देखाउन होडबाजी सुरु गरेका छन् ।
गत २०७४ सालको निर्वाचनमा अन्य दलबाट निर्वाचित जनप्रतिनिधि र स्थानीयस्तरमा प्रभाव राख्ने स्थानीय नेता कार्यकर्ताहरूलाई आफ्नो दलमा भित्र्याउन मुख्य दलहरू सक्रियताका साथ लागि परेका छन् । आगामी ३० वैशाखका लागि स्थानीय तहको निर्वाचन तय भइसकेको छ ।
प्रमुख सत्तारूढ दल नेपाली कांग्रेसले गत बिहीबार मात्रै पर्साको पोखरिया नगरपालिकाका मेयर दीपनारायण रौनियारलाई तामझामका साथ कार्यक्रम आयोजना गरेर कांग्रेसमा प्रवेश गराएको थियो । कांग्रेस सभापति एवं प्रधानमन्त्री शेरबहादुर देउवाले रौनियारलाई आफैं उपस्थित भएर कांग्रेस प्रवेश गराएका थिए । उनी नेपाली जनता दलबाट २०७४ सालको स्थानीय तह निर्वाचनमा पोखरिया नगरपालिकाको मेयरमा निर्वाचित बनेका थिए ।
यसैगरी, वीरगन्ज महानगरपालिकाका मेयर विजय सरावगी शनिबार मात्रै नेकपा एमालेमा प्रवेश गरेका छन् । उनी गत स्थानीय तहको निर्वाचनमा तत्कालीन संघीय समाजवादी फोरमबाट वीरगन्ज महानगरपालिकाको मेयरमा निर्वाचित बनेका थिए । उनलाई एमाले अध्यक्ष केपी शर्मा ओलीले आफैं वीरगन्ज पुगेर एमालेमा भित्र्याएका हुन् । सरावगीको पहिलो रोजाइ कांग्रेस थियो । तर, कांग्रेसबाट राम्रो ‘रेस्पोन्स’ नआएपछि अन्तिममा उनी एमालेमा गएका हुन् ।
पर्साकै जगरनाथपुर गाउँपालिकाका अध्यक्ष जालिम मियासमेत यसअघि नै नेकपा एमालेमा प्रवेश गरेका थिए । उनलाई एमाले अध्यक्ष ओलीले पार्टीमा स्वागत गरेका थिए ।
यस्तै, माओवादी केन्द्रबाट निर्वाचित मोरङको रंगेली नगरपालिकाका मेयर र उपमेयरसमेत गत बुधबार एमालेमा प्रवेश गरेका छन् । मेयर दिलिपकुमार अग्रवाल र उपमेयर केशवकुमारी खराललाई एमाले अध्यक्ष ओलीले रंगेलीमै आयोजित एक कार्यक्रमबीच एमालेमा भिœयाएका हुन् ।
यसैगरी, केही दिनअघि माओवादी केन्द्रका अध्यक्ष पुष्पकमल दाहालले सुर्खेतमा आयोजित प्रदेशस्तरीय प्रशिक्षणमा जिल्ला समन्वय समितिका नेपाली कांग्रेसका उपप्रमुख ज्ञानीप्रसाद शर्मालाई माओवादी केन्द्रमा प्रवेश गराएका थिए ।
जिल्लामा स्थानीय तहका प्रमुख उपप्रमुख मात्रै होइन वडा अध्यक्षदेखि वडा सदस्य र पदमै नरहेर पनि प्रभाव राख्न सक्ने नेताहरू दल अदलबदलमा लागेका छन् । नेकपा एमालेका नेता सुवासचन्द्र नेम्वाङले संविधानले नै व्यक्तिलाई स्वतन्त्रताको अधिकार दिएकाले व्यक्तिले मन परेको दल रोज्नु स्वाभाविक भएको बताए । यस्तो प्रक्रिया मूल्य र मान्यताका आधारमा हुने उनले जानकारी दिए ।
‘संविधानले नै व्यक्तिलाई स्वतन्त्रताको अधिकार दिएको छ, दलमा आउने जाने स्वार्थका आधारमा होइन, मूल्य र मान्यताका आधारमा हुन्छ,’ एमाले नेता नेम्वाङले भने । उनले एमालेले महाधिवेशन सकिएलगत्तैबाट महाधिवेशनको सन्देश जनताका बीचमा पु¥याउने कार्यक्रमसँगै देशभर पार्टी प्रवेश अभियान सुरु गर्दै आएको जानकारी दिए ।
कांग्रेस प्रवक्ता डा. प्रकाशशरण महतले कांग्रेसले सुरु गरेको निर्वाचन अभियानमार्फत अन्य पार्टीमा आबद्ध हजारौं नेताकार्यकर्ता कांग्रेसमा प्रवेश गर्ने तयारी रहेको बताए । ‘कांग्रेस गाउँगाउँ जाँदै छ, यो हाम्रो अभियान नै हो, यो अभियानमार्फत अन्य दलका नेताकार्यकर्ताहरू हजारौंको संख्यामा कांग्रेस प्रवेश गर्दै छन्,’ कांग्रेस प्रवक्ता महतले भने ।
कांग्रेसले स्थानीय तहको निर्वाचनलाई लक्षित गर्दै २९ फागुनदेखि २९ चैतसम्म १ महिना सञ्चालन गर्नेगरी आइतबारबाटै अभियान सुरु गरेको हो । यो अभियानमार्फत अन्य दलका नेताकार्यकर्तालाई आफ्नो दलमा तान्ने कांग्रेसको रणनीति छ । यसका लागि कांग्रेसले ७७ जिल्लामा नै केन्द्रीय कमान्डर खटाइसकेको छ ।
यसैगरी, नेकपा माओवादी केन्द्रलेसमेत स्थानीय तहमा नेताकार्यकर्ता र आफ्नातर्फबाट गत स्थानीय तह निर्वाचनमा निर्वाचित जनप्रतिनिधिलाई सक्रिय बनाइसकेको छ । यस्तै, नेकपा एकीकृत समाजवादीले पनि आफ्ना नेताकार्यकर्तालाई स्थानीय तह निर्वाचनमा केन्द्रित हुन निर्देशन गरिसकेको छ । राजधानी दैनिकबाट
मकवानपुर । नेपाली कांग्रेसले मकवानपुर सहित देशभर आगामी स्थानीय निर्वाचन लक्षित ‘घरघर जाऔं कांग्रेस जिताऔं’क़ अभियान आइतबारबाट सुरु गरेकाे छ । बागमती प्रदेशको राजधानी हेटाैडामा कांग्रेसले स्थानीय निर्वाचन जागरण घोषणा सभा आयोजना गर्दै अभियान सुरु गरिएको हाे । कांग्रेस केन्द्रीय सभापति तथा प्रधानमन्त्री शेर बहादुर देउवाले देशभर एकसाथ भर्चुअल मार्फत अभियानको सुरुवात गरेका हुन् ।
याेसँगै काँग्रेस मकवानपुरकाे समेत ‘घरघर जाऔँ, काँग्रेस जिताऔँ अभियान’ शुरु भएकाे छ । नेपाली काँग्रेस मकवानपुरका सभापति बुद्ध लामाको सभाध्यक्षता तथा कांग्रेस पूर्व केन्द्रीय सदस्य गुरुराज घिमिरेको प्रमुख आथित्यता, नेपाली काँग्रेस बागमती प्रदेशका सभापति तथा वागमती प्रदेशको संसदीय दलका नेता ईन्द बहादुर बानियाँको विशिष्ट आथित्यतामा कार्यक्रम भएको हो ।
कार्यक्रमको प्रमुख अतितथ पूर्व केन्द्रीय सदस्य घिमिरेले ‘नेपाली काँग्रेसका कार्यकर्ताहरु सवै स्थानीय तहका सबै वडामा पुगी कांग्रेसले गरेका कामको जानकारी लिन आग्रह गरे । ‘हरेक जनताको ढोका ढक्ढकाउनु पर्छ,सबैै कार्यकर्ताहरु चुनावको तयारीमा लाग्नु्स् ।’ घिमिरेले भने ‘जनताको माँझमा गई पार्टीको विषयमा र एमसीसीको विषयमा प्रष्ट पार्नुहाेस ।’ नेपाली काँग्रेसको जग बलियो बनाउँन अभियानले साथ दिने उनले बताए । ‘अभियान सफल बनाउन सकियो भने कांग्रेस विजयी हुने छ’ घिमिरेले भने ।
कार्यक्रममा कांग्रेस मकवानपुर पूर्व सभापति माइकल रामचन्द्र अर्याल, रघुरमण न्यौपाने, पूर्व उपसभापति विष्णुप्रसाद लामिछाने, जिल्लाका पदाधिकारी, संघीय तथा प्रदेश क्षेत्रका सभापति लगायत नेतृत्वहरुको उपस्थिति रहेको थियो ।
मकवानपुर /तीन महिनापछि आज आइतबार बसेको बागमतीको प्रदेशसभा बैठकमा २ वटा बिद्येक पारित भएका छन् ।
बैठकमा सामाजिक विकास मन्त्री कुमारी मोक्तानको तर्फबाट आर्थिक मामिला तथा योजना मन्त्री शालिकराम जम्कट्टेलले प्रतिवेदनसहित प्रस्तुत गरेको प्रदेश उच्च शिक्षा सम्बन्धमा व्यवस्था गर्न बनेको विद्येक पारीत गरिएको छ ।
यसैगरी पर्यटन तथा संस्कृति मन्त्री दिपेन्द्र श्रेष्ठको तर्फबाट उद्योग, बाणिज्य तथा आपूर्ति मन्त्री मिलनबाबु श्रेष्ठले प्रस्तुत गरेको प्रतिवेदन सहितको प्रदेश पर्यटन विकास सम्बन्धमा व्यवस्था गर्न बनेको विद्येक सर्वसम्मतिले पारित भएका छन् ।
आज कै बैठकमा आन्तरिक मामिला तथा कानून मन्त्री कृष्णप्रसाद शर्मा खनालले २ विद्येक पेश गरेका छन् ।
खनालले प्रदेश विपद व्यस्थापन ऐन २०७५ लाई संशोधन गर्न बनेको बिद्येक, प्रदेश संचारमाध्यम व्यवस्थान ऐन २०७५ लाई संशोधन गर्न बनेको विद्येक र प्रदेश अनुसन्धान व्यूरो सेवाको गठन, स्थापना, काम, कर्तव्य र अधिकार सम्बन्धमा व्यवस्था गर्न बनेको बिद्येक पेश गरेका हुन् ।
खनाले पेश गरेको केही प्रदेश ऐन संशोधन गर्न बनेको विद्येक दफावार छलफलका लागि संसदीय समितिमा पठाउने निर्णय भएको सभामुख सानुकुमार श्रेष्ठले बताए ।
मकवानपुर । मकवानपुरगढी गाउँपालिकाकाे सुकाैरामा पार्टीकाे वडा कार्यालय स्थापना भएकाे छ । नेकपा एमाले गढी गाउँपालिका वडा नं ७ सुकौराको पार्टी कार्यालय उद्घाटन गरिएको छ ।
नेकपा एमाले जिल्ला कमिटीका सचिव नवीन सिग्देलले शुक्रवार सुकौराको दमारमा पार्टी कार्यालय उद्घाटन गरेका हुन् । पार्टी कार्यालय उद्घाटन पछी बाेल्दै सिग्देलले नेकपा एमालेको विकल्प अरू कुनै पार्टी हुन नसक्ने बताए । उनले जनताको दुख र पीडामा सधै एमाले उभिएको बताए । पार्टीको सम्पूर्ण कार्यकर्ता र कमिटीले बैशाख ३० गते हुने निर्वाचनलाई केन्द्रविन्दु बनाउने भन्दै जनताको अध्याधिक मतले एमाले अनुमोदन हुने सचिव सिग्देलले दावी गरे ।
कार्यक्रममा नेकपा एमाले जिल्ला सचिवालय सदस्य मेम्बर लो, जिल्ला सदस्य कुमार केसी, पूर्व जिल्ला सदस्य वीरबहादुर रूम्बा, अनेकिमहासंघका जिल्ला अध्यक्ष विष्णु दंगाललगायतले मन्तव्य राखेका थिए । त्यस्तै गाउँपालिकाका सदस्यहरू एकाबहादुर गोले, नानीमैया थिङ्ग, सिंघबहादुर मुक्तान, पूर्णबहादुर रूम्बाको उपस्थिति रहेको वडा सचिव रामबहादुर स्यनङ्तानले बताए । कार्यक्रम वडा कमिटीका अध्यक्ष मानबहादुर घलानको अध्यक्षतामा भएको हो ।