चितवन । गजलकार कमल अर्याल सम्मानित भएका छन् । गजल मञ्च चितवनले शनिबार `द्वारिका नेपाल गजल स्मृति पुरस्कार- २०८०´बाट युवा गजलकार अर्याललाई सम्मान गरेको हो । अर्याललाई २५ हजार पुरस्कारको राशि भएकाे उक्त सम्मानद्वारा सम्मानित गरिएकाे हाे ।
मञ्चका पूर्व अध्यक्ष पुष्प अधिकारी अञ्जली, द्वारिका नेपालकी धर्मपत्नी पार्वती अर्याल नेपाल, कविडाँडा साहित्य समाजका अध्यक्ष एलबी क्षेत्री र मञ्चका अध्यक्ष लेखराम सापकोटाले दोसल्ला र सम्मानपत्रले अर्याललाई सम्मान गरेका हुन् । सम्मानित अर्यालले एकल गजल वाचन कार्यक्रममा उनले ६ वटा गजल प्रस्तुत गरे ।
सम्मानित अर्याल २०५५ सालदेखि गजल लेखनमा निरन्तर सक्रिय छन् । उनका `तिमी आउनु अघि´ (२०७१), `तिमी आएपछि´ (२०७३) र `लौरो´ (२०७५) गरी तीन वटा एकल तथा `ईप्रतिनिधि नेपाली गजल´, `हैसियत-२´, `शब्द शिविर´, `अक्षरहरूको पिरामिड´ गरी ४ वटा संयुक्तगजलसङ्ग्रह प्रकाशित छन् । त्यसैगरी अर्यालले लेखेका ६ वटा गजल विभित्र गायकको आवाजमा सांगीतिकरूपमा आएका छन् । उनी हाल काव्यकुञ्ज साहित्य प्रतिष्ठान चितवनका अध्यक्ष छन् ।
सम्मानित स्रस्टा अर्यालका बारेमा प्राध्यापक लक्ष्मण अर्यालले उनकाे व्यक्तित्व र लेखनका बारेमा बोलेका थिए । त्यसैगरी मञ्चका पूर्वअध्यक्षहरू धनराज गिरी, किसान प्रेमी, गोर्खे साइलो, प्रभाकर पण्डित र रमेश प्रभातले मन्तव्य राखेका थिए । कार्यक्रमका प्रमुख अतिथि पुष्प अधिकारी अञ्जलीले स्वर्गीय गजलकार द्वारिका नेपाल एक मृदुभाषी, मिलनसार गजलकार एवम् पत्रकार भएको बताउँदै नेपाली साहित्यिक आकाशमा उनी कहिल्यै नमर्ने गरी अमर रहने धारणा राखेका थिए । `गजल मञ्च चितवनले पूर्वअध्यक्ष नेपालको नाममा पुरस्कार स्थापना गरेर उहाँलाई अमर बनाएको छ´, अञ्जलीले भने ।
मञ्चका पूर्वअध्यक्ष स्व. द्वारिका नेपालको नाममा यो पुरस्कार स्थापना गरिएको हो । २०७९ सालमा स्थापना गरिएको पुरस्कार पहिलोपटक कालिका नगरपालिका निवासी गजलकार मुक्त उदासलाई प्रदान गरिएको थियो । गजल मञ्च चितवनमार्फत स्व. द्वारिका नेपालको नाममा रहनेगरी यो पुरस्कार स्थापना गरिएको हो । भरतपुर-५ घर भै हाल अस्ट्रेलियामा बसोबास गर्दै आएका डिला खरेलले पुरस्कार स्थापना गरेका हुन् । मञ्चका अध्यक्ष नेपालको मस्तिष्कघातका कारण २०७८ असोजमा निधन भएको थियो ।
मकवानपुर । मनहरी गाउँपालिका ७ नम्बर वडा कार्यालयले आफ्नै भवनबाट सेवा प्रदान गर्ने भएकाे छ । मनहरी ७ स्थित बिजौनामा कार्यालय भवन बनेसँगै सेवा सुरु हुने भएकाे छ । आईतबार ७ नम्बर वडा कार्यालयकाे नवनिर्मित भवन नेपाली कांग्रेस बागमती प्रदेश सभापति एवं बागमती प्रदेशसभा सदस्य ईन्द्रबहादुर बानियाँले उद्घाटन गरेसँगै सेवा सुरु हुने भएकाे हाे ।
‘संघीय लोकतान्त्रिक गणतन्त्र पछि धेरै उत्तरचढावका बाबजुद स्थानीय तहको स्थापना भयाे’ भवन उद्घाटन गर्दै नेता बानियाँले भने ‘वडा कार्यालय भवनबाट अब जनताले सहजरुपमा सम्पूर्ण सेवा लिन पाउनेमा खुशी छु ।’ संघीयतामा सबैको अस्थित्व र पहिचानलाई स्थायित्वको लागि स्थानीय तह अपरिहार्य रहेको बताउँदै नेता बानियाँले जनताको अवस्था परिवर्तन गर्न स्थानीय निकायको भूमिका महत्वपूर्ण रहेको बताए ।
लोकतान्त्रिक गणतन्त्र स्थापनापछि निजामती कर्मचारी र राजनीतिमा भएका गल्ती कमजोरीलाई क्रमशः सुधार गर्दै लानुपर्ने बताउँदै कांग्रेस बागमती प्रदेश सभापति बानियाँले आउँदै गरेको चाडपर्वहरु विजयादशमी, दिपावली, छठ, क्रिसमसलगायतका चाडपर्वहरुको शुभकामना दिएका छन् ।मनहरी गाउँपालिकाको बजेटमा रत्नकुमारी एण्ड सन्स् प्रालि हेटौंडाले ८७ लाखमा सो भवन निर्माण गरेको वडाध्यक्ष ठाकुरराम तितुङले जानकराी दिए ।
कार्यक्रममा वडाभित्र रहेका रमन्टार मावि र रोटरी माविमा टाढाटाढाबाट अध्ययनका लागि आउने जेहेन्दार छात्रछात्राहरुलाई २ लाख बराबरको २३ वटा साईकल वितरण गरिएको थियो । टाढाबाट आउने विद्यार्थीहरुलाई लक्षित गरी वडा कार्यालयले खरिद गरेको २३ वटा साइकल वितरण गरिएको हो । साइकल खरिदमा लागि वडाले २ लाख रुपैयाँ खर्च गरेको छ ।
मनहरी ७ का वडाध्यक्ष तितुङको अध्यक्षतामा भएको कार्यक्रममा जिल्ला समन्वय समितिका उपप्रमुख सानुकाजी लुईटेल, नेपाली कांग्रेस मकवानपुरका सभापति बुद्ध लामा, मनहरी गाउँपालिका कावा अध्यक्ष शिवप्रसाद खनाल, नेपाली कांग्रेस मनहरी गाउँपालिका सभापति प्रकाश बर्तौला, नेकपा एमाले मनहरी अध्यक्ष नवीन सुवेदी, मनहरी गाउँपालिकाका निवर्तमान अध्यक्ष एकराज उप्रेती, मनहरी शिक्षा श्रोतव्यक्ति विदुर थापा, मनहरी ५ नम्बर वडा अध्यक्ष दीपेन्द्र अधिकारी, मनहरी ७ का वडा सदस्य नवराज सुवेदी, मनहरी गाउँपालिकाका प्रमुख प्रशासकीय अधिकृत मोहनकुमार श्रेष्ठ, डिपार्ट सामुदायिक वन मनहरीका अध्यक्ष डम्बरबहादुर मोक्तानलगायतकाे उपस्थिति थियाे ।
मकवानपुर । नारायणी बहुउद्देश्यीय सहकारी संस्था लिमिटेड हेटौंडाको २७ औं वार्षिक साधारणसभा शनिबार भएको छ । सहकारीका अध्यक्ष जंगबहादुर गुरुङले आव २०७९/८० को वार्षिक प्रतिवेदन र आव २०८०/८१ को नीति तथा कार्यक्रम, सचिव नारायणप्रसाद खतिवडाले आ.व. २०७९/८० को लेखापरीक्षण प्रतिवेदन, लेखा सुपरिवेक्षण समितिका संयोजक धर्मप्रसाद मिश्रले आव २०७९/८० को आन्तरिक लेखापरीक्षण प्रतिवेदन, ऋण उपसमितिका संयोजक रामचन्द्र अर्यालले आव २०७९/८० को ऋणको प्रतिवेदन र व्यवस्थापक महेश अधिकारीले आव २०८०/८१ को लागि प्रस्तावित आयव्यय विवरण साथै संस्थाको आन्तरिक नीति तथा सदस्य भेटघाट कार्यविधी र संरक्षित पुँजी फिर्ता कोष कार्यविधी प्रस्तुत गरेकोमा साधारणसभाले पारित गरेको छ ।
२०५३ सालमा स्थापित सहकारीको कूल बचत २३ करोड ४४ लाख ४६ हजार, जगेडा कोष दुई करोड १८ लाख ७८ हजार र कूल ऋण लगानी २३ करोड ५९ लाख ७३ हजार रुपैंया रहेको छ । भवन, जग्गासहित सहकारीको कूल सम्पती ३६ करोड ६० लाख ३१ हजार तथा अन्य कोष ६३ लाख ९१ हजार रुपैंया छ । एक हजार एक सय ३३ महिलासहित दुई हजार दुई सय ५९ जना शेयर सदस्य रहेको सहकारीको ६ करोड १८ लाख ८६ हजार शेयर पुँजी रहेको छ ।
साधारणसभामा प्रमुख अतिथि ललित घलानले सहकारीहरु बचत र ऋणमा सिमित नभई उद्योगहरु खोल्न ध्यान दिनुपर्ने बताए । ‘नेपालको संविधानमै समाजवाद उन्मुख रहने उल्लेख छ,’ उनले भने, ‘त्यसैले देश विकासको लागि सहकारीहरुको भूमिका र महत्व धेरै रहेको छ ।’ आमनागरिकलाई धेरै सुपथ पसलको आवश्यक्ता देखिएको भन्दै प्रमुख घलानले त्यस्ता पसल खोल्दै कृषकहरुको उत्पादनलाई विक्री वितरण गर्न आग्रह गरे ।
जिल्ला समन्वय समिति मकवानपुरका प्रमुख ललित घलानको प्रमुख आतिथ्य तथा नारायणी बहुउद्देश्यीय सहकारीका अध्यक्ष जंगबहादुर गुरुङको सभाध्यक्षतामा भएको साधारण सभामा हेटौंडा उपमहानगरपालिका सहकारी शाखा प्रमुख हिमप्रसाद पौडेल, हेटौंडा उपमहानगरपालिका ९ का वडा सदस्य विष्णु राना, निवर्तमान वडा अध्यक्ष लक्ष्मणप्रसाद भण्डारी, राष्ट्रिय सहकारी महासंघका पूर्व संचालक बद्री लम्साल, मकवानपुर जिल्ला बहुउद्देश्यीय सहकारी संघका अध्यक्ष रामहरी न्यौपाने, दिब्यतारा बहुउद्देश्यीय सहकारी संस्था लिमिटेड हेटौंडाका अध्यक्ष डा. गणेश लामा, शिवम् सिमेन्टका बिक्रम खतिवडा, कुष्माण्ड त्रिवेणीधाम विकास समितिका अध्यक्ष ईश्वरी न्यौपाने, नारायणी सहकारीका उपाध्यक्ष रामचन्द्र दाहाल लगायतकाे उपस्थिति रहेकाे थियाे ।
मकवानपुर । युवा बचत तथा ऋण सहकारी संस्थाको बचत रकम १८ करोड ८ लाख ११ हजार ५ सय ७१ रुपैयाँ पुगेको छ । गत वर्षको शेयर सदस्य संख्या २ हजार २ सय ३६ बाट वृद्धि गरी २ हजार ५ सय ९२ पुऱ्याईएको संस्थाले जनाएको छ ।
शनिबार भएको साधारण सभामा यस्तो प्रतिवेदन सार्वजनिक गरिएको हो । कार्यक्रममा बागमती प्रदेश सभा सदस्य लक्ष्मी श्रेष्ठले सहकारीहरू महिलाको जिवनस्तर उकास्न सहयोगी हुनुपर्ने बताएकी छिन् । युवा बचत तथा ऋण सहकारी संस्थाको १७ औं बार्षिक साधारण सभामा प्रदेश सभा सदस्य श्रेष्ठले यस्तो बताएकी हुन् ।
साधारण सभामा हेटौंडा उपमहानगरपालिकाका सहकारी शाखा प्रमुख हिम शर्मा पौडेलले सहकारी घर आँगनको बैंक भएको बताए । रोजगार सिर्जना गर्न देखि व्यवसायिक प्रगति पनि गरेको उनले बताए । हेटौंडा उपमहानगरपालिकाको नीति विधि र सिद्धान्तसंग मेल नखाएमा नगरपालिकाले कुनै पनि हालतमा नछाड्ने पौडेलले बताए । “सहकारीले ऋण, बचत व्याज मात्रै हैन, आम्दानीमा जोड्ने नीति ल्याउनु पर्छ, मन्दीमा सहकारीको भूमिका के हो ?” पौडेलले भने । सहकारीले काम गर्ने बानीको विकास गर्न पर्ने उनले बताए ।
कार्यक्रममा सहकारी अध्यक्ष राजुप्रसाद गौतमले आर्थिक वर्ष २०८०/२०५१ को वार्षिक लक्षित कार्यक्रमहरु प्रस्तुत गरेका थिए । यस आवमा सहकारीले शेयर सदस्य २ हजार ५ सय ९२ बाट वृद्धि गरी ३ हजार १ सय पुन्याउने, संस्था अभिकर्ता भई सदस्य तथा कर्जा बिमा कार्य गरिने, सहकारीका कर्मचारीहरुलाई १ लाख, २ लाख र ७ लाखको विमा संस्थाले गरिदिने, काउन्टर तथा रुट विमा गरि सुरक्षाको व्यवस्था गरिने, बैंक, वित्तिय संघ संस्था संगको सहकार्य र कारोबारलाई निरन्तरता दिईने, सुविधाकर्जा वापत सदस्यको जम्मा बचतको ८० प्रतिशत जुनसुकै बेलामा पनि उपलब्ध गराईने र सो कर्जामा सेवा शुल्क नलाग्ने, कर्जा लगानीको सिमा संस्थाको प्राथमिक पुजिकोषको आधारमा नियमानुसार गरिने योजना रहेको अध्यक्ष गौतमले बताए । यसैगरी संचालक समिती, उप समिती तथा शेयर सदस्यलाई उत्कृष्ट सहकारी अध्ययन अवलोकन भ्रमणको व्यवस्था गरिने गौतमले बताए । १५ हजार शेयर रकम नपुगेका सदस्यलाई पुर्याउनका लागि पहल गर्दै शेयरको माथिल्लो सिमा एक लाखसम्म प्रति सदस्य शेयर दिइनेछ । कर्जाको समय सिमालाई कर्जाको प्रकृति हेरि १ वर्ष देखि १० वर्षसम्मको समय सिमा कायम गरिएकोछ । सहकारीले विभिन्न बिधाम उत्कृष्ट शेयर सदस्यहरूलाई सम्मान समेत गरेको छ ।
मकवानपुर । ‘हेटौंडा साइकल रन’ दोश्रो सस्करण २०८० को उपाधी आशिष थापा मगरले हात पारेका छन् । हेटौंडा उपमहानगरपालिकाको आयोजनामा शनिबार भएकाे रन प्रतियाेगितामा सहभागीलाई पछि पार्दै उपाधी हेटौंडा–६ का आशिषले हात पारेका हुन् ।
प्रथम भएका आशिषले नगद ५० हजार रुपियाँ प्राप्त गरेका छन् । प्रतियोगितामा हेटौंडा–६ का हरेराम राई द्वितीय ह्ँदा, हेटौंडा–२ का विबै सिं मोक्तान तृतीय स्थान बनाउन सफल भए । यसैगरी हेटौंडा–४ का राजिव ठाकुर र प्रदिप थापाले प्रोत्साहन पुरस्कार प्राप्त गरेका छन् । साइकल रनमा द्वितीय भएका राईले ३० हजार, तृतिय भएका मोक्तानले २० हजार हात पारेका छन् । प्रतियोगितामा ठाकुर र थापाले प्रोत्साहन पुरस्कार स्वरुप ५/५ हजार रुपियाँ हात पारेका आयाेजकले जनाएकाे छ ।
यसैगरी प्रतियोगितामा सहभागी भएका महिलाहरुलाई प्रोत्साहन स्वरुप २/२ हजार रुपियाँ पुरस्कार प्रदान गरिएकाे थियाे । हेटौंडा–४ हुप्रचौरबाट सुरु भएको साईकल रन कान्तिलोकपथ हुँदै शिवम सिमेन्ट रोड, हेटौंडा–फापरवारी सडक हुँदै नागश्वती, कमाने, गर्दोही हुँदै हुप्रचौरमा आइपुगेको थियो । प्रतियोगिताको जिल्ला समन्वय समितिका प्रमुख ललित घलान र हेटौंडा उपमहानगरपलिकाका नगर प्रमुख मीनाकुमारी लामाले संयुक्त रुपमा उद्घाटन गरेका थिए ।
प्रतियोगिताको उद्घाटन गर्दै समन्वय समितिका प्रमुख घलानले स्वास्थ्थका लागि साईकल यात्रा उपयोगी रहेकाले दैनिक जिवनमा बिलासिताका साधन छोडेर साईकल यात्रामा जोड दिन जरुरी रहेको बताए । उनले उपमहानगरले थालेको अभियानलाई सार्थक बनाउँन नगरवासीको सहयोग आवश्यक रहेको भन्दै नियमित साईकल यात्राले मानव जिवनमा फाईदा पुग्ने बताए ।
उपमहानगरपालिकाले गत बर्षबाट प्रतियोगिताको सुरुवात गरेको हो । उपमहानगरले नगरवासीलाई साईकलको प्रयोगमा प्रोत्साहन गर्ने उद्देश्य अनुसार प्रतियोगिता सञ्चालन गर्दै आएको जनाएकाे छ ।