मकवानपुर / बागमती प्रदेश प्रहरी कार्यालयले सवारी दुर्घटना न्युनीकरणको अभियान अन्तर्गत सवारी साधानको झल्लरहरु हटाउने अभियान थालेको छ । प्रदेश प्रहरीले सवारी साधनमा सजावटको लागि अगाडितर्फ सिसाको छेउमा जडान गरिएका विभिन्न झल्लरहरुका कारण चालकले अगाडिको दृश्य राम्ररी नदेख्ने हुँदा दुर्घटनाको सम्भावना हुने भन्दै यस्ता अनावश्यक झल्लरहरु हटाउन थालेको बताइएको हाे ।
बागमती प्रदेश प्रहरी कार्यालयले सवारी साधनमा राखिएका झल्लरहरु हटाउने अभियान गत असार २ गतेबाट शुरु गरेको थियो । अभियान शुरु भएदेखि हालसम्म १ हजार ८ सय ५० वटा झल्लर हटाईएको प्रदेश प्रहरी कार्यालयले जनाएकाे छ । प्रहरीका अनुसार १ हजार ५ सय २ वटा सवारी साधनमा राखीएका उक्त झल्लर हटाईएको हो । ट्रक, टिपर, बस लगायतका सवारी साधनमा राखिएको झल्लर हटाईएको प्रहरीले जनाएको छ । बागमती प्रदेश प्रहरी कार्यालयमा प्रहरी नायब महानिरीक्षक बसन्त कुमार लामा आउनुभएपछि सवारी दुर्घटना न्युनीकरणको लागि बार्षिक कार्ययोजना तयार गरी विभिन्न कार्यक्रम र अभियान सञ्चालन गरीरहेको कार्यालयले जनाएको छ ।
यसैगरी संक्रमणबाट सुरक्षित बनाउने फेस सिल्ड लगाएर डियुटी गर्न सुरु गरेको छ । बागमती प्रदेश प्रहरी कार्यालयका प्रत्यक्ष मातहतमा रहेका प्रहरी कर्मचारीहरु सबैले संक्रमण जोखिमलाई कम गर्न भाद्र १ गते देखी फेस सिल्ड लगाएर डियुटी गर्ने व्यवस्था मिलाईएको हो । बागमती प्रदेश प्रहरी कार्यालय हेटौंडाले कार्यरत सबै प्रहरी कर्मचारीहरुलाई फेस सिल्ड वितरण गरीसकेको छ ।
सबै प्रहरी कर्मचारीहरुमा एकरुपता ल्याउन फेस सिल्डमा प्रहरीको लोगो र “बागमती प्रदेश प्रहरी” लेखीएको छ । फिल्डमा नियमित डियुडीमा खटिने हरेक प्रहरी कर्मचारीले फेस सिल्ड लगाएर डियुटी गर्ने बागमती प्रदेश प्रहरी कार्यालयका प्रवक्ता प्रहरी वरिष्ठ उपरीक्षक गिरीले बताउनु भयो ।
डियुटीका प्रहरी कर्मचारी धेरै जनासँग सम्पर्कमा आउनु पर्ने भएकाले प्रहरी कर्मचारीहरुलाई संक्रमण हुनबाट जोगाउन र प्रहरी कर्मचारीहरुबाट अन्य ब्यक्तिमा संक्रमण नफैलियोस भन्ने उद्देश्यले बागमती प्रदेश अन्तर्गत कार्यरत सबै प्रहरी कर्मचारीहरुलाई फेस सिल्ड उपलब्ध गराईएको उहाँले बताउनु भयो । विभिन्न प्रहरी ईकाइमा कार्यरत प्रहरी कर्मचारीहरुमा समेत कोरोना संक्रमण देखिएकाले संक्रमणलाई थप फैलन नदिन बागमती प्रदेश प्रहरी कार्यालयका प्रहरी नायब महानिरीक्षक बसन्त कुमार लामाले हरेक प्रहरी कर्मचारीलाई फेस सिल्ड उपलब्ध गराई डियुटीमा बस्दा मास्क, फेस सिल्ड लगाई डियुटी गर्न निर्देशन समेत दिनुभएको बताउनु भयो ।
प्रहरी कार्यालयमा हुन सक्ने संक्रमण जोखिम न्युनिकरण गर्न पक्राउ परेका ब्यक्तिहरुका साथै संक्रमण जोखिममा कार्यरत प्रहरी कर्मचारीहरुलाई अनिवार्य पीसिआर टेष्ट गर्ने व्यवस्था मिलाईएको छ । सबै प्रहरी कार्यालयमा स्वास्थ्य सुरक्षा सामग्री उपलब्ध गराउने, हरेक प्रहरी कार्यालयमा क्वारेन्टाइन बनाउने, अत्यावश्यक कामले कार्यालय बाहिर जाने प्रहरी कर्मचारीहरुलाई क्वारेन्टाइनमा बस्ने लगाएतका सुरक्षा सावधानी अपनाईएको उहाँले बताउनु भयो ।
यसैबिच आर्थिक प्रलोभनमा परी आफ्नो जिम्मेवारी इमान्दारीताका साथ निर्वाह नगर्ने २ जना प्रहरी कर्मचारीहरुलाई निलम्बन गरेको छ । बागमती प्रदेश प्रहरी कार्यालय हेटौंँडाका अनुसार जिल्ला प्रहरी कार्यालय सिन्धुलीले उनीहरुलाई निलम्बन गरेको हो । बा ६ ख ५५६३ नम्बरको सवारी चालकसँग रकम लिएको भन्ने उजुरीको आधारमा दुईजना प्रहरीलाई प्रारम्भिक सोधपुछ गर्दा रकम लिएको भन्ने पृष्टी भएपछि थप छानविनको लागि निलम्बन गरीएको हो । निलम्बन पर्नेमा ईलाका प्रहरी कार्यालय भिमान सिन्धुलीमा कार्यरत प्रहरी हबल्दार कमल बहादुर खड्का र प्रहरी चौकी ढुंग्रेबास सिन्धुलीमा कार्यरत प्रहरी जवान वीर बहादुर प्रसाद यादव रहेका छन् ।
जिल्ला प्रहरी कार्यालय सिन्धुलीले थप छानबिन गर्न प्रहरी नायव उपरीक्षकको संयोजकत्वमा समिती गठन गरेको छ । राम्रो काम गर्ने कर्मचारीलाई प्रोत्साहन र नराम्रो काम गर्नेलाई सजया स्वरुप यस्ता कार्य गरेको प्रदेश प्रहरी कार्यालय हेटौंडाले जनाएको छ । बागमती प्रदेश प्रहरी कार्यालय अन्तर्गतका कार्यालयहरुमा कार्यरत प्रहरी कर्मचारीहरुबाट नागरिक केन्द्रीत, स्तरीय, प्रभावकारी र पारदर्शी सेवा प्रवाह गराउने उद्देश्यले प्रदेश प्रहरी प्रमुख प्रहरी नायव महानिरीक्षक बसन्त कुमार लामाबाट बिषेश कार्ययोजना बनाई मातहत प्रहरी कर्मचारीहरुबाट सम्पादन भैरहेको कार्यलाई अनुगमन र मुल्यांकन गर्न सिनियर प्रहरी अधिकृतको कमाण्डमा टाक्स फोर्स गठन गरिएको प्रदेश कार्यालयले जनाएको छ ।
सेवाग्राहीसँग आर्थिक प्रलोभनमा पर्ने एक जना प्रहरी निरीक्षक सहित हालसम्म १३ जना प्रहरी कर्मचारी निलम्बित भैसकेका छन् । यसैगरी डियुटीमा ईमान्दारीता प्रदर्शन गर्ने २५ जना प्रहरी कर्मचारी पुरस्कृत भैसकेको बागमती प्रदेश प्रहरी कार्यालयका प्रवक्ता प्रहरी वरिष्ठ उपरीक्षक गिरीले बताउनु भयो ।
मकवानपुर । समयमा उचित व्यवस्थापन नहुँदा हेटौंडा उपमहानगर–६ मा रहेको गौरिटार आइसोलेसनमा रहेका कोरोना संक्रमितहरु भोक भोकै बस्नु परेको छ ।
खाना दिन्छौ दिन्छौ भन्दै दिउँसो २ बजेसम्म खाजा र खानेकुरा नदिएको कोरोना संक्रमितहरुले गुनासो गरेका छन् । भोकले छटपटाएको बिरामीले भमिट गर्दा सम्म स्वास्थ्यकर्मीले वास्ता नगरेको आइसोलेशनमा बस्नेहरुले गुनासो गरेका छन् । कर्राको आइसोलेशनबाट बिरामी थपिएपछि स्वास्थ्यकर्मीहरुले झनै बिरामीको ख्याल गर्न नसकेको पाइएको छ ।
रंगशालाको ब्वाईज होस्टेलको रुपमा रहेको स्थानलाई कोरोना संक्रमण भएकाहरुलाई राख्न आइतबार पहिलो चोटि आइसोलेनको रुपमा सञ्चालन गरिएको हो, तर व्यवस्थापनमा कमजोरी हुँदा कोरोनासँग लडिरहेका संक्रमितहरुलाई दिनभर भोकै राखिएको छ । आइसोलेसनमा न्युनतम आधारभूत भौतिक तयारी समेत नगरी संक्रमितहरु राख्न थालेको संक्रमितको गुनासो छ ।
बाहिरी रुपमा आकर्षक भौतिक संरचना भएपनि आन्तरीक व्यवस्थापन नभएको उहाँहरुले बताउनु भयो । “बिहान देखि पानी खाएर बसिरहेका छौं, सोधपुछ गर्दा एकछिनमा आउँछ भनेर टार्ने गरिन्छ” एक जना संक्रमितले भन्नुभयो “२ बजेपछी दुईवटा जेरि र एउटा फुलौरा दिए ।” मदन भण्डारी स्वास्थ्य विज्ञान प्रतिष्ठान (हेटौंडा अस्पताल) अन्तर्गत रहेको आईसोलेसनले गम्भीर लापरबाही गरिरहेको छ ।
आइसोलेसनका व्यवस्थापन हेरिरहेका हेटौंडा अस्पताल विकास समितिका अध्यक्ष प्रकाश पौडेलले भान्छे नपाएर केहि समस्या भएको बताउनु भयो । उहाँले सकेसम्म काम गरिरहेको दाबी गर्दै नयाँ आइसोलेसनका लागि भान्छा र जनशक्ति नभएको तर चाँडै व्यवस्थापन गर्ने बताउनु भयो ।
३५ वटा वेड भएको हेटौंडाको श्रमिक माविमा बेडको अभाव भएपछि आइतबारबाट राष्ट्रिय खेलकुद प्रष्ठिान रङ्गशालामा रहेको हेस्टलमा आइसोलेशन तय गरिएको थियो ।
कोरोना संक्रमित लगातार थपिँदै गएपछि हेटौंडा उपमहानगरपालिका ६ गौरिटारमा रहेको केन्द्रीय खेलकुद प्रतिष्ठान (गौरिटार रंगशाला) क्षेत्रमा रहेको ब्वाइज होस्टललाई कोरोना आइसोलेसन वार्ड बनाइएको हो । व्यवस्थित आइसोलेसन बेडको अभाबका कारण कोरोना संक्रमण पुष्टि भएका बिरामिलाई होम आइसोलसनबाट निकाल्न हेटौंडामा व्यवस्थित आइसोलेसन वार्ड निर्माण गरिएको हो । यहाँ १ सय २० बेड क्षमताको आइसोलेसन वार्ड तयार भएसँगै कर्रामा रहेका र होम आइसोलेसनमा रहेका संक्रमितलाई गौरीटार लगिएको छ ।
३ तल्ले भवनमा सञ्चालनमा ल्याएको आइसोलेसनको तल्लो तल्लामा अस्पतालका कर्मचारी र उपचारको क्रममा खटिएका चिकित्सक सहितको टोली रहने व्यवस्था सहित वार्ड सञ्चालनमा ल्याएको कोबिड अस्पताल गौरीटारका इन्चार्ज डाक्टर सागर काफ्लेले बताउनु भयो । उहाँका अनुसार अहिले व्यवस्थित ढंगबाट काम गरीरहेका छौं, संक्रमितलाई सुबिधा पु¥याउने उद्देश्य सहित व्यवस्थापन मिलाइएको छ । अहिले कर्रामा बेड नभएर होम आइसोलेसनमा रहेका पेन्डिङ बसेका बिरामी र नयाँ थपिएका बिरामीलाई उपचारका लागि ल्याएको उहाँले जानकारी दिनुभयो ।
बेड अभाबका कारण होम आइसोलेसनमा रहेका बिरामीलाई उनीहरुको इच्छा अनुसार ल्याउने तयारी थालिएको छ । आउन चाहनेलाई ल्याउछौं अन्यथा घरमै न्युनतम मापदण्ड पुरा गरेर घरमै रहन चाहनेलाई चिकित्सकको सम्पर्कमा रहने गरी छोडिने डाक्टर काफ्लेले बताउँछन् । कर्राबाट २१ जना र थपिएका १२ जनालाई गौरीटार लगिएको छ । शनिबार लगिएका २१ जना मध्य होम आइसोलेसनमा रहेर उपचार गराइरहेका पनि रहेको उहाँले बताउनु भयो । शनिवार थपिएका २० जना मध्य १२ जना गौरीटार लगिएको छ ।
आइसोलेसन वार्डमा बेडको अभाब भएपछि ६० जना बिरामी घरमा रहेर उपचार गराईरहेका थिए । जिल्लामा १ सय ७५ जना कोरोना संक्रमितको संख्या पुग्दा हेटौंडामा मात्रै १ सय जना रहेका छन् । कर्रामा रहेको ३५ बेड क्षमताको आइसालेसनबाट बिरामी गौरीटार लगिएपछि केहि संख्यामा मात्र कर्रामा रहेको हेटौडा उपमहानगरपालिकाका सिनियर अहेब भोला चौलागाईले बताउनु भयो ।
शिक्षा मन्त्रालयले विद्यालयमा आइसोलेसन वार्ड नराख्न निर्देशन दिएपछि गौरिटार रंगशालाको भवनमा आइसोलेसन वार्ड सारिएको हो । कर्रामा पनि केहि समयमा लागि स्वाब संकलनका लागि आइसोलेसन वार्ड कायम राखिने बताइएको छ । कर्रामा ३५ बेड क्षमताको आइसोलेसन प्रदेश सरकार अन्तर्गत हेटौंडा अस्पतालले सञ्चालन गरेको हो ।
सिन्धुपाल्चोक / सिन्धुपाल्चोक जिल्लाको पहिरो प्रभावित क्षेत्रको बस्ती तत्काल स्थानान्तरण गरिने भएको छ । सिन्धुपाल्चोकका पहिरो पीडितहरुको लागि राहत सामग्री सहित शनिबार त्यहा पुग्नु भएको बागमती प्रदेशका मुख्यमन्त्री डोरमणि पौडेलले बस्ती स्थानान्तरण गरिने बताउनु भएको हो ।
सिन्धुपाल्चोकको जुगल गाउँपालिका–२ लिदिमा भएको पहिरो प्रभावितका लागि स्वास्थ्य सामग्री, राहत सामग्री तथा अत्यावश्यक सामग्री सहित मुख्यमन्त्री पौडेल त्यसतर्फ सिन्धुपाल्चोक पुग्नु भएको हो । स्थलगत निरीक्षणपछि सो क्षेत्रमा खानेपानीका पाइप, अस्थाई शौचालयका सामग्री, दैनिक उपभोग्य खाद्य सामग्रीको व्यवस्था गरिएको छ । हाल सो क्षेत्रमा नेपाल प्रहरी र ससस्त्र प्रहरी र स्थानीयले उद्वारका काम जारी राखेका थिए भने थप सहयोगका लागि नेपाली सेनको एउटा टुकडी हेलीकप्टरमार्फत सो क्षेत्रमा पु-याएको छ ।
मुख्यमन्त्री पौडेलले तत्काल अस्थाई बासस्थान राहत र क्षतिपूर्ति उपलब्ध गराउने बताउनुभयो । सो स्थान बस्तीको लागि उपयुक्त नभएको स्थानीयले मुख्यमन्त्रीलाई जानकारी गराएका छन् । मुख्यमन्त्री पौडेलले स्थानीयको मागअनुसार बस्ती स्थानान्तरण गरीने बताउनुभयो । सिन्धुपाल्चोकका बस्तीहरु नै मानिसको बसोबास गर्न नमिल्ने, असुरक्षित रहेको बताउनुभयो । यहाँका बस्ती स्थानान्तरणका लागि उपयुक्त जमिनको खोजी गरी सकेसम्म छिटो अगाडि बढाईने उहाँले बताउनु भयो ।
सुरक्षित ठाउँमा स्थानान्तरण गर्नुको अरु केहि विकल्प पनि नभएको उहाँले बताउनुभयो । ‘हामी स्थानान्तरण मात्र हैन, जिविको पार्जन गर्न रोजगारी हुने गरी स्थानान्तरण गर्नुपर्छ’ उहाँले भन्नुभयो । स्थानीयहरुलाई परेको विपत्तिमा सरकारले सहयोग गर्ने उहाँले प्रतिबद्धता जनाउनुभयो । उचित व्यवस्थापन गर्ने सरकारको दायित्व रहेकोले सकारले तत्काल काम थाल्ने उहाँले बताउनुभयो । हालसम्म पनि स्थानियहरु बेपत्ता रहेकोले उद्धार कार्य थप तिव्र बनाइएको पनि उहाँले जानकारी दिनुभायो ।
जिल्लाको पहिरो पीडित सबैको हितको लागि प्रदेशका मन्त्रीहरु, सांसद, जनप्रतिनिधिहरुलगायत अन्य सरोकारवालाहरुसँग प्राविधिकसहितको टोली राखेर छलफल गरेर निकास निकालिने मुख्यमन्त्री पौडेलले बताउनु भयो । शनिबार मुख्यमन्त्री पौडेलसहित उद्योग, पर्यटन, वन तथा वातावरण मन्त्री अरुण नेपाल, सामाजिक विकास मन्त्री युवराज दुलाल, पुर्वमन्त्री शेरबहादुर तामाङ, प्रदेशका अर्थ तथा विकास समिति शरेस नेपाल, प्रदेशका प्रमुख सचिव मानबहादुर विके, मध्यपृतनापति ताराध्वज पाण्डे, बागमती प्रदेश प्रहरी प्रमुख डिआईजी वसन्त लामाको टोली त्यसतर्फ गएको हो । सो क्षेत्रमा अहिले सय ७२ घर धुरी रहेका छन् भने ३६ घरमा पूर्णरुपमा क्षति भएको छ । हाल सम्म १६ जनाको शव फेला परिसकेको छ भने २३ जना अझै बेपत्ता रहेका छन् ।
मकवानपुर । आफ्नो डियुटीमा ईमान्दारीता प्रर्दशन गर्ने प्रहरी कर्मचारीहरुलाई पुरस्कृत गर्ने र गैह्र व्यवसायीक कार्यमा संलग्नलाई कारवाही गरी प्रहरी सेवालाई मर्यादित बनाउने कार्यलाई बिशेष अभियानको रुपमा संचालन गरिरहेको बागमती प्रदेश प्रहरीले आफुलाई दिईएको जिम्मेवारी इमान्दारीताका साथ निर्वाह नगर्ने र आर्थिक प्रलोभनमा परी अनियमितता गर्ने ६ जना प्रहरीलाई मंलगवार निलम्बन गरिएको छ ।
बागमती प्रदेश प्रहरी कार्यालय हेटाैडाबाट खटिएको बिषेश प्रहरी टोलीले सेवाग्राहीसंग रकम लिंदै गरेको अवस्थामा उनीहरुलाई साउन २१ गते नियन्त्रणमा लिएको बागमती प्रदेश प्रहरी कार्यालय हेटाैडाका सुचना समन्वय अधिकृत प्रहरी निरीक्षक रोशन थापाले बताउनु भयाे । निलम्बनमा पर्नेहरूमा जिल्ला प्रहरी कार्यालय सिन्धुलीका ५ जना र जिल्ला प्रहरी कार्यालय काभ्रेका कार्यरत १ जना गरी ६ जना प्रहरी कर्मचारीहरुलाई सवारी चालकसंग विभिन्न वहानामा रकम लिएको भेटिएपछि नियन्त्रणमा लिई प्रदेश प्रहरी कार्यालय हेटौंडामा झिकाइएकोमा उनीहरुको सम्बन्धमा थप छानविन गर्न हाललाई निलम्बन गरिएको हो ।
निलम्बन पर्नेमा २ जना प्रहरी हवल्दार र चार जना प्रहरी जवान रहेकाे प्रहरी निरीक्षक थापाले जानकारी दिनु भयाे । जिल्ला प्रहरी कार्यालय सिन्धुली र सो अन्तर्गतका कार्यालयमा कार्यरत प्रह राजकुमार श्रेष्ठ, प्रह डोर बहादुर कार्की, प्रज कुमार बाबु सिंह, धिरेन्द्र साह, राम कुमार थापा र जिल्ला प्रहरी कार्यालय काभ्रे अन्तर्गतको ईप्रका मंगलटारमा कार्यरत प्रज नबिन बहादुर थापालाई निलम्बन गरीएको हो ।निलम्बनमा पर्ने प्रहरी कर्मचारीजिल्ला प्रहरी कार्यालय सिन्धुली, ईलाका प्रहरी कार्यालय भिमान, खुर्कोट, मंगलटार,प्रहरी चौकी ढुंग्रेबास र अस्थायी ट्राफिक प्रहरी पोष्ट भिमानमा कार्यरत रहेका थापाले बताउनु भयाे ।
निलम्बित प्रहरी कर्मचारीहरुको सम्बन्धमा थप छानविन गर्न प्रदेश प्रहरी कार्यालय हेटौंडाले प्रहरी नायव उपरीक्षक बिज्ञान बस्नेतको संयोजकत्वमा तीन सदस्यीय छानविन टोली गठन गरेको छ । बागमती प्रदेश प्रहरी कार्यालय अन्तर्गतका कार्यालयहरुमा कार्यरत प्रहरी कर्मचारीहरुबाट नागरिक केन्द्रीत, स्तरीय, प्रभावकारी र पारदर्शी सेवा प्रवाह गराउने उद्देश्यले प्रदेश प्रहरी प्रमुख प्रहरी नायव महानिरीक्षक बसन्त कुमार लामाबाट बिषेश कार्ययोजना बनाई मातहत प्रहरी कर्मचारीहरुबाट सम्पादन भैरहेको कार्यलाई अनुगमन र मुल्यांकन गर्न सिनियर प्रहरी अधिकृतको कमाण्डमा टाक्स फोर्स गठन गरिएको समेत प्रहरी निरीक्षक थापाले बताउनु भयाे ।
अभियान अन्तर्गत हालसम्म सेवाग्राहीसंग आर्थिक प्रलोभनमा पर्ने एक जना प्रहरी निरीक्षक सहित ११ जना प्रहरी कर्मचारी निलम्बित भैसकेका छन भने डियुटीमा ईमान्दारीता प्रर्दर्शन गर्ने २५ जना प्रहरी कर्मचारी पुरस्कृत भैसकेका छन ।
१ जना प्रहरी कर्मचारी पुरस्कृत
यसै गरी डियुटीमा बसेका प्रहरी कर्मचारीलाई बिभिन्न प्रलोभन देखाई घुस रकम दिन खोज्ने व्यक्तिहरुलाई घुस वापतको रकम सहित पक्राउ गरी कानुनी बमोजिम कारवाहीको दायरामा ल्याउने १ जना प्रहरी कर्मचारीलाई मंगलबार बागमती प्रदेश प्रहरी कार्यालयले पुरस्कृत गरेको छ थापाले जानकारी दिनुभयाे ।आर्थिक प्रलोभनमा नपरी आफ्नो डियुटीमा ईमान्दारीता प्रर्दशन गर्ने प्रहरी कर्मचारीहरुलाई पुरस्कृत गरिएको हो । पुरस्कृत हुनेमा अस्थायी ट्राफिक प्रहरी पोष्ट भिमान सिन्धुलीमा कार्यरत प्रहरी हवल्दार ओम नारायण महतो रहेका छन ।
डियुटीमा बसेका प्रहरीलाई बिलबुक भित्र ३०० रुपैया राखी प्रहरीलाई आर्थिक प्रलोभनमा पार्न खोजेपछि घुस वापतको रकम र बलेरो गाडी चालक समेतलाई नियन्त्रणमा लिई कार्बाहीको लागि बुझाएका प्रहरी हबल्दारलाई पुरस्कृत गीएको हो । प्रहरीलाई आर्थिक प्रलोभनमा पार्ने बोलेरो चालकलाई नियमानुसार जरिवाना गरिएको छ ।
मकवानपुर/बागमती प्रदेशमा रहेका जिल्लाहरुमा कोरोना संक्रमणपछि विद्यालयभित्र सञ्चालनमा ल्याइएका आईसोलेशन र क्वारेन्टाइन हटाइने भएको छ । विद्यालयबाट आईसोलेशन हटाउने निर्णय अनुसार बागमती प्रदेशमा विद्यालयहरुमा रहेको आइसोलेशन तथा क्वारेण्टाइन स्थानन्तरण गरिने भएको हो ।
आईसोलशसन हटाउने निर्णय कार्यान्वयन गर्न हेटौंडाको श्रमिक माध्यमिक विद्यालयमा यस अघि सञ्चालन गर्दै आइएको क्वारेण्टाइन तथा आइसोलेशनलाई हेटौंडा–६ मा गौरीटार रंगशालामा रहेको केन्द्रीय खेलकुद प्रतिष्ठानको छात्राबासको भवनमा स्थानान्तरण गरिने भएको छ । गौरीटार रंगशालाको छात्राबासमा स्थापना गरिन लागेको स्थानको प्रदेशका मुख्यमन्त्री डोरमणि पौडेलले अवलोकन गर्नुभएको छ । स्थानको अवलोकन गर्दै मुख्यमन्त्री पौडेलले यसलाई छिटोभन्दा छिटो स्थानान्तरण गर्न निर्देशन दिनुभयो ।
प्रदेशमा कोरोना संक्रमण फैलन सक्ने तर्फ सचेत हुन आग्रह गर्दै उहाँले प्रदेश सरकारले पुर्ण सहयोग गर्ने बताउनुभयो । यसैगरी सामाजिक विकास मन्त्री युवराज दुलालले छात्राबाससँगै बन्दै रहेको र निर्माणको अन्तिम चरणमा रहेको कभर्डहलमा समेत संक्रमित राख्न सकिने बताउनु भयो । यसलाई आवश्यकता अनुसार निर्माण गरिने उहाँले जानकारी दिनुभयो । हेटौंडा उपमहानगरपालिकाका मेयर हरिबहादुर महतले यसको व्यवस्थापनमा जनशक्ति, आर्थिकलगायतका काममा सहयोग हुने बताउनु भयो ।
निरीक्षणमा प्रदेशका प्रमुख सचिव डाक्टर मानबहादुर विश्वकर्मा, सामाजिक विकास मन्त्रालयका सचिव दिपक काफ्ले, चिकित्सा महाशाखा प्रमुख डाक्टर पुरुषोत्तमराज सेढाई, हेटौंडा अस्पताल विकास समितिका अध्यक्ष प्रकाश पौडेल, मेडिकल सुपरिटेन्डेन्ट डाक्टर प्रवीण श्रेष्ठ, हेटौंडा उपमहानगरपालिकाका जनस्वास्थ्य निरीक्षक भोला चौलागाईंलगायतले रंगशाला अवलोकन गरेका हुन् ।
यसैगरी प्रदेशका अन्य जिल्लामा विद्यालयमा रहेका आईसोलेशन र क्वारेन्टाइन पनि हटाएर अन्य स्थानमा राखिने तयारी भएको प्रदेश सरकारले जनाएको छ । संघीय सरकारको मन्त्रीपरिषदको बैठकले गत साउन १२ गते नै देशभरको विद्यालयहरुबाट आइसोलेशन तथा क्वारेण्टाइन हटाउने निर्णय गरेको भएपनि बागमती प्रदेश कोभिड संकट व्यवस्थापन समितिले सोमबारमात्र विद्यालयबाट आइसोलेशन र क्वारेण्टाइन हटाउने निर्णय गरेको थियो ।