प्याजको लागि भारतीय बजारको भर पर्दै आउनु परेको अवस्थामा मकवानपुरको मकवानपुरगढी गाउँपालिका वडा न. २, तितुङ डाँडामा रहेको श्रमजिवी कृषक समूहमा आवद्व कृषकहरुबाट उत्पादित प्याज बजार ल्याउने तयारी गरीदै । मकवानपुरगढी गाउँपालिकाले कृषकहरुलाई कृषिमा आत्मनिर्भरताको लागि अनुदानमा आधारीत कार्यक्रमहरु प्राथमिकतामा राख्दै आएको छ । तस्बिर साैजन्यः मंगल लामा
देशभर कोरोना भाइरस संक्रमणविरुद्ध खोप लगाउन योग्य २ करोड ९ लाख ९६ हजार ८ सय ९ जना नागरिक खोपको प्रतीक्षामा छन् । स्वास्थ्य मन्त्रालयले तयार पारेको कोभिड–१९ खोपका लागि लक्षित समूहको प्राथमिकीकरणअनुसार अनुमानित २ करोड १७ लाख ५६ हजार ७ सय ६३ जनालाई खोप लगाइनेछ ।
जसअन्तर्गत अहिलेसम्म ७ लाख ५९ हजार ९ सय ५४ जनाले खोपको दुवै मात्रा (पहिलो र दोस्रो) लगाएका छन् । २६ लाख ११ हजार ८ सय ७ जनाले खोपको पहिलो मात्रा लगाएका छन् । १३ लाख ५० हजार ज्येष्ठ नागरिक र अन्य उमेर समूहकाले पहिलो मात्रा लगाएको तीन महिना बित्नै लाग्दा पनि दोस्रो मात्रा लगाउन पाएका छैनन् । उनीहरूका लागि सरकारले एस्टे«जेनेकाको खोप लगाउने निर्णय गरिसकेको छ ।
स्वास्थ्य मन्त्रालय स्रोतका अनुसार अब क्रमिक रूपमा खोप आपूर्ति हुँदै जाने र एक महिनाभित्र एस्ट्रजेनेकाको खोप पनि नेपाल भित्रिनेछ । स्वास्थ्य मन्त्रालयले कोभ्याक्स फ्यासिलिटीमार्फत जोन्सन एन्ड जोन्सन खोप आउने जानकारी दिएको हो । स्वास्थ्य मन्त्रालयका एक अधिकारीले भने, ‘कोभ्याक्समार्फत १० लाख डोज खोप आउने भएको छ ।
हामिले सकारात्मक जवाफ पाएका छौं ।’ हालसम्म कोभ्याक्स फ्यासिलिटीमार्फत ३ लाख ४८ हजार मात्रा खोप आएको छ । स्वास्थ्य मन्त्रालयका प्रवक्ता डा. कृष्ण पौडेलले २४ असारदेखि खोप आपूर्ति सुरु भई तत्पश्चात् साप्ताहिक रूपमा विभिन्न चरणमार्फत खोप आपूर्ति गर्ने तयारी भएको बताए ।
स्वास्थ्य मन्त्रालयका अनुसार गाभी कोभ्याक्स फ्यासिलिटीबाट समेत थप खोप प्राप्त हुने बताएको छ । स्वास्थ्य मन्त्रालयको तथ्यांकअनुसार नेपालमा ४२ लाख ४८ हजार मात्रा खोप भित्रिएको छ । यसरी हेर्दा हालसम्म ३३ लाख ६४ हजार ५१ मात्रा खोप उपयोग भइसकेको देखिन्छ ।

यस्तै, सरकारले चीनबाट १५ दिनभित्र ४० लाख डोज कोभिड—१९ विरुद्धको भेरोसेल खोप ल्याउँदै छ । प्रधानमन्त्री केपी शर्मा ओलीका परराष्ट्र मामिला सल्लाहकार राजन भट्टराईका अनुसार नेपाल वायु सेवा निगमको वाइडबडीले चीनबाट ४० लाख डोज खोप नेपाल आउँदै छ ।
सरकारले चीनको सिनोफार्म कम्पनीसँग खरिद गरेको कोरोना भाइरसविरुद्धको खोप नेपाल वायुसेवा निगमले तीनवटा उडानमार्फत ल्याउन थालेको छ । निगमले खोप ल्याउन कार्गो उडानको तालिका तय गरिसकेको छ ।
वायुसेवा निगमको उडान तालिकाअनुसार पहिलो उडान यही जुलाइ ८ (असार २४ गते) मा हुनेछ । यस्तै, दोस्रो र तेस्रो उडान क्रमशः जुलाई १५ (असार ३१) र जुलाई २२ (साउन ७)मा हुने तय भएको छ । नेपालले चीनको सिनोभ्याकबाट भेरोसेल खोपको ४० लाख डोज ननडिस्क्लोजेबल एग्रिमेन्ट गरेर खरिद गर्न लागेको हो । स्वास्थ्य मन्त्रालय स्रोतका अनुसार ४ अर्ब ८९ करोड रुपैयाँभित्र रहेर चीनबाट भेरोसिल खोप खरिद प्रक्रिया अघि बढाइएको थियो ।
स्वास्थ्य मन्त्रालयले चीनबाट प्राप्त भएको भेरोसिल खोप प्राथमिकता सूचीका आधारमा लगाउने भएको छ । स्वास्थ्य सेवा विभागअन्तर्गत परिवार कल्याण महाशाखाका निर्देशक डा.तारानाथ पोखरेलका अनुसार अबको प्राथमिकतामा ६० वर्षमुनिका नागरिक पर्नेछन् । कोभिड–१९ खोपका लागि लक्षित समूहको प्राथमिकीकरणमा ५५ वर्ष र माथिका नागरिक, ४० देखि ५४ वर्षको उमेर समूहमध्ये तोकिएका दीर्घ रोग भएका व्यक्ति पर्छन् ।
यस्तै, वैदेशिक रोजगारबाट नेपाल फर्केका र नेपालमा रहेका शरणार्थीहरूमध्ये दीर्घ रोगी भएका व्यक्ति पनि दोस्रो प्राथमिकताको सूचीमा पर्छन् । ६० वर्षमाथिका केहीले अझै खोपको पहिलो मात्रा नलगाएको भन्दै उनीहरू पनि प्राथमिकतामा पर्ने स्वास्थ्य सेवा विभागले जनाएको छ । हालसम्म पहिलो प्राथमिकतामा रहेका मध्ये अधिकांशले खोप लगाइसकेका छन् । अब दोस्रो प्राथमिकतामा रहेकालाई क्रमबद्ध रूपमा खोप लगाउने स्वास्थ्य मन्त्रालयको योजना छ ।
यस्तै, सोमबार देशभर थप २ हजार ६ सय २२ जनामा कोरोना संक्रमण पुष्टि भएको छ । स्वास्थ्य मन्त्रालयका अनुसार ७ हजार ४ सय ९९ जनामा पीसीआर परीक्षण गर्दा १ हजार ७ सय ४५ र ४ हजार २८ एन्टिजेन परीक्षण गर्दा ८ सय ७७ जनामा संक्रमण पुष्टि भएको हो ।
सोमबार देशभर थप २३ संक्रमितको मृत्यु भएको छ । योसँगै कोरोनाबाट मृत्यु हुनेको संख्या ९ हजार २ सय ४८ पुगेको स्वास्थ्य मन्त्रालयले जनाएको छ । स्वास्थ्य मन्त्रालयका प्रवक्ता डा. पौडेलले संक्रमितको संख्या घटेको देखिए पनि जोखिम कायम नै रहेको बताए । राजधानी दैनिक पत्रिकामा छापिएकाे खबर साभार गरिएकाे
देशमा मनसुनी वायुको प्रभाव रहेकोले सामान्य देखि पूर्ण बदली रहेकाे छ । हाल प्रदेश २ र बागमति प्रदेशमा आंशिक देखि सामान्य बदली र बाँकी प्रदेशमा सामान्य देखि पूर्ण बदली रहेको जल तथा माैसम विज्ञान विभाग, माैसम पूर्वानुमान महाशाखाले जनाएकाे छ ।
महाशाखाका अनुसार हाल प्रदेश १, बागमती, गण्डकी, लुम्बिनी र सुदुरपश्चिम प्रदेशका केहि स्थानहरुमा हल्का देखि मध्यम वर्षा भैरहेको छ। प्रदेश १, प्रदेश २, बागमती प्रदेश, गण्डकी प्रदेश र लुम्बिनी प्रदेशका धेरै स्थानहरुमा तथा कर्णाली र सुदूरपश्चिम प्रदेशका थोरै स्थानहरुमा हल्का देखि मध्यम वर्षाको सम्भावना रहेको छ ।
देश भरका प्रदेशहरूका थोरै स्थानहरुमा मेघ गर्जन/ चट्याङ्ग सहित भारी वर्षाको सम्भावना रहेकोले पहाडी भू-भागमा भू-क्षय, पहिरो तथा गेग्रान बहाव (debris flow) को जोखिम साथै नदीनाला तथा खहरे खोलाहरुमा पानीको सतह बढ्न सक्ने तथा दैनिक जीवन/यातायात क्षेत्र प्रभावित हुन सक्ने भएकोले आवश्यक सतर्कता अपनाउन समेत माैसम पूर्वानुमान महाशाखाले अनुरोध गरेकाे छ ।
माैसम पूर्वानुमान महाशाखाका अनुसार आगामी ३ दिनको मौसम पूर्वानुमान
असार २२ गते मंगलबार कर्णाली तथा सुदुर पश्चिम प्रदेशमा आंशिक देखि सामान्य बदली रहि देशका बांकी भूभागहरूमा सामान्य देखि पूर्ण बदली रहनेछ । प्रदेश १, प्रदेश २, बागमती प्रदेश, गण्डकी प्रदेश र लुम्बिनी प्रदेशका केही स्थानहरुमा तथा कर्णाली र सुदूरपश्चिम प्रदेशका थोरै स्थानहरुमा हल्का देखि मध्यम वर्षाको सम्भावना रहेको छ । प्रदेश १ का एक/दुई स्थानमा मेघ गर्जन/ चट्याङ्ग सहित भारी वर्षाको सम्भावना रहेको छ ।
असार २३ गते बुधबार देशका अधिकांश भूभागहरूमा सामान्य देखि पूर्ण बदली रहनेछ । प्रदेश १, प्रदेश २, बागमती प्रदेश, गण्डकी प्रदेश र लुम्बिनी प्रदेशका धेरै स्थानहरुमा तथा कर्णाली र सुदूरपश्चिम प्रदेशका थोरै स्थानहरुमा हल्का देखि मध्यम वर्षाको सम्भावना रहेको छ ।प्रदेश १, प्रदेश २, बाग्मती प्रदेश र गण्डकी प्रदेशका थोरै स्थानहरुमा मेघ गर्जन/ चट्याङ्ग सहित भारी वर्षाको सम्भावना रहेको छ । गण्डकी प्रदेश र लुम्बीनी प्रदेशका एक/दुई स्थानमा धेरै भारी वर्षाको सम्भावना रहेको छ ।
असार २४ गते विहीबार देशभर सामान्य देखि पूर्ण बदली रहनेछ । प्रदेश १, प्रदेश २, बागमती प्रदेश, गण्डकी प्रदेश र लुम्बिनी प्रदेशका धेरै स्थानहरुमा तथा कर्णाली र सुदूरपश्चिम प्रदेशका थोरै स्थानहरुमा हल्का देखि मध्यम वर्षाको सम्भावना रहेको छ। प्रदेश १, प्रदेश २, बाग्मती प्रदेश, गण्डकी प्रदेश र लुम्बीनी प्रदेशका केहि स्थानहरुमा मेघ गर्जन/ चट्याङ्ग सहित भारी वर्षाको सम्भावना रहेको छ ।
मकवानपुर । निर्वाचन आयोगले प्रतिनिधि सभा सदस्यको पहिलो चरणको निर्वाचनका लागि उम्मेदवारको मनोनयन दर्ता गर्ने मिति सार्वजनिक गरेकाे छ । पहिलो चरणको निर्वाचनका लागि उम्मेदवारको मनोनयन दर्ता गर्न असोज २० गते देखि २१ गतेसम्म समय तय गरिएको छ ।
असोज २५ गते उम्मेदवारको अन्तिम नामावली प्रकाशन गर्ने र सोही दिन उम्मेदवारलाई निर्वाचन चिन्ह प्रदान गर्ने आयोगले जनाएको छ । पहिलो चरणको निर्वाचनको कार्तिक २६ गते मतदान हुने आयोगको कार्यतालिकामा उल्लेख गरिएको छ ।
त्यस्तै, दोस्रो चरणको निर्वाचनका लागि उम्मेदवारी दर्ता गर्ने मिति असोज ३१ गते देखि कार्तिक १ गतेसम्मका लागि तोकिएको छ । कार्तिक १ गते उम्मेदवारको मनोनयन पत्र दर्ता भएको सूची प्रकाशित गरिनेछ भने ५ गते उम्मेदवारको अन्तिम नामावली प्रकाशन गरिनेछ । सोही दिन नै उम्मेदवारहरूलाई निर्वाचन चिन्ह प्रदान गरिनेछ भने मंसिर ३ गते मतदान हुने आयोगले जनाएको छ ।
केपी ओली नेतृत्वको सरकारले प्रतिनिधिसभा विघटन गरेर कात्तिक २६ गते पहिलो चरण र मंसिर ३ गते दोस्रो चरणको निर्वाचन घोषणा गरेको थियो । सोहीअनुसार आयोगले आफ्नो कार्यतालिका सार्वजनिक गरेको छ । सर्वोच्च अदालतले प्रतिनिधिसभा विघटनविरुद्धको मुद्दामा अन्तिम फैसला गर्ने तयारी गरिरहेकै बेला निर्वाचन आयोगले भने निर्वाचनको कार्यतालिका सार्वजनिक गरेको हो ।
यसैगरी निर्वाचन आयोगले प्रतिनिधिसभा निर्वाचनको कार्यतालिका सार्वजनिक गर्दै राजनीतिक दल दर्ताका लागि असार ३१ देखि साउन १५ गतेसम्मको मिति तोकेको छ । सत्तारुढ नेकपा एमाले र जनतासमाजवादी पार्टीको विवाद मिलाउन नसकिरहेको आयोगले असार २१ गते दल दर्ताका लागि निवेदन दिन आह्वान गरेको हो ।
सोमबार प्रतिनिधि सभाको निर्वाचन कार्याक्रम सार्वजनिक गर्दै आयोगले दल दर्ताको मिति तय गरेको हो । आयोगले राजनीतिक दलहरुलाई स्वीकृति प्रदान गरिएको सूची साउन १६ गते देखि २३ गतेसम्म राजपत्रमा प्रकाशित गर्ने जनाएको छ ।
मकवानपुर । मकवानपुर प्रहरीले हेटाैडाकाे २ छुट्टाछुट्टै ठाँउबाट लागुऔषध नाईट्रोभेटसहित ६ जना प्रकाउ गरेकाे छ । आइतवार र साेमबार हेटाैडा १५ र हेटाैडा ४ स्थित पूर्व पश्चिम राजमार्गबाट उनीहरू पक्राउ परेकाे प्रहरीले जनाएकाे छ ।
आइतवार राती साढे ९ बजे हेटौंडा १५ पिपल चौतरा स्थित पुर्व पश्चिम सडक खण्डमा बाराबाट हेटौडा तर्फ आउदै गरेको बा ९५ प ७९३२ नम्बरको मोटरसाइकलमा लागुऔषध नाइट्रोभेट बोकेका २ जनालाई प्रकाउ गरेको छ ।
ईलाका प्रहरी कार्यालय पशुपतिनगर मकवानपुरबाट प्रहरी निरीक्षकको कमाण्डमा खटीएको चेकिङ् टोलिले चेकजाँच गर्दा मोटरसाइकल चालक चितवन कालिका नगरपालिका १ जुटपानीका २३ वर्षका रविन बिकले झोलामा लुकाई छिपाई ल्याएको नाईट्रोभेट ट्याबलेट १४९६ पिस फेला परेको मकवानपुर प्रहरीले जानकारी दिएको हो ।
मोटरसाइकलको पछाडी सवार कालिका नगरपालिका ७ बस्ने बर्ष २२ को अर्जुन श्रेष्ठलाई समेत प्रकाउ गरि उक्त मोटरसाइकलसहित नियन्त्रणमा लिई थप अनुसन्धान भईरहेको मकवानपुर प्रहरीले जानकारी दिएको हो ।
यसैगरी सोमबार बिहान साढे ९ बजे लागु औषधको कारोवार भईरहेको छ भन्ने सूचनाको आधारमा प्रहरी चौकी भुटनदेवी मकवानपुरबाट खटिएको प्रहरी टोलीले लागुऔषधको कारोवार गरिरहेका ४ जनालाई प्रकाउ गरेको छ ।
हेटौंडा ४ स्थित पूर्व पश्चिम राजमार्ग सडक खण्डमा लागुऔषधको कारोवार गरिरहेका हेटौंडा १० का २३ बर्षका विवेक न्यौपाने, हेटाैडा ५ का १९ बर्षका एडी चौधरी, काभ्रेपलाञ्चाेक नमोबुद्ध नगरपालिका घर भई हेटौंडा ४ बस्ने २० बर्षका सुरज लामा र सिन्धुली मरिन गाउँपालिका घर भई हेटौंडा १५ बस्ने २३ बर्षका बिशाल कुमार वाईवालाई प्रहरीले प्रकाउ गरेको जिल्ला प्रहरी कार्यालय मकवानपुरले जानकारी दिएको छ ।
उनीहरुको साथबाट लागुऔषध नाईट्रोभेट १ सय ५० ट्याब्लेट फेला परेको हो । उनीहरुलाई लागु औषध नाईट्रोभेट सहित पक्राउ गरी थप अनुसन्धान भईरहको मकवानपुर प्रहरीले जनाएकाे छ ।
२ फरार प्रतिवादी पक्राउ
मकवानपुरबाट २ फरार प्रतिवादी पक्राउ परेका छन् । ज्यान मार्ने उद्योग मुद्दामा ५ बर्ष कैद सजाय तोकीएका हेटौंडा १२ वस्ने मिथुन तितुङलाई मकवानपुर प्रहरीले हेटौंडा २ बाट पक्राउ गरी आवश्यक कारवाहिको लागी जिल्ला अदालत मकवानपुरमा उपस्थित गराई कैद भुक्तानको लागि भिमफेदी कारागार पठाउने कार्य भईरहेको मकवानपुर प्रहरीले जनाएकाे हाे ।
उनलाई मकवानपुर जिल्ला अदालत हेटौडाको २०७७ साल माघ २८ गतेको फैसलाले ज्यान मार्ने उद्योग मुद्दामा ५ बर्ष कैद सजाय तोकिएको थियो ।
यस्तै मकवानपुर जिल्ला अदालत हेटौडाको फैसलाले सवारी ज्यान मुद्दामा ९ दिन कैद र रु २ हजार जरिवाना तोकीएका फरार प्रतिवादी हेटौंडा ९ बाट प्रकाउ गरिएको जिल्ला प्रहरी कार्यालय मकवानपुरले जानकारी दिएको छ । प्रकाउ पर्नेमा हेटौंडा ९ बस्ने बर्ष ४७ को कमल पराजुली रहेका छन्
उनलाई आवस्यक कारवाहिको लागी जिल्ला अदालत मकवानपुरमा उपस्थित गराईएको जिल्ला प्रहरी कार्यालय मकवानपुरले जानकारी दिएको छ ।