मकवानपुर । पतन्जली याेग महिला समितिकाे आयाेजनामा तिहार विशेष कार्यक्रम गरिएकाे छ ।
संविधान सभा सदस्य अनन्त पाैडेलकाे प्रमुख आतिथ्यतमा तथा महिला समितिका जिल्ला अध्यक्ष शशीकला थापाकाे सभाध्यक्षतामा भएकाे कार्यक्रममा पतन्जली याेग केन्द्रका महिला साधिकाहरुले पुरुष साधकहरुका लागि तिहार विशेष कार्यक्रम गरेका हुन् । दाजु भाइ तथा दिदी बहिनीबीचकाे सम्बन्ध प्रगाढ बनाउने उद्देश्यले आयाेजना गरिएकाे हाे थापाले बताइन् ।
कार्यक्रममा प्रमुख अतिथि पाैडेलले आफू पनि याेगा गर्ने गरेकाे कारण स्वास्थ्यलाइ सन्तुलनमा राख्न सफल भएकाे बताउँदै याेग गर्न अभिप्रेरित गरे । “स्वास्थ्य छ त सबथाेक छ” उनले भने । स्वास्थ्य नै सवैभन्दा ठुलाे धन भएकाेले याेगले नै याे धनकाे संरक्षण गर्न सक्ने उनले बताए ।
कार्यक्रममा हेटाैडा उपमनपा वडा नं ४ का वडाध्यक्ष नवीन सिग्देल, पतन्जली याेग जिल्ला समितिका अध्यक्ष रामकृष्ण थापा लगायतकाे उपस्थिति रहेकाे थियाे । कार्यक्रममा देउसि भैलाे खेल्नुका साथै टीका लगाएर नाचगान समेत गरिएकाे थियाे ।
मकवानपुर । ब्रह्मकुमारी राजयोग सेवा केन्द्रले ७० बर्ष उमेर पूरा भएका १०२ जना ज्येष्ठ नागरिकलाई सम्मान गरेको छ ।
सम्मान कार्यक्रममा सहभागी मकवानपुर थाहा नगरपालिका ४ कि ७५ बर्षीया सान्नानी अधिकारीले आश्रमबाट पाएको सम्मान ज्येष्ठ नागरिकको लागि उर्जा भएको बताइन् । २५ वर्षदेखि आश्रममा लागेकी अधिकारीले ज्येष्ठ नागरिकको लागि सन्तानको माया र हेरचाह सबैभन्दा उच्चसम्मान हुने बताइन् ।
यसैगरी ७२ बर्षीय माधव अधिकारीले उमेरको कारण आफूले जीवनमा पहिलो पटक सम्मान पाउँदा औधि खुसी लागेको बताए । नेपाल उद्योग महासंघमा लामो समय नेतृत्व गरेका अधिकारीले बालबालिकाहरुलाई जीवनमा अभाव पनि हुन्छ भन्ने आभाष नदिएर हुर्काएका अभिभावकहरु नै कालान्तरमा अभावमा रहनु पर्ने अवस्था आफूले देखेको उल्लेख गर्दै भने “सन्तान वैदेशिक रोजगारीमा जाँदा एक्लिएका बाबुआमाहरुको लागि सोच्ने ब्यक्तिको अभाव समाजका अहिले खड्किएकाे छ ।”
“आफूले धेरै संघर्ष गरेको तर, सन्तानले बेवास्ता गरेको कारण धेरै ज्येष्ठ नागरिक पीडामा रहेको पाएको छु” उनले भने । ज्येष्ठ नागरिकको रुपमा पहिलो पटक सम्मान पाउदा अलौकिक आनन्द प्राप्त भएको अर्का वृद्धा दामोदर लम्सालले बताए ।
कार्यक्रममा बागमती प्रदेश सभा सदस्य तथा प्रदेशका पुर्व श्रम तथा यातायात मन्त्री एकालाल श्रेष्ठले जन्म मृत्युु प्रकृतिको लय भए पनि जिम्मेवारी पूरा गर्नु सबैको कर्तव्य भएको बताए । “आमा बुबाले सन्तानको लागि सबै जिम्मेवारी पूरा गर्छन, उमेर ढल्कदै जांदा सम्मानदेखि मृत्युपछि श्रद्धा गरेर सस्कृति अनुसार कर्म गर्ने परम्परा समाजमा छ, तर केही ज्येष्ठ नागरिकहरू जीवनकालमै अपहेलित हुनुपर्ने पीडा पनि यही समाजमा देखिन्छ” उनले भने ।
आफूलाई आफैले शान्ति दिने, ज्येष्ठ नागरिकको सम्मान स्वरुप राज्यले ज्येष्ठ नागरिक भत्ता दिएको उनले बताए । अब यसलाई मासिक १० हजार पुर्याउने प्रयासमा आफू लागि परेको उनले बताए ।

बृद्वभत्ताले घर चलाउन पर्ने अवस्था पीडादायी भएको उल्लेख गर्दै उनले भने “अर्थतन्त्र कहालीलाग्दो भएको छ, ब्यवसाय बिग्रेर घर लिलाम हुने अवस्थामा पुगेको छ, यो बेला ज्येष्ठ नागरिकहरुलाई उर्जा र प्रेरण भर्ने काम केन्द्रले गरेको छ ।”
यसैगरी कार्यक्रममा बागमती प्रदेश सभा सदस्य प्रेमबहादुर पुलामीले सन्तान वैदेशिक रोजगारमा जांदा ज्येष्ठ नागरिकको हेरचाहमा समस्या भएको बताए । ज्येष्ठ नागरिकले सम्मान पाएमा मात्रै परिवार र समाज समृद्ध हुनसक्ने उनले बताए ।
ब्रह्मकुमारी राजयोग सेवा केन्द्रको क्षेत्रीय संयोजक शुशीला दिदीको अध्यक्षतामा भएको ज्येष्ठ नागरिक सम्मान कार्यक्रममा उनले ज्येष्ठ नागरिकको योगदानको सम्मान तथा कदर गर्ने प्रयास गरेको बताइन् ।
कार्यक्रममा केन्द्रको विभिन्न शाखाका सञ्चालकहरुको समेत उपस्थिती रहेको कार्यक्रम सञ्चालक बिकेमणी गुरुङले बताए । समाजमा सकारात्मक सन्देश प्रदान गर्न केन्द्रले महत्वपूर्ण योगदान गर्दै आएको सहभागीहरुले बताएका थिए । कार्यक्रममा सम्मानित तथा सहभागी अन्य जेष्ठ नागारिकको लागि मनाेरञ्जनाको कार्यक्रम प्रस्तुत गरिएकाे थियाे ।
मकवानपुर । जाजरकोट जिल्लाको रामीडाँडा केन्द्रबिन्दु भइ शुक्रबार गएको भुकम्प पीडितका लागि बागमती प्रदेश सरकारले १ कराेड ५० लाख रुपैयाँ सहयोग उपलब्ध गराउने भएको छ ।
बागमती सरकारका आन्तरिक मामिला तथा कानुनमन्त्री एवम् प्रवक्ता गंगानारायण श्रेष्ठले शनिबार विज्ञप्ती जारी गर्दै भुकम्प पीडितकाे प्रभावकारी उद्दार, उपचार, राहत र पुनर्स्थापनाकाे लागि १ कराेड ५० लाख रुपैयाँ उपलब्ध गराउने जानकारी दिए ।
‘विपद्काे घडीमा बागमती प्रदेश सरकार कर्णाली प्रदेश सरकारकाे साथमा रहनेछ’ मन्त्री श्रेष्ठ भने ‘भुकम्पमा परी ज्यान गुमाउने व्यक्तिहरु प्रति श्रद्धाञ्जली र आफन्तजनहरुमा समवेदना व्यक्त गर्दै घाइतेहरुकाे शीघ्र स्वाास्थ्यथ्य लाभको कामना गर्दछौं ।’
श्रेष्ठले विपद्काे घडीमा आवश्यक सहयोग गर्न नागरिक समाज र गैरसरकारी संस्थाहरुलाई आग्रह समेत गरेका छन् ।
यसैबीच नेपाली कांग्रेसले जाजरकोट भुकम्प पीडितका लागि ५० लाख रुपैयाँ उपलव्ध गराउने निर्णय गरेको छ ।
कांग्रेसले शनिबार बिहान एक विज्ञप्ति जारी गर्दै भूकम्प प्रभावित क्षेत्रमा उद्धार, राहत तथा उपचारका लागि उक्त रकम उपलब्ध गराउने जानकारी गराएको हो ।
कर्णाली प्रदेशको जाजरकोट केन्द्रबिन्दु भएर गएराति गएको भुकम्पमा परेर ठूलो क्षति भएको छ । कांग्रेसले स्वदेश तथा विदेशमा रहेका सबैलाई तन, मन र धनका साथ खुल्ला हृदयले मानवीय सेवामा जुट्न आग्रह गरेको छ ।
यसैगरी भूकम्प प्रभावित क्षेत्रमा राहत, उद्धार तथा उपचार बारे निर्णय गर्न हाल सिंहदरबारमा बैठक जारी छ ।
बैठक उपप्रधान एवम् गृहमन्त्री नारायणकाजी श्रेष्ठको अध्यक्षतामा बसेको हो । बैठकले प्रभावित क्षेत्रमा राहत तथा उद्धारका कार्यक्रम कसरी अगाडि बढाउने भन्ने निर्णय गर्ने जनाइएको छ ।
मकवानपुर । बागमती प्रदेशका प्रमुख प्रतिपक्षी दल नेकपा(एमाले) का नेता जगन्नाथ थपलियाले भूकम्प प्रभावित क्षेत्रमा जोखिमप्रति सजग रहदै तत्काल राहत र उद्धारको काममा लाग्न अनुरोध गरेका छन् ।
पूर्व अर्थमन्त्री समेत रहेका नेता थपलियाले आज एक अपिल पत्र जारी गर्दै भूकम्पमा परी कयौं व्यक्तिहरु बेपत्ता भइरहेको, स्वास्थ्य केन्द्र र अस्पतालहररु बिरामीले भरिएको तथा मध्यरातिमा भूकम्प गएकोले ठूलो मानवीय क्षति भएकोले स्थानीय स्वास्थ्य संस्थाले थेग्न सक्ने अवस्था समेत नरहेको उललेख गर्दै यस्तो बेला बेपत्ताहरुको खोजी, घाइतेहरुको उद्धार गरी उपचार तथा भूकम्प प्रभावित नागरिकहरुको उचित व्यवस्थापनमा जुट्न नेपाल सरकार, कर्णाली प्रदेश सरकार, स्थानीय सरकारहरु तथा सम्पूर्ण आमनेपालीजनमा अपिल गरेका हुन् ।
“कार्तिक १७ राती पश्चिम नेपालको जाजरकोट जिल्ला केन्द्रविन्दु बनाई गएको शक्तिशाली भूकम्पमा परी ज्यान गुनाउन पुगेका नलगाढ नगरपालिकाकी उपप्रमुख सरिता सिंहसहित सम्पूर्ण मृतकहरुप्रति हार्दिक श्रद्धाञ्जली व्यक्त गर्दछु,साथै उक्त भूकम्पमा परी घाइते भएकाहरुको सिघ्र स्वास्थ्यलाभको कामना गर्दछु” उनले अपिलमा भनेका छन् ।
घटनामा कयौं व्यक्तिहरु बेपत्ता भइरहेको भन्दै स्वास्थ्य केन्द्र र अस्पतालहरु बिरामीले भरिएकोले उद्वार राहतमा ध्यान दिन उनले सरकारलाई आग्रह गरेका छन् ।
शुक्रबार मध्य राति भूकम्प गएकोले ६.४ रेक्टर स्केलको भुकम्पमा परि जाजरकोट र रुकुम पश्चिम जिल्लामा ज्यान गुमाउनेको सङ्ख्या १५० पुगेको छ । उत्तिकै संङ्ख्यामा घाइते भएका छन् ।
“बेपत्ताहरुको खोजी, घाइतेहरुको उद्धार गरी उपचार तथा भूकम्प प्रभावित नागरिकहरुको उचित व्यवस्थापनमा जुट्न नेपाल सरकार, कर्णाली प्रदेश सरकार, स्थानीय सरकारहरु तथा सम्पूर्ण आमनेपालीजनमा हार्दिक अनुरोध गर्दछु” थपलियाले भनेका छन् ।
मकवानपुर । शुक्रबार राती ११:४९ बजे जाजरकोट आसपासलाई केन्द्र बनाएर गएको ६.४ म्याग्निच्युडको भुकम्पमा परी हालसम्म करिब ५० जनाको मृत्यु भएको कर्णाली प्रदेश प्रहरी कार्यालयले जनाएको छ । ४० बढी घाइते भएका छन् ।
सरकारले भुकम्पप्रभावितहरुको उद्दार र राहतका लागि स्वास्थ्यकर्मी सहित हेलिकप्टर पठाउने तयारी गरेको छ ।
प्रधानमन्त्री तथा मन्त्रिपरिषद कार्यालय मातहतको हेलो सरकारले तत्काल हेलिकप्टर पठाउने तयारी भइरहेको जनाएको हो।
भूकम्पका घाइतेहरुको तत्काल उद्धारका लागि सुरक्षाका तीनवटै निकाय परिचालन भएका छन्’ सामाजिक सञ्जालमार्फत हेलो सरकारले भनेको छ, ‘घाइतेहरूको उद्धारका लागि औषधि, स्वास्थ्यकर्मी र हेलिकप्टर पठाउने तयारी भइरहेको छ।’
भूकम्पले जाजरकोटको नलगाढ नगरपालिकाकी उपप्रमुखको मृत्यु भएको छ ।
भूकम्पमा परेर उपप्रमुख सरिता सिंहको मृत्यु भएको कर्णाली प्रदेश प्रहरी प्रमुख डीआईजी भीम ढकालले जानकारी दिए।