
१.
मान्छे नकारात्मक मात्र हेर्छ
छन्द: इन्द्रबज्रा
मान्छे नकारात्मक मात्र खोज्छ
जे छन् नराम्रा तब हेर्छ‚ रोज्छ
कस्तो अनौठो मन पाल्छ मान्छे
सोच्दै नसोची मल फाल्छ मान्छे ।१।
हुन्छन् अनेकौ गुण वा स्वभाव
खोतल्छ मान्छे कम वा अभाव
आफ्नो भए बेस्कन टाल्छ मान्छे
भेटे अरुको त पखाल्छ मान्छे ।२।
केले गरेको बुझिसक्नु छैन
भन्दा नसुन्ने‚ भनिसक्नु छैन
बेकारमा लड्छ र जुध्छ मान्छे
उल्टो नराम्रो अनि बुझ्छ मान्छे ।३।
राम्रो भनेमा उपदेश बुझ्छ
“को होस् तँ” भन्दै अघि सर्छ‚ जुध्छ
“सोचौं सकारात्मक” भन्नुहुन्न
सामान्य मान्छे पनि गन्नुहुन्न ।४।
बिर्सौं भन्यो मान्छ कहाँ र चित्त
यस्तै छ मेरो परिवेश वृत्त
आफन्त बन्दा पनि टेर्न छाड्छ
“सत्चित्त बेकार” भनेर भाँड्छ ।५।
जे छन् नराम्रा सब देख्छ‚ छुन्छ
जान्ने र बुझ्ने म हुँ मात्र भन्छ
सद्भाव बेचेर विकार किन्छ
लाग्दैछ मान्छे हुन बिर्सिइन्छ ।६।
जस्तो छ आफूँ सब देख्नथाल्छ
शंका र कुण्ठा मनभित्र पाल्
छराम्रो छ देख्दा तर रुन्छ भित्र
देखावटी छन् सब इष्टमित्र ।७।
मान्छे नकारात्मक मात्र हेर्
छबोली नराम्रो मुख मात्र फेर्छ
राम्रो भएमा सयचोटि केर्छ
हेपे‚ हकारे अनि मात्र टेर्छ ।८।
केले छ यस्तो परिवेश हाम्रो
के गर्न सक्दा हुनजान्छ राम्रो
मेटे नकारात्मक सोचलाई
होला सबैको अनि पो भलाइ ।९।
२.
जब मानिस बिर्सन थाल्दछ मानवता
छन्द: भ्रमरावली
तन कोमल निर्मल शान्त सुधो छ त जो
दुख दिन्छ‚ पिरोल्छ समाज बनी बलियो
यसरी पथभ्रष्ट भएर त जान्छ कता
जब मानिस बिर्सन थाल्दछ मानवता ।१।
जिउने कसरी सहजै कसको भरमा
असुरक्षित‚ लाञ्छित छिन् तनया घरमा
किन रक्षक भक्षक बन्दछ दुष्ट पिता
जब मानिस बिर्सन थाल्दछ मानवता ।२।
जब फाल्दछ एसिड दुष्ट मुहार भरि
खलकर्म असैह्य छ त्यो सहने कसरी
युवती मन भत्किरहन्छ अनर्थ यहाँ
जब मानिस बिर्सन थाल्दछ मानवता ।३।
परिराख्दछ चोट सधैँ अनुहार भरि
अति चिन्तित छिन् गृहिणी घरमा यसरी
उनको मन शान्त हुने कसरी र कता ?
जब मानिस बिर्सन थाल्दछ मानवता ।४।
बधुले नदिए धन जल्छ शरीर किन?
धनमा मरिमेट्दछ‚ गिर्दछ‚ मार्छ किन?
किन मानव पाल्दछ क्रूर तथा पशुता?
जब मानिस बिर्सन थाल्दछ मानवता ।५।
यदि मारिनु पर्छ अकार्थ बलात्कृत भै
युवती‚ वनिता जगबाट सुरक्षित खै?
यसरी असुरक्षित दुखित छन् दुहिता
जब मानिस बिर्सन थाल्दछ मानवता ।६।
महिला यदि एकल औ कमजोर परे
मलमूत्र खुवाउँछ‚ भन्दछ डायन रे
परित्यक्त र बर्जित यो ननिको छ प्रथा
जब मानिस बिर्सन थाल्दछ मानवता ।७।
यसरी सदियौ कसरी सहने तिनले
हक खोज्दछ त्यो समतामय जीवनले
अब जाग्रित हौं अनि मास्न उठौं क्रुरता
जब मानिस बिर्सन थाल्दछ मानवता ।८।
३.
भित्री संसार
छन्द: उपजाति
यो चित्तको रूप छ भिन्न भिन्न
थाहै बिना बन्दछ झट्ट खिन्न
आफ्नै दुखेको पनि हुन्न पत्तो
आफ्नाहरूबाट थपिन्छ अत्तो।१।
मैले बुझेको मनको चरित्र
आफै छ आफ्नो कटु शत्रुमित्र
जे जे कुरा सञ्चय गर्छ मान्छे
त्यस्तै कुरा दिन्छ र भर्छ मान्छे ।२।
विश्वासमा सङ्कट देखिदैछ
आदर्शको चिन्तन फेरिदैछ
खोलिन्न साँचो मन मित्रलाई
सोचिन्छ यो जीवनको भलाइ ।३।
देखिन्न हाँसो‚ सहबास‚ कार्य
सुन्ने कुरामा पनि हुन्न धैर्य
बिर्स्यो खुसी‚ खिन्न छ यो समाज
बिश्वासिलो मानिस छैन आज।४।
भित्रै हरायो र खुबै करायो
कुण्ठा‚ उदासी मनमा भरायो
यो भित्रको विश्व भयो विचित्र
टेढिन्छ मान्छे तब भित्र भित्र।५।
बद्लिन्छ मान्छे‚ मन बद्लिइन्छ
आफ्नो हुँदो झट्ट छिनेर लिन्छ
मान्छे अनौठो, दुविधा छ धेर
अमूल्य यो जीवन जान्छ खेर।६।
आलोचना गर्छ सुधार छैन
आफै दुखी बन्छ‚ बिगार्छ चैन
औला ठड्याइन्छ असाध्य धेर
उर्जा अनावश्यक जान्छ खेर ।७।
देख्दा छ राम्रो‚ पिर हुन्छ भित्र
यो भित्रको चित्र अझै विचित्र
छाडा छ सारै घिन लाग्छ धेर
हिड्ने कताबाट? सधैं बचेर ।८।
अदृश्य यो घातक विश्वबाट
लुक्दै र छिप्दै पुगिइन्छ घाट
यो भित्रको जीवन हो तिलस्मी
खोजिन्छ भित्रैतिरबाट रश्मि ।९।
विराटनगर
मकवानपुर । सत्तारूढ नेपाल कम्युनिष्ट पार्टी (नेकपा) को सचिवालय आज बस्दैछ। अपराह्न ४ बजे प्रधानमन्त्री निवास बालुवाटारमा डाकिएको बैठकमा मन्त्री हेरफेर तथा पछिल्लो मन्त्रिपरिषदले गरेको केही नियुक्तिका विषयमा छलफल हुनेछ।
पार्टीभित्र छलफल गरेर मात्रै महत्वपूर्ण राजनीतिक नियुक्ति गर्ने भनिए पनि प्रधानमन्त्री ओली र कार्यकारी अध्यक्ष पुष्कमल दाहाल ‘प्रचण्ड’बीच मन्त्रिपरिषद्को पछिल्लो नियुक्तिअघि पटक-पटक छलफल भए पनि त्यसबारे समझदारी थियो वा थिएन भन्ने बाहिरिएको छैन। प्रचण्डले अहिलेसम्म आफ्नो धारणा सार्वजनिक नगरे पनि उनी निकट नेताहरूले असन्तुष्टि जनाइसकेको विषय बाहिरिएका छन्।
बिहीबारको मन्त्रिपरिषद बैठकले पूर्वअर्थमन्त्री डा.युवराज खतिवडालाई अमेरिकाको राजदूत, मुख्यसचिवमा शंकरदास बैरागी र निवर्तमान मुख्यसचिव लोकदर्शन रेग्मीलाई बेलायतको राजदूत बनाउने निर्णय गरेको थियो।
भदौ २६ गते बसेको स्थायी कमिटीको बैठकले सरकारले महत्वपूर्ण निर्णय गर्नुपूर्व सचिवालयका सदस्यको सुझाव, अध्यक्षद्वयको आपसी परामर्श र सहमतिको आधारमा गर्नुपर्ने निर्णय गरेको थियो। स्थायी कमिटिकाे निर्णय विपरित निर्णय भएपछि नेकपाभित्र गत भदौ अन्तिम साताबाट मत्थर भएको विवाद फेरि बल्झिन सक्ने अनुमान गर्न थालिएकाे छ।
यस्तै आजको सचिवालय बैठकमा मन्त्रिमण्डल हेरफेरबारे नेकपाअध्यक्षद्वयबीच अहिलेसम्म भएको छलफल र समझदारीबारे पनि छलफल हुने बताइएकाे छ।
इन्डियन प्रिमियर लिग (आईपीएल) अन्तर्गत शुक्रबार राती सम्पन्न खेलमा चेन्नाई सुपर किङ्स पराजित भयो । दुबई अन्तराष्ट्रिय क्रिकेट रंगशालामा हिजो उ सनराइजर्स हैदरावादसँग ७ रनले पराजित भएको हो । चेन्नाई सुपर किङ्सकाे आईपीएलमा याे लगातार तेस्रो खेलमा हार हाे ।
हैदराबादले दिएको १ सय ६५ रनको लक्ष्य पछ्याएको चेन्नईले २० ओभरमा ५ विकेट गुमाएर १ सय ५७ रनमा समेटियो । चेन्नईका लागि रबिन्द्र जडेजाले ५० रन तथा कप्तान महेन्द्र सिंह धोनीले अपराजित ४७ रन जोडे पनि टोलीलाई जीत दिलाउन सकेनन । हैदराबादका नटराजनले २ विकेट लिए ।
टस जितेर पहिले ब्याटिङ गरेको हैदराबादका प्रियम गर्गले ५१ रन जोडेपछि टोलीले २० ओभरमा ५ विकेट गुमाएर १ सय ६४ रन बनाएको थियो । जितसँगै ४ खेलबाट ४ अंक जोडेको हैदराबाद अंक तालिकाको चौंथो स्थानमा उक्लिएको छ । ४ खेलबाट २ अंक मात्रै जोडेको चेन्नई पुछारमा रहेको छ ।
आईपिएल क्रिकेटमा आज दुई खेल हुनेछन् । आबुधाबीमा हुने खेलमा रोयल च्यालेन्जर्स बैंग्लोर र रोजस्थान रोयल्स भिड्दा सारजहामा दिल्ली क्यापिटल्सको सामना कोलकाता नाईट राईडर्सले गर्नेछ । एजेन्सी
मकवानपुर । वाणिज्य बैंकहरुले ग्राहकरुलाई आर्कषण गराउन विभिन्न योजनाहरु ल्याउने गरेका छन् । यसै मध्यकाे याेजना बैंकले ग्राहकहरुलाई बचत खाता खोल्दैमा बीमा सुविधा दिने गरेका छन् । बैंकले ग्राहकहरुलाई एटीएम कार्ड,मोवाइल/अनलाइन बैंकिङ्गको शुल्क, कर्जाको ब्याजदरमा छुट, उच्च व्याजदर, निशुल्क डिम्याट तथा मेरो शेयर खाता समेत खोल्न सकिने सुविधा दिइरहेका छन् । त्यसमध्येको आकर्षक योजना भनेको बीमा सुविधा रहेको छ ।
बचतकर्ताले बैंकमा खाता खोल्दैमा घातक रोगको उपचार खर्च, दुर्घटना बीमा,मेडिकल बीमा र म्यादी जीवन बीमाको समेत सुविधा दिइरहेका छन् । केहि समय अघि बैंकहरुले निशुल्क बीमा भन्दै बचत खाताको योजना सार्वजनिक गरेका थिए। तर बीमा समितिले बीमा निशुल्क नहुने भन्दै आपत्ति जनाएपछि बैंकहरुले निशुल्क भन्ने शब्द हटाएर बीमाको सुविधा सहितको बचत खाता सञ्चालन गरिरहेका छन् । बैंकहरुमा बचत खाता खाेल्दैमा जाखिम समेत बहन हुने भएपछि सर्वसाधारणहरु समेत त्यस्ता योजना तर्फ आकर्षित हुन थालेका छन् ।
कुन बैंकमा खाता खोल्दा कति/कस्ताे बीमा सुविधा ?
बाणिज्य बैंकहरुले खचतकर्ताहरुलाई अधिकतम २६ लाख सम्मको बीमा सुविधा दिइरहेको पाएको छ । जीवन तथा निर्जीवन बीमा कम्पनीहरुसंगको सहकार्यमा बैंकहरुले उक्त सूविधा दिइरहेका छन् ।
वणिज्य बैंकहरुले उनीहरुको वेवसाइमा राखिएको सूचना आधारमा सबै भन्दा धेरै कुमारी बैंकले २६ लाख रुपैयाँ सम्ममो बीमा सुविधा दिने गरेको पाइएको छ । कुमारीले सुरक्षा बचत खातामा सो बराबरको बीमा सुविधा दिन जनाएको हो ।
यस्तै दोस्रोमा एनआईशि एशिया बैंकले आफ्नो बचत कर्ताहरुलाई २१ लाख रुपैयाँ बराबरको बीमा सुविधा दिईरहेको छ । एनआईसी एशियाले बचत कर्तालाई दुर्घटना बीमा वापत १० लाख रुपैयाँ, घातक रोगको लागि १० लाख र मेडिकल बीमा वापत १ लाख रुपैयाँ बराबरको बीमा सुविधा दिईरहेको छ ।
सिद्धार्थ बैंकले पनि बचतकर्तालाई १४ लाख रुपैयाँ सम्मको बीमा सुविधा दिइरहेका छन् । सिद्धार्थले मेडिकल इन्स्योरेन्स, दुर्घटना बीमा र १८ घातक रोग विरुद्ध बीमाको लागि सो बराबरको रकम बचतकर्तालाई दिनेछ ।
सानिमा बैंकले ५० हजार रुपैयाँको मेडिकल बीमा, १० लाख रुपैयाँ बराबरको दुर्घटना बीमा, ३ लाख रुपैयाँ बराबरको घातक रोगको बीमा र २५ हजार रुपैयाँ म्यादी जीवन बीमा गरी कुल १३ लाख ७५ हजार रुपैयाँको बीमा सुविधा दिइरहेको छ ।
यसैगरी सनराइज बैंकले बचत कर्ताको ५ लाख रुपैयाँको घातक रोगको बीमा र १ लाख रुपैयाँको मेडिकल बीमा सुविधा दिइरहेको छ । मेडिकल बीमाको रकममा २० हजार सम्म ओपीडी खर्च र ८० हजार रुपैयाँ सम्म हस्पिटल भर्ना भएमा उपचार खर्च पाउनेछन् ।
नविल बैंकले पनि बचत कर्तालाई म्यादी जीवन बीमा सहितको बीमा सुविधा दिईरहेको छ । बैंकले ७५ हजार रुपैयाँ बराबरको म्यादी जीवन बीमा,३ लाख रुपैयाँ बराबरको घातक रोगको बीमा गरी ३ लाख ७५ हजार रुपैयाँको सुविधा दिइरहेको छ ।
एनएमबी बैंकले घातक रोग विरुद्ध र दुर्घटना बीमा वापत १० लाख रुपैयाँ, एभेरष्ट बैंकले मेडिकल बीमामा १ लाख र दुर्घटना बीमा बापत ५ लाख गरी ६ लाख रुपैयाँ, हिमालयन बैंकले दर्घटना बीमा वापत ५ लाख, सिभिल बैंकले ५ लाख रुपैयाँको दुर्घटना बीमा र ५० हजारको मेडिकल बीमा सेवा दिनेछ । एनसीसी बैंकले पनि बचतकर्तालाई १० हजार रुपैयाँ बराबरको मेडिकल बीमा सुविधा दिइरहेको छ ।
मकवानपुर । पछिल्लो २४ घण्टामा थप ३ हजार ३ सय ७ जना कोरोना संक्रमित संक्रमणमुक्त भएका छन् । देशका विभिन्न आइसोलेसनबाट उनीहरू निको भएर घर फर्किएको स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले जानकारी दिए । योसँगै नेपालमा ६० हजार ६९६ जना संक्रमित उपचारपछि निको भएका छन् । नेपालमा संक्रमण मुक्त हुने दर ७३.६ प्रतिशत रहेको छ ।
बितेको २४ घण्टामा देशभर हालसम्मकै सर्वाधिक संख्यामा काेराेना भाइरसकाे संक्रमण थपिएकाे मन्त्रालयले जानकारी दिएकाे छ । शुक्रवार थप २ हजार ७२२ जनामा कोरोनाभाइरस संक्रमण पुष्टि भएको हाे । शुक्रबारको नियमित प्रेस ब्रिफिङमा स्वास्थ्य मन्त्रालयका प्रवक्ता गौतमले यससँगै देशभर सक्रिय संक्रमितको संख्या २१ हजार २३४ पुगेको जानकारी दिए ।
यस्तै आज शुक्रबारसम्म देशभर ९ हजार ४७४ संस्थागत आइसोलेशन र ११ हजार ७६० जना होम आइसोलेशनमा रहेका छन् । यसैगरी बितेको २४ घण्टामा काठमाडौं उपत्यकामा १६ सय ३८ जनामा कोरोनाभाइरस संक्रमण पुष्टि भएको छ । मन्त्रालयका अनुसार काठमाडौं १२८०, ललितपुरमा १६२, र भक्तपुरमा १९६ गरी कुल १६३८ जनामा कोरोना संक्रमण पुष्टि भएको हो ।
यसैगरी देशभर कोरोनाबाट थप ११ जनाको मृत्यु भएको छ भने मृतकको कुल संख्या ५२० पुगेको मन्त्रालयले जनाएको छ । आइसीयूमा २१० जना र भेन्टिलेटरमा २९ जना उपचाररत रहेका छन् ।