मकवानपुर। आगामी ४ जेठ आइतबार हेटौंडामा बागमती प्रदेश स्पोर्टस अवार्ड हुने भएको छ । बागमती प्रदेश सरकार युवा तथा खेलकुद मन्त्रालयको आयोजनामा अर्वाड कार्यक्रम गरिने बिहीबार पत्रकार भेटघाटमार्फत जानकारी गराइएको हो ।
पत्रकार भेटघाटमा प्रदेशका पुर्व तथा वर्तमान खेलाडी, प्रशिक्षक र पत्रकारलाई सम्मान गर्ने उदेश्यका साथ प्रदेश स्पोर्टस अवार्ड गर्न लागिएकाे युवा तथा खेलकुद मन्त्री मीनकृष्ण महर्जन जानकारी दिए । राष्ट्रिय/अन्तर्राष्ट्रिय स्तरमा सफलता प्राप्त गरेका पूर्व र वर्तमान खेलाडी जसले प्रदेश र सिङ्गो राष्ट्रको गरिमा बढाउन महत्वपूर्ण योगदान पुयाएका छन्, त्यस्ता खेलाडीलाई प्रोत्साहन स्वरुप पुरस्कार प्रदान गरिने उनले बताए ।
खेल क्षेत्रमा प्रवेश गरेका युवा नयाँ खेलाडीलाई खेलकुदमा आवद्ध हुन हौसला र प्रेरणास्वरुप अर्वाड प्रदान गरिने उनले जानकारी दिए । बागमती प्रदेश स्पोर्टस अवार्डमा वर्षका उत्कृष्ट खेलाडी, महिला, पुरुष, युवा, प्रशिक्षक, लाइभ टाइम एचिभमेन्ट, बागमती खेलकुदको शान, लोकप्रिय खेलाडी, र उत्कृष्ट पत्रकारसमेत गरी ८ विधामा १२ जनालाई अर्वाड प्रदान गरिन लागिएको बताइएकाे छ ।
मन्त्रालयले खेलाडी र पत्रकारलाई नगद पुरस्कार सहित सम्मान गर्ने जनाएकाे छ । उत्कृष्ट खेलाडी महिला पुरुष, लाइभ टाइम एचिभमेन्ट, बागमती खेलकुदको शान र प्रशिक्षकलाई जनही १ लाखको पुरस्कार प्रदान गरिनेछ भने बाँकीलाई जनही ५० हजार रुपैँया सहित अवार्ड दिइने आयोजकले जनाएको छ । प्रदेशको युवा तथा खेलकुद मन्त्रालयले पहिलोपटक आयोजना गर्न लागेको अवार्ड कार्यक्रममा साँस्कृतिक प्रस्तुतिहरु समेत रहने छ ।
कार्यक्रम सहजीकरणका लागि दीपक श्रेष्ठको संयोजकत्वमा ३ सदस्यीय प्राविधिक उप-समिति गठन गरिएको छ । उपसमिति सदस्यहरूमा तेक्वान्दोका पूर्व अन्तर्राष्ट्रिय खेलाडी तथा प्रशिक्षक प्रेमबहादुर भण्डारी र खेलकुद पत्रकार प्रकाश तिमल्सिना रहेका छन् । अर्वाडका लागि खेलाडी छनौट गर्दा यसअघि पुर्याएको योगदान, खेल क्षेत्रमा परेको प्रभाव र नयाँ पुस्तालाई प्रेरणा लगायतका कुरालाई ध्यानमा राखेर गरिनेछ । साथै खेलकुदको प्रचारप्रसारमा सक्रिय भूमिका खेलेर योगदान पुर्याएका एक जना पत्रकारलाई सम्मान गरिने बताइएको छ ।
आइतवार हेटौंडा-४ स्थित हुप्राचौरमा प्रदेश मुख्यमन्त्री बहादुर सिंह लामाको प्रमुख आतिथ्यतामा अवार्ड कार्यक्रम हुनेछ । साथै मन्त्रालयले युथ समिट भने केहि सातापछि आयोजना गर्ने पत्रकार भेटघाटमा जानकारी दिइएकाे छ ।
मकवानपुर । मकवानपुरकाे हेटौंडामा भएकाे प्रदेश युवा सम्मेलन १० बुँदे घोषणापत्र जारी गर्दै समापन भएकाे छ । ‘सिर्जनशीलता र उद्यमशीलता प्रवर्धनः बागमतीमा युवा सशक्तीकरण’ भन्ने नाराका साथ सुरु युवा सम्मेलनले प्रदेशको समृद्धि र सुशासनका लागि युवालाई निर्णायक शक्ति बनाउने संकल्प सहितको १० बुद्धे घोषणापत्र जारी गरेको छ ।
२८ बैशाखबाट सुरु सम्मेलनकाे अन्तिम दिन मंगलबार परिषद्का कार्यकारी उपाध्यक्ष सन्तोष चौंलागाईद्वारा जारी घोषणापत्रमा भनिएकाे छ ‘प्रदेशको नीति निर्माण, नवप्रवर्तन र उद्यमशिलतामा युवाको अर्थपूर्ण सहभागिता हुनुपर्छ ।’ घोषणापत्रमा तीन तहका सरकारहरूबीच समन्वय गरी युवा परियोजना बैंक स्थापनाको माग गरिएको छ । यस बैंक मार्फत युवाको नयाँ सोच र परियोजनालाई बिनाधितो कर्जा, बीउपुँजी र प्राविधिक सहयोगमार्फत कार्यान्वयनमा ल्याउने प्रस्ताव गरिएको छ ।
त्यस्तै, नीति निर्माणदेखि बजेट, कानुन मस्यौदासम्म युवाको अनिवार्य सहभागिता सुनिश्चित गर्नुपर्ने माग गरिएको कार्यकारी उपाध्यक्ष चौंलागाईले बताए । स्थानीय तहमा स्थानीय युवा परिषद् गठन गरी युवामैत्री नीति र बजेट निर्माण गर्न आवश्यक रहेको घोषणापत्रमा जनाइएको छ । घोषणापत्रले युवा सीप वर्षलाई निरन्तरता दिँदै त्यसलाई उद्यम, बजारीकरण र लगानीसँग एकीकृत रूपमा जोड्नुपर्ने धारणा राखेको छ ।
कृषि नवप्रवर्तन कोष स्थापना गरी युवालाई कृषि क्षेत्रमा आकर्षित गर्ने, स्मार्ट फार्मिङ र एग्रो–स्टार्टअपलाई प्रवद्र्धन गर्ने, कृषिमा डिजिटल प्रविधिको प्रयोग अनिवार्य गरिनुपर्ने र कृषि उद्यम गर्न चाहने गरेका विद्यार्थी प्रमाणपत्रको अधारमा कर्जा प्रवाह गरिनुपर्ने घोषणापत्रमा उल्लेख गरिएको छ ।
प्रदेश सरकारका सबै सेवा प्रणालीहरूलाई चरणबद्ध रूपमा डिजिटल प्रणालीमा रूपान्तरण गर्दै युवा–मैत्री डिजिटल सरकारको अभ्यास सुरु गर्नुपर्ने घोषणापत्रमा उल्लेख गरिएको छ । त्यस्तै, पछिल्लो समय युवाबीच बढ्दो मानसिक तनावलाई सम्बोधन गर्न प्रदेशभर मानसिक स्वास्थ्य परामर्श केन्द्र, विद्यालय तथा कलेजहरूमा साइको–सोसल सपोर्ट सिस्टम र २४ सै घण्टा उपलब्ध हुने हेल्पलाइन सेवा स्थापना गर्न प्रदेश सरकारलाई आग्रह समेत गरिएको छ ।
साहित्य, संगीत, डिजिटल कला, लोक शिल्प र चलचित्र निर्माण जस्ता विधामा संलग्न युवालाई प्रदेशस्तरीय प्रर्वद्धन गर्ने कार्यक्रम ल्याउन प्रदेश सरकार समक्ष माग गरिएको छ ।
हेर्नुहाेस घोषणापत्रः
मकवानपुर । बागमती प्रदेशसभाको वर्षे अधिवेशन ५ जेठका लागि आह्वान गरिएकाे छ । प्रदेश प्रमुख दीपक प्रसाद देवकोटाले ५ जेठका लागि प्रदेश सभाकाे बजेट अधिवेशन समेत भनिने वर्षे अधिवेशन आह्वान गरेका हुन् ।
प्रदेश सरकारको सिफारिसमा उनले ५ जेठ बिहान ११ बजेका लागि बैठक आह्वान गरेकाे प्रदेश प्रमुखकाे कार्यालयका प्रवक्ता देवेन्द्र सापकाेटाले जानकारी दिए । प्रदेश मन्त्रिपरिषद्को सिफारिसमा प्रदेश प्रमुख देवकोटाले नेपालको संविधानको धारा १८३ को उपधारा (१) बमोजिम प्रदेश सभाको सोह्रौं अधिवेशन आह्वान गरेका हुन् ।
प्रदेश सरकारको बैशाख २३ गते बसेको मन्त्रिपरिषद् बैठकले प्रदेशसभाको बजेट अधिवेशन आह्वान गर्न प्रदेश प्रमुख समक्ष सिफारिस गर्ने निर्णय गरेको थियो । बागमती प्रदेश सभाले एक सूचना प्रकाशित गरी बैठक आव्हान भएकाे मितिमा प्रदेश सभाका सबै सदस्यहरुलाई उपस्थितिका लागि अनुराेध समेत गरेकाे छ ।
यसअघि प्रदेशसभाको हिउँदे अधिवेशन गत २० चैतमा अन्त्य गरिएको थियो । प्रदेशसभाको बैठक गत २६ माघदेखि बस्न सकेको छैन् । गत १९ र र २० गतेकालागि बाेलाइएकाे बैठक समेत सत्तापक्ष र प्रतिपक्षकाे विवादकाे कारण संचालन हुन सकेन् ।
मकवानपुर । बागमती प्रदेशका मुख्यमन्त्री बहादुर सिंह लामाले नीति निर्माण र नेतृत्व तहमा युवाको उपस्थितिले देशको विकासले गति लिने बताएका छन् । आइतबारबाट हेटौंडामा सुरु भएको प्रदेश युवा सम्मेलनको उद्घाटन गर्दै मुख्यमन्त्री लामाले यस्तो बताएका हुन् ।
युवाहरूका मुद्दा समेट्न नसक्ने नेतृत्वले विकास र समृद्धिको दिशा निर्देश गर्न नसक्ने उनले बताए । ‘शासकीय संरचनामा युवाहरू उपस्थित अनिवार्य गर्नुपर्छ’ उनले भने । देश निर्माण तथा सङ्घीय संरचना संस्थागत गर्न युवाहरूको भूमिका महत्त्वपूर्ण रहेको उनले बताए । ‘देश विकासको नीति निर्माण र नेतृत्व तहमा युवाहरूको उपस्थिति कति छ ? भन्ने प्रश्न मुख्य सवाल हो ।
‘नीति निर्माण तहमा युवाको सहभागिता र संलग्नता गौण छ । नेतृत्व तहमा युवाहरू पुग्न कठिन भइरहेको देखिन्छ’ उनले भने । प्रदेशको समग्र विकासमा युवा शक्तिको सहभागिता, संलग्नता, सहकार्य र साझेदारी अपरिहार्य रहेको उनले बताए । प्रदेश सरकारले आगामी वर्षको बजेट र कार्यक्रमले युवाहरूको सहभागिता, सशक्तिकरण र साझेदारीलाई प्राथमिकतामा राख्ने उनले बताए ।
युवालाई रोजगारी र उत्पादनसँग आबद्ध गर्नु र युवा पलायन रोक्नु गम्भीर चुनौती बनेको उनले बताए । कृषि क्षेत्रमा युवा शक्तिलाई आकर्षित गर्न सिप विकास तालिम, बिउ पुँजी, प्रविधि हस्तान्तरण र व्याज अनुदान दिने कार्यक्रमहरू सञ्चालन भइरहेको उनले बताए ।राम्रो शिक्षाको नाममा युवा विद्यार्थीहरू बिदेसिने ट्रेन्ड अझ डरलाग्दो देखिएको उनको भनाई छ ।
‘पढाइकै नाममा बिदेशिनु भनेकाे उच्च शिक्षा लगत्तै रोजगारीको ग्यारेन्टीकाे लागि हाे’ उनले भने ‘उक्त विषयलाई प्रदेश सरकारले गम्भीरता पूर्वक लिएको छ ।’ प्रदेशका युवाहरू सूचना प्रविधि (आइटी) क्षेत्रमा सक्रिय रहेको र सूचना प्रविधिलाई युवाको रोजगारी र उद्यमशीलतासँग गाँस्ने रणनीति अवलम्बन गरेको उनले बताए । उनका अनुसार युवा मैत्री नीति नियम र कार्यक्रमका विषयमा सरकार तत्पर रहेको छ । युवाहरूको आवश्यकता र मागका विषयमा सरकार बजेट निर्माणमा अघि बढ्ने उनले प्रतिबद्धता व्यक्त गरे ।
कार्यक्रममा प्रदेशका प्रथम मुख्यमन्त्री डोरमणि पाैडेलले युवाको परिभाषा उमेरले नभई सक्रियता र गतिशीलताका आधारमा निर्धारण हुने बताए । युवाहरूमा रचनात्मक र सकारात्मक सोच हुन जरुरी रहेको उनले बताए । मुलुक परिवर्तनमा युवाहरूमा सोच र सकारात्मकताका साथ स्रोत साधनको प्रयोग गर्न सामर्थ्य हुनुपर्ने बताए । नेपाललाई कङ्गाल बनाउने गरी बिचौलियाहरू सक्रिय भएको उनको भनाई छ ।
प्रदेशका युवा तथा खेलकुद मन्त्री मीनकृष्ण महर्जनले युवा लक्षित कार्यक्रम ल्याउनु पर्ने बताए । युवाहरूका विषयहरूलाई सिप र खेलकुदमा जोडेर अघि बढाउनुपर्ने उनले बताए । ‘पछिल्लो पटक विभिन्न दुर्व्यसनका कारण युवाहरूको अवस्था कमजोर बनिरहेको छ’ उनले भने ‘युवाहरूको समस्या निराकरणका लागि खेलकुद क्षेत्रका गतिविधिमा संलग्न गराउन योजनाबद्ध कार्यक्रम ल्याउनु जरुरी छ ।’
बागमती प्रदेश युवा परिषद्को आयोजनामा आइतबारबाट हेटौंडामा ३ दिने युवा सम्मेलन सुरू भएको हाे । सम्मेलनमा शिक्षा, सीप तथा नीतिगत संवाद हुनेछ । सम्मेलनमा डिजिटल सुशासन र प्रविधिमा युवा, शिक्षा, सिप, सृजना, दिगो विकासमा जलवायु परिवर्तन, युवामा सीपमूलक तालिमको आवश्यकता, प्राथमिकता, नीति नेतृत्व र युवा संलग्नता, मुख्यमन्त्रीसँग युवा विषयक छलफल गरिने प्रदेश युवा परिषद्का कार्यकारी उपाध्यक्ष सन्तोष चौलागाईंले बताए ।
सम्मेलनमा देशका सातै प्रदेशका युवाको समेत सहभागिता रहेको छ । युवा सम्मेलन सुरू हुनु अगाडि हेटौँडाको बुद्धचोकबाट खैजेडी भजन, झाँकी सहितको र्याली निकालिएको थियो ।
मकवानपुर । मकवानपुरकाे हेटौंडामा २८ बैशाख (आज) बाट प्रदेश युवा सम्मेलन हुँदैछ । ३० बैशाखसम्म हुने प्रदेश युवा सम्मेलनमा नीति निर्माण, सिप तथा उद्यम र प्रविधिमा युवाहरूको भूमिका र अवस्थाका विषयमा छलफल गरिने छ ।
प्रदेश युवा परिषद्ले आयोजना गर्ने तस्राे सम्मेलनमा बागमती प्रदेशसहित अन्य प्रदेशका ३०० बढी युवाको प्रत्यक्ष सहभागिता रहने परिषद्का उपाध्यक्ष सन्तोष चौलागाईले बताए । बागमती प्रदेश सहित अन्य प्रदेशबाट युवाहरूको सहभागिता रहने गरी कार्यक्रम तयारी गरिएको उनले बताए ।
सम्मेलनमा प्रदेशका ५० स्थानीय तहबाट युवा उद्यमीहरूको सहभागिता रहने छ भने सम्मेलनमा सहभागिताका लागि प्रदेश युवा परिषद् गठन भएका सुदूरपश्चिम र लुम्बिनी प्रदेशबाट ५/५ जना र परिषद् गठन नभएका प्रदेशबाट सामाजिक विकास मन्त्रालयको सिफारिसमा १०/१० जना युवाहरूलाई सहभागी गराइने भएकाे छ । यी बाहेक अनलाइन मार्फत १५० जना सहभागी छनौट गरिएको चौलागाईंले जानकारी दिए ।
सम्मेलनले प्रदेश स्तरमा युवाको नीति संवाद, सीप विकास, रोजगारी र उद्यमशीलता प्रवर्द्धन गर्न महत्त्वपूर्ण प्लेटफर्म प्रदान गर्ने उनले बताए । परिषद्ले २०७८ मा गरेको सर्वेक्षणमा युवाले नीति संवादको प्लेटफर्मको आवश्यकता महसुस गरेकाेले त्यसैकाे आधारमा युवा सम्मेलनको अवधारणा ल्याइएको चौलागाईं बताउँछन् ।
‘तेस्रो शृङ्खलासम्म आइपुग्दा प्रदेश युवा सम्मेलनमा ७ प्रदेशका युवाहरू सहभागी बन्ने वातावरण निर्माण भएको छ । प्रत्यक्ष रूपमा ३०० बढी युवाहरू समेटिए पनि राष्ट्रिय टेलिभिजन, सामाजिक सञ्जाल र परिषद्को वेबसाइट मार्फत डिजिटल माध्यमबाट युवालाई सम्मेलनमा सहभागी गराउने योजना बनाइएको छ’ उनले भने ।
सम्मेलनमा कृषिमा नवप्रवर्तन र युवा संलग्नता सम्भावना र चुनौती, डिजिटल सुशासन र प्रविधिमा युवा, शिक्षा सीप र सिर्जना, दिगो विकासमा जलवायु परिवर्तन र युवा, युवामा सीपमूलक तालिमको आवश्यकता र प्रभावकारिता, नीति नेतृत्व र युवा संलग्नता तथा मुख्यमन्त्रीसँग युवा लगायतका विषयमा विज्ञहरूसँग प्यानल छलफल र कार्यशाला गोष्ठी हुने उनको भनाई छ । सम्मेलनमा सहभागीहरूलाई नेपालकै पहिलो सुरुङ मार्ग रहेको चुरियामाई मन्दिरको अवलोकन भ्रमण र हाइकिङ साथै युवामा सकारात्मक सोच विकासका लागि प्रतिभा र कला प्रदर्शनी गरिने उनले बताए ।
बागमती सरकारले वार्षिक नीति तथा कार्यक्रममा युवा सम्मेलन समेटी बजेट विनियोजन गर्दै आएको छ। परिषद्का अनुसार अघिल्ला दुई आर्थिक वर्षमा १० हजार ५ सयभन्दा बढी युवाले विभिन्न सीप तालिम प्राप्त गरेका छन् भने चार सय ५ जना युवाले आफ्नै उद्यम सुरु गरिसकेका छन्। युवाको नीति संवाद र उद्यमशीलता प्रवर्द्धनमा केन्द्रित सम्मेलन प्रदेशको युवा विकासकाे यात्रामा एक महत्वपूर्ण पाइला हुने उनले बताए ।
सम्मेलनमा व्यावसायिक सीप, अनलाइन उद्यमशीलता, सहकारी व्यवस्थापन, कृषि उद्यम लगायत विषयमा प्रशिक्षण र कार्यशाला सत्र राखिएको समेत उनले बताए । सम्मेलनको उद्घाटन कार्यक्रम पूर्व विभिन्न भेसभुसा, सांस्कृतिक झाँकी, नेपाल प्रहरीको ब्यान्ड बाजा सहित रयाली गरिनेछ भने सम्मेलन पश्चात् घोषणापत्र समेत जारी गरिने छ ।