
१.
बाबाले घट्स्थापना थापी सक्नु भो,
आमाले आजै जमरा राखी सक्नु भो!
तिमी पनि आउने प्रयास गर हे प्रदेशी,
माइला दाइले नि बाटो लागी सक्नु भो।
२.
बाध्यता मै दिन बित्छ्न प्रदेशमा दशै तिहार सम्झिएर
आफन्तको मीठो माया अनि प्यारिको प्यार सम्झिएर
आँखा बाट आँसु बगाएरै किनेको टिकेट फिर्ता गरेँ आमा–
बाबाको टाउका माथी थुपारिएको रिणको भार सम्झिएर।
भरतपुर -५,चितवन

दशैंकाे पहिलाे दिन घटस्थापना
तन मन लगाई गराै देवी बन्दना
जाैं मकै गहुँ छरी सबकाे घरमा
शैलपुत्री देवीकाे -गराैं साधना
सिरानचोक ३ गोरखा

लाला र बाला चिची र नानाको सपना बुन्छ दशैंको बेला
गरीबको साउ साँवा र ब्याज हिसाब गुन्छ दशैंको बेला
बुझे नि दुख प्रिया हेर कठै थाम्दैन त्यो मन अामाको
हेरेर बाटो रुन्छि अामा प्रदेशमा छोरो रुन्छ दशैंको बेला।
हेटाैडा मकवानपुर

बिदा पाए साईली अवश्य आउने छु
तिमीलाई सुनको सिक्री ल्याउने छु
घर लिप पोत गरी राख बेलैमा प्यारी
यसपाली आमा बा को आशीष पाउने छु।
रुम्तेक सिक्किम

१.
यो बर्ष दसैको टीका लगाउन पाइन यस्तै भो
रहर थियो आउने, आउन पाइन यस्तै भो
भन्ने बित्तिकै समय नमिल्दो रैछ बिदेशमा–
मायाको लागि धाउन पाइन यस्तै भो ।
२.
शहर भन्दा गाउँ रमाइलाे हुन्छ चाडबाडमा
वातावरण, घर सुकिलाे हुन्छ चाडबाडमा
परदेश र घरदेश सम्मका गाउँघर फर्कन्छन्
सबैसगँकाे भेटघाट सजिलाे हुन्छ चाडबाडमा ।
हेटौंडा मकवानपुर

आम नेपालीको सामु खुसीयाली छाउँदै छ
अबोध शिशु पनि रमझम देखेर रमाउँदै छ
यता परदेशीलाई सम्झेर रुँदै छन् परिवार,
परदेशी उता परिवारको लागि कमाउँदै छ ।

दशैको लहर आयो फेरी
हर्ष उमंग त छायो फेरी
गरिबलाई दशै हो दशा
भन्नु पर्नेछ फसायो फेरी ।

प्रदेश बाट यो साल दशैमा आफ्नो घर फर्कीने मन छ
गाउँ घर रहे सम्म आफ्ना साथी-भाइ सम्झिने मन छ
तल्ला घरे ठुलदाई र भाउजु मिली लठ्ठा बाट्दै होलान
दोहोरो प्यारी सँग लिङ्गे पिङमा बेस्सरी मच्चिने मन छ ।
पाेखरा

घोर्ले खसी किनेर आफ्नै टाट्नामा बानौंला आमा
आफुलाइ मन परेका राम्रा कपडा छानौंला आमा
बिदेशको काम र कोभीडबाट मुक्ति पाइएछ भने
अर्को सालको दशै हजुरसंगै बसेर मानौंला आमा।
झापा
मकवानपुर । बागमती प्रदेशकाे प्रदेशसभाकाे अधिवेशन आह्वानकाे सिफारिस गरिएकाे छ । बुधबार बसेकाे प्रदेश पम्त्रिपरिषद् बैठकले प्रदेशसभाको नवौं अधिवेशन आह्वान गर्न सिफारिस गरेकाे हाे ।
मन्त्रिपरिषद् बैठकले असोज २४ गते अाइतबार दिउँसो ३ बजेका लागि प्रदेशसभाको हिउँदे अधिवेशन आह्वान गर्न प्रदेश प्रमुख यादवचन्द्र शर्मासमक्ष सिफारिस गर्ने निर्णय गरेको हाे । हालका मुख्यमन्त्री अष्टलक्ष्मी शाक्य नेतृत्वको सरकार अल्पमतमा परेसँगै गत भदौ ११ गते शुक्रबार प्रदेशसभाको वर्षे अधिवेशन अन्त्य गरेकी थिइन् ।
प्रदेशमा एकल बहुमत रहेको एमाले विभाजन पश्चात १३ सांसदले नेकपा (एकीकृत समाजवादी) रोजेसँगै शाक्य नेतृत्वको सरकार पूर्णरुपमा अल्पमत परिसकेको छ । सरकार अल्पमतमा परेसँगै मुख्यमन्त्री शाक्यले एक महिनाभित्र संसद्बाट विश्वासको मत लिनुपर्ने कानुनी बाध्यता छ ।
वाग्मती प्रदेशमा हाल १ सय ९ सांसद छन् । सभामुखसहित ५६ सांसद रहेको एमालेको तर्फबाट एकल बहुमतको सरकार बनाएकी मुख्यमन्त्री शाक्यसँग हाल ४३ सांसद मात्र छन् । सरकार टिकाउन ५५ सांसद चाहिन्छ । साना दलसँगको सहकार्यमा शाक्यको पद जोगिने सम्भावना छैन । प्रदेशसभामा माओवादी केन्द्रको २३, कांग्रेस २२ र नेकपा (एकीकृत समाजवादी) १३ र स्वतन्त्र सांसद १ गरी विपक्षी गठबन्धनमा ५९ मत रहेको छ ।
यस अघी नै ३ सांसद रहेकाे विवेकशील साझा पार्टीले मुख्यमन्त्री शाक्यलाई विश्वासको मत नदिने घोषणा गरिसकेको छ ।
मकवानपुर । हेटाैंडामा महिला प्रधानाध्यापक सम्मानित भएका छन् । अन्तर्राष्ट्रिय शिक्षक दिवसको अवसरमा हेटौंडामा महिला प्रधानाध्यापकलाई सम्मानित गरिएको हाे । शिक्षक दिवसको अबसरमा हेटौंडा उपमहानगरपालिकाका सामुदायिक विद्यालयका ३ महिला प्रधानाध्यापक सम्मानित भएका हुन् ।
सम्मानित हुनेमा अमर माध्यमिक विद्यालय हेटाैडा १ की प्रधानाध्यापक मालती उप्रेती, बाराही निम्न माध्यमिक विद्यालय हेटाैडा १ की प्रधानाध्यापक मञ्जु देबकोटा र भावना प्राथमिक विद्यालय हेटाैंडा १८ की प्रधानाध्यापक रुपा रिजाल रहेका छन् ।
डेक नेपालकाे सहकार्य र शिक्षा विकास तथा समन्वय इकाई मकवानपुरको समन्वयमा शिक्षाका लागि राष्ट्रिय अभियान नेपाल(एनसीई) मकवानपुरले कार्यक्रम आयोजना गरेको थियो । कार्यक्रमका प्रमुख अतिथी एवं जिल्ला समन्वय समिती मकवानपुरका प्रमुख रघुनाथ खुलालले उनीहरुलाई प्रशंसापत्र प्रदान गरेका थिए ।
जिल्ला समन्वय समिती मकवानपुरका प्रमुख खुलालको प्रमुख आतिथ्य, शिक्षा विकास तथा समन्वय इकाई मकवानपुरका प्रमुख प्रेमराज खरेल र शाखा अधिकृत कृष्णप्रसाद पौडेलको विशेष आतिथ्य तथा शिक्षाका लागि राष्ट्रिय अभियान नेपाल, बागमती प्रदेश संयोजक प्रकाश खतिवडाको अध्यक्षतामा भएको थियो ।
कार्यक्रममा बागमती प्रदेश संयोजक खतिवडाले गुणस्तरीय शिक्षाका लागि अभिभावकको भूमिका र शिक्षकको उत्तरदायित्व विषयक कार्यपत्र प्रस्तुत गरेका थिए । शिक्षाका लागि राष्ट्रिय अभियान नेपाल(एनसीई) मकवानपुरका जिल्ला संयोजक बुद्धविर लामाले सहजिकरण गरेको कार्यक्रममा बंशगोपाल माध्यमिक विद्यालयका प्रधानाध्यापक रमेश प्रसाद लामिछाने, अमर माध्यमिक विद्यालयकी प्रधानाध्यापक मालती उप्रेती, प्राध्यापक एवं पत्रकार सुरेश श्रेष्ठ लगायतले अन्तर्राष्ट्रिय शिक्षा दिवसको बारेमा मन्तव्य व्यक्त गरेका थिए । हरेक बर्ष अक्टोबर ५ मा मनाईने अन्तर्राष्ट्रिय शिक्षक दिवसको यसबर्षको नारा ‘शैक्षिक सुधारको केन्द्रमा शिक्षक’ भन्ने रहेको छ ।
मकवानपुर । मकवानपुरको मकवानपुरगढी गाउँपालिकामा गाउँपालिका स्तरीय फुटसल प्रतियोगिता–२०७८ सुरु भएको छ । गाउँपालिका अध्यक्ष विदुर हुमागाईले मंगलबार उद्घाटन गरी प्रतियोगिताको सुरूवात गरेका छन् ।
गढी स्टार स्पोर्टस क्लबको आयोजना तथा मकवानपुरगढी गाउँपालिकाको प्रायोजनमा प्रतियोगिता सुरु भएको हो । फुटसल प्रतियोगितामा २४ वटा टिम सहभागि भएको आयोजककाे तर्फबाट सुभाष अधिकारीले जानकारी दिए । प्रतियोगितामा प्रथम हुनेले नगद ५० हजार, द्वितीय हुनेलाई ३५ हजार र तृतीय हुनले २० हजार रुपैयाँ प्राप्त गर्नेछन् ।
मंगलबाट सुरु भएको प्रतियोगितामा पहिलो दिन ६ वटा खेल खेलाइएको थियो । यस्तै बुधबारबाट दैनिक ८ वटा खेल खेलाउने तयारी भएकाे अधिकारीले बताए ।
मकवानपुर । हेटौंडा उपमहानगरपालिका वडा नम्बर १० स्थित बसपार्कमा नागरिक यात्रु सहायता कक्ष (हेल्प डेक्स) स्थापना गरिएको छ ।
सामुदायिक प्रहरी सेवा उपकेन्द्र हेटौंडा १० र जिल्ला प्रहरी कार्यालय मकवानपुरको समन्वयमा नागरिक यात्रु सहायता कक्ष स्थापना गरिएको हो । नजिकिदै गरेको नेपालिहरुको महान चाड दशैं , तिहारमा यात्रुहरुको चाप बढ्ने भएकाले यात्रुहरुलाई परेको सम्स्यामा तत्काल सहायता गर्न तथा हुन सक्ने सम्भावित घटनाहरुलाई न्यूनीकरण गर्न नागरिक यात्रु सहायता कक्षको स्थापना गरिएको सामुदायिक प्रहरी सेवा उपकेन्द्र हेटौंडा १० का अध्यक्ष प्रदीप कडेलले जानकारी दिए ।
सामुदायिक प्रहरी सेवा उपकेन्द्र अध्यक्ष कडेलको सभाध्यक्षतामा भएको कार्यक्रममा जिल्ला प्रहरी कार्यालय मकवानपुरका प्रहरी उपरीक्षक सोमेन्द्र सिंह राठौरले उक्त सहायता कक्षको उद्घाटन गरेका हुन् । कार्यक्रममा हेटौंडा उपमहानगरपालिका वडा नम्बर १० का अध्यक्ष किताब सिंह लामा ,सामुदायिक प्रहरी सेवा केन्द्र थानाभर्याङका अध्यक्ष शालिकराम पुडासैनी , सामुदायिक प्रहरी सेवा केन्द्र पशुपतिनगरका अध्यक्ष राम विष्ट , वडा प्रहरी कार्यालय मकवानपुरका प्रहरी निरीक्षक कृष्ण प्रसाद विष्ट लगायतको उपस्थिति थियो ।