मकवानपुर / आसन्न स्थानीय तहको निर्वाचन नजिकिँदै गर्दा नेकपा एमालेले चुनावी प्रचारप्रसारको काम तिब्र बनाएको छ । हेटौंडा–४ मा नेकपा एमालेको वडा कमिटीले ५ वैशाखदेखि नै चुनावको प्रचार प्रसार अभियान अन्तर्गत घरदैलो कार्यक्रम सुरु गर्ने भएको छ ।
हेटौंडा उपमहानगरपालिकाबाट अधिकांश वडाहरुबाट सिफारिस भएर आएका एमालेका उम्मेदवारहरुको नाम टुङ्गो लाग्न बाँकी रहँदा सर्वसम्मत उम्मेदवार टुङ्गो लगाएको हेटौंडा–४ मा भने चुनावी प्रचार गर्न थालिएको हो । नेकपा एमालेबाट हेटौंडा–४ का वडा अध्यक्षका उम्मेदवार तथा हालका समेत वडा अध्यक्ष नविन सिग्देलले आइतबार बिहान ७ बजे कर्रा चोकमा जम्मा भएर घरदैलो कार्यक्रम सुरु गर्ने जानकारी दिए ।
शनिबार हेटौंडा–४ मा भएको एमालेको वडा स्तरिय कार्यकर्ता भेला तथा निर्वाचन लक्षित प्रशिक्षण कार्यक्रममा एमाले मकवानपुरका अध्यक्ष एकालाल श्रेष्ठले वडा तहबाट सर्वसम्मत नाम सिफारिस भएका उम्मेदवारहरुको नाम परिवर्तन नहुँने भएकाले सर्वसम्मत हुनुभएकाहरुले चुनावी प्रचारको अभियानमा होमिन निर्देशन दिए ।
प्रशिक्षण कार्यक्रमका प्रमुख अतिथि नेकपा एमालेका केन्द्रिय सदस्य तथा मकवानपुर जिल्ला इन्चार्ज रामेश्वर रानाले हामीले हाम्रो समाजलाई इन्द्रेणी जस्तै बनाउने अभियानमा लाग्नुपर्ने बताए । वडा स्तरबाट नै इन्द्रेणीका रंगहरु झैं सबै नागरिक सुखी, खुसी, समृद्ध तथा आधारभूत आवश्यकताहरु पूरा हुनेगरी काम गर्न सक्षम नेतृत्वलाई जनताले रुचाउने उनको भनाई छ ।
उनले जेष्ठ नागरिकलाई सम्मान, साना बालबालिकालाई उचित स्नेह, रोजगारी, स्वास्थ्य, शिक्षा, खेलकुुदलगायतका क्षेत्रमा सबैको हित हुनेगरी काम गर्न एमालेको सरकार र एमालेका प्रतिनिधीहरुले मात्र सक्ने दाबी गरे ।
उनले आगामी निर्वाचनमा हेटौंडा नगरमा विजयी हुने जनप्रतिनिधीहरुले रोजगारीलाई प्राथमिकतामा राख्न अनुरोध गरे । जनप्रतिनिधीहरुले हेटौंडालाई रोजगारीको लागि उचित व्यवस्थापन गरी हेटौंडाबासी मात्र नभई अन्य स्थानका नागरिकहरुलाई पनि हेटौंडामा रोजगारी गरेर आफ्नो जिविकोपार्जन गर्न सक्ने स्थान प्रदान गर्नुपर्ने बताए ।
इन्चार्ज रानाले हेटौंडाका बासिन्दाले उपमहानगरपालिकाको कार्यालय प्रवेश गर्दा गर्व महसुस गर्न सक्ने र आफ्नो समस्या लिएर नगर प्रमुखको कार्यकक्षसम्म सहजै जानसक्ने बातावरण बन्नुपर्ने बताए ।
कार्यक्रममा एमाले हेटौंडा–४ वडा कमिटीले ३५१ सदस्यीय निर्वाचन परिचालन कमिटी घोषणा गरिएको छ । यस्तै कमिटीमा ४१ सदस्यीय सचिवालय निर्माण गरिएको पनि जनाइएको छ । यसैगरी नविन मिश्रको संयोजकत्वमा कार्यालय व्यवस्थापन तथा प्रचार प्रसार उपकमिटी, केशव बासुकलाको संयोजकत्वमा आर्थिक व्यवस्थापन उपकमिटी, शिवहरी दाहालको संयोजकत्वमा प्रतिबद्धता लेखन उपकमिटी, प्रकाश सुवेदीको संयोजकत्वमा स्वयम्सेवक परिचालन उपकमिटी तथा भवानी शर्माको संयोजकत्वमा निर्वाचन अनुगमन उपकमिटी निर्माण गरिएको छ ।
नेकपा एमाले हेटौंडा–४ वडा कमिटीका अध्यक्ष राजेन्द्र बास्ताकोटीको सभाध्यक्षतामा भएको कार्यक्रममा केन्द्रिय सदस्य तथा मकवानपुर सहइन्चार्ज जुनेली श्रेष्ठ, संविधान सभा सदस्य अनन्त पौडेललगायतकाको आतिथ्यता रहेको थियो ।
मकवानपुर । नेपाल राष्ट्रिय भूतपूर्व सैनिक तथा प्रहरी संगठन (नेपोन) को हेटौंडा अध्यक्षमा भक्त बहादुर केसी चयन भएका छन ।
शनिबार भएको नेपोनको प्रथम हेटौंडा नगर अधिवेशनबाट केसीको अध्यक्षतामा ३१सदस्यीय नगर कमिटी सर्बसम्मत चयन भएकोको हो ।
कमिटीको उपाध्यक्षमा नारायण पौडेल, सचिवमा तीर्थ कुमारी खड्का, कोषाध्यक्षमा दुर्गा महत तथा उपसचिवमा राजु चौलागाई रहनुभएको छ । हालका लागि पदाधिकारीहरुसहित २२ सदस्य चयन गरिएको छ भने बाँकी ९ जना सदस्यहरु सबै क्षेत्रबाट समेटिने गरी मनोनित गरिने अध्यक्ष भक्त बहादुर केसीले जानकारी दिए ।
नेपोन मकवानपुरका जिल्ला उपाध्यक्ष तथा हेटौंडा नगर इन्चार्ज रामकेदार बस्नेतको सभाध्यक्षतामा भएको नगर अधिवेशनमा नेकपा एमाले बागमती प्रदेश सदस्य रघुनाथ खुलालको प्रमुख आतिथ्यता रहेको थियो । कार्यक्रममा एमाले प्रदेश सदस्य सम्राट तुम्बाहाम्फे, नेपोनका केन्द्रिय सचिव सुधिर थापा, नेकपा एमाले मकवानपुरका सचिवालय सदस्य इश्वर ढुङ्गाना लगायतकाको आतिथ्यता रहेको थियो ।
मकवानपुर । राष्ट्रिय प्रजातन्त्र पार्टी (राप्रपा)को हेटौँडा उपमहानगरपालिका अध्यक्षमा अरुण लामा चयन भएका छन् । शनिबार भएको नगर भेलाले लामाको अध्यक्षतामा राप्रपा नगर समिति गठन भएको हो । समितिको उपाध्यक्षमा शुक्रराज प्रजा तथा सचिवमा रघुनाथ खराल चयन भएको राप्रपा मकवानपुरका प्रवक्ता विशभ अधिकारीले जानकारी दिए ।
राप्रपा केन्द्रीय नेता मधु अधिकारीको प्रमुख आतिथ्यतामा भएको भेलामा राप्रपा मकवानपुरका अध्यक्ष शिबराम थापा, नेताहरु रामहरी न्यौपाने, गुञ्जबहादुर न्यौपाने, धु्रब सञ्जेल लगाएतको आतिथ्यता रहेको थियो ।
स्थानीय तह निर्वाचन मिति नजिकिँदै जाँदा देशैभरि दुईपक्षीय प्रतिस्पर्धा गर्नेगरी दलहरू अगाडि बढेका छन् । सत्तापक्षीय र विपक्षी दुईवटा गठबन्धनमा मुलुक निर्वाचनमा अघि बढेको छ । केही दल भने यी दुवै गठबन्धनमा आबद्ध छैनन् । ती दल बहस र छलफलमै केन्द्रित छन् ।
सत्तारूढ गठबन्धनको नेतृत्व नेपाली कांग्रेसले गरेको छ । सत्तारूढ गठबन्धनमा माओवादी केन्द्र, एकीकृत समाजवादी, जसपा र राष्ट्रिय जनमोर्चा छन् । उता संसद्को सबैभन्दा ठूलो दल एमाले नेतृत्वको विपक्षी गठबन्धनमा हालसम्म राप्रपा नेपाल र परिवार दलले सहभागिता जनाएका छन् ।
कमल थापा नेतृत्वको राप्रपा नेपाल र पूर्वमन्त्री एकनाथ ढकाल नेतृत्वको परिवार दल एमालेको सूर्य चिह्न लिएर चुनावी मैदानमा उत्रने तयारी गरिरहेका छन् । संसद्को सबैभन्दा सानो राष्ट्रिय दल लोसपा भने कुन गठबन्धनमा लाग्दा फाइदा हुन्छ भनेर हिसाबकिताब गरिरहेको अवस्था छ ।
नेमकिपा, जनमत पार्टी, राप्रपा, नेकपा, माले, जप्रपा, तमलोपा कुनै पनि गठबन्धनमा आबद्ध भइसकेको छैन । कतै नखुलेका यी दल अन्तिम समयसम्म आफ्नो अस्तित्व जोगाउन भए पनि गठबन्धनमा सहभागी हुने अनुमान गरिन थालिएको छ ।
वीरगन्जस्थित ठाकुरराम बहुमुखी क्याम्पसका प्राध्यापक तथा राजनीतिक विश्लेषक कुर्वान हवारी आगामी स्थानीय तह निर्वाचनमा देशैभरि दुई पक्षीय प्रतिस्पर्धा हुने निश्चित भएको बताउँछन् । ‘एकातर्फ सत्तारूढ दलहरू गठबन्धन नै बनाएर चुनावी मोर्चामा होमिएको अवस्था छ भने अर्कोतर्फ प्रतिपक्षी दलहरूको गठबन्धन पनि बनेको छ ।
केही साना दल यी दुवै गठबन्धनमा नभए पनि आफ्नो अस्तित्व रक्षाका लागि कुनै न कुनै गठबन्धनमा अनिवार्य रूपमा सहभागी हुने नै छन्,’ हवारी भन्छन् । लोसपा स्रोतका अनुसार पार्टी अध्यक्ष महन्थ ठाकुर, वरिष्ठ नेता राजेन्द्र महतो दुवै गठबन्धनका शीर्ष नेताहरूसँग चुनावी तालमेल तथा सिट बाँडफाँटको छलफलमा छन् ।
एमाले अध्यक्ष केपी शर्मा ओली र कांग्रेस सभापति तथा प्रधानमन्त्री शेरबहादुर देउवासँग ठाकुर र महतो समानान्तर रूपमा छलफल गरिरहेका छन् । जुन गठबन्धनमा आफूलाई बढी फाइदा हुन्छ सोही गठबन्धनमा सहभागी हुने रणनीति लोसपाको छ ।
लोसपाको तराई मधेसमा राम्रो प्रभाव रहेको छ । यस्तै, मधेसको नयाँ तर शक्तिशाली भनिएको डा. सिके राउत नेतृत्वको जनमत पार्टी कुनै पनि गठबन्धनमा सहभागी भइसकेको छैन । जनमत पार्टीसहित हृदयेश त्रिपाठी नेतृत्वको जनता प्रगतिशील पार्टी नेपाल (जप्रपा), वृशेषचन्द्र लाल नेतृत्वको तराई मधेस लोकतान्त्रिक पार्टी (तमलोपा)लाई आफू नेतृत्वको गठबन्धनमा सहभागी गराउन एमाले अध्यक्ष ओली सक्रिय छन् ।
आन्तरिक रूपमा ओलीले अन्य साना कम्युनिस्ट पार्टीलाई समेत आफ्नो गठबन्धनमा सहभागी गराउन प्रयास जारी राखेका छन् । नारायणमान विजुक्छे नेतृत्वको नेपाल मजदुर किसान पार्टी, सिपी मैनाली नेतृत्वको नेपाल कम्युनिस्ट पार्टी (माले), नेत्रविक्रम चन्द विप्लव नेतृत्वको नेपाल कम्युनिस्ट पार्टीलगायतलाई आफू नेतृत्वको गठबन्धनमा सहभागी गराएर ओलीले सत्तारूढ गठबन्धनलाई चुनौती दिन खोजेका छन् ।
सत्तारूढ पाँच दलीय गठबन्धनमा रहेको कांग्रेसका वरिष्ठ नेता एवं स्थानीय तह निर्वाचन तयारी तथा अनुगमन समितिका संयोजक रामचन्द्र पौडेलले आगामी स्थानीय तह निर्वाचनमा आफूहरूको विजयी सुनिश्चित रहेको ठोकुवा गरेका छन् । जनतामा राम्रो प्रभाव भएका प्रमुख दलहरूको गठबन्धन भएकाले आफूहरू विजयी हुने निश्चित भएको दाबी पौडेलले गरेका छन् । तर, निर्वाचनमा चुनावी गठबन्धन गर्ने सैद्धान्तिक सहमति गरेको सत्तारूढ पाँच दलीय गठबन्धनलाई सिट बाँडफाँटमा सकस भएको छ । सिट बाँडफाँटको मापदण्ड’ पाँच दलीय गठबन्धनले अझै टुंगो लगाउन सकेको छैन ।
एउटै पालिकामा गठबन्धनमा आबद्ध सबै दलको दाबी रहिरहनु र एकले अर्कोलाई सहयोग नगर्ने उद्घोष जिल्लाजिल्लाबाट हुनुले मत विभाजन हुने र विपक्षी गठबन्धनलाई सहज हुन सक्ने आँकलनसमेत भइरहेको छ । पाँच दलीय गठबन्धनको साझा उम्मेदवारलाई पाँचै दलले स्वीकार गरेर मतदान गरे विपक्षी गठबन्धन उसको अगाडि टिक्न गाह्रो हुनेछ । तर, पाँचै दलबीच पालिकास्तरमा एउटै स्वर वा एकमत देखिँदैन । राजधानी दैनिकबाट
मकवानपुर/ आसन्न स्थानीय तहको निर्वाचनमा नेकपा एमालेसँग चुनावी गठबन्धन गरेको राप्रपा नेपालले मकवानपुरको हेटौंडा उपमहानगरपालिकाको उपमेयरसहित केही वडाको वडाध्यक्ष दाबी गरेको छ ।
एक साता अघि जिल्ला कमिटी गठन गरेको राप्रपा नेपालले प्रदेश एक मात्रै उपमहानगरपालिकाको उपमेयर सहित शक्तिशाली वडाको वडा अध्यक्षमा दाबी गरेपछि यो बिषयले चर्चा पाएको छ ।
दुबै पार्टीको केन्द्रिय कमिटीबीच गठबन्धनको सहमति भएको थियो । त्यसको भोलिपल्ट आज बिहीबार मकवानपुरका स्थानीय तहमा तालमेल गर्ने विषयमा दुई पार्टीबीच छलफल भएपछि यस्तो दाबि गरिएको हो ।
आज बिहीबार एमाले पार्टी कार्यालयमा भएको छलफलमा उपमहानगरपालिकासहित केही पालिकामा तालमेलको विषयमा छलफल भएको राप्रपा नेपाल मकवानपुरका अध्यक्ष गुरुप्रसाद सापकोटाले बताए ।
उपमहानगरको उपमेयरसहित एमालेले हारेका वडाहरुमा आफ्नो दाबी रहने उनले बताए । यद्यपि अहिले नै पदको विषयमा छलफल सुरु नभइसकेको सापकोटाको भनाइ छ । राप्रपा नेपालले हेटौंडा उपमहानगरपालिकाको उपमेयरसहित उपमहानगरको वडा नम्बर ६, १ र १२ सहितका वडा र जिल्लाकै अर्को एक गाउँपालिकामा राप्रपा नेपालले दावी गरेको छ । तालमेलका विषयमा शुक्रबार र शनिबार थप छलफल हुने सापकोटाले बताए ।
नेकपा एमाले मकवानपुरका अध्यक्ष एकालाल श्रेष्ठले राप्रपा नेपालसँग चुनावी तालमेलको कुरा भएको तर सहमति हुन बाँकी रहेको बताए । “अहिले सांगठनिक अवस्थाको बारेमा दुबै पार्टीले तयारी गर्ने र फेरि छलफलमा बस्ने सहमति भएको छ” अध्यक्ष श्रेष्ठले “अहिले पदको बारेमा कुनै टुङ्गो भएको छैन तैपनि सहकार्यको कुरामा माग दाबी रहिहाल्छ, यो स्वभाविक हो ।” छलफलमा एमालेका केन्द्रीय सदस्य तथा जिल्ला सह-इन्चार्ज कृष्णप्रसाद दाहाल, केन्द्रीय सदस्य जुनेली श्रेष्ठ, जिल्ला अध्यक्ष एकालाल श्रेष्ठ, उपाध्यक्ष लालबहादुर थापा सहभागी थिए ।
राप्रपा नेपालको तर्फबाट महामन्त्री राजाराम बर्तौला, केन्द्रीय सदस्य बालकृष्ण कार्की, दामोदर वाग्ले र जिल्ला अध्यक्ष सापकोटा सहभागी थिए । तत्कालिन राप्रपाले २०७४ को निर्वाचनमा हेटौंडा उपमहानगरमा मेयरमा ७ हजार र उपमेयरमा ७ हजार ४ सय मत पाएको थियो ।
स्थानीय तहको निर्वाचनमा नेकपा एमालेको सुर्य चुनाव चिन्हबाट निर्वाचन लड्ने सहमति गरेको राप्रपा नेपालका नेताहरुले आज नेकपा एमालेका नेताहरुसँग औपचारिक भेट गरेका छन् ।
नेकपा एमाले पार्टी कार्यालय हेटौँडामा भएको भेटमा यहि बैशाख ३० गते हुने स्थानीय तहको निर्वाचनमा हुने तालमेलको विषयमा छलफल भएको थियो । बैठकमा जिल्लामा गठबन्धनलाई बलियो र परिणाममुखी बनाउने विषयमा छलफल भएको थियो । गठबन्धनको निष्कर्षमा पुग्नका निमित्त तथ्यसंगत ढंगबाट छलफल थप अगाडी बढाउने दुवै पार्टीका प्रतिनिधिबीच सहमती भएको छ ।
बैठकमा एमाले मकवानपुरका सह–इञ्चार्ज एवम् प्रतिनिधिसभा सांसद कृष्णप्रसाद दाहाल, केन्द्रिय सदस्य एवम् प्रदेशसभा सांसद जुनेली श्रेष्ठ, अध्यक्ष एकालाल श्रेष्ठ, उपाध्यक्ष लालबहादुर थापा सहभागी थिए । यसैगरी राप्रपा नेपालका तर्फबाट महामन्त्री राजाराम बर्तौला, केन्द्रिय सदस्य बालकृष्ण कार्की, मकवानपुर अध्यक्ष गुरुप्रसाद सापकोटा, मकवानपुर १ (ख) का अध्यक्ष दामोदर वाग्ले लगायतको सहभागी रहेका थियो ।