मकवानपुर । मकवानपुर प्रहरीले सुनकाे गहना चाेरी गरेकाे आरोपमा १ जना पक्राउ गरेकाे छ । मकवानपुरको हेटौंडामा सुनको गहना चोरी गरेको आरोपमा १ जना पक्राउ गरेकाे जिल्ला प्रहरी कार्यालयले जनाएकाे छ ।
मकवानपुर प्रहरीले हेटौंडा-२ स्थित मनोज राईको सुन बनाउने ठाउँबाट ६५ लाल सुन र ७६ हजार रुपैयाँ नगद चोरी गरेको आरोपमा हेटौंडा १० राप्तिरोड बस्ने २५ वर्षीय सन्दिप जोशीलाई पक्राउ गरेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिए ।
गत साउन २३ गते हेटौंडा-२ राईको सुन बनाउने ठाउँबाट गहना र नगर चोरी भएको निवेदन प्राप्त भएकोले चाेरी गरेको आरोपमा जोशीलाई पक्राउ गरिएको प्रहरीले जनाएको छ । जोशीलाई भदाै २ गते शुक्रबार हेटौंडा-१२ पदमपोखरीबाट पक्राउ गरिएको र थप अनुसन्धानका भईरहेको प्रहरी प्रवक्ता रिमालले बताए ।
मकवानपुर । मकवानपुर प्रहरीले कुटपिट मुद्दामा फरार रहेका ३ जना प्रतिवादी पक्राउ गरेकाे छ । मकवानपुर जिल्ला अदालतकाे विभिन्न मितिमा भएकाे फैसला बमाेजिम जरिवाना ताेकिएका ३ जना फरार रहेकाे भदाै ४ गते उनीहरूलाइ पक्राउ गरिएकाे मकवानपुर प्रहरीले जनाएकाे छ ।
मकवानपुर जिल्ला अदालतकाे २०७७ साल मंशिर ९ गतेको फैसलाले कुटपिट मुद्धामा ५ हजार जरिवाना तोकिइ फरार प्रतिवादी हेटौडा ९ का ३२ बर्षिय यदु कुमार विश्वकर्मालाई जिल्ला प्रहरी कार्यालय मकवानपुरबाट खटीएको प्रहरी टोलीले भदाै ४ गते हेटाैडा ४ बाट पक्राउ गरिएकाे हाे ।
यसैगरी मकवानपुर जिल्ला अदालतकाे २०७७ साल मंशिर ९ गतेको फैसलाले कुटपिट मुद्दामा ५ हजार जरिवाना ताेकिइ फरार प्रतिवादी हेटौडा १६ का ४० बर्षिय राधिका विश्वकर्मालाई जिल्ला प्रहरी कार्यालय मकवानपुरबाट खटीएको प्रहरी टोलीले भदाै ४ गते नै हेटाैडा १६ बाट पक्राउ गरिएकाे जिल्ला प्रहरी कार्यालय मकवानपुरका प्रवक्ता जयश्वर रिमालले जानकारी दिए ।
जरिवाना भुक्तानको लागी सम्मानित मकवानपुर जिल्ला अदालतमा
उपस्थित गराउने कार्य भईरहेको ।
यस्तै मकवानपुर जिल्ला अदालतको २०७७ मंशिर ९ गतेको फैसलाले कुटपिट मुद्दामा ५ हजार जरिवाना तोकिइ फरार प्रतिवादी हेटौडा १६ घर भई हेटाैडा २ मा युनिभर्सल सुन पसल सञ्चालन गरि बस्ने वर्ष ४८ को रामचन्द्र घिमिरे विश्वकर्मालाई जिल्ला प्रहरी कार्यालय मकवानपुरबाट खटीएको प्रहरी टोलीले भदाै ४ गते हेटाैंडा १६ बाट पक्राउ गरिएकाे रिमालले बताए ।
पक्राउ परेका यदुकुमार, राधिका र रामचन्द्रलाई अदालतबाट ताेकिएकाे जरिवाना भुक्तानको लागि मकवानपुर जिल्ला अदालतमा उपस्थित गराउने कार्य भईरहेको प्रहरीले बताएकाे छ ।
सरकारले राजनीतिक दल विभाजन सहज बनाउने गरी मंगलबार ल्याएको अध्यादेशअनुसार नै निर्वाचन आयोगले दल दर्ताको प्रक्रिया सुरु गरेको छ । तर, आयोगमा दल दर्ताका लागि दिएको निवेदनमा प्रस्तावित दुवै दलको नाम भने अन्य दलसँग मिल्दोजुल्दो भएको भन्दै आयोगले प्रस्ताव गरिएकै नाम दर्ता गर्न अनिच्छा देखाएको छ ।
सो अध्यादेश बुधबार राष्ट्रपतिबाट प्रमाणीकरण भएपछि नेकपा एमालेको माधव नेपाल समूह र जसपाको महन्थ ठाकुर समूहले नयाँ दल दर्ताका लागि निर्वाचन आयोगमा निवेदन दिएका थिए । आयोगले सो निवेदनउपर अध्ययन सकेर १० दिनभित्रमा नै दर्ताको काम टुंग्याइने जनाएको हो ।
नेता नेपाल अध्यक्ष तथा झलनाथ खनाल वरिष्ठ नेतासहित ९५ सदस्यीय केन्द्रीय समिति रहनेगरी नेकपा एमाले (समाजवादी) नामको दल दर्ताका लागि आयोगमा दर्ता नम्बर ४३३ मा एउटा निवेदन परेको छ । तर, सो नाममा भने आयोगले दल दर्ता गर्न इन्कार गरेपछि नेपाल समूहले दलको नाम नेकपा एकीकृत (समाजवादी) राख्ने सहमति गरेको हो ।
यस्तै, निर्वाचन चिह्न कलम राख्ने विषयमा छलफल भइरहेको छ । यस्तै, अर्को ठाकुरको नेतृत्वमा जसपा (लोकतान्त्रिक) नामको दल दर्ताका लागि दर्ता नम्बर ४३४ मा निवेदन दर्ता भएको छ । सो दलमा २५ जना केन्द्रीय कार्यकारिणी सदस्य तोकिएको छ । यस्तै, ठाकुरलाई अध्यक्ष र राजेन्द्र महतोलाई वरिष्ठ नेता प्रस्ताव गरिएको छ ।
सो दलको नाममा समेत आयोगमा उपेन्द्र यादवले उजुरी गरेपछि आयोगले अर्को नाम ल्याउन भनेको छ । ‘आयोगले दल दर्ताका लागि आवश्यक प्रक्रिया अघि बढाइसक्यो तर दुवै दलले नाम फेरेर नयाँ निवेदनसाथ आउनुपर्नेछ । त्यसपछि आवश्यक कागजातको अध्ययन गरेर आयोगले दल दर्ताका लागि आएको निवेदनउपर निर्णय गर्छ,’ आयोग उच्च स्रोतले राजधानीसँग भन्यो ।
सरकारले ल्याएको अध्यादेश ऐनका रूपमा आएपछि सोहीलाई आधार मानेर आयोगले बिहीबार नै नियमावली संशोधनसमेत गरिसकेको छ । आयोगले अध्यादेशले समेटेको भाषाअनुसार नियमावलीमा संशोधन गरेको हो ।
नियमावलीमा संशोधन भएसँगै दल दर्ताका लागि थप कानुनी आधार तय भएको छ । ‘आयोगमा दुईवटा दल दर्ताका लागि निवेदन आएको छ, सरकारले ल्याएको अध्यादेश पनि राजपत्रमा प्रकाशित भइसकेको छ, अध्यादेशकै आधारमा नियमावली संशोधन भयो, संशोधनपछि नियमावली पनि प्रकाशित भएको छ,’ आयोग स्रोतले भन्यो ।
सो नियमावलीसमेत बिहीबार नै राजपत्रमा प्रकाशित भइसकेको छ । आयोगले नियमावली संशोधनको मस्यौदा तयार गरी कानुन मन्त्रालयमा पठाएपछि मन्त्रालयले पारित गरेर राजपत्रमा प्रकाशित गरेको हो । नियमावलीमा यसअघि नभएको व्यवस्थासमेत अध्यादेशको मर्मअनुसार आएको हो ।
प्रदेश सभा र स्थानीय तहमा निर्वाचित जनप्रतिनिधिले नियमावलीअनुसार अब नयाँ गठन भएका दलमा आबद्ध व्यक्तिले दल परिवर्तन गर्न चाहेमा प्रदेश सदस्यको हकमा प्रदेशस्थित निर्वाचन कार्यालय र स्थानीय तहका जनप्रतिनिधिको हकमा जिल्ला निर्वाचन कार्यालयमा २१ दिनभित्र नागरिकता र निर्वाचित भएको प्रमाणपत्र लैजानुपर्नेछ ।
यस्तै, अब दल दर्ताको प्रक्रियामा आयोगले दलको नाम, झन्डा, विधान, निर्वाचन चिह्न, केन्द्रीय समितिमा तोकिएका नेताहरूको नागरिकतासहितका आवश्यक कागजात तथा अध्यादेशअनुसार केन्द्रीय समिति वा संसद्को संख्याको २० प्रतिशत पुगे नपुगेको हेर्नेछ ।
आयोगका प्रवक्ता राजकुमार श्रेष्ठले आयोगमा दल दर्ताका लागि निवेदन दिँदा आवश्यक कागजात आए नआएको आयोगले हेर्ने र सबै कागजात पूरा भएपछि केन्द्रीय समितिमा प्रस्ताव गरिएका नामकोसमेत सनाखत गरिने जानकारी दिए ।
‘दल दर्ताका लागि निवेदन दिँदा आवश्यक कागजात आए नआएको आयोगले हेर्छ, आएका कागजातमा समावेश भएका विषय वस्तु पनि अन्य दलसँग मिले नमिलेको र संविधानसंगत भए नभएको आयोगले जाँच गर्छ, सबै कागजात पूरा भएपछि केन्द्रीय समितिमा प्रस्ताव गरिएका नामकोसमेत सनाखत गरिन्छ, त्यसपछि दल दर्ता हुन्छ,’ आयोगका प्रवक्ता श्रेष्ठले भने ।
यी सबै प्रक्रिया पूरा गरेर दल दर्ता प्रक्रिया टुंग्याउन आयोगले कानुनअनुसार ३५ दिन समय लिन पाउँछ । तर, आयोगले सबै कागजात प्रक्रिया पूरा भएर आएको पाइए १० दिनभित्रमा नै दल दर्ता गर्ने जनाएको छ । सरकारले मंगलबारको मन्त्रिपरिषद् बैठकबाट राजनीतिक दलसम्बन्धी ऐन २०७३ लाई संशोधनको निर्णय गर्दै राष्ट्रपति कार्यालयमा अध्यादेश जारीका लागि सिफारिस गरी पठाएको थियो भने राष्ट्रपति विद्यादेवी भण्डारीले बुधबार दिउँसो जारी सो अध्यादेश गरेकी थिइन् ।
महन्थको दल दर्ताको निवेदन रद्द गर्न निर्वाचन आयोगमा उपेन्द्रको पत्र
जनता समाजवादी पार्टी नेपाल (जसपा)का अध्यक्ष उपेन्द्र यादवले आफ्नो दलको नामसँग मिल्दोजुल्दो नाममा अन्य दल दर्ता नगर्न निर्वाचन आयोगमा निवेदन दिएका छन् ।
जसपा अध्यक्ष यादवले आफ्नो दलको नामसँग मिल्नेगरी नयाँ दल दर्ता गर्न आएको निवेदन रद्द गर्न निर्वाचन आयोगमा निवेदन दिएका हुन् । जसपा नेता प्रदीप यादवले सर्वोच्च अदालतको फैसलाले नै अरू दलसँग मिल्दोजुल्दो नाम राखेर दल दर्ता गर्न नपाइने भनेकाले सोहीअनुसार गर्न आयोगलाई ध्यानाकर्षण गराइएको जानकारी दिए ।
आयोगले जसपाको आधिकारिकता यादवलाई दिएपछि पार्टीविहीन बनेका ठाकुर पक्षले सरकारले राजनीतिक दल विभाजन सहज बनाउनेगरी अध्यादेश ल्याइदिएपछि नयाँ दल दर्ताका लागि बुधबार आयोगमा निवेदन दिएको थियो । आयोगले भने दल दर्ताका लागि निवेदन आएको र थप विषयमा अध्ययन भइरहेको जनाएको छ ।
कानुनी आधारबारेसमेत अध्ययन गरेर आयोगले दल दर्ताको निर्णय लिने जनाएको हो । ठाकुर पक्षले नयाँ दलको नाम जसपा (लोकतान्त्रिक) प्रस्ताव गर्दै आयोगमा दल दर्ताका लागि निवेदन दिएको छ । यस्तै, नयाँ दलमा अध्यक्ष ठाकुरको नाम प्रस्तावित छ भने वरिष्ठ नेतामा राजेन्द्र महतोको नाम प्रस्ताव गरिएको छ । ठाकुर समूहको नयाँ दलमा २४ सदस्यीय कार्यकारिणी समिति प्रस्ताव गरिएको छ भने दलको निर्वाचन चिह्न साइकल प्रस्ताव गरिएको छ । रान्जधानी दैनिकमा प्रकाशित समाचार साभार
नेपाल कम्युनिस्ट पार्टी (एमाले) उपाध्यक्ष वामदेव गौतमले माधवकुमार नेपाल अध्यक्ष रहेको नेकपा एमाले (समाजवादी) पार्टीमा सहभागी हुने बताएका छन् ।
गौतमले नेतृत्व गरेको ‘पार्टी एकता राष्ट्रिय अभियान’को बिहीबार भर्चुअल बैठकले एमाले विभाजन भइसकेको अवस्था मध्यनजर गर्दै नेपालले नेतृत्व गरेको एमाले समाजवादीलाई समर्थन गर्ने निर्णय गरेको उनको सचिवालय सदस्य शैलेन्द्र राउतले बताए ।
नेता गौतमले भर्चुअल बैठकमा अब नेपाल पक्षमा लगेर वामपन्थीबीचको एकता आफ्नो नेतृत्वमा गर्ने बताएका छन् । अबको डेढ वर्षमा एमालेबाहेकको वामपन्थीलाई एक ठाउँमा ल्याउन सकिने दाबी गौतमले गरेका छन् ।
आफू केपी ओलीतर्फ गएको तर उनले कुनै जिम्मेवारी नै नदिएको आरोप उनले लगाए । ‘माधव नेपाल नेतृत्वको पार्टीको बैठकमा म सबैभन्दा पहिले प्रस्ताव राख्छु, एकताको जिम्मेवारी मलाई दिनुहोस् । उहाँले दिनुहुन्छ, मलाई विश्वास छ’ गौतमले भने, ‘केपी ओलीतिर गएँ नि, केपी ओलीले त जिम्मै दिएनन् । मैले जिम्मेवारी मागेका थिएँ ।
तर माधव नेपालतिर गएपछि मलाई दिनुहुन्छ ।’ बैठकमा सहभागीमध्ये केहीले माधव नेपालकै पार्टीमा सामेल हुनुपर्ने प्रस्ताव राखेका थिए भने केहीले एकता अभियानमै रहनुपर्ने अडान लिएका थिए । युवा संघद्वारा एमाले समाजवादीमा समाहित हुने निर्णय यता, युवा संघ नेपालले माधवकुमार नेपाल अध्यक्ष रहेको नेकपा एमाले (समाजवादी) पार्टीमा समाहित हुने निर्णय गरेको छ ।
संघ एमाले समाजवादी पार्टीमा गोलबद्ध हुन देशभरिका नेता, कार्यकर्तालाई अपिलसमेत गरेको छ । संघका अध्यक्ष नरेश शाहीको अध्यक्षमा संघका उपलब्ध पदाधिकारी र विभागीय प्रमुख÷उपप्रमुखको सहभागितामा बसेको बैठकले एमाले समाजवादी पार्टीमा समाहित हुने निर्णय गरेको संघका उपमहासचिव एवं प्रवक्ता सञ्जीप राईले बताए ।
यस्तै, बैठकले संघको झन्डा रातो पृष्ठभूमिमा सेतो पाँचकुने तारा तीन कुनामाथि र दुई कुना तल फर्केको राख्ने निर्णय गरेको छ ।
‘यात्रा समृद्धिको, लक्ष्य समाजवादको’ मूल नारा राख्ने निर्णय बैठकले गरेको छ । संघको केन्द्रीय कमिटीको विस्तारित बैठक ११ र १२ भाद्रमा काठमाडौंमा हुनेछ । सो बैठकमा सातवटै प्रदेश कमिटीका पदाधिकारी जिल्ला अध्यक्ष, सचिव र महिला विभाग प्रमुख, केन्द्रीय निकाय सहभागी हुनेछ ।
५ भाद्र शनिबार बिहान ८ बजे महिनाको २ दिनको २ घण्टा, राष्ट्रलाई अभियानअन्तर्गत त्रिभुवन विश्वविद्यालय परिसर सरसफाइ कार्यक्रम राख्ने निर्णय बैठकले गरेको छ ।
एमालेमा फर्किन ओलीको आह्वान
एमाले अध्यक्ष केपी शर्मा ओलीले माधवकुमार अध्यक्ष रहेको नेकपा एमाले (समाजवादी)मा लागेका नेताकार्यकर्तालाई पार्टीमा फर्किन आह्वान गरेका छन् । एमाले भक्तपुर जिल्ला कमिटीमाले बिहीबार आयोजना गरेको कार्यक्रमलाई सम्बोधन गर्दै ओलीले एमाले समाजवादीको लिस्टमा नाम रहेका नेतालाई त्यहाँबाट आफ्नो नाम हटाएर एमालेमै फर्किन आह्वान गरेका हुन् ।
निर्वाचन आयोगमा नेपालले बुझाएको नामावलीबाट आफ्नो नाम हटाएर एमालेमा फर्किन उनले सार्वजनिक रूपमा आह्वान गरेका हुन् । ‘त्यो लिस्टबाट नाम हटाउनुस् । तपाईं हामीले बनाएको पार्टी हो यो, कसैको व्यक्तिगत स्वार्थ र कुण्ठामा पार्टीलाई बर्बाद पार्नुहुन्न । अप्ठ्यारो नमानी घोषणा गरिदिनुस् । पार्टीमा आउनुस्, काम गरौं । देशको भविष्य बनाउने अभियानमा लागौं,’ ओलीले भने ।
भ्रममा परेकाहरूलाई सम्झाउन पार्टी पंक्तिलाई आह्वान गर्दै उनले भने, ‘साथीहरूलाई भ्रममा नपर्न आग्रह गर्छु । यदि कही कतै भ्रममा परेको, अलमलमा परेको साथी भेटिन्छ भने सम्झाउनुस् ।’ पूर्वप्रधानमन्त्री समेत रहेका एमाले समाजवादीका अध्यक्ष नेपालले दल दर्ताका लागि निर्वाचन आयोगमा निवेदन दर्ता गराएपछि ओली नेपालविरुद्ध आक्रामक रूपमा प्रस्तुत भएका छन् ।
ओलीले पार्टी विभाजनले एमालेमा एकछिन ग्रहण लागेजस्तो मात्र भएको बताए । पार्टी विभाजन सूर्यमा बादल लागेजस्तो, ग्रहण लागेजस्तो मात्र भएको टिप्पणी उनले गरे । ‘हिजो कोही समातेर घिसाउँदै र घिसारिँदै हिँडे, संसारमा कुनै पात नझर्ने रूख हुँदैन । हामीमा त्यस्तै भयो,’ उनले भने । राजधानी दैनिकमा प्रकाशित समाचार साभार
मकवानपुर । सरकारले कृष्ण जन्मअष्टमीका दिन सार्वजनिक बिदा दिने निर्णय गरेको छ।
बिहीबार(आज) सिंहदरवारमा बसेको मन्त्रिपरिषद् बैठकले भदौ १४ गते कृष्ण जन्मअष्टमीमा सार्वजनिक बिदा दिने निर्णय गरेको हाे ।
सरकारले गाईजात्रामा नेवार समुदायका लागि देशैभर बिदा दिने निर्णय पनि गरेको छ । यसअघि गाईजात्रामा काठमाडाैं उपत्यकामा मात्र सार्वजनिक विदा दिने गरेकाे थियाे ।
यसैगरी बागमती प्रदेश सरकारले भदाै ७ गते मनाइने गाईजात्रा पर्वकाे अवसरमा प्रदेशभर सार्वजनिक विदा दिने भएकाे छ । प्रदेश सरकार मन्त्रिपरिषदबाट बागमती प्रदेशकाे प्रमुख पर्वकाे रूपमा मनाइने गाईजात्रा पर्वकाे उपलक्ष्यमा सार्वजनिक विदा दिने निर्णय भएकाे हाे ।
प्रदेश राजपत्रमा भदाै २ गते सुचना प्रकाशित गरी भदाै ७ गते सार्वजनिक विदा दिइने घाेषणा भएकाे हाे
