मकवानपुर । बलात्कारपछि हत्या गरेको आशंका गरिएको बालिकाको परिवारलाई नगद र खाद्यान्न सहयोग गरिएको छ । पूर्वी मकवानपुर बागमती ७ की मृतक ४ स्वर्गीय रुविना पाख्रिनको परिवारलाई सहयोगीहरुबाट प्राप्त नगद ३१ हजार ५० रुपैंया र खाद्यान्न सहयोग गरिएको हो ।
आर्थिक रुपमा विपन्न रहेको परिवारलाइ बागमती प्रदेशकी निवर्तमान प्रदेश प्रमुख एवं माईती नेपालकी अध्यक्ष अनुराधा कोईरालाबाट प्राप्त १० हजार र जगत टिभीबाट संकलित २१ हजार ५० रुपैंया हस्तान्तरण गरिएको थियो । यस्तै हाल जापानमा रहेका मकवानपुरकी चेलीहरु शर्मिला लामा र प्रिया व्लोनबाट ५ बोरा चामल, तेल १ कार्टुन र मसला तथा अनुराधा कोईरालाबाट प्राप्त एक बोरा चामल, नुन, तेल, चना प्रदान गरिएको थियो ।
नगद सहयोग गर्नेमा जापानमै रहेका नेपालको पहिलो स्याटेलाइट निर्माता हरिश श्रेष्ठबाट ३ हजार, पोखराकी सुशिला श्रेष्ठबाट ३ हजार, मकवानपुरगढीकी गोमा लामाबाट २ हजार ५ सय साथै हेटौंडाकी रश्मी बस्नेत, फापरबारीका भीम परियार, बुढीचौर घर भई हाल दक्षिण कोरियामा रहेका गिरिजा न्यौपानेबाट जनही २ हजारसहित १३ जनाले सहयोग गरेका थिए ।
मकवानपुरको पूर्वी क्षेत्र वागमती गाउँपालिका ७, लामिटारस्थित रुविनाको घरमा पुगेर आमा सीतामायाँ पाख्रिन र बुवा शेरबहादुर पाख्रिनलाई नगद र खाद्यान्न सहयोग गरिएको हो । माईती नेपालकी मकवानपुर कार्यक्रम संयोजक मायाँ लामा, मन लामा र जगत टिभीका संचालक अशोकसुजन श्रेष्ठले नगद र खाद्यान्न हस्तान्तरण गरेका थिए ।
झण्डै ९ महिनाअघि मंसीर ३ गते साँझ रुविनाको रगतले लतपतिएको नग्न अवस्थामा शव भेटिएपछि बलात्कार र हत्या भएको अनुमान गरिएको थियो । रुविनाको बलात्कार र हत्या गरेको आरोपमा आफन्त नातापर्ने स्थानीय एक किशोरमाथि मकवानपुर जिल्ला अदालतमा मुद्धा चलिरहेको बताईएको छ ।
यसअघि रुविनाको परिवारलाई वागमती गाउँपालिकाबाट ५० हजार, पाख्रिन समाज चितवनबाट ५५ हजार, गाउँलेहरुबाट ३५ हजार, मञ्जुश्री असहाय संरक्षण केन्द्र मकवानपुरबाट १५ हजार रुपैंया लगायतले आर्थिक सहयोग गरेको परिवारले जनाएको छ । आफ्नो खेतमा उत्पादित अन्नले छ महिनामात्र खान पुग्ने भएकाले ज्याला मजदुरी गर्नुपर्ने अवस्था रहेकोले थप सहयोगको अपेक्षा गरेका छन् ।
मकवानपुर । लुम्बिनी प्रदेशका मुख्यमन्त्री शंकर पोखरेलले राजीनामा दिएका छन् । पाेखरेलकाे राजिनामा सँगै नयाँ मुख्यमन्त्री चयनका लागि प्रदेश प्रमुख अमिक शेरचनले आह्वान गरेका छन् । प्रदेश प्रमुख शेरचनले साउन २८ गते दिउँसो ३ बजेसम्म मुख्यमन्त्रीको दावी गर्न आह्वान गरेका हुन् ।
बुधबार लुम्बिनी प्रदेशका मुख्यमन्त्री शंकर पोखरेलविरुद्धको अविश्वासको प्रस्तावमा प्रदेश सभामा छलफल हुँने कार्यसूची थियो । स्पष्ट अल्पमतमा परिसकेका पोखरेलले अविश्वास प्रस्तावको सामना गर्नुपूर्व नै प्रदेश प्रमुख अमिक शेरचनसमक्ष राजीनामा बुझाएका थिए । पाेखरेलकाे राजिनामा प्रदेश प्रमुख शेरचनले स्वीकृत गरी अर्काे मुख्यमन्त्री चयन नभएसम्मकाे लागि पाेखरेललाई नै मुख्यान्त्रीकाे जिम्मेवारी दिएका छन् ।
विपक्षी दलहरूले माओवादी केन्द्रका सांसद कुलप्रसाद केसीलाई मुख्यमन्त्री प्रस्ताव गर्दै पोखरेलविरुद्ध अविश्वासको प्रस्ताव दर्ता गरेका थिए । पोखरेलको बहिगर्मनपछि यो प्रदेशको मुख्यमन्त्री माओवादी केन्द्रकै नेता कुलप्रसाद केसी बन्ने पक्का छ ।
प्रदेशका हालका प्रदेश प्रमुख पनि माओवादी केन्द्रकै हुन्। देउवा नेतृत्वको सरकारले दुईसाता अघिमात्रै शेरचनलाई प्रदेश प्रमुख नियुक्त गरेको थियो । त्यस्तै लुम्बिनी प्रदेशका सभामुख पनि नेकपा माओवादीकै पूर्णबहादुर घर्ती छन् ।
लुम्बिनी प्रदेशमा अब संविधानको धारा १६८ को उपधारा २ बमोजिमको बहुमतको सरकार गठन हुनेछ । यसमा दुई वा दुईभन्दा धेरै दलको समर्थनमा सरकार बन्न सक्नेछ । नयाँ मुख्यमन्त्रीका लागि अहिलेको विपक्षी गठबन्धनबाट कुलप्रसाद केसीले दावी गर्नेछन् । उनी माओवादी केन्द्र संसदीय दलका नेता हुन् । शंकर पोखरेलविरुद्ध अविश्वास प्रस्ताव दर्ता गर्दा केसीको नाम मुख्यमन्त्रीमा सिफारिस भएको थियाे ।
केसी पूर्वमन्त्री भइसकेका व्यक्ति हुन् । उनको पक्षमा अहिले ४१ सांसद देखिएका छन् । कांग्रेस, माओवादी, जनता समाजवादी र जनमोर्चाको साथ उनले पाएका छन् ।


मकवानपुर । मकवानपुर ५४ जना काेराेना संक्रमित थपिएका छन् । पछिल्लो २४ घण्टामा थप ५४ जनामा कोरोना भाइरस संक्रमण पुष्टि भइ थपिएकाे हाे ।
बुधबार १ सय १७ जनाको पीसीआर परीक्षणमा ४९ जना र २२ जनाकाे एन्टीजेन परीक्षणबाट ५ जना संक्रमण पुष्टि भएको स्वास्थ्य कार्यलय मकवानपुरले जनाएको छ । कार्यलयका अनुसार पुष्टि हुनेहरुमा सबैभन्दा बढी ४५ जना हेटौंडा उपमहानगरपालिका भित्रका रहेका छन् । यसैगरि थाहा नगरका ३ जना,बागमती,मनहरी र भीमफेदीगाउँपालिकाका २/२ जना रहेका छन् । यो संगै जिल्लामा हालसम्म १४ हजार १ सय २२ जनामा कोरोना पुष्टि भएको छ ।
यसैगरि पछिल्लो २४ घण्टामा ७२ जनाले कोरोना संक्रमण निकाे भएका छन् । यो संगै जिल्लामा हालसम्म १२ हजार ९ सय ७ जनाले कोरोना निकाे भएका छन् ।
यसैगरि जिल्लामा पछिल्लो २४ घण्टामा थप २ जना संक्रमितको मृत्यु भएको छ । मृत्यु हुनेहरुमा हेटौंडा-७ का ७० वर्षीय र भीमफेदी-१ का ६१ वर्षीय पुरुष रहेका छन् । उनिहरु दुबैजनाको उपचारको क्रममा हेटौंडा अस्पतालमा मृत्यु भएको हो । हेटौंडा-७ का पुरूषमा साउन १९ गते कोरोना पुष्टी भएको र साउन २० गते उपचारको लागि हेटौंडा अस्पतालमा भर्ना भएकोमा मंगलबार मृत्यु भएको कार्यलयले जनाएको छ ।
यसैगरि भीमफेदी-१ का ६१ वर्षीय पुरुषमा साउन ९ गते कोरोना पु्ष्टि भएको र साउन १० गते उपचारको लागि हेटौंडा अस्पतालमा भर्ना गरिएको थियो । उनको आज बिहान उपचारको क्रममा मृत्यु भएको कार्यलयले जनाएको छ ।
यो संगै जिल्लामा कोरोनाबाट मृत्यु हुनेको संखया १ सय ५२ पुगेको छ । जसमा हेटौंडा उपमहानगरपालिका का १ सय ९ जना, मनहरी गाउँपालिकाका ११ जना, थाहा नगरपालिकाका ९ जना, भीमफेदी गाउँपालिकाका ६ जना, मकवानपुरगढी गाउँपालिकाका ५ जना, बागमती र बकैया गाउँपालिकाका ४/४ जना, कैलाश र राक्सिराङ गाउँपालिकाका २/२ जना रहेका छन् ।
जिल्लामा हाल १ हजार १९ जना सक्रिय संक्रमित उपचाररत रहेका छन् । जसमा ९ सय ७३ जना घरमा र ४६ जना संस्थागत आइसोलेसनमा उपचाररत रहेको स्वास्थ्य कार्यलय मकवानपुरले जनाएको छ ।
नेपालमा थपिए ३ हजार ४ सय ८१ जना काेराेना संक्रमित
नेपालमा ३ हजार ४ सय ८१ जना काेराेना संक्रमित थपिएका छन् । पछिल्लो २४ घण्टामा नेपालमा थप ३ हजार ४ सय ८१ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएकाे छ ।
१६ हजार ६ सय ५६ जनाको परीक्षण गर्दा ३ हजार ४ सय ८१ जना काेराेनाे भाइरस संक्रमण पुष्टि भएको मन्त्रालयले जनाएको छ ।
यसैगरी पछिल्लो २४ घण्टामा १ हजार ८ सय ८५ जना कोरोना संक्रमण निकाे भएका छन् । साेही समयमा कोरोनाको कारण ३० जनाको मृत्यु भएको छ । यो संगै नेपालमा कोरोनाको कारण मृत्यु हुनेको संख्या १० हजार १ सय ८० पुगेको स्वास्थ् मन्त्रालयकाे तथ्याङमा उल्लेख छ ।
बालबालिकाहरू अझै जाेखिममा
Tags: No Comments
मकवानपुर । मान्छे बेचेर खाने जस्ता अपराधिक गतिविधिमा संलग्न हुनेहरुको सन्जाल अझैसम्म रहेको रत्ननगर नगरपालिका चितवनका नगर प्रमुख नारायण वनले बताएका छन् । आर्थिक रूपमा कमजोर भएकाहरु बढी जोखिममा रहेको बताउँदै नगरप्रमुख वनले भने “यस्ता जोखिममा रहेका बालबालिकाहरुको संरक्षण गर्नु स्थानीय तहहरुको जिम्मेवारी हो ।”
सुरक्षाको लागि साथ साथ परियोजना अन्तरगत मंगलबार चितवनको रत्ननगर नगरपालिकामा एक्प्याक्ट लगजेम्बर्गको सहयोगमा कानुन अन्वेसण तथा स्रोत विकास केन्द्र (सेलर्ड)ले आयोजना गरेको मानव बेचबिखन विरुद्ध र बाल संरक्षणका बिषयमा सेवा प्रदायकहरूका निमित्त एक दिवसीय तालिममा उनले यस्तो बताएका हुन् ।
रत्ननगर नगरपालिकाले जोखिममा रहेका अभिभावक बिहिन बालबालिकाको अवस्था विश्लेषण गर्दै संरक्षकत्व प्रदान गर्ने तत्परता देखाएको उनले बताए । “म रत्न नगरको बालक हुं भनेर गर्व गर्न लायक बनाउने अभियानमा छौं” वनले भने यो बालबालिकाहरुको लागि संबिधानले प्रदान गरेको अधिकार पनि हो ।”
यसैगरी महिलामाथि हुने कुनै पनि हिंसाको विरुद्ध आफूहरु लागि परेको नगरउपप्रमख बिमलादेवी दुवाडीले बताइन् । बुहारीलाई आफ्नो घरमा सम्मानित हुने अवस्था सिर्जना गर्न सामाजिक पाटोमा सचेतना फैलाउन अभियानमा नगरपालिका लागिपरेको उपप्रमुख दुवाडीले बताइन् । “दाईजोलगायतको कुप्रथाहरुको अन्त्यमा हामीले धेरैले गर्न बाँकी छ” उनले भनिन । यसैगरी सडक बालबालिका, घरेलु बालश्रमलगायतको क्षेत्रमा पनि काम गरिरहेको उनले बताइन् ।

रत्ननगर नगरपालिका चितवनसँगको समन्वय र सहकार्यमा आयोजना गरिएको कार्यक्रम मानव तस्करलाई कारबाहीको लागि कानुन नबनेको हुनाले ठगिको केसमा मुद्दा चलाउने गरेको कारण तस्करी नरोकिएको तालिमका सहजकर्ता केशब दुवाडीले बताए ।
बालयौन मोहक मनोप्रवृत्ति हाबी भएकाहरूबाट बालबालिका बढी जोखिममा रहेको सेलर्डका फिल्ड अफिसर अधिवक्ता जगन्नाथ सुबेदीले बताए । केही बाल गृहको नराम्रा कामको कारण सबै बालगृह बदनाम हुने गरेकोले बालगृह सञ्चालन गर्दा नीति नियमहरु पुर्ण रुपमा पालन गर्नतर्फ ध्यान दिनुपर्ने अधिवक्ता सुवेदीले आग्रह गरे ।

घरेलु श्रमिक राख्ने प्रवृत्ति अझै रहेको र वडास्तरीय रुपमा घरेलुु बाल श्रमिक उन्मुलनको कार्य जारी राखेको रत्ननगर नगरपालिका महिला बालबालिका महाशाखा प्रमुख दीपा घिमिरेले बताइन् । सबैको सहकार्यले बाल संरक्षण र मानव बेचबिखन विरुद्धको अभियानमा सफलता प्राप्त हुने घिमिरेले बताइन् ।
कोरोना महामारीको कारण अनलाइन शिक्षाको बाहानामा बालबालिकामाथि मानसिकलगायतको तनाव बढेको रत्ननगर नगरपालिका नगरस्तरीय बाल क्लब सन्जाल अध्यक्ष रोनिशा घिमिरेले बताइन् । “मोबाइलको अभावमा अनलाइन शिक्षामा जोडिन नपाउँदा हिनताबोध गर्नेहरू एकातिर छन् भने, त्यै मोबाइलको दुरुपयोग गरेर पढाइ बिग्रार्नेहरू पनि छन्” उनले भनिन् “अनलाइनबाट हुने नकारात्मक कामको निगरानी सरकारले किन गर्दैन ?” यसैगरी अनलाइनको कारण बालबालिकाहरू विविध प्रकारको खराब लतमा फस्दै गरेको र बाल क्लबहरूले नियन्त्रण गर्नै नसक्ने अवस्था आएको सन्जालका सचिब सहज खनालले बताए ।

बालबालिकाको संरक्षणमा अभिभावक स्वयम जिम्मेवार हुनुपर्ने र अभिभावक नहुदा राज्यले सबै जिम्मेवारी लिनुपर्ने प्रशिक्षक दुवाडीले बताए । तालिममा प्रशिक्षक दुवाडीले अपराध पीडितको अधिकार बारे कानुनी व्यवस्था बारे पनि जानकारी गराएका थिए । पीडित कमजोर हुने र पीडक शक्तिशाली हुने भएकोले कमजोर वर्गले झनै ढिलो न्याय पाउने भएकोले बिद्यमान कानुनमा फास्टट्र्याकको व्यवस्था गरिएको उनले बताए ।

यसैगरी तालिममा फिल्ड अफिसर अधिवक्ता सुवेदीले स्वयमसेवी पर्यटनको जोखिममा बालबालिका पर्नेसक्ने बारे ध्यानाकर्षण गराएका थिए । स्वयमसेवि रुपमा आउने पर्यटनहरूको जोखिममा बालिकाभन्दा बालकहरू बढी परेको उनले बताए । पर्यटनको रूपमा आउने र बालबालिकामाथि यौन शोषण गर्ने गरेको पाइएमा कानुनी कारबाही हुने उनले बताए ।
तालिममा रत्ननगर नगरपालिकामा रहेका बालगृह सञ्चालकहरु, तथा बालअधिकारको क्षेत्रमा कार्यरत सेवा प्रदायकहरुको उपस्तिथि रहेको थियो ।
मकवानपुर । हेटौंडा उपमहानगरपालिकामा कोरोनाविरुद्धको खोप लगाउनका लागि अनलाईन दर्ता अभियान संचालन भएकाे छ । स्वास्थ्य तथा जनसंख्या मन्त्रालय मार्फत काेराेना खोप लगाउन अनलाईन दर्ताका लागि महिला सशक्तिकरण तथा गरिबी निवारण समूह नेपालको सहजिकरणमा हेटौंडा उपमहानगरपालिकामा अभियान संचालन गरेको हो ।
मन्त्रालयले विश्व स्वास्थ्य संगठन र युएनडिपिको आर्थिक एवं प्राविधिक सहयोगमा ७ प्रदेशका ७ स्थानीय तहमा पाइलट प्रोजेक्टको रुपमा अनलाईन दर्ता अभियान संचालन गरेको हाे । बागमती प्रदेशको हेटौंडा उपमहानगरपालिका सहित प्रदेश १ को बिराटनगर महामहानगरपालिका, प्रदेश २ को कलैया उपमहानगरपालिका, गण्डकी प्रदेशको बेनी नगरपालिका, लुम्बिनी प्रदेशको बुटबल उपमहानगरपालिका, कर्णाली प्रदेशको गुराँस गाउँपालिका र सुदरपश्चिम प्रदेशको धनगढी उपमहानगरपालिकामा सहजकर्ताहरु नै खटाएर अनलाईन दर्ता अभियान संचालन भईरहेको छ ।
७ सय ५३ वटै स्थानीय तहमा अभियान संचालन गर्ने र तथ्यांक व्यवस्थापनको उद्देश्यले ७ स्थानीय तहमा पाइलट प्रोजेक्ट संचालन गरिएको बताइएकाे छ । अनलाईन दर्तामा सर्वसाधारणको उत्साहजनक सहभागिता देखिएको महिला सशक्तिकरण तथा गरिबी निवारण समूह नेपालकी अध्यक्ष इन्दिरा न्यौपानेले बताईन् ।
अनलाईन दर्ता गर्दा खोप केन्द्रमा हुने भिडभाड समेत कम भएको सर्वसाधारणको भनाई छ । सहजकर्ताहरु नै परिचालन गरेरअग्रिम अनलाईन दर्ता गरी स्वास्थ्य केन्द्रमा खोप लगाउँदा लाईन बस्नु नपर्ने भएकाले सहज ढंगले खोप लगाउन सकिने भएकाे छ ।
अभियानले खोपको दुरुपयोग रोक्ने, बैदेशिक रोजगारी जानेहरुका लागि अध्यागमनमा परेको समस्यालाई सहजिकरण गर्ने, स्वास्थ्य संस्थामा चाप व्यवस्थापन हुने, खोपको राष्ट्रिय तथ्यांकमा दुरुस्तता आउने जस्ता सकारात्मक परिणाम आउने विश्वास लिइएकाे छ ।