नेपाल सरकारले गत जेठ १५ गते आय–व्ययको सार्वजनिक जानकारी वक्तव्य जारी गरी आगामी आर्थिक वर्षको बजेट सार्वजनिक गरिसकेको छ । बजेट मार्फत सरकारले निजामती, सार्वजनिक संस्थान र प्रतिष्ठानका कर्मचारीलाई पर्यटन काज उपलब्ध गराउने घोषणा गरेसँगै यतिबेला यो विषय निकै चर्चामा रहेको छ । यसबीचमा, सामाजिक सञ्जाल र आम सञ्चारका माध्यमहरूमा यो विषयले निकै स्थान पाइसकेको छ ।
कर्मचारीलाई पर्यटन काज, घर–ससुराली भएको जिल्ला रोज्न नपाइने’ जस्ता समाचार शीर्षकहरू पनि कर्मचारी वृत्तमा भाइरल बनिरहेका छन् ।
आय–व्ययको सार्वजनिक जानकारी वक्तव्यमा आन्तरिक पर्यटनलाई प्रवर्द्धन गर्न निजामती, सार्वजनिक संस्थान र प्रतिष्ठानका कर्मचारीलाई १० दिनको पारिश्रमिक बराबरको रकमसहित पर्यटन काज उपलब्ध गराइने र निजी क्षेत्रमा कार्यरत कर्मचारीलाईसमेत सोही अनुसारको सुविधा प्रदान गर्न प्रेरित गरिने उल्लेख छ । यस हिसाबले यो कार्यक्रम सरकारले आगामी आर्थिक वर्षमा आन्तरिक पर्यटन प्रवर्द्धनका लागि अघि सारेको कार्यक्रम हो भन्ने तथ्य वक्तव्यबाटै प्रष्ट भइसकेको छ । यो विषय राहत, सहुलियत र आर्थिक पुनरुत्थान शीर्षक अन्तर्गत समाविष्ट भई वक्तव्यमा उल्लेख भएबाट पनि महामारीका कारण सुस्ताएको पर्यटन क्षेत्रलाई केही मात्रामा गति दिन र आर्थिक पुनरुत्थानमा सहायता पुगोस् भन्ने हेतुले अघि सारिएको अल्पकालीन प्रकृतिको कार्यक्रम हो भनेर सहजै बुझ्न सकिन्छ ।
आन्तरिक पर्यटन प्रवर्द्धनका लागि सार्वजनिक क्षेत्रमा कार्यरत कर्मचारीलाई आवश्यक खर्च सहित बिदा वा काजमा पठाइनुपर्ने माग र आवाज उठ्न थालेको निकै वर्ष बितिसकेको छ । कर्मचारी क्षेत्रका ट्रेड युनियनहरू लगायत पर्यटन व्यावसायीहरुसमेतले यो विषयमा निकै समयदेखि सरकारलाई घच्घच्याई रहेका थिए । केही सार्वजनिक संस्थान र निजी संस्थाहरूले आफ्ना कर्मचारीलाई वर्षेनी आन्तरिक भ्रमणमा पठाउने व्यवस्था लागू गर्दे आएको र आन्तरिक पर्यटनको प्रवर्द्धन तथा कर्मचारीलाई कामप्रति उत्साह जगाउन यस प्रकारको कार्यक्रम फलदायी भइरहेको पाइएको छ ।
सरकारी तवरमा प्रदेशमा कार्यरत कर्मचारीहरूलाई समेटेर प्रदेश स्तरमा यस प्रकृतिको कार्यक्रम विगत वर्षहरूबाटै छिटपुट रूपमा सुरुवात भईरहेतापनि सङ्घीय सरकारले भने हालसम्म यो विषयलाई सम्बोधन गरिसकेको थिएन । यस वर्ष पनि बजेट निर्माणको पूर्व सन्ध्यामा यस क्षेत्रका सरोकारवालाहरूले पर्यटन काजको कार्यान्वयनका लागि लिखितरुपमा नै माग गरेका थिए ।
आगामी आर्थिक वर्षको बजेटमा समाविष्ट गरिएको यो कार्यक्रमले यस खालको सहुलियत माग गरिरहेका सरोकारवालाहरूको सम्बोधन त गरेकै छ, सँगसँगै कोभिड १९ को मारले शिथिल बनेको मुलुकको अर्थतन्त्रलाई उकास्ने सन्दर्भमासमेत अत्यन्तै सान्दर्भिक रहेको छ । यसको कार्यान्वयनबाट मुलुकभित्रका पर्यटकीय गन्तव्यहरूको विकासमा टेवा पुग्नुका साथै नयाँ पर्यटकीय गन्तव्यको प्रचारप्रसार र पहिचान भई मुलुकको समग्र पर्यटन क्षेत्रलाई नै प्रवर्द्धन गर्न सकिन्छ ।
कार्यक्रममार्फत देशभित्रका पर्यटकीय स्थलहरूको ब्राण्डिङ्ग तथा नयाँ गन्तव्यहरूको पहिचान गर्न सके यसबाट आन्तरिक र बाह्य दुवै पर्यटकहरूलाई आकर्षित गर्न सकिन्छ । यसको प्रभावकारी कार्यान्वयनबाट केही हदसम्म मुलुकी अर्थतन्त्र भाईब्रेन्ट बन्न सक्ने अवस्था रहन्छ । एकपछि अर्कोरुपमा चरणबद्धरुपमा फैलिएको महामारीका कारण विदेशी पर्यटकहरू तत्काल आउन सक्ने सम्भावना नदेखिएको सन्दर्भमा पर्यटन काजको घोषणालेआम कर्मचारीहरूसँगै देशभरका पर्यटन व्यावसायीहरुमासमेत सकारात्मक आशाको सञ्चार गरिरहेको छ ।
बजेटमार्फत पर्यटन काजको घोषणा भएसँगै यस्तो काज सुविधा प्राप्त गर्ने लक्षित वर्ग वक्तव्यमा उल्लेख भएजस्तै निजामती, सार्वजनिक संस्थान र प्रतिष्ठानमा कार्यरत कर्मचारीहरू मात्रै हुन् की यसले सामुदायिक विद्यालयका शिक्षक एवं सरकारका सबै तहमा कार्यरत सबै राष्ट्रसेवकहरूलाई समेट्ने हो ? भन्ने विषयमा पनि निकै चर्चाहरू भइरहेका छन् । माग, ध्यानाकर्षण, ज्ञापन पत्र र वक्तव्यबाजीका श्रृखलाहरु पनि यसबीचमा देखिएका छन् । हुन पनि, सार्वजनिक क्षेत्रमा कार्यरत सबै राष्ट्रसेवकहरूलाई यो कार्यक्रममा समेट्न सके यसको दायरा थप फराकिलो बन्ने देखिन्छ । यो लेख तयार गर्दासम्म यस सम्बन्धमा सरकारी तवरबाट औपचारिक धारणा भने सार्वजनिक भइसकेको छैन । यद्यपि, संस्कृति, पर्यटन तथा नागरिक उड्डयन मन्त्रालयका उच्च अधिकारीहरूले पर्यटन काज सम्बन्धी निर्देशिका निर्माणको क्रममा रहेको जानकारी सार्वजनिक गरिसकेका छन् । यसबाट, पर्यटन काज सम्बन्धी कार्य विधिगत विषयहरू र यो सुविधा प्राप्त गर्ने लक्षित वर्गको प्रष्टताका लागि उक्त निर्देशिका जारी नभएसम्म प्रतीक्षारत रहनुपर्ने अवस्था छ ।
आगामी दिनमा पर्यटन काज सम्बन्धी व्यवस्थाको कार्यान्वयनमा प्रभावकारिता कायम गर्नका लागि केही पक्षहरूमा यथेष्ट ध्यान पुर्याईन आवश्यक देखिन्छ । यस सम्बन्धी निर्देशिकाको निर्माण यथाशक्य चाँडो टुङ्ग्याइ आगामी आर्थिक वर्षको सुरुवातबाटै कार्यान्वयनमा ल्याइन आवश्यक छ। पर्यटन काज सम्बन्धी निर्देशिका तर्जुमा गरिरहँदा यो सुविधा प्राप्त गर्ने लक्षित वर्गको प्रष्ट किटान हुनुका साथै काज सुविधा प्राप्त गर्ने सन्दर्भमा लक्षित वर्गका सबै तह र श्रेणीका कर्मचारीको सहज पहुँचको सुनिश्चितता हुन आवश्यक छ । पर्यटन काज खटाइने गन्तव्य स्थलहरू निर्दिष्ट गरी निर्देशिकामा नै उल्लेख गरिनुपर्छ ।
गन्तव्य स्थलहरू छनौट गर्दा सरकारले अघि सारेको यो कार्यक्रमको अभीष्ट हासिल हुने तवरले सबै कोणबाट विश्लेषण गरी भौगोलिक एवं प्रादेशिक सन्तुलनसमेत कायम हुने तवरले उपयुक्त स्थानहरू चयन गर्न तर्फ पर्याप्त ध्यान पुग्नुपर्ने देखिन्छ ।
पर्यटन काजको कार्यान्वयनका क्रममा सबै कर्मचारीलाई काजमा खटाइरहँदा सम्बन्धित कार्यालयको दैनिक सेवा प्रवाहमा बाधा उत्पन्न हुन नदिनेतर्फ पनि उतिकै सजगता अपनाउन जरुरी छ।
यसका लागि सम्बन्धित कार्यालयमा कार्यरत कर्मचारीहरुमध्ये एक पटकमा निश्चित प्रतिशत कर्मचारीलाई मात्रै काजमा खटाउन सक्ने व्यवस्था गर्न उपयुक्त देखिन्छ। काजमा खटाइने कर्मचारीको मनोनयन, काज स्वीकृति, काजको रकम दाबी गर्ने र भुक्तानी सम्बन्धी प्रक्रियालाई सरलीकृत गर्ने तर्फ पनि उतिकै ध्यान पुर्याईनु पर्छ । यी प्रक्रियाहरू जटिल बन्न पुगेमा कर्मचारीको मनोबल उकास्न अघि सारिएको कार्यक्रमले उल्टै मनोबल ह्रास हुने अवस्था निम्तिन सक्ने खतरा रहन्छ ।
काजमा जाने कर्मचारीले भ्रमणका क्रममा पालना गर्नुपर्ने आचरण र भ्रमणका सर्तहरू पनि निर्माणाधीन निर्देशिकामा मूर्तरूपमा किटान गरिन आवश्यक छ । यसले भ्रमणमा जाने कर्मचारी स्वयंलाई नै अनुशासित बनाउनुका साथै समाजमा कर्मचारीप्रति देखिने गरेका नकारात्मक धारणाहरूको न्यूनीकरणका लागिसमेत बल पुग्ने अवस्था रहन्छ।
अन्य पक्षहरूसँगै हरतरहले भ्रमण गन्तव्य स्थलको प्रचारप्रसार र प्रवर्द्धन हुने, स्थानीय उत्पादन र स्थानीय स्तरमा उपलब्ध सेवा सुविधाको अधिकतम उपभोग हुने, गन्तव्य स्थलको प्रचारप्रसारमा सहायक सिद्ध हुने किसिमका बस्तु खरिद र प्रयोगमा प्राथमिकता दिने जस्ता विषयहरू भ्रमणका सर्तमा समावेश गरिनुपर्छ।
काजमा खटिने कर्मचारीहरूले भ्रमण पश्चात् अनिवार्य रूपमा प्रतिवेदन प्रस्तुत गर्ने तथा प्रतिवेदनको अभिलेख प्रणालीलाई सुदृढ बनाइनुका साथै प्रतिवेदनमार्फत उजागर गरिएका विषयहरूलाई सम्बन्धित सरोकारवाला निकायहरूले पृष्ठपोषणकारुपमा सदुपयोग गर्न सक्ने प्रबन्धसमेत गरिनुपर्छ । अर्कोतर्फ, कार्यक्रमको कार्यान्वयन सही रूपमा भए, नभएको, भ्रमणमा खटिने कर्मचारीले यससम्बन्धी सर्तहरू पालना गरे, नगरेको, पर्यटन काजमा प्राप्त सुविधा र सहुलियतहरू सोही प्रयोजनमा उपयोग भए, नभएको सम्बन्धमा कुनै सम्झौता नहुने गरी कडारुपको अनुगमनकारी व्यवस्थासमेत निर्देशिकामा समेटिन अपरिहार्य रहन्छ।
पर्यटन प्रवर्द्धकै कारण विश्वका धेरै राष्ट्रहरूले आर्थिक विकासमा फड्को मारेका छन् । थाइल्यान्ड, जमैका, माल्दिभ्स, स्विट्जरल्याण्ड जस्ता देशहरूको अर्थतन्त्रमा पर्यटनले ठूलो हिस्सा ओगटेको छ । ती मुलुकहरूमा आन्तरिक पर्यटनको अवस्था पनि सुदृढ रहेको पाइन्छ । हुन पनि, आन्तरिक पर्यटन बलियो नभई बाह्य पर्यटनको आधारशिला मजबुत बन्न सक्दैन । यस सन्दर्भमा पर्यटन काज सम्बन्धी व्यवस्थाको सफल कार्यान्वयन हुन सकेमा यसले चौतर्फीरुपमा नै सकारात्मक प्रभावहरू सृजना गर्न सक्ने अवस्था रहन्छ ।
लाखौँ सङ्ख्याका कर्मचारीहरू देशका विभिन्न भूभागमा भ्रमण गरिरहँदा यसले देशको पर्यटन क्षेत्र र अन्तरसम्बन्धीत पक्षहरुको प्रवर्द्धन त गर्छ नै सँगसँगै, भ्रमणमा निस्किएका कर्मचारीहरूलाई पुनर्ताजगी भई सार्वजनिक सेवा प्रवाहमा समेत त्यसको सकारात्मक प्रभाव पर्ने स्थिति रहन्छ।
अतः आम कर्मचारी, पर्यटन व्यवसायी लगायत सबै सरोकारवालाहरूले कर्तव्य र दायित्व बोधसहित यस किसिमको स्वागत योग्य कार्यक्रमलाई सही रूपमा उपयोग गर्न सक्नुमा नै पर्यटन काजको सान्दर्भिकता र औचित्य पुष्टि हुनसक्ने देखिन्छ । प्रशासनडट कमबाट
मेलम्ची, सिन्धुपाल्चोक — वर्षा अझै रोकिएको छैन । कालो लेदोले भरिएको डरलाग्दो बाढीले बजारलाई क्रमशः कटान गर्दै छ । तटीय क्षेत्रका अधिकांश दुईतले घर बाढीमै हराइसके, केहीको अवशेष देखिएको छ । बजारका चार, पाँचतले चिटिक्क देखिने घरलाई लेदोले ढाकेको छ । जिल्लाको समृद्ध नगरमा गनिने मेलम्ची बजारलाई बाढीले मंगलबार एकै रातमा बगर बनाएको छ ।

सिन्धुपाल्चोकको मेलम्ची–१२ स्थित इन्द्रेश्वरी मावितर्फ जाँदै स्थानीय । उक्त विद्यालयमा विस्थापित ८० परिवारलाई राखिएको छ । तस्बिर : अनिश तिवारी/कान्तिपुर
त्यही बगरबीच नदीछेउमा चुर्लुम्म डुबेको आफ्नो घर हेर्दै बसिरहेका मेलम्ची नगरपालिका–११ का ४६ वर्षीय हीराकाजी श्रेष्ठ बेलाबेला मुख छोपेर रोइरहेका छन् । मेलम्चीको इन्द्रेश्वरी माध्यमिक विद्यालयको एउटा कोठामा आश्रय लिइरहेका उनको चार जनाको परिवार निदाएको छैन । ‘ज्यानबाहेक केही जोगिएन, यही एकसरो कपडा ज्यानमा छ त्यत्ति हो, ऋण गरेर बनाएको घरजग्गा सबै बाढीले निल्यो, कहाँ जानु, के गर्नु ?’ बिहीबार दिउँसो मेलम्ची बजार देखाउँदै उनले भने । श्रेष्ठले ७० लाख रुपैयाँ लगानी गरेर चारतले घर बनाएका थिए । उनले घर बनाउँदा लागेको १० लाख ऋण तिर्न अझै बाँकी छ । अब उनी कहाँ गएर बस्ने अन्योलमा छन् ।
मेलम्ची बजारको माथिल्लो भेग टारबाट घर हेर्दै गरेकी मेलम्ची नगर टारकी ३४ वर्षीया मनिता थापाका आँखा अझै ओभाएका छैनन् । ‘घर त डुब्यो, यो स्कुले कोठामा कतिन्जेल बसिरहनुपर्ने हो थाहा छैन, राहतको भरमा पेट भरिएको छ, जग्गा, सम्पत्ति सबै एकै रातमा बगर बनाइदियो,’ उनले भनिन् । सवारी चालक श्रीमान्को काम खोसियो, दुईसरो लत्ताकपडा र साथमा भएको नगदबाहेक घरबाट केही निकाल्न नपाएपछि उनको तीन जनाको परिवारलाई यहाँ बस्न मन लागेको छैन । ‘हामीजस्तै सबै एकअर्कालाई हेरेर चित्त बुझाउनुपरेको छ । कतै जान पनि कोरोनाको डर छ, कहाँ जानु र ?’ उनले भनिन् ।
बाढीको विध्वंस बिहीबारबाट केही सामान्य भएको छ । मेलम्ची र इन्द्रावतीमा पानीको सतह घट्दो छ । जिल्ला प्रशासन कार्यालयका अनुसार ह्योल्मोभूमि, हेलम्बु हुँदै मेलम्ची खोलामा आएको बाढीमा परेर मेलम्चीका ६ सय र हेलम्बुका ३ सय जना प्रभावित भएका छन् ।
बाढीले बुधबार डुबानमा परेको सिन्धुपाल्चोकको मेलम्ची बजार र उद्धारमा खटिएको नेपाली सेनाको हेलिकप्टर । तस्बिर : अंगद ढकाल/कान्तिपुर
मेलम्ची बजारमा झन्डै डेढ सय घर पूरै डुबेका छन् । आधा दर्जन घरका केही भाग देखिएको छ । बिहीबार साँझसम्म तीन जनाको शव भेटिएको छ । बुधबार एक र बिहीबार दुई शव फेला परेका हुन् । सिन्धुपाल्चोकमा एक र सिन्धुलीको सुनकोसी नदी किनारमा दुई जनाको शव भेटिएको प्रहरीले जनाएको छ ।
जिल्ला प्रहरी नायब उपरीक्षक प्रकाश सापकोटाका अनुसार मृत्यु हुनेमा चिनियाँ नागरिक ४८ वर्षका यु सिछु, २३ वर्षीय गोडटी आनच्छ्यो र भारतीय नागरिक ३२ वर्षीय कमललोचन महतो छन् । यीबाहेक १३ जना अझै बेपत्ता रहेको डीएसपी सापकोटाले बताए । बेपत्ता भनिएका २० जनामध्ये चार जना सकुशल सम्पर्कमा आएको प्रमुख जिल्ला अधिकारी अरुणप्रसाद पोखरेलले बताए ।
बाढीका कारण फसेका ७४ जनाको बुधबार र बिहीबार नेपाली सेना, सशस्त्र प्रहरी र नेपाल प्रहरीले उद्धार गरेको छ । बाढीले घरजग्गा सबै बगाइसकेपछि पनि बेलाबेला नदीको लेदोले ढाकेको घर हेरिरहेका मेलम्ची नगर पीपलटारका ४५ वर्षीय मानबहादुर तामाङलाई आफ्नोभन्दा बढी गाउँमा जग्गा नभएका परिवारलाई कष्ट हुने मान्छन् । ‘गाउँमा जग्गा हुने गाउँ जालान् तर यहाँबाहेक अन्यत्र एक पाइला जग्गा नहुने मेरोजस्तै परिवार कहाँ गएर बस्ने भन्ने अन्योल थपिएको छ,’ उनले भने ।
***
सशस्त्र र नेपाली प्रहरीले बिहीबार अबेर साँझसम्म पनि मेलम्ची बजारछेउको बीचमा जोगिएका घरबाट आवश्यक सामग्री ओसार्न स्थानीयलाई सघाइरहेका छन् । बाढीबाट विस्थापित ८० परिवारलाई इन्द्रेश्वरी मावि भवनमा गाँसबासको व्यवस्थापन गरेर आश्रय दिइएको छ । नदी किनारका बचेका घरमा अझै जोखिम भएकाले सुरक्षाकर्मीलाई खटाएर सामान्य आउजाउ पनि बन्द गरिएको मेलम्ची नगरकी उपमेयर भगवती नेपालले बताइन् ।
मेलम्चीबाट हेलम्बु, इन्द्रावती र पाँचपोखरी थाङपाल गाउँपालिका जोड्ने मोटरेबल पुल बाढीले बगाएपछि सम्पर्क जोड्ने विकल्प खोज्न थालिएको उनले बताइन् । ‘तीनवटा गाउँपालिकासँग सडक सम्पर्क टुटेको छ, हेलम्बुसँग सडक जोड्न तत्काल एक्स्काभेटर र इन्द्रावती, पाँचपोखरी थाङपाल गाउँपालिकासम्म पुलको विकल्पबारे सोच्दै छौं,’ उनले भनिन् । मेलम्ची र हेलम्बुमा बिजुली आपूर्ति र मोबाइल नेटवर्क नहुँदा उद्धार राहत पुर्याउन झनै कठिनाइ देखिएको उनको भनाइ छ ।
अविरल वर्षात्का कारण मंगलबार उर्लिएको मेलम्चीमा बाढी कसरी आयो भन्नेबारे यकिन तथ्य अहिलेसम्म खुल्न सकेको छैन । हेलम्बु–१ का अध्यक्ष मिङमार ह्योल्मोले भने मेलम्चीघ्याङभन्दा माथिल्लो पहाडी भाग नामासाङसाङ भास्सिएर मेलम्ची खोलाको मुहानक्षेत्र थुनिएर बाढी आएको हुन सक्ने बताएका थिए ।
मेलम्ची नगरका मेयर डम्बर अर्यालले हेलिकप्टर लिएर हेलम्बु र पाँचपोखरी थाङपाल गाउँपालिका क्षेत्र अनुगमनमा पुगेकाले कहीं ठूलो पहिरो खसेको नपाइएको बताएको उल्लेख गरे । हेलम्बुको शिरभेग र पाँचपोखरी थाङपाल गाउँपालिकाको गाङछपो हिमालमा असारमै हिउँ परेको प्रस्ट देखिने र त्यही हिउँ भास्सिएर आएको हुन सक्ने उनले अनुमान गरे । मंगलबार साँझतिर पाँचपोखरी थाङपाल गाउँपालिकाको याङ्ग्री लार्के क्षेत्र र हेलम्बु गाउँपालिकाबाट मेलम्चीमा पानीको सतह बढेको जानकारी जिल्ला प्रशासनमा आएलगत्तै मेलम्ची तटीय क्षेत्रका जनप्रतिनिधिलाई खबर गरेका थिए । गाउँमा सूचना पुग्दानपुग्दै बाढी आउन थाले पनि स्थानीय सुरक्षित स्थानतिर लागेकाले मानवीय क्षति हुन पाएन ।
नगरप्रमुख अर्यालले बाढीले मेलम्चीलाई १० वर्षपछि धकेलेको बताएका छन् । ‘खोला बजारको बीचसम्म आएर बगर तुल्यायो, झन्डै १० हजार रोपनी जमिन बगर बनेको अनुमान छ,’ उनले भने, ‘डेढ सय घर डुबे, अर्बौंको क्षति भएको छ । अहिले उद्धार र राहत व्यवस्थापनको प्रथम चरणमा छौं ।’ अनिश तिवारीकाे समाचार इकान्तिपुरबाट साभार
मकवानपुर । मेगा बैंक नेपाल लिमिटेडका ग्राहकले दराजबाट सामान खरिद गर्दा छुट प्राप्त गर्ने भएका छन् । बैंकका ग्राहकहरुले दराज डटकमबाट सामान खरिद गर्दा हरेक बिहीबार १५ प्रतिशतसम्म छुट प्राप्त गर्ने भएका हुन् ।
कोभिड १९ बाट उत्पन्न विशेष परिस्थितिलाई ध्यानमा राख्दै मेगा बैंक र दराज डटकमबीच मेगा बैंकका ग्राहकहरुलाई विशेष छुटमा सहज र सुरक्षित रुपमा घरमै सामान पुर्याउने सम्झौता भएको हो ।
सम्झौताअनुसार, मेगा बैंकका डेबिट कार्ड प्रयोगकर्ताले १० प्रतिशत र क्रेडिट कार्ड प्रयोगकर्ताहरुले दराजबाट सामान खरिदमा १५ प्रतिशतसम्म अथवा बढीमा ५ सयसम्म छुट पाउने छन् । डिजिटल बैंकिङ अन्तरगत नगदबिहीन कारोबारलाई बढवा दिने सरकारको नीतिलाई प्राथमिकतामा राखी मेगा बैंकले दराजसँग सम्झौता गरेको हो ।
दराज डटकमको बेभसाइट तथा मोबाइल एप्समार्फत सामान अर्डर गरी घरमै सामान प्राप्त गर्न सकिनेछ । दराजसँगको सम्झौताको लाभ लिँदै सहज र सुरक्षित रुपमा बिनाझन्झट घरमै बसी सामान खरिद गर्न मेगा बैंकले ग्राहकहरुलाई अनुरोध पनि गरेको छ ।
१६ औं संस्करणको युरोकप फुटबलमा आज (बिहीबार) ३ खेलहरु हुँदैछ। युरोपको विभिन्न ११ शहरमा आयोजना भईरहेको युरोकपको समूह चरण अन्तर्गत आज समूह ‘सी’ को २ खेल र समूह ‘बी’ को १ खेल हुनेछ।
आज हुने पहिलो खेलमा समूह ‘सी’ मा रहेको युक्रेन र नर्थ म्यासेडोनिया बीच प्रतिस्पर्धा साँझ पौने ७ बजे सुरु हुनेछ। आज युक्रेन पहिलो जित निकाल्ने योजनामा हुनेछ। पहिलो खेलमा युक्रेन नेदरल्यान्ड्ससँग ३-२ गोल अन्तरले पराजित भएको थियो।
नर्थ म्यासेडोनिया पनि पहिलो जितको खोजीमा हुनेछ। नर्थ म्यासेडोनिया पहिलो खेलमा अष्ट्रियासँग ३-१ ले पराजित भएको थियो। युक्रेन समूहको तेस्रो र नर्थ म्यासेडोनिया चौंथो स्थानमा रहेको छ।
आज हुने दोस्रो खेलमा बेल्जियम र डेनमार्कबीच प्रतिस्पर्धा हुनेछ। समूह ‘बी’ काे बेल्जियम र डेनमार्कबीचको खेल राति पौने १० बजे सुरु हुनेछ। बेल्जियम आज लगातार दोस्रो जित निकाल्ने योजनामा हुनेछ। पहिलो खेलमा बेल्जियमले रुसलाई ३-० ले हराएको थियो। ३ अंक जोडेको बेल्जियम समूहको शीर्ष स्थानमा रहेको छ। डेनमार्क भने पहिलो जित निकाल्न चाहन्छ। पहिलो खेलमा डेनमार्क फिनल्याण्डसँग १-० ले पराजित भएको थियो। पुछारमा रहेको डेनमार्क पहिलो अंक जोड्न चाहन्छ।
आज हुने तेस्रो खेलमा नेदरल्यान्ड्स र अष्ट्रियाबीच प्रतिस्पर्धा हुनेछ। समूह ‘सी’ मा रहेका दुई टिमबीचको खेल राति पौने १ बजे सुरु हुनेछ। नेदरल्यान्ड्स लगातार दोस्रो जित निकाल्ने योजनामा रहेको छ। समूहको शीर्ष स्थानमा रहेको नेदरल्यान्ड्सले पहिलो खेलमा युक्रेनलाई ३-२ ले हराएको थियो। अष्ट्रिया पनि लगातार दोस्रो जित निकाल्न चाहन्छ। पहिलो खेलमा अष्ट्रियाले नर्थ म्यासेडोनियालाई ३-१ ले हराएको थियो। एजेन्सी
सिन्धुपाल्चोक । लगातार प्राकृतिक विपत्ति भोगिरहेको सिन्धुपाल्चोकमा मनसुन सुरु भएको पहिलो दिन नै प्राकृतिक विपत्तिबाट ठूलो जनधनको क्षति भएको छ । २०७१ सालदेखि लगातार प्राकृतिक विपत्तिको सामना गर्दै आएको सिन्धुपाल्चोकले यो वर्षको १ असारमा नै ठूलो विपत्तिको सामना गर्नुपरेको छ ।
मंगलबार बेलुकी हेलम्बु गाउँपालिकाको ‘बखान’ भन्ने स्थानमा ठूलो पहिरो गएपछि मेलम्ची नदी थुनिएको थियो । थुनिएको नदी खुलेपछि नदीले विनाश रूप धारण गर्दै क्षति बनाएको थियो । ‘मेलम्ची खानेपानी आयोजनाको अम्बाथानमा रहेको ड्यामभन्दा माथिबाट आएको पहिरोले मेलम्ची नदी थुनेको देखियो,’ हेलिकोप्टरबाट पहिरो स्थलमा पुगेका नेपाली सेना गोरख बक्स गणका प्रमुख निर्मलकुमार श्रेष्ठले भने, ‘त्यही पहिरोले नै तल्लो तटीय क्षेत्रमा क्षति भएको देखियो ।’
पहिरोपछि आएको बाढीले मानवीय क्षतिको यकिन विवरण प्राप्त नभए पनि केही बेपत्ता छन् । सात जनाको शव भेटिएको छ । हेलम्बु २ का माधव भण्डारी, गणेश ज्योति, हेलम्बु ३ की टिकामाया खड्का, हेलम्बु ६ का च्यामा तामाङ, उनकी पत्नी, ७ का ज्ञानेन्द्र कक्षपति र सुरेन्द्र नेपालको मेलम्ची बाढ मा परेर निधन भएको छ ।
उनी रु सबै ट्राउट माछा फार्ममा काम गर्नेहरु रहेको सिन्धुपाल्चोकका सहायक प्रमुख जिल्ला अधिकारी बाबुराम खनालले जानकारी दिए । ‘बखान क्षेत्रमा गएको पहिरो हेर्दा अन्य पहिरोभन्दा फरक देखिएको छ । लाभा जस्तै बगिहेको छ, ठूलो ज्वालामुखी विस्फोटनपछि निस्कने लाभाजस्तै लेदो बगिरहेको छ,’ सेनानी श्रेष्ठले भने, ‘यस्तो प्रकृतिको पहिरो यसअघि देखिएको नै थिएन ।’
अहिले पनि पहिरो झर्न नरोकिएको र लेदो पनि बगिरहेको उनले जानकारी दिए । ‘माथि हिमाल नै फुटेर आएको जस्तो अवस्था छ, लेदोले नदीको सतह २ मिटर भन्दा अग्लो भएको छ,’ प्रमुख सेनानी श्रेष्ठले भने । पानीसँगै बाक्लो घोल आएर नदी छेउछाउका घरमा पसेर क्षति बनाएको रेडियो मेलम्चीका स्टेसन म्यानेजर देवराज सुवेदीले जानकारी दिए ।
सडक सम्बन्ध टुट्यो
पहिरो र त्यसपछि आएको बाढीले इन्द्रावती र मेलम्ची नदीमाथि रहेका चारवटा पक्की पुल बगाएको छ । पुल मात्रै होइन नदीले मेलम्ची हेलम्बु सडकखण्ड पनि पुरै कटान गरेको छ । मेलम्चीलाई सदरमुकाम चौतारसँग जोड्ने पक्की पुल बाढीले बगाएको छ भने मेलम्ची र दुवाचौर जोड्ने अर्काे पुल पनि बगाएको छ । ‘मेलम्चीमाथि हेलम्बुसम्म जति पनि पक्की र झोलुङे पुल छ, त्यो सबै नै बगाएको छ,’ नेपाली सेना गोरख बक्स गणका प्रमुख निर्मलकुमार श्रेष्ठले भने ।
नदी किनारका घर टहरा र माछा व्यावसाय सबै बगायो
मेलम्ची खानेपानी आयोजनाको मुहानस्थल हेलम्बुको अम्बाथनदेखि मेलम्ची बजारसम्म बाढीले ३ सय बढी घरमा क्षति पु¥याएको छ । प्रमुख जिल्ला अधिकारी अरुण पोखरेलका अनुसार मेलम्ची नगरपालिकाभित्रका १ सय ३३ र हेलम्बु गाउँपालिकाभित्र १ सय ५० घर प्रारम्भिक रूपमा क्षति भएको विवरण प्राप्त भएको जानकारी दिए ।
बाढीबाट विस्थापितलाई मेलम्चीस्थित इन्द्रेश्वरी माविमा र हेलम्बु क्षेत्रका स्थानीयलाई पनि डाँडाका सुरक्षित स्थानमा राखिएको उनले जानकारी दिए । मेलम्ची नदी किनारमा ट्राउट माछापालन गर्ने व्यावसायीलाई बाढीले नराम्रोसँग झट्का दिएको छ । नदीछेउमा रहेको एउटा पनि ट्राउट माछा फर्म नराखी बाढीले बगाएको छ । अविरल वर्षाका कारण सिन्धुपाल्चोकको हेलम्बुमा आएको बाढीले मेलम्ची खानेपानी आयोजनाको क्याम्प बगाएपछि अलपत्र परेका ४७ जना कामदारको उद्धार गरिएको छ ।
बाढीमा फसेकाको उद्धार
मेलम्ची खानेपानी आयोजनाको आम्बाथान मुहान नजिकैको क्याम्पमा बस्ने ७० जना कामदार तथा आयोजनाका कर्मचारीलाई नेपाली सेनाले उद्धार गरेको छ । बाढीमा फेसका ४७ जना कामदारलाई नेपाली सेना तथा निजी कम्पनीको हेलिकोप्टरबाट उद्धार गरी धुलिखेल अस्पतालमा राखिएको प्रमुख जिल्ला अधिकारी अरुण पोखरेलले जानकारी दिए ।
मंगलबार राति आएको बाढीले कामदार बसेको क्याम्प बगाएको थियो । केही कामदार भागेर ज्यान जोगाउन सफल भए भने अन्य सम्पर्कविहीन छन् । मेलम्ची खानेपानी आयोजनाको हेडवक्र्स निर्माण कार्य भइरहेकाले नेपाली, चिनियाँ र भारतीय तथा आयोजनाका कर्मचारीसहित ७० जना त्यहाँ कार्यरत थिए ।
बाढीमा फसेकाको खोजी तथा उद्धार कार्य भइरहेको छ । आयोजनाको कर्मचारी मजदुरको उद्धारमा मेलम्ची खानेपानी आयोजना, निर्माण व्यवसायी, परामर्शदाता खटिरहेको र बेपत्ताको खोजी भइरहेको मेलम्ची खानेपानी विकास समितिले जनाएको छ ।
मेलम्ची खानेपानी आयोजनाका २३ कर्मचारी र मजदुर अझै सम्र्पकविहीन रहेको मेलम्ची खानेपानी आयोजनाले जानकारी दिएको छ । बाढीले मेलम्ची खानेपानी आयोजनाको ड्याममा क्षति बनाए पनि सुरुङको गेट बन्द गरिएकाले सुरुङमा भने क्षति नभएको खानेपानी आयोजनाले जानकारी दिएको छ । राजधानी दैनिककाे लागि दिनेश थापाले लेख्नु भएकाे समाचार साभार