मकवानपुर । बागमती प्रदेश लोकसेवा आयोगका सदस्य सुदर्शन ढकालले राजीनामा दिएका छन् । प्रदेश प्रमुख दीपकप्रसाद देवकोटा समक्ष शुक्रवार ढकालले राजीनामा बुझाएका हुन् ।
प्रदेश लोकसेवा आयोग ऐन, २०७६ को दफा ६ (क) अनुसार ११ कार्तिकबाट लागू हुने गरी उनले राजीनामा बुझाएका हुन् ।प्रदेश सरकारले आफूभन्दा कनिष्ठलाई अध्यक्ष बनाउने तयारी गरेको भन्दै राजिनामा दिएको उनले बताए । प्रदेश सरकारले सहसचिव स्तरको व्यक्तिलाई प्रदेश लोकसेवा आयोगको अध्यक्ष बनाउन लागेकाे बताइएकाे छ ।
प्रदेशका मुख्यमन्त्री, प्रमुख प्रतिपक्षी दलका नेता र सभामुख सदस्य रहेको ३ सदस्यीय समितिले आयोगको अध्यक्ष नियुक्त गर्ने संवैधानिक प्रावधान रहेकाे छ । प्रदेश स्वास्थ्य निर्देशनालय हेटौंडाका पूर्व निर्देशक महेश्वर श्रेष्ठलाई आयोगको अध्यक्ष बनाउने तयारीमा प्रदेश सरकार रहेकाे बताइएकाे छ ।
मकवानपुर । बागमती प्रदेशकी उद्योग, वाणिज्य, भूमि तथा प्रशासन मन्त्री शुकमाया तामाङले नापी कार्यालय मकवानपुरको अनुगमन गरेकी छन्।
बिहीबार हेटौंडा उपमहानगरपालिका–२ स्थित कार्यालयकाे अनुगमन गरेकी हुन् । अनुगमनका क्रममा मन्त्री तामाङ्ले कार्यालयका समस्याकाे जानकारी लिइन् । साथै उनले कार्यालयलाई आवश्यक सहयोग गर्ने प्रतिबद्धता समेत व्यक्त गरिन्।उनले सेवा प्रणालीलाई जनतामा सहज रूपमा उपलब्ध गराउन कर्मचारीहरुलाई निर्देशन पनि दिइन्।
२०३२ सालमा नेपालमा पहिलो पटक नयाँ प्रविधि (ट्रिगोनोमेट्रिकल पोइन्ट) द्वारा नापी सुरु भएको ऐतिहासिक जिल्ला मकवानपुरमा ‘सर्भे पार्क’ तयार गर्न मन्त्रालयबाट बजेट बिनियोजन गरिएको छ। अनुगमनको क्रममा नापी कार्यालय मकवानपुरका निमित्त प्रमुख प्रकाश घिमिरे र नापी अधिकारी रामसोगारथ महतो लगायतका कर्मचारीहरु उपस्थिति रहेकाे थियाे ।
मकवानपुर । बागमती प्रदेश प्रमुख दिपक प्रसाद देवकाेटाले २ वटा विधेयक प्रमाणीकरण गरेका छन् भने एउटा विधेयक फिर्ता पठाएका छन् ।
प्रदेश प्रमुख देवकाेटाले बिहीबार प्रदेश सभाबाट पारित भएकाे प्रदेश स्वास्थ्य सेवा ऐन, २०७५ लाई संशोधन गर्न बनेको विधेयक तथा प्रदेश हस्तकलाग्राम स्थापना तथा सञ्चालनको सम्बन्धमा व्यवस्था गर्न बनेको विधेयक प्रमाणीकरण गरेका हुन् ।
प्रदेश सभाको ७ असोज २०८१ को बैठकबाट पारित भई १८ असोज २०८१ मा प्रमाणीकरणको लागि नेपालको संविधानको धारा २०१ को उपधारा (१) बमोजिम प्राप्त भएकाे उक्त विधेयकहरु संविधानको धारा २०१ को उपधारा (२) बमोजिम प्रदेश प्रमुखबाट प्रमाणीकरण भएकाे हाे । प्रमाणीकरण भएकाे विधेयक प्रदेश राजपत्रमा प्रकाशित भएपछि ऐनकाे रुपमा लागू हुनेछ ।
यसैगरी प्रदेश प्रमुखले प्रदेश सभाबाट पारित भई प्रमाणीकरणको प्राप्त “प्रदेश कृषि विकास सम्बन्धमा व्यवस्था गर्न बनेको बिधेयक” नेपालको संविधानको धारा २०१ को उपधारा (३) बमोजिम पुनर्विचारकाे लागि प्रदेश सभामा फिर्ता गरेका छन् ।
बिहीबार प्रदेश प्रमुख देवकाेटाले प्रदेश सभा सभामुखलाई सम्बाेधन गरी उक्त विधेयक फिर्ता गरेका हुन् । फिर्ता गरिएकाे विधेयक सभामा छलफल गरी संसाेधनसहित पारित भइ पुनः प्रमाणीकरणकाे लागि पठाउनु पर्ने संवैधानिक व्यवस्था छ ।
मकवानपुर । मकवानपुर प्रहरीले मनहरीबाट तास खेलिरहेका ८ जनालाई नियन्त्रणमा लिएकाे छ । इलाका प्रहरी कार्यालय मनहरीबाट खटिएकाे टोलीले बुधबार राति जुवा खेलिरहेको उनीहरुलाई नगद ४५ हजार रुपैयासहित नियन्त्रणमा लिएको हाे ।
प्रहरीले नगद तथा ताससहित मकवानपुर मनहरी ६ वस्ने ४७ वर्षीय रेशम तामाङ, २४ वर्षीय रविन मोक्तान, ५३ वर्षीय गोपीलाल मोक्तान, ४२ वर्षीय अशोक राई, ४० वर्षीय कृष्ण थिङ, ४० वर्षीय कृष्ण पाख्रिन, ४५ वर्षीय सन्तोष राई र ३३ वर्षीय विष्णु पाख्रिनलाई नियन्त्रणमा लिएकाे जनाएकाे छ ।
मनहरी गाउँपालिका वडा नम्वर ६ भुलचोकबाट हार जित हुने गरि जुवा खेलिरहेको अवस्थामा नगद ४५ हजार ४ सय ४५ सहित ८ जनालाई नियन्त्रणमा लिएको जिल्ला प्रहरी कार्यालय मकवानपुरका डिएसपी श्यामु अर्यालले जानकारी दिए ।
मकवानपुर । बागमती प्रदेश प्रहरी कार्यालय हेटौंडाले ६९ औं प्रहरी दिवस, २०८१ विभिन्न कार्यक्रम आयोजना गरी मनाएको छ ।
कार्यालयले मंगलबार र बुधबार दुई चरणमा विभिन्न कार्यक्रम गरी दिवस मनाएको हो । प्रहरी दिवस कार्यक्रमकाे पहिलो दिन मंगलबार श्रद्धाञ्जली तथा मृतक प्रहरीका परिवारलाई सम्मान कार्यक्रम गरेकाे थियाे । यसैगरी बुधबार विभिन्न विधामा उत्कृष्ट हुने, खेलकुद कार्यक्रममा उत्कृष्ट हुनेहरु र पुर्व प्रहरीलाई सम्मानसहित पुरस्कृत गरिएको थियो ।
प्रहरी दिवस कार्यक्रममा बागमती प्रदेश मुख्यमन्त्री बहादुर सिंह लामाले प्रदेश सरकारको स्थापनासँगै प्रदेशको शान्ति सुरक्षा कायम गर्ने जिम्मेवारीमा प्रदेश प्रहरीले काम गर्दै आइरहेको बताए । ‘प्रदेश प्रहरीलाई प्रभावकारी एवम् व्यवस्थित बनाउन सरकारले अभिभावकको भूमिका निर्वाह गर्दै आइरहेको छ’ उनले भने ।
यसैगरी बागमती प्रदेशका आन्तरिक मामिला तथा कानूनमन्त्री सुरज चन्द्र लामिछानेले प्रहरीको साहस, लगनशीलता र समर्पणले नै सबैको हरेक क्षण सुरक्षित भएको बताए । ‘निलो पोशाकलाई सम्मान गर्दै विभिन्न चुनौतिको सामना, हरेक परिवर्तनको साक्षि, सशस्त्र द्वन्द, असहज परिस्थिति, प्राकृतिक विपद्, दुर्घटनामा पनि नागरिक सेवामा समर्पित रहदैं सदैव अग्रपक्तिंमा रहि मुस्कान सहितको सेवा दिदै अहोरात्र खटिरहने प्रहरी संगठनलाई बागमती प्रदेश सरकारको निरन्तर सहयोग र समन्वय रहि रहनेछ’ उनले भने ।
बागमती प्रदेश प्रहरी कार्यालयका प्रहरी प्रमुख प्रहरी नायव महानिरीक्षक कृष्ण हरी शर्माले प्रदेशको शान्ति सु–व्यवस्थालाई मजबुत बनाउने कार्यमा बागमती प्रदेश सरकारबाट सहयोग भइरहेकाे बताए ।
उत्कृष्ट अनुसन्धानकतातर्फ काभ्रेस्थित इलाका प्रहरी कार्यालय मंगलटारका प्रहरी निरीक्षक कृष्ण गिरी, उत्कृष्ट विपद् व्यवस्थापकतर्फ जिल्ला प्रहरी काभ्रेका प्रहरी उपरीक्षक बसुन्धरा खड्का र काभ्रे जिल्लास्थित ईलाका प्रहरी कार्यालय देविटारका प्रहरी हवल्दार शम्भु बोहरा पुरस्कृत भए ।
यसैगरी पुरस्कृत हुनेहरुमा उत्कृष्ट प्रहरी कार्यतर्फ हेटौंडास्थित प्रहरी चौकी रातोमाटेका प्रहरी हवल्दार सुरेन्द्र साह, उत्कृष्ट वाह्य प्रशिक्षकको रुपमा बागमती प्रदेश प्रहरी तालिम केन्द्र दुधौलीका प्रहरी सहायक निरीक्षक कर्ण बहादुर तामाङ र उत्कृष्ट प्राविधिक जिल्ला प्रहरी कार्यालय काभ्रेमा कार्यरत प्रहरी सहायक निरीक्षक नवराज कार्की रहेका छन् ।
यस्तै नेपाल प्रहरी कार्यदक्षता मूल्याङ्कन २०८१ मा जिल्ला प्रहरी कार्यालय सिन्धुलीको नागरिक सहायता कक्षको उत्कृष्ट व्यवस्थापन गर्ने प्रहरी उपरीक्षक गोविन्द राज काफ्ले र सिन्धुलीको गोलन्जोर गाउँपालिका–७ स्थित नेपाल प्रहरी संगठनको सेवा प्रवाहलाई सरल, सहज र प्रवाहलाई प्रभावकारी बनाउन पुुर्याएको योगदानको कदर गर्दै रवि आचार्यलाई प्रशंंसा पत्र प्रदान गरिएको छ ।
नेशनल गोल्ड टेलिभिजन हेटौंडाका प्रबन्ध निर्देशक उज्वल चौलागाई, टिम टिभी हेटौंडाका प्रमुख रामशरण दुलाल, सिन्धुलीका पूर्वप्रहरी निरीक्षक राम बहादुर हायू र मकवानपुरका पूर्व प्रहरी सहायक निरीक्षक रामसिंह तामाङलाई कदरपत्रद्वारा सम्मानित गरिएको छ ।
यस्तै बागमती प्रदेश प्रहरीस्तरीय फूटबल, भलिबल, टेवलटेनिस, क्रिकेट, बास्केट बल, डोरीतान र ब्याडमिन्टन प्रतियोगितामा प्रथम तथा द्वितीय हुने प्रहरी कर्मचारीहरुलाई पुरस्कार वितरण गरिएको छ ।
यसैगरी प्रहरी दिवसकाे अवसरमा भएकाे रक्तदान कार्यक्रममा ४५ जनाले रक्तदान गरेका छन् । उक्त कार्यक्रममा बागमती प्रदेशका मुख्यमन्त्री बहादुर सिंह लामासहित ४५ जनाले रक्तदान गरेका थिए । बागमती प्रदेश प्रहरी प्रमुख प्रहरी नायव महानिरीक्षक कृष्ण हरि शर्मासहित ४१ जना पुरुष र ४ महिला कर्मचारीले रक्तदान गरेका हुन् ।