मकवानपुर । नेकपा एमाले मकवानपुर क्षेत्र नम्बर-१ का उम्मेदवार रामेश्वर रानाले बकैया गाउँपालिकामा मतदाता भेटघाट तथा घरदैलो अभियान सञ्चालन गरेका छन्। रानासँगकाे घरदैलोमा स्थानीयहरुले पुराना योगदान स्मरण गरे ।
२०५४ सालमा तत्कालीन जिल्ला विकास समितिको सभापति रहँदा रानाले बकैया–६ गवरस्थानमा जनजागृति आधारभूत विद्यालय स्थापना स्वीकृत गराएको योगदान आज पनि उदाहरणीय रूपमा स्मरण गरिन्छ।
विद्यालयका तत्कालीन अध्यक्ष टंक गोलेले जिल्लाको समग्र विकासमा निरन्तर योगदान पुर्याएका इमानदार, कर्मठ र विकासप्रेमी नेता रानालाई २८ वर्षपछि पुनः मतदान गर्न पाउँदा गर्व लागेको बताए। “विकासका काम देखिने गरी गर्ने नेता र पार्टी भनेकै एमाले हो,” गोलेले भने। घरदैलो अभियानका क्रममा रानाले शिक्षा, स्वास्थ्य, सडक, खानेपानी, कृषि र रोजगारीका विषयमा आफ्ना स्पष्ट योजना सार्वजनिक गरेका छन्।
घरदैलोका क्रममा स्थानीय मतदाताहरूले उत्साहपूर्वक एमाले र सूर्य चिन्हमा मतदान गरी रानालाई विजयी बनाउने प्रतिबद्धता व्यक्त गरे । मंगलबार र बुधबार रानाले बकैयाको सबै वडाहरुमा पुगी मतदातासङ्ग प्रत्यक्ष भेट गरि आफ्नो प्रतिबद्दता सहित मत मागेका हुन् ।
घरदैलो अभियानकै क्रममा बाराको निजगढ हुँदै बकैया–६ गवरस्थान पुगेका उम्मेदवार रानालाई स्थानीयवासीहरूले भव्य स्वागत गरेका थिए । स्थानीयको सहभागितासहित गरिएको स्वागत कार्यक्रमले बकैयामा एमालेप्रतिको जनसमर्थन झनै बलियो बन्दै स्थानीय नेताहरुले बताए ।
स्थानीय विकासमा रानाको ऐतिहासिक योगदानलाई स्मरण गर्दै मतदाताहरूले रानाप्रति दृढ विश्वास व्यक्त गरेका छन्।
एमाले नेतृत्वको सरकारले देशभर ठूला पूर्वाधार, सडक सञ्जाल विस्तार, शिक्षा र स्वास्थ्य संस्थाको विकास, तथा राष्ट्रिय स्वाभिमान र सार्वभौमिकताको रक्षा गर्दै आएको उल्लेख गर्दै उनले बकैयालाई पनि समृद्धिको केन्द्र बनाउने प्रतिबद्धता जनाए।
उनले पछिल्लो समय मुलुकले भोगेको विध्वंस, अस्थिरता र विकास अवरोधपछि अब दृढ नेतृत्वसहित राष्ट्र निर्माणको नयाँ चरण आवश्यक रहेको बताए। “अब नारा होइन, परिणाम चाहिएको छ। एमालेले मात्र स्थायित्व, विकास र राष्ट्रिय हितको रक्षा गर्न सक्छ,” रानाले भने। स्थानीय जनउत्साह, विगतका ठोस उपलब्धि, एमालेको विकासवादी नीति र राष्ट्रियताप्रतिको स्पष्ट अडानका कारण बकैयामा एमालेको जित सुनिश्चित देखिएको स्थानीयवासीहरूको विश्वास छ।
मकवानपुर । आसन्न प्रतिनिधि सभा सदस्य निर्वाचन २०८२ को लागि जिल्ला विपद् व्यवस्थापन समिति मकवानपुरले स्वास्थ्यकर्मीलाई बिदामा नबस्न र जिल्ला नछोड्न आवश्यक व्यवस्था मिलाउन अनुरोध गरेको छ ।
बुधबार बसेको समितिको बैठकले स्वास्थ्य क्षेत्रसँग सम्बन्धित महत्वपूर्ण तयारीका निर्णयहरू सार्वजनिक गर्दै यस्तो अनुरोध गरेको हो । आगामी फागुन २१ गते हुने प्रतिनिधि सभा सदस्य निर्वाचन नजिकिदै गर्दा निर्वाचन लक्षित
स्वास्थ्य कार्यको लागि तयारी गरिएको हो ।
मकवानपुरका प्रमुख जिल्ला अधिकारी बसन्त अधिकारीको अध्यक्षतामा बसेको समितिको बैठकले निर्वाचन अवधिमा सम्भावित विपद् तथा आकष्मिक अवस्थालाई मध्यनजर गर्दै जिल्लाभर स्वास्थ्य सेवा प्रणालीलाई तयारी अवस्थामा राख्ने निर्णय गरेको हो।
बैठकले निर्वाचनको समयमा जिल्लाका सबै स्थानीय तहमा तत्काल परिचालन गर्न सकिने
गरी साधन स्रोतसहितको आपतकालीन स्वास्थ्य टोली तयारी अवस्थामा राख्न जनस्वास्थ्य कार्यालय मकवानपुरमार्फत सबै स्थानीय तहलाई अनुरोध गर्ने निर्णय गरेको प्रजिअ अधिकारीले बताए । साथै जिल्लाभित्र रहेका सम्पूर्ण स्वास्थ्य संस्थाहरूलाई आवश्यक जनशक्ति तथा उपकरण तयारी अवस्थामा राख्न समेत निर्देशन दिइने भएको छ।
निर्वाचन अवधिलाई ध्यानमा राख्दै हेटौंडा अस्पताललाई पनि आवश्यक साधन स्रोतसहित तयारी अवस्थामा रहन र त्यसको विवरण जिल्ला प्रशासन कार्यालयमा माग गर्ने निर्णय गरिएको छ।
यस्तै, जिल्लाभित्र सञ्चालनमा रहेका दमकल तथा एम्बुलेन्सहरूलाई जुनसुकै समयमा प्रयोग गर्न सकिने गरी पूर्ण रूपमा चालु अवस्थामा राख्न सम्बन्धित निकायहरूलाई लेखी पठाइने भएको छ।
निर्वाचनको संवेदनशीलतालाई ध्यानमा राख्दै सो अवधिमा जिल्लाका सम्पूर्ण स्वास्थ्य जनशक्तिलाई बिदामा नबस्न र जिल्ला नछोड्न आवश्यक व्यवस्था मिलाउन जनस्वास्थ्य कार्यालय मकवानपुरमार्फत सबै स्थानीय तह तथा स्वास्थ्य संस्थाहरूलाई निर्देशन पठाउने निर्णय गरेको छ।
त्यसैगरी, विपद् व्यवस्थापन समिति अन्तर्गतका सबै निकाय तथा पदाधिकारीहरूले निर्वाचन लक्षित सम्भावित विपद्जन्य घटनाको पूर्वतयारी, उद्धार तथा व्यवस्थापनका लागि आवश्यक प्रबन्ध मिलाउने पनि निर्णय भएको छ।
निर्वाचनलाई सुरक्षित र व्यवस्थित बनाउन स्वास्थ्य क्षेत्रको तयारी अत्यन्त आवश्यक रहेकोले यस्तो तयारी गरिएको अधिकारीले बताए । “निर्वाचनको समयमा कुनै पनि आकष्मिक अवस्था सिर्जना भएमा तत्काल प्रतिक्रिया दिन सक्ने गरी स्वास्थ्य तथा उद्धार संयन्त्रलाई तयारी अवस्थामा राख्ने निर्णय गरिएको हो” प्रजिअ अधिकारीले भने ।
मकवानपुर । राष्ट्रिय स्वतन्त्र पार्टी (रास्वपा) मकवानपुरका सभापति भरत पराजुली कांग्रेस प्रवेश गरेका छन् ।
रास्वपा हेटौंडामा आज विशेष भेला राखेको छ । भेलाको पूर्वसन्ध्यामा उनी कांग्रेस प्रवेश गरेका हुन् । त्यसअघि जिल्ला सभापति पराजुलीले सर्लाही पुगेर कांग्रेस केन्द्रिय सभापति गगन थापासँग भेट गरेका थिए ।
पराजुलीले आफू कांग्रेसमा फर्किएको बताएका छन् । सामाजिक संजाल फेसबुकमा स्टाटस पोष्ट गर्दै उक्त कुरा पुष्टि गरेका हुन् ।
भरत पराजुलीले फेसबुकमा लेखेका छन्
सबैमा नमस्कार।
म विगत करिब ३० वर्षदेखि नेपाली कांग्रेसको राजनीतिमा सक्रिय रूपमा समर्पित रहँदै आएको थिएँ। त्यसपछि २०७९ साल साउनदेखि राष्ट्रिय स्वतन्त्र पार्टीमा आबद्ध भई संगठन निर्माण र विस्तारमा निरन्तर लागिपरेँ।
जहाँ रहे पनि म सधैं भुईँमान्छेको सेवकका रूपमा जनताको सेवामा समर्पित रहन प्रयासरत थिएँ। २०७९ सालको प्रतिनिधि सभा निर्वाचनमा मकवानपुर क्षेत्र नं. २ जस्तो बिकट क्षेत्रबाट १२ हजारभन्दा बढी मत प्राप्त गर्नु मेरो लागि जनविश्वासको प्रमाण थियो।
तर समयक्रममा पार्टीभित्र देखिएका प्रवृत्तिहरूले मलाई गम्भीर रूपमा सोच्न बाध्य बनायो। हामीले जुन उद्देश्य, मूल्य र आदर्शका साथ पार्टीलाई बुझेका थियौं, व्यवहारमा त्यसको ठीक विपरीत अवस्था विकसित हुँदै गएको महसुस भयो। सीमित व्यक्तिहरूको प्रभाव, चाकरीवाद, आलोचनालाई अस्वीकार गर्ने संस्कार तथा आन्तरिक लोकतन्त्र कमजोर हुँदै गएको अवस्थाले निराश बनायो। मैले सधैं इमानदारी, निष्ठा र जनसेवाको भावनाका साथ राजनीति गरेँ। कुनै व्यक्तिको चाकरी गर्ने, व्यक्तिगत स्वार्थका लागि सम्झौता गर्ने वा आर्थिक प्रभावका आधारमा अघि बढ्ने प्रवृत्तिसँग म सहमत हुन सकिनँ।
यस निर्णयलाई कसैले अन्यथा अर्थ लगाउन सक्लान्, तर मेरो लागि मूल कुरा पार्टी स्थापना गर्दा अघि सारिएको उद्देश्य र व्यवहारबीचको अन्तर हो। जब आदर्शभन्दा फरक बाटो समातिएको महसुस भयो, तब आत्मसम्मान र मूल्यको आधारमा अलग हुने निर्णय गरेको छु।
रास्वपामा मलाई माया, साथ र विश्वास गर्ने सम्पूर्ण साथीहरूमा हार्दिक कृतज्ञता व्यक्त गर्दछु। म पार्टीमा नरहँदा केही सीमित व्यक्तिहरूलाई सुखानुभूति हुन सक्ला, तर भविष्यमा कसैले पनि मेरो जस्तो नियति भोग्न नपरोस् भन्ने कामना गर्दछु।
रास्वपा पार्टीको जिल्ला सभापति पदमा रहँदा विभिन्न कोणबाट प्रत्यक्ष तथा अप्रत्यक्ष रूपमा सहयोग गर्नुहुने सम्पूर्ण साथीहरू, शुभेच्छुकहरू तथा कार्यकर्ताहरूमा हार्दिक आभार प्रकट गर्दछु। तपाईंहरूको साथ, समर्थन र विश्वास नै मेरो राजनीतिक यात्राको बलियो आधार रहनेछ।
हाल नेतृत्व तहको मूल्यांकन गर्ने शैली र व्यवहारका आधारमा भविष्यमा पनि आफू तथा आफ्ना हितैषीहरूको उचित कदर नहुने सम्भावना देखिएको छ। साथै, यही प्रवृत्ति कायम रहे जनताको हित, कार्यकर्ताको उचित मूल्यांकन तथा संरक्षण हुन नसक्ने अवस्था देखिएकाले स्थापना कालदेखि आबद्ध रहेको पार्टीबाट आजकै मितिदेखि अलग रहने निर्णय गरेको सम्वन्धित सबैमा जानकारी गराउँदछु।
आगामी दिनहरूमा पनि म सदाझैं जनताको सेवामा समर्पित रहने प्रतिबद्धता व्यक्त गर्दछु। धन्यवाद।
मकवानपुरगढी । फागुनको पारिलो घामसँगै मकवानपुर क्षेत्र नं. १ को चुनावी माहोल तात्तिएको छ । आगामी फागुन २१ गते हुने प्रतिनिधिसभा निर्वाचनको मिति नजिकिएसँगै उम्मेदवारहरूको दौडधुप मात्र बढेको छैन, गाउँबस्तीमा आश र भरोसाको सञ्चार भएको छ ।
यसै क्रममा नेकपा एमालेका उम्मेदवार रामेश्वर राना जब आइतबार मकवानपुरगढीको उकालो लागे । त्यहाँ केवल भोट माग्ने औपचारिकता मात्र देखिएन । उम्मेदवार र मतदाताबीचको आत्मीय सम्बन्धका रोचक दृश्यहरू पनि देखिए ।
बिहान मकवानपुरगढी–४, सामरी कुनाबाट रानाले हात जोड्दै भने, ‘नमस्कार, म रामेश्वर राना…।’
उनको परिचय पूरा नहुँदै एक पुरुषले भने, ‘हजुरलाई नचिन्ने को छ र ? हजुर कर्मठ, इमान्दार र निष्ठावान हुनुहुन्छ । यसपालि भोट हजुरलाई नै हो, ढुक्क हुनुस् ।’
किसानको यो भनाइमा पसलबाट सामानको झोला लिएर निस्किँदै गरेका अर्का अधबैँसे पुरुषले पनि सही थपे । बिहानको यो न्यानो संवाद र मनकामना मन्दिरको दर्शनपछि सुरु भएको रानाको यात्रा ठेकीचोक हुँदै रुद्रबाटिकातर्फ लम्कियो ।
रानाको घरदैलो अभियानमा तीन फरक पुस्ताको संगम देखियो । वडा नं. ३ को भानुचोक र मक्रान्चुली हुँदै देविडाँडा पुग्दा २१ वर्षीय नवयुवा सुमन घिमिरे भेटिए । उनले उम्मेदवारलाई ढाडस दिँदै भने, ‘यसपालि मेरो र मेरो परिवारको भोट अनुभवी नेतालाई नै हो ।’ यति मात्र होइन, उनी आफैं पनि अभियानमा सामेल भए ।
टोली जब वडा नं. २ को भालुन्टार, शिखरकटेरी र कुर्ले हुँदै अघि बढ्यो । त्यही क्रममा सयौँ मतदाताबीच ७६ वर्षीय सान्तानाथ न्यौपाने भेटिए । शिखरकटेरी निवासी न्यौपानेले ज्येष्ठ नागरिकको भावना पोखे, ‘वृद्धभत्ता दिलाएर एमाले वृद्धवृद्धाको भरोसा बनेको छ, अब तपाईं सबै जनताको भरोसा बन्नेगरी काम गर्नुस् । आशिवाद, जितको शुभकामना ।’
घरदैलोको उत्कर्ष भने वडा नं. २ को ताप्लाखर्कमा देखियो । त्यहाँ पुग्दा सिंगो गाउँ नै रानाको स्वागतमा उठेको देखिन्थ्यो । स्थानीयले फूलमाला र घडा राखेर भव्य स्वागत गरे ।
स्वागत ग्रहणपछि कोणसभालाई सम्बोधन गर्दै रानाले अहिलेको राजनीतिमा चल्ने गरेको ‘नयाँ र पुरानो’ भन्ने बहसलाई निकै मार्मिक ढंगले चिरे । उनले प्रश्न गरे, ‘बुवाआमाको उमेर बढ्दैमा उहाँहरू कहिल्यै पुरानो हुनुहुन्छ र ? कपडाजस्तो नयाँ–पुरानो भनेर चेतन्शील प्राणीसँग तुलना गर्नु कत्तिको न्यायोचित हुन्छ ?’
उनले थपे, ‘अब हामीले सही मूल्यांकन गर्ने बेला आएको छ । नविनतम् सोच र विचारलाई व्यवहारिक बनाउन सके मात्रै समृद्ध समाज निर्माण हुन्छ, म त्यसैमा प्रतिबद्ध छु ।’
रानाको व्यक्तित्व र लामो राजनीतिक योगदानको प्रभाव पनि अभियानमा देखियो । सभाको अन्त्यमा लामो समय अर्को पार्टीमा सक्रिय रहेका शंकर थिङ नेपाली कम्युनिष्ट पार्टी परित्याग गरी एमालेमा प्रवेश गरे । थिङले भने, ‘लामो समय राजनीतिमा लागेर सामाजिक रुपान्तरणमा लाग्नु भएको छ, अब तपाईं जत्तिको मान्छे नै अवसर पाउनुपर्छ ।’
ताप्लाखर्कको न्यानो स्वागतपछि टोली जितपुरभञ्ज्याङ पुग्यो । त्यहाँ पनि मतदातासँग प्रत्यक्ष संवाद गर्दै रानाले ‘सूर्य’ मा मतदान गर्न आग्रह गरे । बिहान सामरी कुनाबाट सुरु भएको यात्रा जितपुरभञ्ज्याङ पुग्दा साँझ पर्न लागेको थियो, तर उम्मेदवार र मतदाता दुबैमा उत्साहको कमी देखिएन ।
एमाले प्रचारप्रसार समितिका अनुसार रामेश्वरको सोमबारको घरदैलो कार्यक्रम हेटौंडा उपमहानगरपालिका वडा नं.१७ र १८ लागि तय भएको छ ।
मकवानपुर । नेकपा एमाले मकवानपुर क्षेत्र नम्बर–१ का उम्मेदवार रामेश्वर रानाले आगामी फागुन २१ गते हुने निर्वाचनलाई लक्षित घरदैलो अभियान सञ्चालन गरेका छन्।
हेटौंडा उपमहानगरपालिका–५ र ७ नम्बर वडामा सनिवार घरदैलो गरिएको छ । आइतबार मकवानपुरगढीमा घरदैलो कार्यक्रम रहेको छ ।
घरदैलोका क्रममा उम्मेदवार रानाले स्थानीय मतदातासँग भेटघाट गर्दै समृद्ध मकवानपुर निर्माणका लागि आफ्नो स्पष्ट दृष्टिकोण र कार्ययोजना प्रस्तुत गरेका थिए।
विकास, रोजगारी, सुशासन र जनताको जीवनस्तर उकास्ने विषयलाई केन्द्रमा राख्दै उनले विगतको अनुभव र क्षमताका आधारमा आफू सक्षम प्रतिनिधि हुने दाबी गरे। रानाले मकवानपुरको समग्र विकासका लागि आफूले सशक्त भूमिका खेल्ने विश्वास दिलाउँदै मतदातासँग सहयोग र समर्थनको आग्रह गरेका छन् ।
स्थानीय बासिन्दाहरूले रानाको सरल, जनमुखी र विकासप्रेमी नेतृत्वप्रति भरोसा व्यक्त गर्दै सकारात्मक प्रतिक्रिया दिएका छन्। घरदैलो कार्यक्रममा देखिएको जनउत्साहले मकवानपुर–१ मा एमालेको चुनावी माहोल थप सुदृढ बन्दै गएको संकेत गरेको छ।
नेकपा एमालेका स्थानीय नेता–कार्यकर्ता, शुभेच्छुक र समर्थकहरूको उल्लेख्य उपस्थितिसहित सम्पन्न घरदैलो अभियानले पार्टीप्रतिको जनविश्वास अझ बढ्दै गएको नेताहरूले बताएका छन्।
फागुन २१ गते हुने निर्वाचन नजिकिँदै जाँदा उम्मेदवार रानाले जनताको घरदैलोमै पुगेर मतदाताको मन जित्ने अभियानलाई तीव्र बनाउदै लगेका छन् ।