मकवानपुर । हेटौंडा बजार क्षेत्रकाे सडक फराकिलो बनाउने क्रममा घरटहरा भत्काइएकाे विषयसँग सम्बन्धित विवादमा सर्वोच्च अदालतले सरोकारवाला निकायबाट आवश्यक कागजात पेश गर्ने आदेश दिएको छ ।
सोमबार न्यायाधीश विनोद शर्मा र शान्तिसिंह थापाको संयुक्त इजलासले यसअघि माग गरिएका अभिलेख उपलब्ध नभएको जनाउँदै सडक विस्तारसम्बन्धी निर्णय, प्रक्रिया र आधारसँग जोडिएका सम्पूर्ण मिसिल फाइल अदालतमा पेश गर्न निर्देशन दिएको हो ।
अघिल्ला आदेशअनुसार कागजात नआएपछि पुनः मिसिल झिकाउने आदेश जारी गरिएको सर्वोच्च प्रशासनले जनाएकाे छ । सडक विस्तारसम्बन्धी कानुनी प्रक्रिया, निर्णय र अधिकारसँग जोडिएका कागजातको अध्ययनपछि मात्र थप सुनुवाइ अघि बढाइने सर्वोच्च अदालतको आदेशमा उल्लेख छ ।
हेटौंडा बजार क्षेत्रमा सडक विस्तारको काम अघि बढाइएपछि राष्ट्रिय स्वतन्त्र पार्टीकी नेतृ तथा पूर्वसांसद विन्दवासिनी कंसकारसहित छ जना स्थानीयले सम्पत्तिको अधिकार उल्लंघन भएको र क्षतिपूर्ति नदिइएको भन्दै सर्वोच्च अदालतमा रिट निवेदन दर्ता गराएका थिए । डिभिजन सडक कार्यालय हेटौंडा, हेटौंडा उपमहानगरपालिका र जिल्ला प्रशासन कार्यालय मकवानपुरलगायत निकायले सडक विस्तार प्रक्रिया अघि सारेपछि प्रभावित पक्ष मङ्सिर १६ गते सर्वोच्च अदालत पुगेका थिए । सो रिटमा सडक विभाग, सहरी विकास मन्त्रालय तथा भौतिक पूर्वाधार तथा यातायात मन्त्रालयलाई समेत विपक्षी बनाइएको छ ।
यसअघि सर्वोच्च अदालतले मङ्सिर ९ गते अल्पकालीन अन्तरिम आदेश जारी गरेको थियो । त्यसपछि मङ्सिर २६ गते न्यायाधीश मेघराज पोखरेलको इजलासले विपक्षीका नाममा कारण देखाऊ आदेश जारी गर्दै अन्तरिम आदेशलाई निरन्तरता दिएको थियो । सोही दिन न्यायाधीश कुमार रेग्मी र महेश शर्मा पौडेलको इजलासबाट पनि मिसिल झिकाउने आदेश भएको थियो ।
गत मंसिर २० गते शनिबार बिहान ५ बजेबाट हेटौंडा बजारको राप्ती रोडबाट बुद्धचोक, मेन रोड हुँदै कर्रा, पशुपतिनगर, रातोमाटे तथा बुद्धचोकबाट पिपल बोट, चौकीटोल ओरालोसम्म सडक विस्तारको लागि घर टहरा भत्काइसकिएको छ । शनिबार बिहान ५ बजेबाट साँझ ५ बजेसम्म (१२ घण्टा) सडक कार्यालयले १० वटा मेसिन प्रयोग गरेर घर तथा टहरा भत्काएको थियो ।
डिभिजन सडक कार्यालयले ५ मंसिरमा सार्वजनिक सूचनामार्फत महेन्द्र राजमार्गकाे रातोमाटेदेखि बुद्धचोक हुँदै राप्ती पुलसम्म तथा त्रिभुवन राजपथकाे बुद्धचोकदेखि सामरी पुलसम्म सडकको दायाँ–बायाँ २५–२५ गज क्षेत्रभित्र पर्ने संरचना हटाउन आग्रह गरेकाे थियाे ।
मकवानपुर । नेकपा एमाले मकवानपुरले २ हजार २५ सदस्यीय निर्वाचन परिचालन समिति गठन गरेकाे छ । एमाले मकवानपुरकाे बैठकले मकवानपुर ईञ्चार्ज तथा प्रतिनिधिसभाका उम्मेदवार रामेश्वर रानाकाे संयाेजकत्वमा २ हजार २५ सदस्यीय प्रतिनिधिसभा निर्वाचन परिचालन समिति गठन गरेकाे हाे ।
आगामी २१ फागुनकाे लागि ताेकिएकाे प्रतिनिधि सभा निर्वाचनकाे लागि गठन गरिएङ्काे परिचालन समितिमा केन्द्रीय कमिटी सदस्य, केन्द्रीय निकायका सदस्य, प्रदेश कमिटी, प्रदेश निकाय सदस्य, जिल्ला कमिटी सदस्यहरू, जिल्ला लेखा कमिटीका सदस्यहरू, जिल्ला सल्लाहकार सदस्यहरू, जेष्ठ कम्युनिष्ट मञ्चका सदस्यहरू, पालिका तथा ईलाका कमिटीका सदस्यहरू, पालिका लेखा कमिटीका सदस्यहरू, वडा कमिटीका पदाधिकारीहरू, निर्वाचित जनप्रतिनिधि सबै,जनसंगठनका केन्द्र, प्रदेश, जिल्ला, पालिकाका पदाधिकारी, स्ववियुमा निर्वाचित पदाधिकारी र सदस्यहरू रहेका छन् ।
निर्वाचन परिचालन कमिटीकाे सचिवमा पार्टी जिल्ला उपाध्यक्ष हिदम लामा रहेका छन् । यस्तै ७७ सदस्यीय निर्वाचन परिचालन कमिटीकाे सचिवालय समिति समेत गठन गरिएकाे जिल्ला उपाध्यक्ष लामाले जानकारी दिए । पूर्व मूख्यमन्त्री डाेरमणि पाैडेलकाे संयाेजकत्वमा निर्वाचन परिचालन अनुगमन समिति, प्रतिनिधिसभा १ नं. क्षेत्र निर्वाचन परिचालन समितिकाे संयाेजक एकालाल श्रेष्ठ, सहसंयाेजक नवीन सिग्देल र कमल विष्ट, सचिव अनिल बानियाँ रहेका छन् ।
यसैगरी प्रतिनिधिसभा २ नं. क्षेत्र निर्वाचन परिचालन समितिकाे संयाेजक भारती पाठक, सहसंयाेजक बलराम बल र राजाराम स्याङ्तान र सचिव मेम्मर लाेलाई जिम्मेवारी दिईएकाे छ । निर्वाचन परिचालनकाे प्रचार समिति संयाेजकमा नवीन सिग्देललाई जिम्मेवारी दिइएकाे छ भने अनन्त पाैडेलकाे संयाेजकत्वमा निर्वाचन घाेषणा पत्र निर्माण समिति गठन भएकाे छ । आर्थिक व्यवस्थापन संयाेजक गाेपाल श्रेष्ठ, प्रशासनिक संयाेजन हिदम लामा, जनसाँस्कृतिक संयाेजक देवराज रिमाल, प्रचार सामग्री व्यवस्थापन संयाेजक सीता विष्टलाई जिम्मेवारी दिइएकाे एमाले मकवानपुरले जनाएकाे छ ।
यस्तै कार्यालय सञ्चालन व्यवस्थापन आरती पाठक, भूगाेल बाहिर रहेका मतदाता समन्वय समिति फूर्वादाेर्जे लामा, कानूनी परामर्श संयाेजक मदन दाहाल, उम्मेदवार फाेकल पर्सन १ नं. क्षेत्र दिलु घर्ती, २ नं. क्षेत्र आशिष अस्लामीलाई ताेकिएकाे पार्टीले जनाएकाे छ । बैठकले १० वटा पालिका, २ ईलाका कमिटी र १ सय २ वटा वडामा समेत निर्वाचन परिचालन समितिकाे संयाेजक, सहयाेजक र सचिव ताेकेकाे छ । माघ महिनाभित्र सबै जनसंगठनकाे जिल्ला र पालिकास्तरमा निर्वाचन सहयाेग समिति बनाउने तथा १० पालिका, २ ईलाकामा र १ सय २ वडामा निर्वाचन परिचालन समितिकाे कार्यालय स्थापना गरि कार्य अगाडि बढाउने निर्णय गरेकाे उपाध्यक्ष लामाले बताए ।
जिल्ला उपाध्यक्ष हिदम लामाकाे अध्यक्षतामा बसेकाे बैठकमा पार्टी केन्द्रीय सचिव महेश बस्नेतकाे प्रमुख आथित्यता, केन्द्रीय सदस्यहरू रामेश्वर राना, महेशकुमार बर्ताैला, भारती पाठक, एकालाल श्रेष्ठ, केन्द्रीय लेखा आयाेगका सदस्य नवीन सिग्देल, प्रदेश कमिटीका अध्यक्ष कैलाश ढुङ्गेल, प्रदेश कमिटीका उपसचिव भक्तकुमारी लामा, प्रदेश कमिटीका सदस्यहरूकाे उपस्थिति रहेकाे थियाे ।
मकवानपुर । राष्ट्रिय सभा निर्वाचनअन्तर्गत बागमती प्रदेशबाट गीता देवकोटा र प्रेमप्रसाद दंगाल निर्वाचित भएका हुन्।
नेपाली कांग्रेस र नेकपा एमालेको गठबन्धनका उम्मेदवारहरू विजयी भएका छन्। महिलातर्फ कांग्रेसकी देवकोटा र अन्य समूहबाट एमालेका दंगाल विजयी भएका हुन् ।
महिलातर्फ निर्वाचित देवकोटाले प्रदेश सभाबाट ६० मत प्राप्त गर्दै ३ हजार १ सय ८० मतभार हासिल गरिन्। स्थानीय तहबाट १६१ मतसहित ३ हजार ५९ मतभार पाएपछि उनले कुल ६ हजार २ सय ३९ मतभारसहित विजय हासिल गरिन्।
अन्य समूहबाट निर्वाचित दंगालले प्रदेश सभातर्फ ५९ मत प्राप्त गरी ३ हजार १ सय २७ मतभार पाए। स्थानीय तहतर्फ १६२ मतसहित ३ हजार ७८ मतभार प्राप्त गरेपछि उनको कुल मतभार ६ हजार २ सय ५ पुगेको थियो ।
निर्वाचनमा नेकपा र नेपाल मजदुर किसान पार्टी नेमकिपाका उम्मेदवारसहित कुल ६ जनाबीच प्रतिस्पर्धा भएको थियो । महिलातर्फ नेकपाकी उम्मेदवार सरोजकुमारी झाले २ हजार ५ सय २२ मतभार प्राप्त गरिन् भने नेमकिपाकी कविता महर्जनले १ सय ९७ मतभार पाइन्। अन्य समूहमा नेकपाका प्रेमप्रसाद सापकोटाले २ हजार ५ सय ४१ मतभार तथा नेमकिपाका विक्रम ढुकुछुले १ सय ९७ मतभार प्राप्त गरे। बागमती प्रदेश सभाका ८९ जना प्रदेश सभा सदस्य र स्थानीय तहका २२९ जना प्रमुख तथा उपप्रमुख गरी कुल ३१८ मतदाताले मतदानमा सहभागिता जनाएका थिए। प्रदेश सभातर्फ ४ हजार ७ सय १७ मतभार र स्थानीय तहतर्फ ४ हजार ३ सय ५१ मतभार खसेको थियो। कुल खसेको मतभार ९ हजार ६८ रहेको निर्वाचन कार्यालयले जनाएको छ।
काठमाडौ । नेपाल खुला विश्वविद्यालय (एनओयू) ले ५४५ जना विद्यार्थी दीक्षित गरेको छ । विश्वविद्यालयले आइतबार राजधानीको गरेको पहिलो दीक्षान्त समारोहबाट विश्वविद्यालय स्थापनादेखि २०८२ आषाढ मसान्तसम्म विभिन्न शैक्षिक कार्यक्रम पूरा गरेका ५४५ जना विद्यार्थीहरू दीक्षित गरेको हो ।
आइतबारको दीक्षान्त समारोहमा १८६ जना विद्यार्थीहरू प्रत्यक्ष सहभागी भई दीक्षित भएका हुन्। समारोहमा सङ्कायगत रूपमा सामाजिक शास्त्र तथा शिक्षा सङ्कायबाट २४०, व्यवस्थापन तथा कानुन सङ्कायबाट २७४ र विज्ञान, स्वास्थ्य तथा प्रविधि सङ्कायबाट ३१ जना दीक्षित भएका छन्। तहगत रूपमा दर्शनाचार्यमा १५२, स्नातकोत्तरमा ६४, पिजिडीमा २ र स्नातक तहमा ३२७ जना विद्यार्थी रहेका छन्।
स्थापनाको छोटो समयमै दूरशिक्षा र नवीन प्रविधिमार्फत उच्च शिक्षामा पहुँच विस्तार गरेको विश्वविद्यालयको प्रथम दीक्षान्त उत्सव
विश्वविद्यालयका कुलपति एवं प्रधानमन्त्री सुशीला कार्कीको अध्यक्षतामा आयोजना गरिएको हो ।
शिक्षाविद् केदारभक्त माथेमाले खुला विश्वविद्यालयलाई निरन्तर सिकाइको प्रतीक र सीमाविहीन शिक्षाको विशिष्ट केन्द्रका रूपमा चित्रण गरे । खुला विश्वविद्यालयका विद्यार्थीहरू बढी परिपक्व र स्व-अध्ययनशील हुन्छन्। दूरशिक्षाले मानिसमा आत्म-अनुशासन र जीवनभर सिकिरहने चेतना विकास गर्ने उनले बताए ।
माथेमाले डिग्री प्राप्तिलाई शिक्षाको अन्त्य नभई नयाँ चरणको सुरुवात भएको बताउँदै साहित्य र बहुविषयक ज्ञानले मानवीय संवेदनशीलता र विचारको विकास गर्ने बताए ।
कुलपति तथा प्रधानमन्त्री सुशीला कार्कीले देश-विदेशमा रहेका नेपाली विद्यार्थीहरूका लागि खुला तथा दूर सिकाइका माध्यमबाट गुणस्तरीय उच्च शिक्षाको पहुँच पुर्याउन विश्वविद्यालयले गरिरहेको प्रयासको सराहना गरिन् । ‘हाम्रा उच्च शिक्षा प्रदायक संस्थाहरू अझै गतिशील हुनुपर्छ खुला विश्वविद्यालयले समयको प्रवाहलाई आत्मसात गर्दै विश्वव्यापी ज्ञान र रैथाने ज्ञानलाई सँगै लैजान सक्नुपर्छ’ उनले भनिन् ।
कार्यक्रममा स्वागत मन्तव्य राख्दै उपकुलपति प्रा.डा. शीलु मानन्धर बज्राचार्यले यो दीक्षान्त समारोहलाई विश्वविद्यालयको शैक्षिक यात्राको महत्वपूर्ण कोशेढुङ्गा भएको बताइन् । सोही अवसरमा विश्वविद्यालयको पहिलो प्राज्ञिक जर्नल “नेपाल खुला विश्वविद्यालय जर्नल” को पहिलो अङ्कको समेत अनावरण गरिएको थियो।
समारोहमा विश्वविद्यालयका रजिष्ट्रार, डीन, सभासद, पूर्व पदाधिकारी, प्राध्यापक, विद्यार्थी र अभिभावकको उपस्थिति रहेको थियो।
मकवानपुर । बागमती प्रदेशबाट राष्ट्रिय सभा सदस्य चयनका लागि निर्वाचन तालिका अनुसार आज मतदान कार्य भइरहेको छ । निर्वाचन आयोगले तोकेकाे तालिकाअनुसार बिहान ९ बजेदेखि मतदान सुरु भएको छ भने दिउँसो ३ बजेसम्म मतदान गर्न सकिनेछ।
बागमती प्रदेशका लागि हेटौंडा उपमहानगरपालिका–४ स्थित भुटनदेवी माध्यमिक विद्यालयलाई मतदानस्थल तोकिएको छ। उक्त मतदानस्थलमा २ वटा मतदान केन्द्र राखिएको निर्वाचन अधिकृत गीता श्रेष्ठले जानकारी दिइन्।
देशभर राष्ट्रिय सभामा रिक्त हुने १८ सदस्यका लागि आज निर्वाचन हुँदैछ। बागमती प्रदेशमा फागुन २० गते पदावधि सकिन लागेका तत्कालीन माओवादी केन्द्रकी गंगाकुमारी बेलवासे र तत्कालीन एकीकृत समाजवादीका वेदुराम भुसालको स्थानमा नयाँ सदस्य चयन हुन लागेको हो।
बागमती प्रदेशको मतदाता संख्या ९ जना घटेर ३३८ कायम भएको छ। बागमती प्रदेश निर्वाचन कार्यालय हेटौंडाका प्रमुख हरिप्रसाद ढकालका अनुसार प्रदेश सभा सदस्य ६ जना तथा स्थानीय तहका मेयर ३ जनाले पदबाट राजीनामा दिएपछि मतदाता संख्या घटेको हो। यसअघि प्रदेश सभा ११० सदस्य र स्थानीय तहका प्रमुख–उपप्रमुख गरी २३८ जना गरी कुल ३४८ जना मतदाता हुनुपर्नेमा अन्तिम सूचीमा ३४७ जना मतदाता सार्वजनिक गरिएको थियो। तर प्रतिनिधिसभा निर्वाचनमा उम्मेदवारी दिन प्रदेश सभा सदस्य ६ जना र स्थानीय तहका ३ जना प्रमुखले राजीनामा दिएपछि अब ३३८ जनाले मात्र मतदान गर्ने छन्।
राजीनामा दिने प्रदेश सभा सदस्यहरूमा काँग्रेसका १, राप्रपाका १, तत्कालिन माओवादी केन्द्रका १, तत्कालिन एकीकृत समाजवादीका १ र एमालेका २ जना रहेका छन्। त्यस्तै, काठमाडौं महानगरपालिकाका मेयर बालेन्द्र साह, भरतपुर महानगरपालिकाकी मेयर रेणु दाहाल र धुलिखेल नगरपालिकाका मेयरले पनि पदबाट राजीनामा दिएका छन्।
बागमती प्रदेशबाट राष्ट्रिय सभामा एक महिलासहित दुई सदस्य चयन गरिनेछ। यसका लागि महिला समूह र अन्य समूहबाट गरी ६ जनाले उम्मेदवारी दिएका छन्। महिला समूहतर्फ नेपाली कांग्रेसकी गीता देवकोटा, नेकपा की सरोजकुमारी झा र नेपाल मजदुर किसान पार्टीकी कविता महर्जन उम्मेदवार छन्। अन्य समूहतर्फ एमालेका प्रेमप्रसाद दंगाल, नेकपाका प्रेमप्रसाद सापकोटा र नेमकिपाका विक्रम डुकुछे उम्मेदवार रहेका छन्।
प्रदेश सभा सदस्यको मतभार ५३ र स्थानीय तहका प्रमुख तथा उपप्रमुखको मतभार १९ तोकिएको छ। बागमती प्रदेशमा कुल मतभार ९ हजार ९५८ रहेको छ। मतभारका आधारमा कांग्रेस पहिलो, नवगठित नेकपा दोस्रो र एमाले तेस्रो स्थानमा रहेका छन्।