मकवानपुर । नेकपा एमालेका केन्द्रीय सदस्य तथा मकवानपुर सहईन्चार्ज कृष्णप्रसाद दाहालले नेपाली जनताले सबैभन्दा बढि विश्वास गरेको पार्ट एमाले भएको बताएका छन ।
बकैया गाउँपालिका कमिटीको बैठकमा सम्बोधन गर्दै केन्द्रीय सदस्य दाहालले गठबन्धनको बीचबाट संघ र प्रदेशको निर्वाचनमा प्राप्त सिट र समानुपातिकमा पहिलो पार्टी हुनुले जनताको विश्वासको पार्टी एमाले भएको पुष्टि भएको बताए । सामाजिक, आर्थिक, साँस्कृतिक परिवर्तनको लागि अबको पार्टी कामको केन्द्रविन्दु बनाउन पर्ने उनको भनाई रहेको छ ।
बैठकमा पार्टी जिल्ला कमिटीका सचिव नवीन सिग्देलले गत निर्वाचनमा नेकपा एमालेको जनमत बलियो रहेकोले अबको आवश्यकता संगठन चुस्त र पद्वतीसंगत संगठन निर्माण र परिचालन गर्नुपर्ने बताए। उनले गाउँको विकास र जनताको समस्या समाधानको नेता एमाले बन्नुपर्ने बताए ।
गाउँपालिका कमिटीका अध्यक्ष गोपाल दाहालको अध्यक्षतामा बसेको बैठकमा प्रदेश कमिटीका सदस्य पद्मा पौडेल, जिल्ला सचिवालय सदस्य दलबहादुर वाईवा, जिल्ला लेखा समितिका अध्यक्ष शेखर थपलिया, जिल्ला सदस्यहरू बेलप्रसाद दाहाल, राजन दाहाल र निरमाया भोम्जन लगायतको उपस्थिति रहेको थियो ।
प्रतिनिधिसभा सभामुखमा नेकपा एमालेका देवराज घिमिरे निर्वाचित भएका छन् । नेपाली कांग्रेसकी उम्मेदवार ईश्वरी न्यौपानेलाई पराजित गर्दै उनी सभामुख बनेका हुन् । प्रतिनिधिसभामा बिहीबार घिमिरेलाई ‘सभामुख निर्वाचित गरियोस्’ भन्ने प्रस्तावको पक्षमा १ सय ६७ र विपक्षमा १०० मत परेको हो ।
सभामुख चयनका लागि भएको मतदानमाा प्रतिनिधिसभाका २ सय ७५ मध्ये २ सय ६८ सदस्य सहभागी भएका थिए । १ सांसद भने ‘तटस्थ’ बसे । घिमिरेको प्रस्तावकमा एमाले उपाध्यक्ष सुवास नेम्वाङ र समर्थकमा नेकपा माओवादी केन्द्र संसदीय दलका प्रमुख सचेतक हितराज पाण्डे, राष्ट्रिय प्रजातन्त्र पार्टी अध्यक्ष राजेन्द्र लिङ्देन एवं राष्ट्रिय स्वतन्त्र पार्टी अध्यक्ष रवि लामिछाने थिए ।
कांग्रेस उम्मेदवार न्यौपानको प्रस्तावकमा कांग्रेस महामन्त्री विश्वप्रकाश शर्मा र समर्थकमा नेकपा एकीकृत समाजवादी नेता प्रकाश ज्वाला थिए । घिमिरेलाई सभामुख बनाउन सत्तारूढ दल एमाले, माओवादी केन्द्र, राष्ट्रिय स्वतन्त्र पार्टी, राप्रपाको मुख्य साथ थियो भने जनता समाजवादी पार्टी, जनमत पार्टी, नागरिक उन्मुक्ति पार्टी र स्वतन्त्र सांसदहरू अमरेशकुमार सिंह, प्रभु साह र योगेन्द्र मण्डलले समेत घिमिरेकै पक्षमा मत दिए ।
घिमिरे गत ४ मंसिरमा सम्पन्न प्रतिनिधिसभा निर्वाचनमा झापा–२ बाट प्रत्यक्षतर्फ निर्वाचित र न्यौपाने कांग्रेसकी समानुपातिक सांसद हुन् । सभामुख चयन प्रक्रियामा घिमिरेको उम्मेदवारीमाथि मतदान हुँदा कांग्रेसले न्यौपानेको उम्मेदवारीमाथि छलफल नै भएन । कांग्रेस उम्मेदवार न्यौपानेलाई भने एकीकृत समाजवादी, लोकतान्त्रिक समाजवादी र राष्ट्रिय जनमोर्चाले समर्थन गरे ।
प्रतिनिधिसभामा कांग्रेसले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिएपछि ‘सभामुखमा कसले जित निकाल्छन् ?’ भन्नेमा अनेक अड्कल भएका थिए । प्रतिनिधिसभामा नेकपा एमालेका ७८, माओवादी केन्द्रका ३२, राष्ट्रिय स्वतन्त्र पार्टीका २०, राप्रपाका १४ र कांग्रेससँग ८८ सांसद छन् । प्रतिनिधिसभामा जसपाका १२, नेकपा एकीकृत समाजवादीका १० तथा लोसपाका ४ सांसद छन् ।
त्यस्तै, तीन स्वतन्त्र सांसदसमेत छन् । जनमत पार्टी र नागरिक उन्मुक्ति पार्टीका प्रतिनिधिसभामा १० सांसद छन् । प्रतिनिधिसभामा मजदुर किसान पार्टीका १ र जनमोर्चाका पनि १ र कांग्रेसका १ सांसद निलम्बनमा परेका छन् ।
संवैधानिक व्यवस्थाअनुसार प्रतिनिधिसभा सदस्यले आफूमध्येबाट एकजनलाई सभामुख चयन गर्नुपर्छ । यसअघिसम्म प्रतिनिधिसभा अध्यक्षता ज्येष्ठ सदस्य पशुपतिशमशेर जबराले गर्दै आएका थिए ।
प्रतिनिधिसभाले सभामुख चयन नगर्दासम्म ज्येष्ठ सदस्यले नै संसद् सञ्चालन गर्ने संवैधानिक व्यवस्था छ । संविधानको धारा ९१ मा प्रतिनिधिसभा पहिलो बैठक बसेको १५ दिनभित्र सभामुख र उपसभामुख निर्वाचन गर्नुपर्ने उल्लेख छ ।
हाल सत्ता गठबन्धनमा नेकपा एमाले र नेकपा माओवादी केन्द्रसहित सात दल सहभागी छन् भने कांग्रेसले समेत प्रधानमन्त्रीका रूपमा प्रचण्डलाई प्रतिनिधिसभामा विश्वासको मत दिएको थियो । तर, कांग्रेसले प्रचण्डलाई विश्वासको मत दिए पनि प्रतिपक्षमा रहने बताउँदै आएको छ ।
हालको सत्ता गठबन्धन बन्दा र प्रचण्ड प्रधानमन्त्री हुँदा प्रतिनिधिसभा पाँचवर्षे कार्यकालका लागि नेकपा एमाले र माओवादी केन्द्रबीच आधाआधा कार्यकाल सभामुख भागबन्डा गर्ने सहमति भएको बताइन्छ ।
को हुन् घिमिरे ?
प्रतिनिधिसभा सभामुखमा निर्वाचित देवराज घिमिरे ताप्लेजुङ सिरिजंघा गाउँपालिका–३ मा १३ जेठ २०१३ मा जन्मिएका हुन् । उनी हाल झापा अर्जुनधारा नगरपालिका–६ का स्थायीबासी छन् ।
स्नातकसम्म अध्ययन गरेका घिमिरेले बाल्यकालमा स्थानीय श्रीसिंहदेवी प्राथमिक विद्यालयबाट शिक्षा प्रारम्भ गरे । पछि, ताप्लेजुङको भानु पब्लिक हाइस्कुलबाट उनले २०२९ सालमा एसएलसी उत्तीर्ण गरे । घिमिरेले धरानको महेन्द्र बहुमुखी क्याम्पसबाट आईए र त्रिचन्द्र क्याम्पस काठमाडौंबाट स्नातक गरेका छन् ।
२०३१ सालमा ‘झापा विद्रोह’पछि नेपाल कम्युनिस्ट पार्टीको सम्पर्कमा रहेर २०३२ माघदेखि अखिल नेपाल कम्युनिस्ट क्रान्तिकारीको विद्यार्थी राजनीतिमा लागे ।
२०३३ सालपछि शिक्षासमेत थाँती राखेर पार्टी संगठन निर्माणमा खटिएका घिमिरेले भूमिगत अवस्थामै २०३५ भदौमा नेपाल कम्युनिस्ट पार्टीको सदस्यता प्राप्त गरे । २०३५ सालमा नेपाल कम्युनिस्ट पार्टीको सदस्यता प्राप्त गरेका उनले ४५ वर्षे लामो औपचारिक राजनीतिक जीवनमा विभिन्न जिम्मेवारीमा रहेर काम गरिसकेका छन् ।
११ पुस २०३५ मा कम्युनिस्ट घटक मिलेर बनेको नेकपाको तेह्रथुम र पाँचथर जिल्लाको संगठक, २०३९ सालमा इलाम जिल्ला पार्टी प्रमुख, २०४९ सालमा नेकपा माले र नेकपा एकीकृत एकीकरणपछि सम्पन्न नेकपा (एमाले)को पाँचौं राष्ट्रिय महाधिवेशनबाट केन्द्रीय सदस्य हुँदै २०५० सालमा नेकपा एमाले मेची अञ्चल इन्चार्ज भएर घिमिरेले काम गरिसकेका छन् ।
२०५८ सालमा एमाले केन्द्रीय विभागअन्तर्गत स्वास्थ्य विभाग इन्चार्ज हुँदै इन्जिनियरिङ विभाग, युवा संघ नेपाल, नेपाल राष्ट्रिय शिक्षक संगठन, प्रगतिशील प्राध्यापक संघ इन्चार्जको जिम्मेवारीसमेत पूरा गरिसकेका छन् ।
२०७५ सालमा तत्कालीन एमाले र माओवादी मिलेर बनेको नेकपा प्रदेश १ अध्यक्ष, २०७८ सालमा सम्पन्न नेकपा एमाले १०औं राष्ट्रिय महाधिवेशनबाट पार्टी स्थायी कमिटी सदस्य तथा प्रदेश नम्बर १ इन्चार्ज बनेका उनी भूमिगत राजनीतिमा रहँदा पञ्चायती शासकले गतिविधि नियन्त्रणका लागि पटकपटक पक्राउ पुर्जी जारी गरेको थियो ।
२०५६ सालमा राष्ट्रियसभा सदस्य बनेका घिमिरे २०७९ मंसिरमा भएको प्रतिनिधिसभा सदस्य निर्वाचनमा झापा–२ बाट निर्वाचित भएका थिए । राजधानी दैनिकबाट
मकवानपुर । प्रतिनिधि सभा सभामुख चयनका लागि आज बिहीबार निर्वाचन हुने भएको छ । संघीय संसद् भवनमा बिहान ११ बजेदेखि सभामुख चयनको लागि मतदान हुने संघीय संसद् सचिवालयले जनाएको छ ।
सभामुख पदमा सत्ता गठबन्धनको तर्फबाट नेकपा एमालेबाट सांसद देवराज घिमिरेले उम्मेदवारी दिएका छन् । झापा–२ बाट प्रतिनिधि सभा सदस्यमा निर्वाचित सांसद घिमिरेको प्रस्तावकमा एमाले नेता एवं पूर्व सभामुख सुवासचन्द्र नेम्वाङ, समर्थकमा माओवादीका प्रमुख सचेतक हितराज पाण्डे, राप्रपाका अध्यक्ष राजेन्द्र लिङ्देन र राष्ट्रिय स्वतन्त्र पार्टीका अध्यक्ष रवि लामिछाने रहेका छन् ।
यस्तै नेपाली कांग्रेसबाट सभामुखमा ईश्वरी न्यौपानेले उम्मेदवारी दिएकी छन् । समानुपातिक सांसद न्यौपानेको प्रस्तावकमा कांग्रेसका महामन्त्री विश्व प्रकाश शर्मा र समर्थकमा एकीकृत समाजवादीका नेता प्रकाश ज्वाला रहेका छन् ।
सभामुखमा निर्वाचित हुन कम्तीमा १ सय ३८ मत ल्याउनुपर्छ। राजनीतिक समीकरणमा रातारात कुनै नाटकीय हेरफेर नभएमा नेकपा एमालेका नेता घिमिरे प्रतिनिधिसभाको सभामुख बन्ने निश्चित भएको छ ।
सत्ता साझेदार दलहरुको मत नै घिमिरे सभामुख बन्न पर्याप्त छ । प्रतिनिधि सभामा प्रत्यक्ष र समानुपातिक गरि २ सय ७५ जना सांसद छन्। प्रतिनिधिसभामा एमाले ७९, माओवादी केन्द्र ३२, राष्ट्रिय स्वतन्त्र पार्टी (रास्वपा) २०, राष्ट्रिय प्रजातन्त्र पार्टीसँग १४ र जनमत पार्टीसँग ६ सांसद छन्। यो भनेको सभामुख निर्वाचित हुन बहुमत भन्दा बढी हो ।
यसमा जनता समाजवादी पार्टी (जसपा) को १२, नागरिक उन्मुक्ति पार्टीको ३ र स्वतन्त्र सांसदहरुको मत थपिन सक्ने बताईएको छ ।

मकवानपुर । गत मंसिरमा सम्पन्न चुनावी परिणाम पछी सरकार गठनकाे समयमा एकाएक बदलिएकाे सत्तागठबन्धनले नेपाली काँग्रेस प्रमुख प्रतिपक्षमा रहेकाे थियाे । संसदमा सबै भन्दा ठुलाे दल काँग्रेसले पुष्पकमल दाहाल प्रचण्ड प्रधानमन्त्रीमा नियुक्त हुँदा विपक्षमा मत दिएकाे हाे ।
तिनै प्रधानमन्त्रीले विश्वासकाे मत दिदा काँग्रेस समेतले विश्वासकाे मत दिए पछी संघीय संसद प्रमुख प्रतिपक्ष विहिन जस्तै भएकाे छ । केन्द्रीय संसदकाे झल्काे दिने गरी बागमती प्रदेशमा समेत काँग्रेसले मुख्यमन्त्री शालिकराम जम्कट्टेललाई विश्वासकाे मत दिदाँ संसद प्रमुख प्रतिपक्ष विहिन भएकाे छ । बागमती प्रदेश सभामा रहेका ७ दल मध्ये ६ दलले मुख्यमन्त्रीलाई विश्वासकाे मत दिएकाे हाे ।
तर ३ सदस्य रहेकाे नेपाल मजदुर किसान पार्टीले भने विश्वासकाे मतकाे विपक्षमा मतदान गरेकाेले संसदमा एक्लाे तर कमजाेर प्रतिपक्ष भएकाे छ । केन्द्रीय सरकारका प्रधानमन्त्रीलाई पनि विश्वासको मत दिएको थिएन। नेपाली कांग्रेसले समेत मुख्यमन्त्री जम्कट्टेललाई विश्वासको मत दिएपछि नेमकिपा एक्लो प्रतिपक्षी दल बनेको हो । नेमकिपा प्रदेशसभाको पहिलो कार्यकालमा पनि ५ वर्ष नै प्रतिपक्षमा बसेको थियो। नेमकिपाका २०७४ सालमा पहिलाे पटक गठन भएकाे प्रदेश सभमा २ जना प्रदेशसभा सदस्य रहेका थिए ।
११० जना सांसद रहेको प्रदेशसभामा मुख्यमन्त्री जमकट्टेलले ९५ प्रतिशत संसदकाे मतकाे विश्वास प्राप्त गरेका छन् । उनलाई नेपाली कांग्रेसका ३७, नेकपा एमालेका २७, नेकपा माओवादी केन्द्रका २१, राप्रपाका १३, नेकपा एकीकृत समाजवादीका ७ र हाम्रो नेपाली पार्टीका २ जना सांसद गरी १०५ जनाले विश्वासको मत दिएका हुन्।
मकवानपुर । बागमती प्रदेशसभाकाे आज बस्ने छैटौ बैठकमा बागमती प्रदेशको मुख्यमन्त्री शालिकराम जम्कट्टेलले विश्वासको मत लिने भएका छन् । प्रदेश सभामा रहेका ११० सांसद मध्ये ७० जना सांसदको समर्थनमा जम्कट्टेल मुख्यमन्त्री चयन भएका हुन् ।
बागमती प्रदेशमा कुनै पनि दलले स्पष्ट बहुमत प्राप्त नगरेकाेले संविधानको धारा १८६ को उपधारा २ बमोजिम दुई वा दुई भन्दा बढी दलकाे समर्थनमा मुख्यमन्त्रीमा नियुक्त भएको जम्कट्टेलले नियुक्ति भएकाे एक महिनाभित्र सदनमा विश्वासको मत लिनुपर्ने व्यवस्था छ। गत पुस २५ गते बागमती प्रदेशको चौथो मुख्यमन्त्रीमा नियुक्त भएका जम्कट्टेलले पुष २६ गते पद तथा गाेपनियताकाे सपथ लिएका थिए ।
नेकपा एमाले नेकपा माओवादी केन्द्र राप्रपा नेकपा समाजवादी र हाम्राे नेपाली पार्टीसहित ५ दलको समर्थमा मुख्यमन्त्री बनेका उनलाई विश्वासको मत आउँदा ६९ मत आउने अपेक्षा गरिएकाे छ । राप्रपाका समानुपातिक सांसद भुवन कुमार पाठक सभामुख चयन भएकाले उनले मतदान प्रक्रियामा भाग लिन र मत दिन नपाउने व्यवस्था छ ।
मुख्यमन्त्री जम्कट्टेलले प्रदेशसभामा प्रतिनिधित्व गर्ने सबै दलहरुलाई विश्वासको मत दिन आग्रह समेत गरेका छन् । एकाएक भत्किएकाे चुनावी गठबन्धन पछी बनेकाे नयाँ सत्ता समिकरणमा पहिलाे दल काँग्रेस बाहिर रहेकाे अवस्था छ । तर संघिय सरकारका प्रधानमन्त्री पुष्पकमल दाहाल प्रचण्डलाई नेपाली काँग्रेसले समेत विश्वासकाे मत दिएकाेले बागमती प्रदेश सभामा समेत काँग्रेसले विश्वासकाे मत दिन सक्ने बताइएकाे छ ।
तर प्रदेशसभाको सबै भन्दा ठुलो दल नेपाली कांग्रेसले सत्तारुढ दलहरुसंग सभामुख पद माग गरेकाे थियो । तर, केन्द्रीय सत्ता समिकरणमा राप्रपाको भागमा परेको सभामुख नपाएपछी कांग्रेसले विश्वासको मत नदिने अठोट गरेको काँग्रेसका एक नेता बताउँछन् । तर, मुख्यमन्त्री जम्कट्टेललाई विश्वासकाे मत दिने नदिने विषयमा कांग्रेस संसदीय दलको बैठक आज बिहान संसदीय दलको कार्यालयमा बस्ने काँग्रेस सांसद बताउँछन् ।
आज दिउँसो साढे १२ बजे बस्ने प्रदेशसभा बैठकमा जम्कट्टेलले विश्वासकाे मत दिन लागेका हुन । उनी नेकपा एमालेको २७, माओवादी केन्द्रको २१, राप्रपाको १३, नेकपा एकीकृत समाजवादीको ७ र हाम्रो नेपाली पार्टीको २ सांसद गरि ७० जनाको समर्थनमा मुख्यमन्त्री चयन भएका हुन ।