मकवानपुर । शिक्षक सेवा आयोगले प्राथमिक तहकाे लागि ४ हजार ४६२ शिक्षकको लागि आवेदन माग गरेको छ । शनिबार आयाेगले देश भरकाे लागि प्राथमिक तह तृतीय श्रेणीकाे पदकाे लागि उक्त संख्यामा आवेदनकाे लागि विज्ञापन गरेकाे हाे ।
आयोगकाे विज्ञापन अनुसार बागमती प्रदेशमा सबैभन्दा धेरै १ हजार १०३ जना, कोशीमा १ हजार ७७ जना, गण्डकीमा ८ सय जना, मधेशमा ५ सय ८ जना, लुम्बिनीमा ४ सय ९५ जना, सुदूरपश्चिममा ३ सय २ जना र कर्णालीमा १ सय ७७ जनाका लागि आवेदन खुलाएको छ ।
आयोगले सातै प्रदेशका लागि खुला, महिला, दलित महिला, मुस्लिम महिला, आदिवासी जनजाति, अपाङ्गता, दलित, पिछडिएको क्षेत्र, मधेशीलगायतका विभिन्न समूहमा विज्ञापनद्वारा शिक्षककाे लागि आवेदन खुल्ला गरेकाे हाे । योग्यता पुगेका इच्छुक नेपाली नागरिकले जेठ १३ गतेसम्म र दोब्बर दस्तुर बुझाएर जेठ २० गतेसम्म आवेदन दिन सकिने आयोगकाे सूचनामा जनाएको छ ।
विज्ञापन हेर्नकाे लागि यहाँ क्लिक गर्नुहाेस
काठमाडौं । जर्मनीको फ्रयान्कफर्टमा कलाकार रन्जु यादवको चित्रकला प्रदर्शनी भएकाे छ । मिथिला चित्रकार रन्जुले शनिबार नेपाली समाज जर्मनीले फ्र्यान्कफर्टमा आयोजना गरेकाे नेपाल डेको कार्यक्रममा एकल चित्रकला प्रदर्शनी गरेकी हुन् ।
प्रत्येक वर्ष अप्रिल २० तारिखमा नेपाल डे मनाउँदै आएको नेपाली समाजले चित्रकला प्रदर्शनीकाे लागि रन्जुलाई निमन्त्रणा गरेका थिए । उनकाे २४ वटा चित्रहरु प्रदर्शनीमा राखिएको थियो । कार्यक्रममा चित्रकार यादवले नेपालमा मिथिला कलाको विकास, आफ्नो कला यात्रा र समाज रुपान्तरणमा आफ्ना चित्रहरुको प्रभावबारे कार्यपत्र समेत प्रस्तुत गरिन् ।
जर्मनीका लागि नेपाली राजदूत रामकाजी खड्काले चित्रकार यादवको चित्रकला प्रदर्शनीले नेपाली कला संस्कृतिको जर्मनीमा प्रवर्धन हुने र यसले फ्र्यान्कफर्टजस्तो अन्तर्राष्ट्रिय सहरमा नेपालको सांस्कृतिक कुटनीतिमा सघाउ पुग्ने बताए । जर्मनीमा मिथिला चित्रकला प्रदर्शनी आयोजना गर्न भूमिका खेलेको नेपाली समाज र चित्रकार यादवमाथि आफूलाई गर्व लागेको राजदूत खड्काकाे भनाइ थियाे ।

नेपाली समाजका अध्यक्ष शिव अधिकारीका अनुसार जर्मनीका विभिन्न सहरबाट कार्यक्रममा सहभागी हुन आएका नेपाली र जर्मन नागरिकले रन्जुकाे चित्रकला प्रदर्शनीलाई अवलोकन गरेका थिए । अध्यक्ष अधिकारीले नेपाली समाजले फ्रयान्कफर्टमा नेपाल डे आयोजना गरेर नेपालबारे जर्मनीमा प्रचारप्रसार गर्नुका साथै दुई देशका नागरिककाे सम्बन्ध सुमधुर बनाउने काम गरेको बताए ।
नेपाल डेको अवसरमा नेपाल, युक्रेन र भियतनामका कलाकारहरुले गीत, संगीत र नृत्य प्रस्तुत गरेका थिए । एक जना बलिउड कलाकारले नेपाली गीतमा प्रस्तुति प्रदर्शन गरेका थिए । आफ्नो बहुदेशीय एकल चित्रकला प्रदर्शनीका लागि राष्ट्रिय ललितकला पुरस्कार विजेता रन्जु अहिले ३३ दिवसीय युरोप कला यात्रामा छन् । उनले युरोपका चार वटा देशको भ्रमण गर्ने छन् । तर तीन देशमा मात्रै चित्रकला प्रदर्शनी गर्ने कार्यक्रम छ ।
मकवानपुर । मकवानपुरको बकैयामा खोलामा डुबेर एक जना बालकको मृत्यु भएको छ ।
बकैया गाउँपालिका वडा नं.६ स्थित बकैया खोलामा शनिबार डुबेर ती बालकको मृत्यु भएको छ । मृत्यु हुनेमा बकैया ६ टिकुले टोल बस्ने चौर स्याङतानको छोरा ६ बर्षीय दिपक स्याङतान रहेको जिल्ला प्रहरी कार्यालय मकवानपुरले जनाएको छ ।
प्रहरीका अनुसार बकैया खोलाको पानीमा पौडी खेल्ने क्रममा डुबेर घाइते भएका दिपकलाई उपचारको लागि सामुदायिक प्रसुती गृह अस्पताल निजगढ लगिएकोमा उपचारको क्रममा मृत्यु भएको हो ।
मकवानपुर । मकवानपुरको हेटौंडामा रहेको कार्टुन उद्योगमा आगलागी भएको छ । हेटौंडा ८ स्थित हेटौंडा औद्योगिक क्षेत्रमा रहेको हेल्पबक्स प्याकेजिंङ कार्टुन फ्याक्ट्रीमा आइतबार मध्यराती आगालागी भएको हो ।
काठमाडौ १९ का संजीव मानन्धरले संचालन गरिरहेको फ्याक्ट्री आगालागीबाट पुर्ण रुपमा जलेर नष्ट भएको तर मानवीय क्षति नभएको मकवानपुर प्रहरीले जनाएको छ । हेटौंडा उपमहानगरपालिकाको दमकल, नेपाल प्रहरी, सशस्त्र प्रहरी र स्थानीयको सहयोगमा लागेको आगो ५ घण्टापछि नियन्त्रणमा आएको जनाइएको छ।
प्रहरीका अनुसार आगलागीको कारण थाहा भएको छैन । घटनामा भएको क्षतीको विवरण समेत हालसम्म प्राप्त नभएको मकवानपुर प्रहरीले जनाइएको छ।
मकवानपुर । मकवानपुर प्रहरीले गांजा ओसारपसारमा सम्लग्न २ किशोर सहित ७ जनालाई नियन्त्रणमा लिएको छ । जिल्ला प्रहरी कार्यालय मकवानपुर र इलाका प्रहरी कार्यालय नेवारपानीको प्रहरीले उनीहरूको साथबाट १३० किलो गांजासहित नियन्त्रणमा लिएको हो ।
गाजासहित नियन्त्रणमा लिइएकामा मकवानपुर जिल्ला राक्सिराङ गाउँपालिका ३ बस्ने १५ र १९ बर्षिय किशोर रहेका छन् । यस्तै मकवानपुर कैलाश गाउंलालिका ४ बस्ने २८ बर्षिय बम बहादुर चेपाङ, २७ बर्षिय हरिकुमार प्रजा,२७ बर्षिय बिरमान प्रजा रहेका छन् ।
यसैगरी मनहरी गाउँपालिका ३ हाडीखोला बस्ने ४४ बर्षिय रामहरी लुईटेल र मनहरी ५ बस्ने ३६ बर्षिय दिपक थापा मगर रहेको प्रहरीले जनाएको छ ।
पदमपोखरी सेक्टर लामिटारबाट खटिएको नेपाली सेना र पर्सा राष्ट्रिय निकुञ्ज प्रशासनको सयुक्त गस्ती टोलिले गस्ती गर्दै जाने क्रममा पर्सा राष्ट्रिय निकुञ्जको मध्यवर्ति इलाकामा बोरामा लागू औषध गांजा बोकेर पैदलै पर्सा जिल्लातर्फ जादै गरेको अबस्थामा उनीहरूलाई नियन्त्रणमा लिएको जिल्ला प्रहरी कार्यालय मकवानपुरले जनाएको छ ।