मकवानपुर । बागमती प्रदेश आर्थिक मामिला तथा योजनामन्त्री शालिकराम जम्मकट्टेलले देश विकासमा इन्जिनियरहरुको भूमिका महत्वपूर्ण हुने बताएका छन् । एकीकृत प्रगतिशील इन्जिनियर समूहको परिचयात्मक कार्यक्रमलाई सम्बोधन गर्दै उनले मुलुकका हरेक क्षेत्रमा निर्माण गरिने भौतिक संरचना, विकास निर्माणका आयोजना र त्यसको, गुरु योजना, विस्तृत परियोजनालगायतमा इन्जिनियरहरुको महत्वपूर्ण भूमिका हुने बताए । उनले भने ‘इन्जिनियरबिना समृद्ध नेपालको कल्पना गर्न सिकदैन ।’
त्यस्तै बागमती प्रदेश सामाजिक विकासमन्त्री कुमारी मोक्तान इन्जिनियरहरुले कुनै लोभ लालचमा नपरी आफ्नो पेशाप्रति प्रतिवद्ध भएर काम गर्नुपर्ने सुझाव सहित शुभकामना दिएकी छिन् । कार्यक्रममा खानेपानी, उर्जा तथा सिंचाईमन्त्री बसन्त मानन्धरले शुभकामना मन्तव्य राख्दै आसन्न निर्वाचनबाट सक्षम, सबल र इन्जिनियरहरुको हकहितका लागि काम गर्न सक्ने नेतृत्व चयन हुन पर्ने बताए ।
नेपाल इन्जिनियर्स एशोसिएसनको आगामी माघ ७ गते हुने निर्वाचनलाई लक्षित गरी उम्मेदवारहरुको परिचयात्मक कार्यक्रम आइतबार हेटौंडामा भएको छ । एशोसिएसनको ३३ औँ केन्द्रीय कार्यकारिणी समिति र बागमती प्रदेशको दोस्रो कार्यकारिणी समितिको निर्वाचनका उम्मेदवारहरुले आफ्नो परिचयसंगै चुनावी घोषणापत्रसमेत सार्वजनिक गरेका छन् ।
नेकपा माओवादी केन्द्र, नेकपा एकीकृत समाजवादी र जनता समाजवादी पार्टीको सुभेच्छुक इन्जिनियर्सहरुले एकीकृत प्रगतिशील इन्जिनियर्स समूह नामक चुनावी प्यानल बनाई निर्वाचनमा जान लागेका हुन् । सो प्यानलबाट केन्द्रीय सभापति र बागमती सभापतिको उम्मेदवारमा क्रमश डा. हरिराम पराजुली र गिरीधर मिश्र रहेका छन् ।
एशोसिएसनको केन्द्रीय उपाध्यक्षमा आ.न्हसला तुलाधर, महासचिवमा डा. शंकर ढकाल, उपमहासचिवमा डा. समित थापा, कोषाध्यक्षमा इ. श्याम नारायण चौधरी, सह कोषाध्यक्षमा इ. स्मिता भट्ट प्यानलबाट उम्मेदवार रहेका छन् । त्यस्तै बागमती प्रदेशतर्फ उपाध्यक्षमा इ. शिवप्रसाद भण्डारी, सचिवमा इ. अमरचन्द्र निराला, सह सचिवमा इ. कमल पोखरेल र कोषाध्यक्षमा इ. उमेशजंग थापा उम्मेदवार छन् । परिचयात्मक कार्यक्रममा केन्द्र र बागमती प्रदेशका विभिन्न पदका उम्मेदवारहरुको उपस्थिति रहेको थियो ।
एकीकृत प्रगतिशील इन्जिनियर समूह प्रचार प्रसार समितिको आयोजनामा भएको कार्यक्रममा बागमती प्रदेश मुख्यमन्त्री कार्यालयका प्रमुख स्वकीय सचिव उमेश रुपाखेतीले अध्यक्षता गरेका थिए भने आयोजकको तर्फबाट इन्जिनियर रविन पाठकलले शुभकामना मन्तव्य व्यक्त गरेका थिए ।
मकवानपुर । बागमती प्रदेशकी सामाजिक विकास मन्त्री कुमारी मोक्तानले सहकारी प्रत्यक्ष जनतासँग जोडिएको संस्था भएकाले सहकारीको विकासको लागि प्रदेश सरकारले महत्वपूर्ण भूमिका खेल्ने बताएकी छन् ।
शनिबार हेटौंडा उपमहानगरपालिका १३, शिखरपानीस्थित चुरेशिखर कृषि सहकारी संस्था लिमिटेडको १३ औं वार्षिक साधारणसभाको उद्घाटन गर्दै उनले उक्त कुरा बताइकी हुन् । साधारणसभाको उद्घाटन गर्दै माेक्तानले सहकारी ऐनमा संशोधन गर्न सकिने भन्दै त्यसका लागि पहल गर्ने बताईन् । ‘सहकारी ऐनमा केही समस्या छ भने पुर्नविचार गर्नुपर्छ, गर्न सकिन्छ,’ उनले भनिन्, ‘प्रदेश सरकारले ऐन, कानून बनाउँदा पत्रकार, यातायात, बालबालिका, महिलाको संघसंस्थासँग छलफल समेत गर्ने गरेको छ ।’ दुग्ध उत्पादकसहित धेरै किसानलाई प्रदेश सरकारले प्रत्यक्ष अनुदान र प्रोत्साहन रकम दिई रहेको भन्दै उनले जनतालाई सरकारले धेरै लाभ दिन किसान लक्षित कार्यक्रमका लागि सहकारीमार्फत् सुझावको अपेक्षा रहेको बताईन् ।
गाउँगाउँमा रहेको कृषि सहकारीहरु उत्पादनमा जोडिएकोमा खुशी व्यक्त गर्दै उनले उत्पादन बढाउँदै उद्योगसँग जोड्न पनि आग्रह गरिन् । कार्यक्रममा सहकारीले जेष्ठ नागरिक सम्मान, जोडी सम्मान, असल बचतकर्ता, उत्कृष्ट बाल बचत, उत्कृष्ट कृषकहरुलाई नगदसहित सम्मान गरिएको थियो । ३ करोड ३५ लाख ७६ हजार रुपैंया बचत र ३ करोड २६ लाख ४९ हजार रुपैंया लगानी रहेको सहकारीमा ७ सय ८९ जना शेयर सदस्य रहेको बताईएको छ ।
हेटौंडा उपमहानगरपालिका वडा नम्बर १५ का अध्यक्ष महारत्न लामाको विशेष आतिथ्य रहेको कार्यक्रम सहकारीका अध्यक्ष राजु दर्लामीको सभाध्यक्षतामा भएको थियो । हेटौंडा उपमहानगरपालिका सहकारी शाखाका प्रमुख हिमप्रसाद पौडेल, जडिबुटी सहकारी संघ मकवानपुरका सचिव लिलाकुमार घलान, स्वाबलम्बन बहुउद्देश्यीय सहकारी संस्थाका अध्यक्ष दिपेश थिङ, नारायणी संघ हेटौंडाका निवर्तमान अध्यक्ष बद्री प्रसाद चौलागाई, जनप्रिय प्राविधिक शिक्षालय, हटियाका अध्यक्ष रमेश खतिवडा लगायतले मन्तव्य व्यक्त गरेका थिए ।
मकवानपुर । आदिवासी जनजाति पत्रकार महासंघ (फोनिज) बागमती प्रदेश समितिको अध्यक्षमा युवराज श्रेष्ठ सर्वसम्मत चयन भएका छन् । विहीबार हेटौंडामा भएको फोनिज बागमती प्रदेश अधिवेशनबाट रामेछापका श्रेष्ठ अध्यक्षमा सर्वसम्मत चयन भएका हुन् ।
यसै गरी उपाध्यक्षमा राजेश रुम्बा (चितवन), डोल्मा शेर्पा (काठमाडौं) महिलातर्फ, महासचिवमा श्याम राना (काठमाडौं), संगठन सचिवमा शिशिर दोङ (काभ्रे), संस्थागत सचिवमा राजु नापित (काठमाडौं), कोषाध्यक्षमा शंकर श्रेष्ठ (धादिङ) चयन भएका छन् ।
यस्तै सदस्यहरुमा मिना श्रेष्ठ (मकवानपुर), कमला तामाङ (अस्मि) (सिन्धुली), पासाङ शेर्पा (सिन्धुपाल्चोक), पूर्णबहादुर मगर (विशाल), उद्धवकुमार श्रेष्ठ (सिन्धुली), अर्विन्द्रमान सिंह (चितवन), सरोज लामा , पासाङ घिसिङ (ललितपुर), रविन्दू सिंजाली मगर, दिक्की डोल्मा शेर्पा (सिन्धुपाल्चोक), पूर्वा तामाङ रसुवा), सञ्जय चौधरी (चितवन), हिरालाल गुरुङ (चितवन) सर्वसम्मत चयन भएका छन् । २१ सदस्यीय कार्य समितिले संस्थागत सदस्यमा पदाधिकारीको बैठकपछि १ जना मनोनयन गरिने जनाएको छ ।
दोस्रो प्रादेशिक अधिवेशनबाट संघीय प्रतिनीधिमा सम्झना श्रेष्ठ, पूर्णभक्त दुवाल, पेमा लामालाई सर्वसम्मत चयन गरिएको छ । प्रदेश समितिको अनुशासन समिति संयोजकमा बाबुकाजी श्रेष्ठ, सदस्यहरुमा रिदेन महर्जन, रसिया श्रेष्ठ चयन भएका छन् । राजेन्द्र मानन्धरको संयोजकत्वमा दोलख गुरुङ, राकेश चौधरी सदस्य रहने गरी लेखा समिति सर्वसम्मत चयन गरिएको छ ।
मकवानपुर । सवारी दुर्घटनाका घाइतेहरुको प्राथमिक उपचारका लागि बागमती प्रदेश स्वास्थ्य मन्त्रालयले उपकरण सहयोग गरेको छ । मन्त्रालयमा शुक्रबार भएको कार्यक्रममा बागमती प्रदेशका ५ वटा प्राथमिक स्वास्थ्य केन्द्रलाई उपकरण हस्तान्तरण गरिएको हो ।
बागमती प्रदेशका स्वास्थ्य मन्त्री निमा लामा र राज्यमन्त्री कल्पना नेपालीले स्वास्थ्य सामग्री हस्तान्तरण गरेका छन् । मन्त्रालय अन्तरगतको स्वास्थ्य आपूर्ति व्यवस्थापन केन्द्रले मकवानपुरको मनहरी, धादिङको गजुरी, काभ्रेको पाँचखाल, सिन्धुपाल्चोकको मेलम्ची र रामेछापको मन्थली प्राथमिक स्वास्थ्य केन्द्रलाई सामग्री सहयोग गरेको छ ।
उपकरण सहयोगका लागि ५० लाख रुपैंया बजेट विनियोजन भएको केन्द्रका निमित्त निर्देशक डा. अर्जुनप्रसाद सापकोटाले जानकारी दिए । निर्देशनालयले प्यासेन्ट मोनिटर, अक्सिजन कन्सर्नट्रेटर, इसिजि मेसिन, व्हिल चियर, बेड, स्टेचर, अक्सिमिटर लगायतका उपकरण सहयोग गरिएको छ ।
सहयोग सामग्री हस्तान्तरण गर्दै मन्त्री निमा लामाले प्रदेशका ग्रामिण भेगसम्म सडक पूर्वाधारको विस्तार भईरहेको र दुर्घटनाको दर समेत बढेकाले दुर्घटनामा घाइतेहरुको जीवन रक्षाका लागि सहयोग गरिएको उपकरण उपयोगी हुने विश्वास व्यक्त गरे । उनले दुर्घटनाका घाइतेहरुलाई समयमै उद्धार र प्राथमिक उपचारका लागि मन्त्रालयले उपलव्ध गराएको उपकरणको सदुपयोग गर्न समेत सुझाव दिए ।
उनले आगामी दिनमा प्रदेशका सवारीको बढि चाप हुने सडकको प्रत्येक ५० किलोमिटरमा स्वास्थ्यकर्मीहरुको टिमसहित एम्बुलेन्सको व्यवस्था गरिने बताए । उनले प्रदेशको स्वास्थ्य क्षेत्रको सुधार र सुदृढिकरणका लागि सबैको सहकार्य आवश्यक रहेको बताए ।
कार्यक्रममा स्वास्थ्य राज्यमन्त्री कल्पना नेपालीले मन्त्रालयले स्वास्थ्य क्षेत्रलाई सबल बनाउन निरन्तर सहजीकरण एवं सहयोगका लागि काम गरिरहेको र यसलाई निरन्तरता दिने बताउँदै सेवा प्रवाहलाई व्यवस्थित गर्नुपर्नेमा जोड दिईन् ।
स्वास्थ्य मन्त्रालयका सचिव बद्रीबहादुर खड्काको सभाध्यक्षतामा भएको कार्यक्रममा स्वास्थ्य निर्देशनालयका निर्देशक महेश्वर श्रेष्ठ, निक साइमण्ड इष्टिच्युटका कार्यकारी अधिकृत अनिलबहादुर श्रेष्ठ, विभिन्न स्थानीय तहका प्रतिनिधि लगायतको उपस्थिति रहेको थियो ।
मकवानपुर । आगामी माघ १२ गते हुने राष्ट्रियसभाको निर्वाचनका लागि हेटौंडामा विहीबार निर्वाचन अधिकृतको कार्यालय स्थापना गरिएको छ । बागमति प्रदेशमा हुने निर्वाचन कार्यक्रम संचालनका लागि हेटौंडा ५ स्थित प्रदेश निर्वाचन कार्यालय बागमती प्रदेशको भवनमा निर्वाचन अधिकृतको कार्यालय स्थापना गरिएको हो ।
निर्वाचन आयाेगले ७ वटै प्रदेशमा केही समय अघी निर्वाचन अधिकृत नियुक्त गरेकाे थियाे । बागमती प्रदेशमा मकवानपुर जिल्ला अदालतका जिल्ला न्यायाधिस डिल्लीरत्न श्रेष्ठलाई निर्वाचन अधिकृत ताेकेकाे थियाे । विहीबार स्थापना भएकाे कार्यालयबाट बागमती प्रदेशमा १ जान महिला र अन्य १ गरी २ जनाको निर्वाचन कार्यक्रम संचालन हुने जिल्ला न्यायाधीश एवं निर्वाचन अधिकृत श्रेष्ठले जानकारी दिए ।
राष्ट्रिय सभामा बागमती प्रदेशबाट १ जना महिला र १ जना अन्य गरी २ जनाको पद रिक्त हुँदैछ । प्रदेश निर्वाचन कार्यालय बागमती प्रदेशले पुस १७ गते शनिवार मतदाताको नामावली प्रकाशन गर्ने, पुस २० गते १० बजेदेखि दिउँसो ३ बजेसम्म उम्मेदवारको मनोनयन दर्ता गर्ने कार्यतालिका सार्वजनिक गरिसकेको छ । यसैगरी माघ १२ गते विहान ९ बजे देखि ३ बजे सम्म हुने मतदान कार्यक्रम भने हेटौंडा ८ मा रहेको हेटौंडा औधोगिक व्यवस्थापन लिमिटेडको सभागृहमा हुने छ ।
मतदानका लागि बागमती प्रदेशसभाका १ सय ९ जना सदस्यहरु र प्रदेशका १३ जिल्लाका १ सय १९ वटा स्थानीय तहका २ सय ३८ प्रमुख उपप्रमुख गरी कुल ३ सय ४८ जनाले सहमागिता जनाउने छन् ।
कार्यालय उद्घाटन कार्यक्रममा प्रदेशका निर्वाचन कार्यालयका प्रमुख लुमनाथ पोखरेल, जिल्ला अदालतको मुख्य न्यायधिश एवं मुख्य निर्वाचन अधिकृत श्रेष्ठ, प्रमुख जिल्ला अधिकारी भरतमणी पाण्डे, नेपाल पत्रकार महासंघ मकवानुरका अध्यक्ष मणीराज गौतम लगायतको उपस्थिति रहेको थियो ।