मकवानपुर । पाँचौ राजहर्षि जनक कप फुटबल प्रतियोगिता–२०७७ मा हेटौंडाको पिप्ले युवा क्लबले आज जीतका फाइनलमा भिड्ने भएका छन् । बागमती नगरपालिका सर्लाही र बागमती युवा क्लबकाे आयाेजनामा चैत २१ गते शनिबारबाट सूरू भएकाे प्रतियाेगितामा पिप्ले युवा क्लब अफ्रिकन रुट्स एसोसिएसन क्यामरुनलाई २–१ गाेल अन्तरले हराउँदै फाइनल प्रवेश गरेकाे हाे ।
प्रतियाेगित अन्तरगत चैत २७ गते भएकाे पहिलाे सेमिफाइनल खेलमा क्यामरुनलाई हराउँदै फाइनल प्रवेश गरेकाे पिप्ले युवा क्लब र चैत २८ गते भएकाे दाेस्राे सेमीफाइलन खेलमा शसस्त्र प्रहरीकाे एपीएफ क्लबलाइ ४–० गाेल अन्तरले पराजीत गर्दै फाइनल प्रवेश गरेकाे आयाेजक बागमती युवा क्लबकाे खेल निकै प्रतिस्पर्धात्मक रहने छ ।
प्रतियाेगिताकाे उद्घाटत खेलमा चन्द्रागिरी नगरपालिका काठमाडौंलाई २–० गाेलले हराउँदै पिप्ले क्लब सेमिफाइनल प्रवेश गरेकाे थियाे । पछिल्लो समय पिप्ले युवा क्लबले खेलकुदकाे गतिविधीबाट मकवानपुर जिल्लाकाे चिनारी गराउन र खेलकुद क्षेत्रको विकासमा आक्रामक ढङ्गले गतिविधि गर्दै आएको छ । हाल मोफसल कै प्रतिष्ठित राजर्षि जनक कप फुटबल प्रतियगितामा उत्कृष्ट खेल खेली फाइनल प्रवेश गर्दै आफ्नो बलियो दाबेदारी पनि पेस गरेको छ ।
आज हुने फाइनल प्रतिस्पर्धामा उपाधि जित्दै मकवानपुरबासी लाई गौरवान्वित बनाउने कुरामा आफु विश्वस्त रहेकाे प्रशिक्षक सुविन घिमिरेले बताए । उनले भने ‘विदेशी र नेपालका चर्चित खेलाडीको समिश्रण रहेको पिप्ले टोली उपाधि जित्ने गरी प्रतियोगितामा सहभागी भएको हाे ।’ स्थानीय केही खेलाडीलाई समेत प्रतियोगितामा पिप्लेले सहभागी गराएको छ । घिमिरेले अहिलेसम्म खेलाडीको मेहेनतका कारण जीत सम्भव भएको बताए ।

प्रतियोगितामा कञ्चनजंघा एफसी सिलगुढी, बागमती युवा क्लब सर्लाही, अफ्रिकन रुट्स एसोसिएसन क्यामरुन, सेन्ट्रल कलेज बीएफसी चितवन, एपीएफ क्लब, नवजनजागृति युवा क्लब सिमरा, सुदुरपश्चिम ११ र बागमती नगरपालिका सर्लाहीले सहभागिता जनाएका छन् ।
प्रतियोगिताको विजेताले १० लाख १ हजार र उपविजेताले ५ लाख ५ सय रुपैयाँसहित ट्रफी प्राप्त गर्नेछ । सर्लाहीका सर्वोत्कृष्ट खेलाडीले पल्सर मोटरसाइकल र प्रतियोगिताको सर्वोत्कृष्ट खेलाडीले ५१ हजार तथा विधागत उत्कृष्ट खेलाडी एवम् प्रशिक्षकले नगदसहित ट्रफी प्राप्त गर्नेछ ।
मकवानपुर । मकवानपुरको जिल्ला स्तरीय ११ औ राष्ट्रपति रनिङशिल्ड खेलकुद प्रतियोगिता सुरु भएको छ । चैत २९ गते अाइतबार पहिलो दिनको प्रतियाेगिता अन्तरगत बुद्ध माविका आयुस नेगीले ४ सय र ८ सय मिटर दौडमा स्वर्ण पदक पाएका छन् । यस्तै ४ सय मिटर दौड र ज्याभलिङ थ्रोमा जनक मावि बकैयाकी पविना दार्जी प्रथम हुदै २ स्वर्ण जितिन् ।
पहिलो दिनको खेलमा ज्याभलिङ थ्रो,सटपुट,४ सय मिटर दौड,८ सय मिटर दौड, ४ सय मिटर रिले तथा १५ मिटर दौडका फाईनल खेल सम्पन्न भएका छन् । यस्तै ८ सय मिटर दाैड छात्रामा नाटेश्वर थाहाकी सुजना विक प्रथम भएकी छन् । १५ सय मिटर दौडमा छात्र तर्फ राजन गोले सुन्दरी देवी मावि, थाहा नगरपालिका र छात्रामा सरिता हुमागाई सारदा मावि गढी गाउपालिका विजयी भएका छन् । रिले मा ४ * ४०० छात्र बुद्ध मावि र छात्रा तर्फ नाटेश्वर मावि प्रथम भएका छन् ।
भलिवलमा छात्रा तर्फ ७ र छात्रमा ९ वटा विद्यालयले सहभागी जनाएका छन् भने कवड्डीमा ८ पालिकाका विद्यालयहरु सहभागी भएका छन् । भलिवल र कव्वडीका पहिलो चरणका खेलहरु सकिएका छन् । चैत ३० गते सेमिफाईनल र फाईनल खेल हुने बताईएको छ ।
कोभिडको सन्त्रासका कारण दुई दिनमा नै प्रतियोगिता समापन गर्न लागिएको जिल्ला खेलकुद विकास समितिका कार्यालय प्रमुख राजन दाहाल खुशराजले जानकारी दिए । जिल्लाका सबै १० वटै स्थानिय तहले भाग लिएको प्रतियोगितामा ८ सय ७५ जना खेलाडी सहभागी रहेका जिल्ला खेलकुद विकास समितिले जनाएको छ ।
४८ स्वर्ण पदकका लागि हुने प्रतियोगितामा भलिवल, एथलेटिक्स, कवड्डी, कराते, तेक्वान्दो र उसुका खेलहरु भएका छन् । समग्र खेलमा मेडलका आधारमा प्रथम हुने विद्यालयले रनिङ शिल्ड प्राप्त गर्ने छ भने अन्य टीम गेम विजेताहरुलाई शिल्ड पदान गरिने जिल्ला खेलकुद विकास समितिका अध्यक्ष सानुकुमार लामाले जानकारी दिए ।
प्रतियोगिताको उद्घाटन जिल्ला समन्वय प्रमुख रघुनाथ खुलालले गरेका थिए । खेलकुद विकास सििमतिका अध्यक्ष लामाको अध्यक्षतामा भएको कार्यक्रममा एशियाकै उत्कृष्ट प्रधानअध्यापक आधुनिक राष्टिय माविका प्रधानअध्यापक विर बंश बैठालाई सम्मान गरिएको थियो ।
मकवानपुर । मकवानपुर प्रहरीले सवारी ज्यान मुद्दा र चेक अनादर मुद्दामा फरार रहेकाे ३ जना प्रतिवादी पक्राउ गरेकाे छ । सवारी ज्यान मुद्दामा जरिवाना भुक्तान गर्न बांकी रहेका फरार प्रतिवादी हेटाैडा ८ का ज्ञानेन्द्र देउला र चेक अनादर मुद्दामा जरिवाना भुक्तान गर्न बांकी रहेका फरार प्रतिवादी हेटाैडा ८ की पिन्की पाण्डे श्रेष्ठ हेटाैडा १ की भवानी राना तामाङलाई चैत २९ गते पक्राउ गरिएकाे मकवानपुर प्रहरीले जनाएकाे छ ।
मकवानपुर जिल्ला अदालतको २०७३ साल साउन ६ गतेको फैसालाले सवारी ज्यान मुद्दामा जरिवाना भुक्तान गर्न बांकी रहेका देउलालाई जिल्ला प्रहरी कार्यालय मकवानपुरबाट खटिएको टोलीले हेटौडा ८ बाट पक्रउ गरिएकाे मकवानपुर प्रहरी प्रवक्ता जयश्वर रिमालले बताए ।
यस्तै मकवानपुर जिल्ला अदालतको २०७४ साल पाैष १३ गतेको फैसालाले चेक अनादर मुद्दामा जरिवाना भुक्तान गर्न बांकी रहेका श्रेष्टलाइ जिल्ला प्रहरी कार्यालय मकवानपुर बाट खटिएको टोलीले हेटौडा ८ कमानेबाट पक्रउ गरिएकाे प्रवक्ता रिमालले जानकारी दिए । चेक अनादर मुद्दामै मकवानपुर जिल्ला अदालतको २०७६ साल पाैष २७ गतेको फैसालाले जरिवाना भुक्तान गर्न बाँकी रहेका प्रतिवादी तामाङलाइ जिल्ला प्रहरी कार्यालय मकवानपुरबाट खटिएको टोलीले हेटौडा १ बाट पक्रउ गरेकाे हाे ।
सवारी ज्यान मुद्दामा फरार प्रतिवादी देउला र चेक अनादर मुद्दामा फरार प्रतिवादीहरू श्रेष्ठ र तामाङलाइ जरिवाना भुक्तानको लागि सम्मानित मकवानपुर जिल्ला अदालतमा उपस्थित गराई जरिवाना भुक्तान गराईएको प्रवक्ता रिमालले बताए ।
काम मिलाइ दिन्छु भन्दै रकम माग्ने १ जना पक्राउ
यसैगरी मकवनापुर प्रहरीले हेटाैडाबाट प्रहरीसँगकाे काम मिलाइ दिन्छु भनी सर्वसाधारणसँग रकम माग्ने १ जनालाइ पक्राउ गरेकाे छ । प्रहरीसँगकाे काम मिलाइ दिन्छु भनी सर्वसाधारणसँग रकम माग्ने हेटाैडा १ का संजाेग लामालाइ चैत २८ गते पक्राउ गरिएकाे प्रवक्ता रिमालले जानकारी दिए ।
लामाले लेखनदासको काम गर्छु, प्रहरीसँग जुन सुकै काम गराईदिन्छु भनि सर्वसाधारणसँग रकम माग्ने गरेको गुनासोकाे अाधारमा जिल्ला प्रहरी कार्यालय मकवानपुरबाट खटिएको प्रहरी टोलीले लामालाई पक्राउ गरी थप अनुसन्धान कार्य भईरहेको रिमालले बताए ।
मकवानपुर । नेपालमा पछिल्लो २४ घण्टामा १ सय ५१ जना काेराेना भाइरस संक्रमणमुक्त भएका छन् । याे सँगै काेराेना निको हुनेको संख्या २ लाख ७३ हजार ८ सय ८६ पुगेको स्वास्थ तथा जनसंख्या मन्त्रालयले जनाएकाे छ ।
यस्तै पछिल्लाे २४ घण्टमा थप ३ सय ३७ जनामा कोरोना भाइरस संक्रमण पुष्टि भएको छ । जनसंख्या मन्त्रालयका अनुसार ३ हजार ५सय ३२ जनाको पीसीआर परीक्षण गर्दा ३ सय ३७ जनामा संक्रमण पुष्टि भएको हो ।
छिमेकी मुलुक भारतमा कोरोनाले भयावह रुप लिँदै गर्दा नेपालमा पनि त्यसको असर देखिएको छ भने पछिल्लो समय संक्रमितको संख्या बढ्दै गएको तथ्यांकमा देखिएको छ । गत बिहीबार ३ सय ३२ जनामा संक्रमण पुष्टि भएको थियो भने शुक्रबार २ सय ८८ जनामा संक्रमण पुष्टि भएको हाे ।
यससँगै देशभर कोरोना संक्रमितको संख्या २ लाख ७९ हजार ७सय २५ पुगेको छ । यस्तै पछिल्लो २४ घण्टमा कोरोना भाइरस संक्रमणबाट १ जनाको मृत्यु भएको छ । हालसम्म ३ हजार ३९ जनाको मृत्यु हुँदा सक्रिय संक्रमित २८ सय जना रहेका छन् ।
हेटौंडामा एक बालक सहित ४ जनामा कोरोना संक्रमण
यसै गरी पछिल्लो २४ घण्टामा बागमती प्रदेशको राजधानी समेत रहेको हेटौंडामा एक जना बालक सहित ४ जनामा कोरोना पुष्टि भएको हो । पुष्टि हुनेमा हेटौंडा-३ की ८५ वर्षीया महिला,४१ वर्षीया महिला र ६ वर्षीय बालक रहेका छन् । यसैगरि हेटौंडा-४ की ३२ वर्षीया महिला रहेकी छन् ।
शुक्रबार १४ जनाको स्वाब परीक्षणमा ४ जनामा संक्रमण देखा परेको जिल्ला जनस्वास्थ्य कार्यलय मकवानपुरले जनाएको छ । यो संगै मकवानपुरमा सक्रिय संक्रमितको संख्या १४ पुगेको छ । संक्रमितहरु आफ्नै घरमा उपचाररत रहेका छन् ।
यसैगरि मकवानपुरमा कोरोना संक्रमणबाट हालसम्म ३२ जनाको मृत्यु भईसकेको छ । मृत्यु हुनेमा २६ जना हेटौंडा उपमहानगरपालिकाका रहेका छन् । यसैगरि थाहा नपालिकाका र मनहरी गाउँपालिकाका २/२ रहेका छन् भने बागमती र बकैया गाउँपालिकाका १/१ जना रहेको छन् ।
मकवानपुरमा हालसम्म पुष्टि भएको ३ हजार ९ सय ६ जना संक्रमितमा ३ हजार ८ सय ६० जना संक्रमण मुक्त भएको जनस्वास्थ्य कार्यलयले जनाएको छ ।
मकवानपुर / प्रहरी हिरासतभन्दा स्कुलमा मानव अधिकार हननका घटना अत्यधिक हुने गरेको राष्ट्रिय मानव अधिकार आयोग बागमती प्रदेश कार्यालयका सहसचिव यज्ञप्रसाद अधिकारीले बताएका छन् ।
राष्ट्रिय मानव अधिकार आयोगको आयोजनामा शनिबार हेटौंडामा भएको छैटौ रणनीतिक योजना तर्जुमा सम्बन्धमा परामर्श कार्यक्रम उनले यस्तो बताएका हुन् । राज्यका निकायहरु अधिकार कार्यान्वयनको पाटोमा उदासिन देखिएको गुनासो उनले गरे । कर्मचारी र स्वयम मानव अधिकारकर्मीको मानव अधिकारको रक्षा र उनीहरुले कर्तव्य भूमिका बारे चासो र चिन्ता गर्नुपर्ने अवस्था भएकोले परामर्श गोष्ठीको आयोजना गरिएको आयोगका सचिब वेदप्रसाद भट्टराईले बताए । सरोकारवालाहरूबाट महत्वपूर्ण सुझाव प्राप्त भएको उनले बताए ।

कार्यक्रममा मानव अधिकार तथा जनसरोकार समिति मकवानपुरका अध्यक्ष अधिवक्ता इश्वरी अधिकारीले काममा ढिलासुस्ती हुनु पनि मानव अधिकारको गम्भीर हनन भएको बाताए । यसैगरी कार्यक्रममा प्रहरीको सुरक्षा अवस्था धेरै नाजुक रहेको शसस्त्र प्रहरीका डिएसपी अमरबहादुर खत्रीले बताए । जनतालाई सुरक्षाको प्रत्याभूत गर्नुपर्ने प्रहरी नै विभिन्न प्रकोपबाट असुरक्षित रहेको उलने बताए ।
बालअधिकारकर्मी तिलोत्तम पौडेलले बालविकासमा राज्यकाे रुचि नहुनु मुख्य चुनौती रहेको बताए । बाल विकासका कार्यक्रममा राज्यले गरेको लगानी साह्रै न्यून रहेको बताए । “कार्यक्रम छ भनेर मख्ख मात्रै परेका छौ,त्यसको प्रभावकारिता बारे सुक्ष्ममा विश्लेषण खै” उनले भने । बिद्यालयमा बालिका सुरक्षाको सवाल पनि टिठलाग्दो रहेको उनले बताए । बालश्रम, बिद्यालयमा बालबालिकाले भोग्नु परेको शारीरिक दण्ड, महिनावारी प्याडको गुणस्तरीयता, युवामा देखिएको लागुऔषध, युवा मानव अधिकार रक्षकको गोपनियताको जस्ता सवाल रणनीतिक योजनामा समेटिनुपर्ने उनले बताए ।
कार्यक्रममा जिल्ला कानुन सहायता समिती प्रमुख अप्सरा बस्नेतले न्यायमा सहज पहुँच नभएको बताइन् । प्रत्येक स्कुलमा ५० प्रतिशत छात्र र केही प्रतिशत छात्राहरु लागुऔषधमा फसेको कुरा गहिरो अध्ययन नभएको प्रती अधिवक्ता बस्नेतले गुनासो गरिन । जनप्रतिनिधिबाट मानव अधिकार संरक्षण भन्दा दुरुपयोग भएको उनले बताइन । हिंसामा परेको महिलाले न्यायीक उपचारको लागि आफ्नो वडाबाट सिफारिस लिन समेत झन्झट भोग्नु परेको उनले बताइन् । यस्ता सवाललाई कसरी सम्बोधन गर्न सकिन्छ भन्नेबारे रणनीतिक योजना बनाइनुपर्ने अधिवक्ता बस्नेतले बताइन् ।

झण्डै ३ दशकदेखी राज्यले शिक्षक दरबन्दी नबढाईएको कारण गुणस्तरीय सिकाइबाट बालबालिका बन्चित भएको, छात्रवृत्ति पनि साह्रै न्यून भएको, लागुऔषधमा लागेका बालबालिकालाई उन्मुक्ति दिलाउनु धेरै चुनौतीपूर्ण रहेको भूकम्प पुन:निर्माण प्राधिकरण (शिक्षा) मकवानपुर प्रमुख उपसचिव बद्री बहादुर पाठकले बताए ।
कार्यक्रममा अनौपचारिक क्षेत्र सेवा केन्द्र बागमती प्रदेश प्रमुख कृष्ण गौतमले मानव अधिकारको सवालमा विभिन्न विषम परिस्थितिमा नागरिक समाजको सहकार्य धेरै महत्त्वपूर्ण रहेको बताए । सघींयताको अभ्यासको क्रममा पहुँच बिस्तार गर्नु पर्नेमा आयोगलाई केन्द्रिकृत गरिन नहुने गौतमले बताए । कार्यक्रममा राष्ट्रिय मानव अधिकार आयोगका सदस्य नीर ठाकुरले राष्ट्रिय समस्याका बारेमा महत्त्वपूर्ण सुझाव प्राप्त भएको र आगामी दिनमा अगाडि बढ्ने क्रममा सुझावहरू कार्यान्वयन गर्न निर्देशन गरिने बताए ।