मकवानपुर । नेपाली कांग्रेस मकवानपुरको सभापति पदमा कांग्रेस नेता जयराम लामिछानेले उम्मेदवारी घोषणा गरेका छन । आज सम्पर्क कार्यालयको उद्घाटन् गर्दै उनले उम्मेदवारी घोषणा गरेका हुन । लामिछाने समेत काग्रेस मकवानपुरको सभापतिमा ३ जनाले उमेदवारी घोषणा गरेका छन् ।
काग्रेस पाटीलाई थप सुदृढ गराउका लागि आफुले सभापतिमा उमेदवारी दिने लामिछानेले बताए । हेटौंडा २ कांग्रेस चोक पल्पसा रोड तर्फ सम्पर्क कार्यालयसमेत स्थापना गरेर उद्घाटन् गरिएको छ ।
अहिले सभापतिका लागि मात्र उमेदवारी घोषणा गरेपनि केही दिनमा आफ्नो चुनावी प्यानल नै सार्वजनिक गर्ने तयारी भइरहेको उनले बताए। कार्यक्रममा कांग्रेस मकवानपुरका पूर्वसभापति रामचन्द्र अर्याल, रघुरमण न्यौपाने तथा जिल्ला सचिव आनन्द कठायत, नेतृ रिता खनाल, इन्दिरा न्यौपानेलगायतको उपस्थिति रहेको थियो ।
यसअघि कांग्रेस हेटौंडा उपमहानगरपालिकाका निवर्तमान सभापति आनन्दराम पराजुली र जिल्ला सचिव बुद्ध लामाले सभापति पदमा उम्मेदवारी घोषणा गरिसकेका छन। कांग्रेसको १४ औं महाधिवेशन अन्तरगत मकवानपुरको जिल्लाका १ सय २ वटै वडा, १० स्थानीय तह र क्षेत्रगत अधिवेशन सम्पन्न भइसकेको छ । यस अघि मकवानपुर जिल्लाको अधिबेशनको मिति २ पटक घोषणा भएर स्थगित भएको छ ।
मकवानपुर । तामाङ समुदायले मनाउने सोनाम ल्होछारका अवसरमा बागमती प्रदेश प्रमुख यादवचन्द्र शर्माले शुभकामना दिएका छन् । यस वर्ष माघ १९ गते आज परेकाे तामाङ समुदायको विशेष धार्मिक तथा सांस्कृतिक पर्व सोनाम ल्होछारका अवसरमा शुभकामना सन्देश जारी गर्दै प्रदेश प्रमुख शर्माले सबैका लागि सुख, शान्ति र समृद्दि तथा उत्तरोत्तर प्रगतिका कामना व्यक्त गरेका छन् ।
देश भित्र र बाहिरका समेत विभिन्न मुलुकहरुमा छरिएर रहेका तामाङ समुदायले हर्षोलाशपूर्ण वातावरणमा मनाउँने २८५८ औं ताक ल्हो (सोनाम ल्होछार) पर्वका अवसरमा जारी शुभकामना सन्देशमा प्रदेश प्रमुख शर्माले यो पर्वलाई पनि हामी हाम्रा अन्य चाडपर्वहरुझैं एउटा महत्वपूर्ण पर्व मानिने गरिएको उल्लेख गरेका छन् । प्रमुख शर्माले सन्देशमा भनेका छन्,‘तामाङ समुदायकाे प्रचलनमा रहेकाे पञ्चाङ्ग अनुसार आजबाट एउटा वर्ष पूरा भई अर्को वर्ष सुरु भएको छ । यो नववर्ष ‘सोनाम ल्होछार’ ले हामी सबैका लागि सुख, शान्ति र समृद्दि ल्याउन सकोस् भन्ने कामनासहित उत्तरोत्तर प्रगतिका लागि शुभकामना व्यक्त गर्दछु ।’
प्रमुख शर्माले हामी संयौ थुङ्गा फूलका रंगीन बगैंचाका फूलहरु भएको उल्लेख गरदै हामी बहुल जातीय, बहुभाषिक, बहुधार्मिक एवम् बहुसांस्कृतिक समाजका अभिन्न अङ्ग भएको बताएका छन् । शुभकामना सन्देशमा उनले अन्य समुदाय सरह तामाङ समुदाय पनि देशकाे लागि उत्तिकै महत्वपूर्ण अङ्ग भएको उल्लेख गरेका छन् । प्रमुख शर्माले यो पर्वले हाम्रो धर्म, संस्कृति, रिती–रिवाज तथा परम्पराको सम्बर्द्दन गर्न महत्वपूर्ण योगदान गर्नेछ भन्ने विश्वास रहेको शुभकामना सन्देशमा भनेका छन् ।
‘हाम्रो समाजको मूल चरित्र भन्नु नै विविधतामा एकता, सद्भाव र सामाजिक सहिष्णुता एवम् बन्धुत्व र पारस्परिक मेलमिलाप हो’ प्रमुख शर्माले भने– ‘हाम्रा यी र यस्तै राष्ट्रिय धरोहरप्रति हामीले गौरवबोध गर्न सक्नुपर्छ ।’ ‘यो पर्वले हामीलाई यसकै लागि प्रेरित गर्नेछ । हाम्रो समाजमा मनाइने चाडपर्वहरु तथा अनुपालना गरिने संस्कृतिहरुले हामीलाई सामाजिक हित,आपसी सम्मान र भाइचाराको प्रबलीकरण गर्न प्रेरित गर्न सकोस् भन्ने पुन:एकपटक शुभकामना व्यक्त गर्दछु ।’

मकवानपुर । साहित्य सङ्गम मकवानपुरले विभिन्न विधाका ८ जना साहित्यकारलाई सम्मान र पुरस्कार प्रदान गर्ने भएको छ । मकवानपुरको अग्रणी साहित्यिक संस्था साहित्य संगमले यस बर्ष ८ जना साहित्यकारलाई विभिन्न सम्मान र पुरस्कार प्रदान गर्ने जनाएकाे छ ।
सङ्गम अध्यक्ष अनिता न्यौपानेको अध्यक्षतामा बसेकाे मङ्गलबारको बैठकले संस्थाले प्रत्येक वर्ष प्रदान गर्दै आएको सम्मान तथा पुरस्कार साहित्यका विभिन्न विद्यामा योगदान पुर्याएका ८ जना साहित्यकारलाई प्रदान गर्ने निर्णय गरेको हाे । वरिष्ठ हास्यव्यङ्ग्यकार भैरव अर्यालको स्मृतिमा सङ्गमले स्थापना गरेको २१ हजार १ सय ११ रुपैयाँकाे भैरव अर्याल स्मृति सम्मान यसवर्ष हरिकला उप्रेतीलाई प्रदान गर्ने निर्णय गरेको छ । उक्त सम्मानकाे लागि अर्याल परिवारले २ लाख ५० हजार रुपैयाँको अक्षयकोष स्थापना गरेका छन् ।
यसै गरी संगमले स्थापना गरेकाे १५ हजार ५ सय ५५ रुपैयाँ राशीकाे मकवानपुर साहित्य श्री युवा साहित्यकार सुवास खनाललाई प्रदान गर्ने निर्णय गरिएको अध्यक्ष न्याैपानेले जनाकारी दिइन् । यसैगरी सङ्गमले यसवर्ष भेषनाथ अधिकारी स्मृति पुरस्कार साहित्यकार मनोज भण्डारीलाई प्रदान गर्ने भएको छ । साहित्यकार विशाल अधिकारी (आशुतोष) ले बुबाको नाममा स्थापना गरेको यो पुरस्कारको राशी १५ हजार ५ सय ५५ रुपैयाँ रहेका छ ।
हाल अमेरिका निवासी मकवानपुरका दीपक मुडभरीले मातापिताको नाममा स्थापना गरेको १० हजार राशीकाे सुभद्रादेवी–मदन मुडभरी स्मृति काव्य पुरस्कार साहित्यकार दीपक गौतमलाई प्रदान गरिने भएकाे छ । यस्तै, शिक्षासेवी देवप्रसाद श्रेष्ठले आमाको नाममा स्थापना गरेको ७ हजार ७ सय ७७ रुपैयाँ राशीकाे मङ्गलादेवी श्रेष्ठ स्मृति नारी पुरस्कार साहित्यकार रुकु कार्कीलाई प्रदान गर्ने निर्णय भएकाे न्याैपानेले बताइन् ।
यसैगरी हास्यव्याङ्ग्यकार आरसी रिजालले माताको नाममा स्थापना गरेको अणकुमारी स्मृति साहित्य पुरस्कार बालजागृति इङ्लिस बोर्डिङ स्कुलका सुविज्ञा सुवेदीलाई प्रदान गरिने भएको छ । उक्त पुरस्कारकाे राशी ५ हजार रुपौयाँ रहेको छ । यो पुरस्कार ९–१२ कक्षामा अध्ययनरत छात्रालाई प्रदान गरिदै आएको छ । न्याैपानेका अनुसार शेषजङ्ग स्मृति कथा पुरस्कार हेटौंडा स्कुल अफ म्यानेजमेन्टमा अध्ययनरत् उषाकिरण अधिकारीलाई प्रदान गरिने भएको छ । शिक्षासेवी डेडिजङ्ग शाहले छोराको स्मृतिमा स्थापना गरेको यो पुरस्कारको राशी ५ हजार रुपैयाँ रहेको छ । यो पुरस्कार ९–१२ कक्षामा अध्ययनरत् विद्यार्थी बीच कथा प्रतियोगिता गराई एक जनालाई प्रदान गरिदै आएको छ ।
यस्तै साहित्यसेवी मुक्तगोविन्द वैद्यले यसवर्षबाट स्थापना गरेको १० हजार रुपैयाँ राशीकाे मुक्क्ति–तारा साहित्य पुरस्कार समिक्षक घनश्याम घिमिरेलाई प्रदान गरिने भएको छ । यो पुरस्कार साहित्यका विभिन्न विधामा योगदान पुर्याएका तथा क्रियाशिल साहित्यकारलाई प्रदान गरिने जनाइएको छ । सार्वजनिक गरिएका सम्मान तथा पुरस्कार कोभिड–१९ को संक्रमण न्यूनिकरण भएपछि विशेष साहित्यिक कार्यक्रमको आयोजना गरी प्रदान गरिने सङ्गम अध्यक्ष न्यौपानेले जानकारी दिइन् ।
मकवानपुर । हेटाैँडाकाे संस्थागत विद्यालय ज्ञानदीप शिक्षा (जी. एस.) निकेतन माविले मंगलबार ‘भर्चुअल अभिभावक भेला तथा साँस्कृतिक कार्यक्रम’ गरेकाे छ । विद्यालयले २१ औ स्थापना दिवसकाे अवसरमा अभिभावक भेला तथा साँस्कृतिक कार्यक्रम गरेकाे हाे ।
विद्यालय व्यवस्थापन समितिका सदस्य सचिव तथा विद्यालयका प्रिन्सिपल ईश्वरप्रसाद लामिछानेकाे अध्यक्षता एवम् विद्यालयकाे मातृसंस्था ज्ञानदीप बहुद्देश्यीय सहकारी संस्था लिमिटेडका अध्यक्ष जिधराज ढकालकाे प्रमुख आतिथ्यमा सम्पन्न कार्यक्रममा संस्थागत विद्यालय अभिभावक सङ्घ मकवानपुरकी अध्यक्ष रमिला सापकाेटा, शिक्षक-अभिभावक सङ्घका अध्यक्ष प्रकाश बानियाँकाे विशिष्ट आतिथ्य रहेकाे थियाे ।
शिक्षक, कर्मचारी, अभिभावक तथा विद्यार्थी गरी करिब ४५० काे सङ्ख्यामा सम्पन्न उक्त कार्यक्रममा अभिभावकहरूले मन्तव्य राख्नुका साथै विद्यार्थीहरूकाे तर्फबाट गायन, नृत्य तथा साहित्यिक रचना प्रस्तुत गरिएकाे विद्यालयका सहायक प्रिन्सिपल तथा अतिरिक्त क्रियाकलाप प्रमुख दीपक गाैतमले जानकारी दिए ।
विद्यालयका प्रिन्सिपल ईश्वरप्रसाद लामिछानेले विद्यालय व्यवस्थापन समितिकाे तर्फबाट शैक्षिक प्रगति प्रतिवेदन प्रस्तुत गर्दै प्रतिकूल समयमा पनि अनलाइन कक्षामा ९० प्रतिशतभन्दा बढी विद्यार्थीलाई प्रभावकारी अनलाइन कक्षा सञ्चालन गर्न सकिएकाे जनाकारी दिए । लामिछानेले विद्यालयले खेलकुद, कलासाहित्यलगायत विविध क्षेत्रमा उल्लेख्य उपलब्धि हासिल गर्न सफल हुनु, १ तला भवन निर्माण गर्नु, कक्षा-४,५ र ६ मा १/१ वटा थप सेक्सनसहित करिब १ सय जना थप विद्यार्थी भर्ना गर्नु, शिक्षकलाई सहुलियत किस्ताबन्दीमा संस्थाकाे समेत लगानीमा ल्यापटप उपलब्ध गराउने क्रमकाे थालनी हुनु, सरस्वती मन्दिर स्थापना हुनु, विद्यालयसम्म आउने बाटाेका लागि जग्गा खरिद गरिनु लगायतकाे कार्य प्रगति प्रस्तुत गरेका छन् ।
उनले विद्यार्थीकाे सुविधाका लागि थप एक थान बस थप गर्ने प्रकृया अघि बढ्नु, कम्प्युटर प्रयाेगशाला मर्मत सम्भार गरिनु, बाल उद्यान निर्माण कार्य अघि बढ्नुजस्ता कार्यलाई उपलब्धिकाे रूपमा उल्लेख गर्दै शैक्षिक सत्र २०७९ देखि लागू हुने गरी १०+२ कार्यक्रम सञ्चालन गर्ने, प्रशासनिक जनशक्ति थप गरी विद्यालयकाे प्रशासनिक कार्यक्रममा थप प्रभावकारिता ल्याउने, प्रविधिमैत्री/बालमैत्री कक्षाकाेठाकाे विकास गर्ने याेजनामा विद्यालय रहेकाे जानकारी दिP ।

कार्यक्रममा बाेल्दै संस्थागत विद्यालय अभिभावक सङ्घ मकवानपुरकी अध्यक्ष रमिला सापकाेटाले कम शुल्कमा स्तरीय शिक्षा प्रदान गर्न जीएस निकेतन सफल भएकाे भन्दै विद्यालयकाे मुक्तकण्ठले प्रशंसा गरेकी छन् । शिक्षक अभिभावक सङ्घका अध्यक्ष तथा अन्य अभिभावकहरूले प्रतिकूल समयमा पनि जीएसले सञ्चालन गरेकाे अनलाइन कक्षालगायत अभिभावक-विद्यार्थी- शिक्षक अन्तरक्रिया कार्यक्रमकाे सापकाेटाले खुलेर प्रशंसा गरिन् ।
कार्यक्रमका प्रमुख अतिथि सञ्चालक समिति अध्यक्ष जिधराज ढकालले विद्यालय स्थापना दिवसकाे सन्दर्भमा भर्चुअल कार्यक्रम गरिएकाले उत्कृष्ट शिक्षक, कर्मचारी, अभिभावक तथा विभिन्न विधा एवम् क्षेत्रमा उत्कृष्टता हासिल गर्ने विद्यार्थीलाई पुरस्कृत तथा सम्मानित गर्न नसकिएकाे र उपयुक्त समयमा सम्मानित गरिने तथा विद्यालय व्यवस्थापन समितिका तर्फबाट प्रिन्सिपलले प्रस्तुत गरेकाे प्रतिवेदनकाे मर्म, भावना तथा अभिभावक अन्तरक्रिया कार्यक्रमका क्रममा आएका महत्त्वपूर्ण सल्लाह सुझावलाई सञ्चालक समितिकाे तर्फबाट तदारुकताका साथ कार्यान्वयन गरिने प्रतिबद्धता व्यक्त गगरे ।
स्थापना दिवसकाे सन्दर्भ पारेर माघ १५, १६ र १७ गते भर्चुअल रूपमै तहगत अभिभावक अन्तरक्रिया सम्पन्न गरी काेभिड-१९ काे तेस्राे लहरका कारण भाैतिक उपस्थितिमा अभिभावक दिवस आयाेजना गर्न नसकिएकाले भर्चुअल रूपमै भए पनि स्थापना दिवस सफलतापूर्वक सम्पन्न गरिएकाे प्रिन्सिपल लामिछाने जानकारी दिए ।

मकवानपुर । मकवानपुरकाे हेटाैडामा मगलबार भएकाे रक्तदान कार्यक्रममा ५७ जनाले रक्तदान गरेका छन् । नेकपा एमाले निकट राष्ट्रिय युवा संघ नेपाल मकवानपुर जिल्ला कमिटी रोट्रयाक्ट क्लब अफ मकवानपुरको आयोजनामा मंगलबार भएकाे रक्तदान कार्यक्रममा ५७ जनाले रक्तदान गरेका हुन् ।
राष्ट्रिय युवा संघ नेपाल मकवानपुरद्वारा हेटौंडा–५, सानोपोखरास्थित नेकपा एमाले पार्टी कार्यालयमा आयोजित रक्तदान कार्यक्रममा ३७ जनाले रक्तदान गरेका हुन् । यस्तै रोट्रयाक्ट क्लब अफ मकवानपुरले हेटाैडाकाे बुद्धचाेकमा आयोजना गरेकाे रक्तदान कार्यक्रममा २० जनाले रक्तदान गरेका छन् ।
पछिल्लाे समय कोभिड–१९ का कारण रक्तदान कार्यक्रम नहुँदा रगत अभाव भएकोले युवा संघले रक्तदान कार्यक्रमको आयोजना गरेको जनाएको छ । युवा संघ नेपाल मकवानपुर जिल्ला कमिटीका अध्यक्ष लक्ष्मण उप्रेतीको सभाध्यक्षतामा भएको कार्यक्रममा नेकपा एमालेका केन्द्रीय सदस्य एवम् मकवानपुर जिल्ला ईन्चार्ज रामेश्वर रानाको प्रमुख आतिथ्य रहेको थियो ।
रोट्रयाक्ट क्लब अफ मकवानपुरले हेटाैडाकाे बुद्धचाेक रोटरी क्लब अफ मकवानपुरका अध्यक्ष कृष्णबहादुर कार्कीको प्रमुख आतिथ्य तथा क्लबका अध्यक्ष प्रतीक्षा न्यौपानेको अध्यक्षतामा रक्तदान कार्यक्रम भएको हो ।
रक्तसञ्चार केन्द्र हेटौंडाको प्राविधिक सहयोगमा भएको रक्तदान कार्यक्रम भएकाे हाे । कार्यक्रममा रोटरी क्लब अफ मकवानपुरका निवर्तमान अध्यक्ष कविन संगामी, रोट्रयाक्टका पदाधिकारी तथा पूर्व समितिहरुको उपस्थिति रहेको थियो ।
