मकवानपुर । सिविन बाल हेल्प लाइन मकवानपुरले कोरोना महामारीको समयमा जनस्वास्थ्यको उपचारमा सहजता प्रदान गर्न स्वास्थ्य सामग्री सहयोग गरेको छ ।
मदन भण्डारी स्वास्थ्य विज्ञान प्रतिष्ठान हेटौंडा अस्पताल, जिल्ला प्रहरी कार्यालय मकवानपुर (महिला बाल बालिका तथा ज्येष्ठ नागरिक सेवा केन्द्र) र मनहरीको कोभिड अस्पतालको लागि स्वास्थ्य सामग्री सहयोग गरिएको हो । प्रतिष्ठानलाई स्वास्थ्य सामग्री हस्तान्तरण कार्यक्रममा प्रतिष्ठानका रजिष्टार राजेश प्रसाई, डाक्टर रामचन्द्र सापकोटालगायतको उपस्थिती थियाे।
यसैगरी जिल्ला प्रहरी कार्यालयलाई स्वास्थ्य सामग्री हस्तान्तरण कार्यक्रममा सेवा केन्द्र इन्चार्ज चुडाकुमारी खड्कालगायतको उपस्थिती रहेको थियो । यसैगरी मनहरीमा आयोजना गरिएको स्वास्थ्य सामग्री हस्तान्तरण कार्यक्रममा गाउँपालिका अध्यक्ष एकराज उप्रेती, आइसोलेसन इन्चार्ज ज्योतिराज लुइटेलको उपस्थिती थियो ।

मकवानपुर जिल्ला मनहरी गाउपालिका – ८ स्थित म कोभिड अस्पतालको लागि कोभिड–१९ आपतकालिन सहयोग परियोजना सञ्चालित बाल हेल्पलाइन १०९८ मकवानपुरबाट शुक्रबार स्वास्थ्य सामग्री वितरण गरेको हो ।
स्वास्थ्य उपचारको लागि सहयोग स्वरुप मास्क, हेन्ड सेनिटाइजर, फेस मास्क, बेड म्याट्रेस, बिरामीको लागि ट्रली, बीपी सेट (स्टेथोस्कोप सहित) स्टीमर, ग्लोब्स, सर्जिकल ग्लोब्स, सोडियम हाइपोक्लोराइडलगायतको सामग्री बाल हेल्प लाइनकी सम्झना अधिकारीमार्फत प्राप्त भएको आइसोलेसन इन्चार्ज ज्योतिराज लुइटेलले बताए ।

यसैगरी सिविनले शुक्रबार कोभिड–१९ आपतकालिन सहयोग परियोजना नै हेटौंडा उपमहानगरपालिका वडा –१० स्थिती जिल्ला प्रहरी कार्यालयको लागि पनि स्वास्थ्य सामग्री सहयोग गरेको सिविन मकवानपुरका प्रमुख झविन्द्र ज्ञावलीले बताए । प्रहरी कार्यालयको लागि मास्क, हेन्ड सेनिटाइजर, फेस मास्क, इन्फारेड थर्मोमिटर, फेस शिल्ड ग्लोब्स, हेन्ड वास, लगायतको स्वास्थ्य सामग्री सहयोग गरिएको सिविनले जनाएको छ ।
मकवानपुर । नेपाली कांग्रेसकी केन्द्रीय सदस्य महालक्ष्मी उपाध्याय डिनाद्वारा मनहरी अस्पताललाई एक थान अक्सिजन कन्सन्ट्रेटर सहयोग गरेकी छिन् । कांग्रेस नेतृ डिनाले अस्पताल प्रमूख डा. रिवेक सुनाम परियार र मनहरी ७ का अध्यक्ष ठाकुर तितुङलाई शुक्रबार १० लिटरको अक्सिजन कन्सन्ट्रेटर सहयोग गरेकी हुन् ।
कन्सन्ट्रेटर हस्तान्तरण कार्यक्रममा मनहरी गाउँपालिका अध्यक्ष एकराज उप्रेती, कांग्रेस जिल्ला सदस्य मिरा स्याङतान, प्रदेशसभा सदस्य सन्तबहादुर प्रजा, कांग्रेस हेटौंडा उपमहानगर सभापति आनन्दराम पराजुली, महासमिति सदस्य रञ्जन कालाखेती, मनहरी गाउँपालिका सचिव प्रकाश बर्ताैला, ७ नम्बर वडा सभापति उमेश लामा, मुक्ति अधिकारी, गोरीमाया लामा, मकवानपुर उद्योग वाणिज्य संघ पश्चिम क्षेत्र सभापति नारायण सुवेदीलगायतको उपस्थिति रहेको थियो ।
मकवानपुर । पर्यटकीय क्षेत्रकाे विस्तार तथा व्यवस्थापनकाे लागि प्रदेश सरकार सकारात्मक रहेकाे प्रदेशका मुख्यमन्त्री डाेरमणि पाैडेलले बताएका छन् ।
बागमती प्रदेशको राजधानी रहेको हेटौंडामा फरक ढंगले पर्यटक आकर्षण गर्न होमस्टे सञ्चालनमा ल्याईने तयारी भएको उनले बताएका छन् । विशेष गरी प्रदेश २, भारतीय पर्यटक र बागमती प्रदेशका स्थानीय पर्यटकलाई लक्षित गरेर हेटौंडा उपमहानगरपालिका १४ नम्बर वडा ड्राइभर डाँडामा होमस्टे गाउँ निर्माण भईरहेको छ । शुक्रबार होमस्टे गाउँ निर्माण स्थल पुगेका मुख्यमन्त्री पाैडेलले यस्ताे बताएका हुन् ।
हेटौंडा उपमहानगरपालिका १४ नम्बर वडाको ६ लाख र प्रदेश सरकारको ३० लाख लागतमा १० वटा होमस्टे निर्माण भईरहेको छ । होमस्टे सञ्चालन अब आउने आर्थिक वर्ष २०७८/०७९ भित्र हुने वडाध्यक्ष दिपक खड्काले बताए । उनले भने ‘हामीले १४ नम्बरमा १० वटा होमस्टे सञ्चालन गर्ने योजना बनाए अनुरुप यहाँका स्थानीयलाई लमजुङको घलेगाउँ र बन्दिपुरको होमस्टेमा लगेर तालिम दिएका छौं । सोहि अनुरुप होमस्टेको लागि आवश्यक भवनहरु निर्माण सम्पन्न हुने वित्तिकै सञ्चालन गर्नेछौं । ’
होमस्टको लागि आवश्यक अनुमतिको लागि उपमहानगरको पहलमा पर्यटन बोर्डमा पहल भईरहेको वडाध्यक्ष खड्काले बताए । उनले होमस्टे सञ्चालन भएपछि आवश्यकता र माग अनुसार होमस्टे थप्न सकिने बताए ।
होमस्टेमा स्थानीय परिकार, स्थानीय संस्कृती झल्कने गरी लोकल कुखुरा, ढिँडो, गुन्द्रुकलगायत हुने बताए । यस्तै गुन्द्री, सुकुल, चकटीहरु समेत प्रयोग गरेर स्थानीय झल्को दिने गरी निर्माण सम्पन्न हुने वडाध्यक्ष खड्का बताउँछन् । स्थानीय क्षेत्रमा बसाेबास गर्दै गर्दा स्थानीय परीकारकाे स्वादहरू चखाउने, संस्कारकाे प्रदर्शनी गर्दा स्वतः प्रचार हुने उनले बताए ।
मकवानपुर । बागमती प्रदेशका भौतिक पूर्वाधार विकासमन्त्री रामेश्वर फुयाँलले विद्युतीय सवारी सञ्चालनमा अवरोध गर्नु निरर्थक भएको भन्दै सरकारले जस्तोसुकै विरोधको बाबजुत पनि विद्युतीय बस सञ्चालन गर्न दाबि गरेका छन् ।
वातावरणीय स्वास्थ्यलाई समेत सकारात्मक प्रभाव पार्न सक्ने राम्रो कामको विपक्षि दलले ब्यर्थको विरोध गरेको मन्त्री फुयाँलले बताए । शुक्रबार मन्त्रालयमा पत्रकार सम्मेलन गर्दै मन्त्री फूयाँलले भने “पेट्रोलियम पदार्थबाट चल्ने सवारीलाई विस्थापित गरी वातावरण मैत्री नवीकरणीय उर्जाबाट चल्ने सवारी सञ्चालन गर्ने काममा अवरोध गरिए भावी पुस्ताप्रति अन्याय हुने छ ।”
प्रदेश सरकारले हरित प्रदेशको अवधारणाअनुरुप वातावरणमैत्री विद्युतीय बस सञ्चालन गरेर स्वच्छता अभियानको उद्घोष गर्न लागेकोले यसमा साथ दिन उनले आग्रह गरे । मन्त्री फुयालले विद्युतीय बस खरिद, पूर्वाधार निर्माण तथा सञ्चालनका हरेक क्रियाकलापहरु पारदर्शी हिसाबले हुने भन्दै अन्य कुनै बहाना वा कारण देखाएर रोक्नु नहुने धारणा बताए ।
प्रदेश सरकारले सरकारी जग्गामा स्थानीय तह तथा विद्युत प्राधिकरणसँगको समन्वयमा चार्जिङ्ग स्टेसन निर्माण गर्ने तयारी गरेको बताउँदै मन्त्री फूयाँलले भने “यसमा कसैले बाधा व्यवधान गर्नुहुदैन,यदी कसैले त्यस्तो गरे त्यहाँका स्थानीय विकास पे्रमी नागरिकहरुले त्यस्ता क्रियाकलापको विरोध गर्नेछन् ।”
प्रदेश सरकारले निर्माण गर्न लागेको चार्जिङ्ग स्टेसनलाई लक्षित गरेर प्रदेश सरकारका पूर्वमन्त्री शालिकराम जम्कट्टेलले कुनैपनि अवस्थामा स्टेसन बन्न नदिने भन्ने अभिव्यक्ति दिएको प्रति लक्षित गर्दै मन्त्री फुयालले सरकारको उद्देश्य र योजनामा पूर्वमन्त्रीलाई सहमत गराएर पहिला धादिङमै स्टेसन बनाइने बताए ।
प्रदेश सरकारले हेटौंडा, भरतपुर, नुवाकोट, बालाजु नयाँ बसपार्क, धुलिखेल तथा काठमाडौंका दुईवटा यातायात व्यवस्था कार्यालयलगायतका स्थानमा चार्जिङ मेसिन राखि सुविधा सम्पन्न विद्युतीय बस सुलभ भाडा दरमा प्रदेशवासीको लागि सञ्चालन गर्न लागिएको बताए ।
विपक्षको विरोध जारी
बागमती प्रदेश सरकारले बिद्युतीय बस खरिदका लागि टेण्डर प्रकृया अघि बढाएको बिरोधमा प्रतिपक्ष दलहरुले लगातार प्रदेश सभाको बैठक अवरुद्ध पादै आएको छ ।
एमाले र माओवादी केन्द्र एउटै पार्टी रहँदा सरकारमा सहभागि हुँदादेखि नै प्रदेश सरकारको प्राथमिकतामा परेको बिद्युतीय बस सञ्चालनको योजनामाथि अहिले प्रमुख प्रतिपक्ष दल माओवादी केन्द्रले विमति जनाउँदै आएको छ ।
बागमती प्रदेश सरकारले पहिलो बजेट भाषणमा २०८५ सम्म प्रदेशलाई पेट्रोलियम पदार्थबाट सञ्चालन हुने सवारी साधन विस्थापित गर्ने गरी नीति तथा कार्यक्रम र बजेट पास गरेको थियो ।
अहिले प्रतिपक्षमा रहेको नेपाली कांग्रेसले समेत त्यतिबेला विरोध गरेको थिए । जब बस खरिद प्रकृयाका लागि सरकारले टेण्डर प्रकृया अघि बढायो तब भने प्रमुख प्रतिपक्ष दल माओवादी र नेपाली कांग्रेस विरोधमा उत्रिएको छ । भौतिक पूर्वाधार विकास मन्त्रालयले चार्जिङ स्टेशन सहित बस खरीदका लागि टेण्डर आब्हान गरेपछि माओवादी केन्द्र विरोधमा छ । केन्द्रलाई नेपाली कांग्रेसका सांसदहरुको साथ छ ।
मन्त्रालयले बिद्युतीय बस खरीदको आवश्यकता र औचित्य पुष्टी गर्न प्रदेश सांसदहरुसँग अन्तरक्रिया आयोजना गरेका बेला प्रमुख प्रतिपक्ष दलका नेता शालिकराम जम्मकट्टेल धादिङमा कुनै हालतमा चार्जिङ स्टेशन बनाउन नदिने पक्षमा रहेको बताए । उनले गजुरीमा आफ्नै बोलवाला चल्ने भन्दै धादिङभरी नै स्टेशन बन्न नदिने दाबि गर्दै आएका छन् ।
बागमती प्रदेशमा बिद्युतीय बस सञ्चालन भए अहिले भईरहेको पेट्रोलिय पदार्थको खपत र डिजेल पेट्रोलबाट चल्ने भारतीय सवारी साधनको व्यापारमा गिरावट आउने भन्दै भारतीय कम्पनी प्रदेश सांसदहरु मार्फत बिद्युतीय बस खरीद प्रकृया रोक्न लबिङ गरिरहेका छन् । भारतीय सवारी साधन आयातमा लगानी रहेका कांग्रेस सांसद इन्द्र बानियाँ बिद्युतीय सवारी भित्रिा नदिने रणनीतिमा छन् । बानियाँ र जम्मकट्टेललाई उपयोग गर्दै भारतीय कम्पनी बागमती प्रदेश सरकारको महत्वकाक्षी योजना विफल बनाउन लागि परेको बुझिएको छ ।
नेपालमा हाईड्रो पावरमा लगानी बढिरहेको छ । यहाँ बिद्युत उत्पादन बढिरहेका बेला वातावरण मैत्री बिद्युतीय सवारी साधनको प्रयोग गर्न बागमती प्रदेश सरकार प्राथमिकताका साथ लागेको छ । प्रदेश सरकारले बिद्युतीय बसलाई सेवामुखी ढंगबाट सञ्चालन गर्न लागेको मुख्यमन्त्री डोरमणि पौडेलले बताए । तत्काल ३० वटा बिद्युतीय बस सञ्चालनका लागि धुलेखेल–काठमाडौँ–धादिङ र हेटौँडामा रहेका सरकारकै मातहतमा सञ्चालित बस पार्कमा चार्जिङ स्टेशन ब्यवस्थापन गर्ने प्रदेश सरकारको तयारी छ ।
- त्रिपुरा पोखरेल खरेल
कलेजमा राजनीतिशास्त्र पढाइ हुँदैथ्यो। रिडर जगतलाई छात्रछात्राले मन पराउथे ।उनको पढाउने शैली गजबको थियो। सधैँको जस्तो आज प्रश्न गर्ने प्रशान्तको पालो हो। अनि पाँच मिनेटमै यो सकेर हामी आफ्नो पढाइको विषयतिर लाग्नुपर्छ ।
” सर क्रान्ति भनेको के हो ? ” प्रशान्तले प्रश्न गर्यो। ” किन सोध्यौ प्रशान्त ? ” तिनी मुस्कुराए ” मलाई जान्ने चाहना जाग्यो ।” ” क्रान्ति भनेको भोकोको आबाज हो ,जब ऊ डम्म भएर अघाउँछ त्यसपछि ऊ विश्राम गर्छ, फेरि अर्को भोकाएको मान्छे, क्रान्ति भन्दै आक्रोशित आवाजले माइक घन्काउँछ ।
“अनि परिवर्तन भनेको चाहिँ के हो सर?” आज ऊसले सानो बालक सरह गुरुलाई प्रश्नको वर्षा गर्दैछ। ” हैट लाटा , परिवर्तन पनि कतै हुन्छ र? परिवर्तनको शाब्दिक अर्थ के हो तिमीलाई थाहा छ ?” “छैन , त्यसैले गुरूलाई सोधेको ।” प्रशान्तले पछाडि फर्केर साथीहरुलाई हेर्यो। उसले मन पराएकी ललिता र उसका चार आँखा जुधे। ऊ मुस्कुराइ।
” बाबु , परिवर्तन भनेको चाहिँ पुरानो रक्सीलाई नयाँ बोतलमा हालेको जत्तिकै हो। राजनीतिशास्त्रमा प्रजातन्त्रको व्याख्या कस्तो लेखिएको छ, त्यो तिमीलाई थाहा छ ,तर प्रयोगमा भने प्रजातन्त्रको सही मूल्यांकन भएको छ त?” तिनले उल्टै प्रशान्तलाई प्रश्न गरे। ” नाइँ ,ऊसले नकारात्मक पाराले टाउको हल्लायो। राजनीति शास्त्रमा मौलिक अधिकारको कुरा लेखिएको छ।
कसैले मौलिक अधिकार पाएका छन् त? ” छैन गुरू।” ऊसले पुन: टाउको हल्लायो। ” बावु ! प्रजातन्त्र , परिवर्तन , मौलिक अधिकार र क्रान्ति भन्दै नेताहरूले सिधासाधा जनताको भोट हत्याउने काम गर्छन् । सरकार परिवर्तन हुन्छ, सरकार चलाउने मान्छे परिवर्तन हुन्छन् तर व्यवस्था परिवर्तन हुँदैन ।” “अहिले भने अलिअलि बुझें सर।”
पानी खोलाबाट बोकेर खानुपर्ने गाउँका मानिसहरूले सरकारसँग पानीको माग गरेर नारा लगाएका रहेछन् । पुलिसहरुले अश्रुग्यास छोड्दै भीडलाई लाठीचार्ज गर्दैथ्ये। “गुरूको भनाइको अर्थ पुरै बुझें। ” बाहिरको दृश्य हेर्दै प्रशान्तले भन्यो।
सिक्किम, भारत