नेपाली कांग्रेसले पालिका अधिवेशनमा वडा सभापति र क्षेत्रीय प्रतिनिधि मात्रै मतदाता हुनेगरी विधान संशोधन गरेको छ । कांग्रेसको शनिबार सम्पन्न केन्द्रीय कार्यसमिति बैठकले क्रियाशील सदस्यको अधिकार कटौती गर्दै पालिका अधिवेशनमा वडा सभापति र क्षेत्रीय प्रतिनिधि मात्रै मतदाता हुन पाउनेगरी विधान संशोधन गरेको हो ।
यसअघि भने कांग्रेस विधानमा पालिकाभित्र रहेका सबै क्रियाशील सदस्य अधिवेशनका सदस्य हुने प्रावधान थियो । कांग्रेस नेता रमेश लेखकले कोरोना महामारीलाई ध्यान दिँदै अधिवेशनमा भीडभाड नहोस् भनेर यस्तो व्यवस्थासहितको विधान संशोधन गरिएको जानकारी दिए ।
संशोधित विषय मंसिरका लागि तय गरिएको १४औं महाधिवेशनबाट अनुमोदन गराइने लेखकले जानकारी दिए । ‘विधानको धारा ८ (१) (क) र धारा ९ (१) (ख) मा उल्लेख गरिएको क्रमशः ‘गाउँपालिका क्षेत्रभित्रका सम्पूर्ण नेपाली कांग्रेसका क्रियाशील सदस्य गाउँपालिका अधिवेशनका र नगर÷उपमहानगर÷महानगरपालिका क्षेत्रभित्रका नेपाली कांग्रेसका क्रियाशील सदस्य नगरपालिका अधिवेशनका सदस्य’ भनिएकोमा ‘गाउँपालिका क्षेत्रभित्रका वडा सभापति र क्षेत्रीय प्रतिनिधि तथा नगरपालिका क्षेत्रभित्रका वडा सभापति र क्षेत्रीय प्रतिनिधि भनी संशोधन गर्ने,’ कांग्रेसले शनिबार सम्पन्न बैठकको निर्णयमा भनेको छ ।
पालिका अधिवेशनमा वडा सभापति र क्षेत्रीय प्रतिनिधि मात्रै मतदाता
विधानअनुसार १ सय ५० पचास वा सोभन्दा कम क्रियाशील सदस्य भएको वडामा क्रियाशील सदस्यमध्येबाट कम्तिमा तीन महिलासहित नौ जना क्षेत्रीय प्रतिनिधि प्रत्यक्ष निर्वाचित हुने व्यवस्था छ ।
त्यस्तै १ सय ५० भन्दा बढी क्रियाशील सदस्य भएको वडामा बढीमा ७५ को सीमाभित्र रही प्रति १ सय थप क्रियाशील सदस्यमा थप दुई महिलासहित ६ जना प्रतिनिधि चयन गर्न पाउने व्यवस्था छ ।
कोरोनाको जोखिम नघटेको र विभिन्न जिल्लामा निषेधाज्ञा पनि जारी भएको अवस्थामा थोरै उपस्थित हुनेगरी विधानको व्यवस्थामा संशोधन गरिएको कांग्रेसले जनाएको छ ।
यसैगरी, कांग्रेसले गाउँ÷नगर÷उपमहानगर र महानगरपालिकाको कार्यसमितिको सभापतिको उम्मेदवार क्षेत्रीय प्रतिनिधि मात्रै हुन पाउने गरी विधान संशोधन गरेको छ ।
यसअघि महासमिति बैठकले बनाएको विधानमा कांग्रेसको क्रियाशील सदस्यता लिएको दुई वर्षको सदस्य पालिका सभापतिको उम्मेदवार बन्न पाउने व्यवस्था थियो । सभापतिबाहेकको कार्यसमितिका पदाधिकारी र सदस्यको उम्मेदवार भने क्रियाशील सदस्य पनि हुन सक्नेछन् ।
‘गाउँ÷नगर÷उपमहानगर÷महानगरपालिका कार्यसमितिमा मतदाता वडा सभापति र क्षेत्रीय प्रतिनिधि हुने व्यवस्था गरिएको छ,’ कांग्रेसको निर्णयमा भनिएको छ ।
यस्तै, अपांगता भएका व्यक्तिको प्रतिनिधित्वका सन्दर्भमा विधान र नियमावलीमा गरिएको पालिकाका क्रियाशील सदस्यहरूले निर्वाचित गर्ने भन्ने उल्लेख गरिएका पदको निर्वाचन वडा सभापति र क्षेत्रीय प्रतिनिधिले गर्ने जनाएको छ ।
कांग्रेसले शनिबार नै ९ देखि १३ मंसिरसम्म केन्द्रीय महाधिवेशन गर्नेगरी कार्यतालिका सार्वजनिक गरेको थियो । नयाँ कार्यतालिका अनुसार १८ भदौबाट कांग्रेसको सबैभन्दा तल्लो तह मानिने वडा तहको अधिवेशन सुरु हुनेछ । राजधानी दैनिकमा प्रकाशित समाचार साभार गरिएकाे
कोरोना संक्रमितको संख्या दिनहुँ बढ्दै गएपछि काठमाडौं उपत्यकामा निषेधाज्ञालाई थप कडा बनाउने तयारी गरिएको छ ।
स्वास्थ्यसँग सम्बन्धित निकायले काठमाडौं उपत्यकालाई ‘रेड जोन’मा राखेको भन्दै उपत्यकाका तीनै जिल्ला काठमाडौं, भक्तपुर र ललितपुरका प्रसासन कार्यालयले जारी निषेधाज्ञालाई थप कडाइ गर्ने तयारी गरेका हुन् ।
काठमाडौंका प्रमुख जिल्ला अधिकारी कालीप्रसाद पराजुलीले स्वास्थ्यसँग सम्बन्धित निकायले काठमाडौंलाई कोरोनाको रेड जोन मानेको र संक्रमितको संख्या बढ्दै जाँदा निषेधाज्ञाको मोडालिटीमासमेत थप कडाइ गर्नुपर्ने अवस्था सिर्जना हुँदै गएको बताए ।
उनले आमसर्वसाधारणले महामारीप्रति सरकारले जारी गरेको स्वास्थ्य सुरक्षा मापदण्डको पालनामा बेवास्ता गर्दा संक्रमणको गति उकालो लाग्दै गएकाले अवस्थाको विश्लेषण गर्ने काम भइरहेको जानकारी दिए ।
‘काठमाडौं कोरोना संक्रमण बढ्दो छ, हामीले अनुगमन टोली नै गठन गरेर स्वास्थ्य मापडण्ड पालना भए नभएकोबारे अनुगमन गर्दै आइरहेका छौं, पछिल्लो अवस्थाकोसमेत विश्लेषण गर्ने काम हुँदै छ, आमसर्वसाधारणलाई जथाभावी भीडभाड नगर्न, मास्कको प्रयोग गर्न र बिनाकाम घरबाहिर ननिस्कनसमेत आग्रह गरिरहेका छौं,’ काठमाडौंका प्रमुख जिल्ला अधिकारी पराजुलीले राजधानीसँग भने ।
स्वास्थ्य मन्त्रालयका अनुसार शनिबारसम्म काठमाडौंमा ८ हजार ५ सय ७९, ललितपुरमा १ हजार ३ सय १९ र भक्तपुरमा १ हजार ९ सय १८ संक्रिय संक्रमित छन् । काठमाडौंमा परीक्षण गरिएकामध्ये २५ देखि ३० प्रतिशतलाई संक्रमण पुष्टि हुन थालेको छ ।
प्रमुख जिल्ला अधिकारी पराजुलीले संक्रमणको दर कम हुनेभन्दा बढ्दो गतितर्फ रहेकाले प्रसासनले थप संक्रमण दरको समीक्षा गर्दै निषेधाज्ञाको कडाइमा आवश्यक निर्णय लिने तयारी गरिरहेको जानकारी दिए ।
‘संक्रमणको आगामी तथ्यांकको विश्लेषण गरेर कस्तो मोडालिटीमा नियोधाज्ञालाई अघि बढाउने भन्ने तय गर्छौं,’ प्रमुख जिल्ला अधिकारी पराजुलीले भने ।
हाल भने काठमाडौं प्रसासनले राति ८ बजेबाट सवारी साधन सञ्चालनमा रोक लगाइसकेको छ । रातिको समयमा भेटघाट बढी हुने भएकाले प्रशासनले यस्तो निर्णय गरेको हो ।
हाल कोरोना संक्रमणको गति बढ्दै जाँदा काठमाडौं उपत्यकाका निजी तथा सरकारी अस्पतालमा कोरोना संक्रमित बिरामीसमेत बढ्न थालिसकेका छन् भने संक्रमितको संख्यासँगै मृत्युदरसमेत बढ्दै जान थालेको छ ।
यसअघि काठमाडौं, ललितपुर र भक्तपुरका प्रमुख जिल्ला अधिकारीहरूको संयुक्त बैठकले निषेधाज्ञा ८ भदौसम्म कायम गर्ने निर्णय गरेका थिए । काठमाडौं उपत्यकामा १६ वैशाखबाट निषेधाज्ञा जारी गरिएको थियो ।
स्वास्थ्य मन्त्रालयका अनुसार हाल दैनिक १० हजार हाराहारीमा कोरोना परीक्षण भइरहेको छ । यो परीक्षण हेर्दा प्रत्येक चार जनामा एकलाई संक्रमण पुष्टि भइरहेको छ । परीक्षणका क्रममा काठमाडौं उपत्यकालगायत ठूला सहरमा दैनिक २० देखि २५ प्रतिशतसम्म संक्रमण पुष्टि भइरहेको मन्त्रालयले जनाएको छ ।
गृह मन्त्रालयले शुक्रबार मात्रै कोरोना महामारीको तेस्रो लहर आउने सम्भावना रहेको भन्दै ७७ वटै जिल्लामा पहिलो र दोस्रो चरणमा सञ्चालित कोरोना अस्पताललाई पुनः सूचीकरण गर्न सम्बद्ध निकायलाई निर्देशन दिएको छ ।
स्वास्थ्य तथा जनसंख्या मन्त्रालय, स्वास्थ्य आपतकालीन तथा विपत् व्यवस्थापन एकाइ तथा स्वास्थ्य आपतकालीन कार्य सञ्चालन केन्द्रको अनुरोधअनुसार गृह मन्त्रालयले देशभरका बन्द कोभिड–१९ आइसोलेसन सेन्टर, अस्पताल र शिक्षण अस्पताललाई पुनः सूचीकरण एवं सञ्चालन गर्न ७७ वटै जिल्ला प्रशासन कार्यालयलाई निर्देशन दिएको हो । राजधानी दैनिकमा प्रकाशित समाचार साभार गरिएकाे
मकवानपुर । मकवानपुर प्रहरीले चाेरी, लागुऔषध, चेक अनादर मुद्दाका ४ जना फरार प्रतिवादी पक्राउ गरेकाे छ । प्रहरीले चाेरी मुद्दाका १ जना, लागुऔषध मुद्दका १ जना र चेक अनादर मुद्दाका २ जना गरी ४ जना फरार प्रतिवादी पक्राउ गरेकाे हाे ।
मकवानपुर जिल्ला अदालत हेटौडाको २०७७ साल माघ २८ गतेको फैसलाले चोरी मुद्दामा बर्ष ४ महिना कैद र रू २० बीस जरिवाना भुक्तान गर्न बाँकी फरार प्रतिवादी कैलाश गाउँपालिकाका ८ का राजिन्द्र मोक्तानलाई जिल्ला प्रहरी कार्यालय मकवानपुरबाट खटीएको प्रहरी टोलीले मनहरी गाउँपालिका ९ बाट पक्राउ गरिएकाे जिल्ला प्रहरी कार्यालयले जनाएकाे छ ।
साउन ३१ गते आइतबार मनहरी ९ बाट पक्राउ गरिएका माेक्तानलाई आवश्यक कारवाहीको लागि जिल्ला अदालत मकवानपुरमा उपस्थित गराईएकोमा उक्त कैद तथा जरिवाना भुक्तानको लागि कारागार कार्यालय भिमफेदी पठाउने कार्य भईरहेको प्रहरी प्रवक्ता जयश्वर रिमालले जानकारी दिए ।
यसैगरी मकवानपुर जिल्ला अदालत हेटौडाको २०७८ बैशाख १६ गतेको फैसलाले लागुऔषध गाँजा मुद्दामा १० महिना ५ दिन कैद भुक्तान गर्न बाँकी फरार प्रतिवादी राैतहट चन्द्रपुर नगरपालिका ३ का ३० बर्षिय पुर्ण बहादुर गोलेलाई जिल्ला प्रहरी कार्यालय मकवानपुरबाट खटिएको प्रहरी टोलीले हेटाैडा उपमहानगरपािलका २ बाट पक्राउ गरिएकाे प्रहरीले जनाएकाे छ ।
साउन ३१ गते आइतबार हेटाैडा २ बाट पक्राउ गरिएका गाेलेलाई आवश्यक कारवाहिको लागि जिल्ला अदालत मकवानपुरमा उपस्थित गराईएकोमा उक्त कैद भुक्तानको लागि कारागार कार्यालय भिमफेदी पठाउने कार्य भईरहेको प्रवक्ता रिमालले बताए।
यस्तै मकवानपुर जिल्ला अदालत हेटौडाको २०७८ बैशाख १७ गतेको फैसलाले चेक अनादर मुद्दामा २ हजार रूपैया जरिवाना भुक्तान गर्न बाँकी फरार प्रतिवादी जिल्ला मकवानपुर कैलाश गाउँपालिका ३ का ३७ बर्षिय पेमा योञ्जनलाई जिल्ला प्रहरी कार्यालय मकवानपुरबाट खटिएको प्रहरी टोलीले जिल्ला प्रहरी कार्यालय मकवानपुरबाट खटीएको प्रहरी टोलीले हेटाैडा उपमहानगरपािलका २ बाट पक्राउ गरिएकाे प्रहरीले जनाएकाे छ । साउन ३१ गते हेटाैडा २ बाट पक्राउ गरिएकाे याेञ्जनलाई आवश्यक कारवाहिको लागि जिल्ला अदालत मकवानपुरमा उपस्थित गराईएको रिमालले बताए ।
यसैगरी मकवानपुर जिल्ला अदालत हेटौडाको २०७७ फागुन १७ गतेको फैसलाले चेक अनादर मुद्दामा १ हजार रूपैया जरिवाना भुक्तान गर्न बाँकी फरार प्रतिवादी कैलाश गाउँपालिका २ का २७ बर्षिय दिल बहादुर नेगीलाई जिल्ला प्रहरी कार्यालय मकवानपुरबाट खटीएको प्रहरी टोलीले हेटाैडा उपमहानगरपािलका २ बाट पक्राउ गरिएकाे प्रहरीले जनाएकाे छ । साउन ३१ गते हेटाैडा २ बाट पक्राउ गरिएकाे आवश्यक कारवाहीको लागि जिल्ला अदालत मकवानपुरमा उपस्थित गराईएको रिमालले जानकारी दिए ।
मकवानपुर । बागमती प्रदेश सभा बैठक भदौ १ गते बस्ने भएको छ । चालू वर्षको नीति, कार्यक्रम तथा बजेट पास गरेसँगै गत असार २८ मा स्थगित भएको प्रदेशसभा बैठक १ महिनापछि मंगलबार बस्न लागेको हो ।
सोमबार दिउँसो ४ बजे कार्यव्यवस्था परामर्श समितिको बैठक बस्ने र भदौ १ गते मंगलरबार दिनको २ बजे प्रदेश सभाको बैठक बस्ने भएको प्रदेश सभा सचिवालयको सचिव कृष्णहरि खड्काले बताए । प्रदेश सभामा केही प्रदेश ऐन संशोधन गर्ने विधेयक र प्रदेश सभा नियमावली संशोधन दर्ता भएको प्रदेश सभा सचिवालयका प्रवक्ता विनोद अमात्यले जानकारी दिए । यसैगरी उच्च शिक्षा सम्बन्धी विधेयक र पर्यटन सम्बन्धी विधेयक यसअघि नै दर्ता भएका थिए ।
- छविलाल खड्का
श्रीधर बाजेकाे किरिया कर्म सकेर कान्छाकाे परिवार सहर फर्कियाे । सात वर्षे छाेराे संस्कारले टिभी खाेल्याे । कार्टुन लायाे । सधैं खुसी हुने संस्कार आज के के नपुगे झै । काँडाले कता कता घाेचे झै मलिन भाव भङ्गीमा बस्याे ।
गाउँमा फेसबुक चलाउन नपा’की संस्कारकी मम्मी हाइसञ्चाे मान्दै फेसबुकमा घाेप्टाे परिन् । उनलाई ससुरा बितेकाे घटना, पैत्रिक सम्पति, सासू आमाकाे अवस्था आदि केही कसैले छाेएन । कान्छाे भने अलि मलिन छ । केही हेर्दै ऊ साेच्छ – “दाइ गाउँमै छ । आमालाई फकाएर सम्पति हत्याउने पाे हाे कि ! म ठगिने हाे कि ! ”
संस्कारले साेध्याे – “बाबा, हाम्राे बैनी खाेई ?” अचम्म मान्दै बाबा – “छैन । किन ?” संस्कार – “हजुरका पनि दिदी- बैनी रहेछन् । मेराे साथीका पनि बैनी छन् । तर मेरा छैनन् ।” ” याे ट्वन्टी फस्ट सेन्चुरी हाे । सानाे परिवार सुखी परिवार । धेरै संख्या भएर केही हुँदैन । ट्यालेन्ट हुनुपर्छ । हाम्राे त छाेरा भने नि छाेरी भने नि तिमी हाै बाबू ।” छाेरालाई सम्झाउँदै थियाे ।
“बैनी चाहिन्छ के बाबा । मेरा लागि मात्र नभएर हजुरहरुका लागि पनि चाहिन्छ ।” संस्कारले जिद्धी गर्याे । ” किन चाहियाे हामीलाई ?” बाबू । “छाेरी नभएपछि हजुर मर्दा कसले काँध हाल्छ ?” संस्कारकाे जिज्ञासा थियाे ।
काेहलपुर, बाँके