मकवानपुर /नेपाल कम्युनिष्ट पार्टी (नेकपा) प्रचण्ड–मावध समुहले जिल्लाको बकैया गाउँपालिकामा अगुवा कार्यकर्ताहरुको लागि प्रशिक्षण तथा अन्तरक्रिया कार्यक्रम गरेको छ ।
बुधबार मकवानपुरको बकैया गाउँपालिका–४ जुरेलीमा भएको कार्यक्रममा नेकपाका केन्द्रीय सदस्य तथा जिल्ला इन्चार्ज बिरोध खतिवडाले प्रधानमन्त्री केपी शर्मा ओलीको टिमको चुरिफुरी धेरै दिन नटिक्ने बताए ।
‘अहिले उहाँहरुको चुरिफुरी सत्ताको आडमा हो । प्रतिगमनको बाटो समाउनेहरुलाई जनताले माफ गर्ने छैनन्’, उनले भने । नेकपाका जिल्ला सचिव तथा प्रदेशसभा सदस्य प्रेम बहादुर पुलामी (छिन्तु) ले नेता कार्यकर्तालाई प्रधानमन्त्री केपी शर्मा ओलीको गलत कदम बिरुद्ध एक जुट हुँदै वडा र टोल टोलमा संघर्षका कार्यक्रमहरु गर्न निर्देशन दिए । ‘हामीले जनतालाई बुझाउनु छ र असम्बैधानिक कदम खारेजीको लागि आन्दोलन बिकल्प छैन’, उनले भने, ‘राजा न नटिकेको देशमा तानाशाह बन्नेहरुको सपना पनि टिक्न सक्दैन ।’
बकैया गाउँपालिका पार्टी अध्यक्ष नारायण तिमल्सिनाको अध्यक्षतामा भएको प्रशिक्षणमा जिल्ला पार्टी कार्यालय सदस्य बद्रि लम्साल, सचिवालय सदस्य लक्ष्मी पाख्रिन, लक्ष्मी माझी, जिल्ला सदस्यहरु कृष्ण प्रसाद चौँलागाई, सिर्जना थिङ, लोकनाथ गौतम, परर्शुराम गौतम, प्रेम डिमडुङ, अमर स्याङ्तान लगायतको आतिथ्यता रहेको थियो ।
प्रशिक्षणमा गाउँ कमिटि र वडास्तर ससम्मका अगुवा कार्यकर्ताहरुको सहभागिता रहेको नेकपा मकवानपुरका सचिवालय सदस्य कमान सिं पाख्रिन (पृथक)ले बताए ।
मकवानपुर/चिसोबढी बालबालिका, दीर्घरोगी तथा वृद्धवृद्धाहरुको स्वास्थ्यमा समस्या आउन सक्ने संभावना बढेको छ । यसैबीच चिसोमा कपडा अभावले जाडोको समस्या भोग्दै आएका लोपोन्मुख जाति वनकरियाका बालबालिका र एकल महिलालाई न्यानो कपडा वितरण गरिएको छ ।
आदिवासी जनजाति विकासका लागि संजाल काठमाडौंले सदस्यहरुबाट संकलित रकमबाट तयारी कपडा वितरण गरिएको हो । आदिवासी जनजाति विकासका लागि संजालकी अध्यक्ष सावित्रा चेपाङ, उपाध्यक्ष सुदीप ठकुरी, कोषाध्यक्ष निर्मला भुजेल, सदस्य सुमिन गुरुङलगायतले वनकरिया बालबालिकालाई कपडा वितरण गरेका थिए । १ देखी २० वर्षसम्मका ११ छात्रासहित ३३ विद्यार्थी वनकरिया, एक जना शारिरीक अपाङ्गता भएका र ३ जना एकल महिलालाई जाडोमा लगाउँने कपडा वितरण गरिएको थियो ।
कपडा वितरणले बनकरिया बालबालिकालाई विद्यालयमा पढ्न र ट्युसन पढ्न सहज हुने अपेक्षा गरिएको छ । २०६५ सालमा स्थापित संस्थाले आदिवासी जनजातिका क्षेत्रमा विभिन्न कार्यक्रम गर्दै आएको छ ।
यसअघि, २० घर रहेको वनकारियावस्तीमा ३ लाख ३० हजार रुपैंयाको लागतमा दश वटा ट्युवेल निर्माण भएपछि भाँडा माझ्न, लुगा धुन कुलोको मलमुत्र मिसिएको पानी प्रयोग गर्नुपर्ने बाध्यताबाट मुक्ती पाएको वनकरियाहरुले बताएका छन् ।


आदिवासी मामिलाहरुको लागि अन्तर्राष्ट्रिय कार्य समूह (आईडब्लुजीआईए) को आर्थिक सहयोगमा राष्ट्रिय आदिवासी जनजाति महिला महासंघमार्फत् ट्युवेल निर्माण गरिएको थियो ।
मकवानपुर/नेपाल कम्युनिष्ट पाटी (प्रचण्ड–माधव) समुह मकवानपुरको बागमती गाउँपालिकामा प्रशिक्षण तथा पार्टी प्रवेश कार्यक्रम भएको छ ।
आज मंगलबार भएको प्रशिक्षण कार्यक्रममा नेकपा क्रान्तिकारी माओवादी, नेपाली काँग्रेस र राप्रपाबाट दुई दर्जन बढि नेता कार्यकर्ता नेकपा प्रवेश गरेका छन् । नेकपा क्रान्तिकारी माओवादी मकवानपुरका सचिवालय सदस्य माधव घोरसाइनी, जिल्ला सदस्य जित बहादुर भ्लोन सहित बागमती गाउँ कमिटि नेकपामा प्रवेश गरेको छ । त्यस्तै नेपाली काँग्रेस बागमती गाउँपालिका ५ का पूर्व सभापति केदार थापा, ४ नम्बर वडाबाट कमल रसाइली, निसान भोम्जन, आसाराम थिङ, ७ नम्बर वडाबाट निर्मला तिमल्सिनाको नेतृत्वमा नेकपा प्रवेश गरेको हो ।
राप्रपाबाट एमध्वज बल, धनबीर स्याङ्तान लगायत पार्टी प्रवेश गरेका थिए । उनीहरुलाई नेकपाका केन्द्रीय सदस्य केदार न्यौपाने, जिल्ला अध्यक्ष मुनु सिग्देलले स्वागत गरेको नेकपा मकवानपुरका सचिवालय सदस्य कमान सिं पाख्रिन ९पृथक० ले बताए । कार्यक्रममा बोल्दै केन्द्रीय सदस्य न्यौपानेले प्रधानमन्त्री गलत कदम चाल्दै दुई तिहाई जनमतको अपमान गरेको बताए ।
पार्टी अध्यक्ष सिग्देलले प्रधानमन्त्रीको असम्बैधानिक कदमको बिरुद्ध वडा तहसम्म संघर्षको कार्यक्रम अघि बढाउन कार्यकर्ताहरुलाई निर्देशन दिइन् । पौष महिनाभित्र वडा कमिटि बैठक, प्रशिक्षण र जनवर्गीय संगठनहरुको बैठक सकाउने र गाउँपालिका स्तरीय बृहत्त कार्यकर्ता भेला प्रशिक्षण गरिने उनले बताइन् ।
कार्यक्रममा नेकपा बागमती प्रदेश कमिटि सदस्य सर्केश घलान, जिल्ला पार्टी सचिवालय सदस्य भगवती पुडासैनी, ज्ञान सागर भ्लोन, जिल्ला सदस्यहरु सर्मिला बिक,जनक पहरी, दिलदोर्जे पाख्रिन, दन्तलाल माझी, मंगल रखाल लगायतको आतिथ्यता रहेको थियो ।
मकवानपुर / मकवानपुर जिल्ला मनहरी गाउँपालिका उपाध्यक्ष मनिला विष्टले आफूलाइ अन्याय भएकाे बताउँदै अब न्यायकाे लागि कानुनकाे सहयाेग लिने बताउनु भएकाे छ । आफूले दिंदै नदिएकाे राजिनामा स्वीकृतिकाे समाचार बाहिएकाे भन्दै उपाध्याक्ष विष्टले अब कानुनी बाटाे लड्ने बताउनु भएकाे हाे । आज आइतबार हेटाैंडामा पत्रकार सम्मेलन गर्दै उहाँले यस्ताे बताउनु भएकाे हाे ।
यसअघि मंसीर २९ गते गाउँपालिका उपाध्यक्ष मनिला बिष्टले स्वेच्छाले दिनु भएको राजीनामा आफूले स्वीकृत गरिदिएको मनहरी गाउँपालिका अध्यक्ष एकराज उप्रेतीले सञ्चार माध्यमसमक्ष भन्नु भएको छ ।
उहाँका अनुसार पुस १७ गते शुक्रबार राजीनामा स्वीकृत भएको हो । शुक्रबार स्वीकृत भएको राजीनामाबारे आइतबार मात्रै समाचार प्रकाशन भएको थियो । आइतबार कार्यालय समयमा उपाध्यक्ष मनिला बिष्टले भने आफूले दिँदै नदिएको राजीनामा कसरी स्वीकृत हुन्छ भन्ने प्रश्न गर्नु भएको छ । उहाँले फेसबुकमा गाउँपालिका अध्यक्षका छोरा विकास उप्रेती र कर्मचारी डिल्लीराम रेग्मीले शुक्रबार साँझ राजीनामा स्वीकृत भएको पत्र दर्ता गराएको सुनेको सामाजिक सञ्जाल फेसबुकमा लेख्नु भएको छ ।
अध्यक्ष उप्रेती र उपाध्यक्ष बिष्टका यी दुईखाले फरक फरक भनाईले अन्यौलता सिर्जना गरेको छ ।
बिगतको हल्ला के हो ?
पूर्व नेकपा एमालेबाट निर्बाचित अध्यक्ष उप्रेती र उपाध्यक्ष बिष्ट तथा कर्मचारीहरुबीच समन्वय अभाव भएकाले पटक पटक विवाद हुने गरेको र त्यसै क्रममा उपाध्यक्षले राजीनामा दिएका समाचारहरु सञ्चारमाध्यमहरुमा प्रकाशित भएका थिए । यो घटना गत मंसीर २९ गतेको हो । केही दिन यही कुराले स्थानीय सञ्चारमाध्यमहरुमा चर्चा पायो । तर, त्यतिखेरै अध्यक्ष उप्रेती र उपाध्यक्ष बिष्टले यो हुँदै नभएको कुरा भएकाले भ्रममा नपर्न भन्दै मिडियाहरुलाई प्रतिक्रिया दिएका थिए । अध्यक्ष उप्रेतीले भन्नु भएको थियो–‘राजीनामा दिएको हो भने बुझ्ने मै हूँ, मैले बुझ्न पाएको छैन, दिने व्यक्तिले पनि मैले दिएको छैन भन्नु भएको छ, यो अनावश्यक हल्ला कसरी चल्यो ?’
गाउँपालिकाको संस्थागत धारणा
उपाध्यक्ष बिष्टको राजीनामासहित अध्यक्ष र कर्मचारीहरुसँग विवाद बढेको भन्ने समाचारहरु आएपछि पुस १ गते कार्यपालिका बैठक बस्यो । बैठकको माइन्युटमा लेखिएको छ–यस गाउँपालिका उपाध्यक्ष मनिला बिष्टले आफ्नो पदबाट राजीनामा दिएको भन्ने बिषयसँग जोडेर भ्रामक र कपोलकल्पित बिषयहरु समेटेर फेसबुक, पत्रपत्रिका, अनलाइन सञ्चार माध्यमहरुमा आएका खबरको बारेमा कार्यपालिका बैठकमा गम्भिर ध्यानाकर्षण र छलफल भयो । पुष्टयाइँ बिना सत्य तथ्य नबुझी अनावश्यक भ्रमपूर्ण, कपोलकल्पित आरोपका समाचार आउनु दुखद् र भत्र्सनायोग्य र खेदपूर्ण भएको । मिडियाकर्मीहरुले समाचार प्रकाशन/प्रसारण गर्दा आधिकारिक रुपमा बुझी प्रकाश/प्रसारण गर्नु हुन बैठक हार्दिक आग्रह गर्दछ ।’
उल्लेखित निर्णयले पनि मंसीर २९ गते दिइएको भनिएको राजीनामासम्बन्धी हल्लालाई खारेज गरेको छ । त्यससँगै गाउँपालिकाले मंसीर २ गते निकालेको विज्ञप्तीले पनि कार्यपालिकाको बैठकको निर्णयलाई सार्बजनिक गरी भ्रमपूर्ण समाचारको पछि नलाग्न आग्रह गरिएको छ ।


राजनीतिक स्वार्थको असर
अहिले राजीनामा स्वीकृत भएको भनिएको बिषय अब अध्यक्ष एकराज उप्रेती वा उपाध्यक्ष मनिला बिष्टको मात्रै रहेन । यो नेपाल कम्युनिष्ट पार्टीको फुटसँग जोडिएर अघि बढ्यो । फुटसँगै ओली पक्षधरतातिर लाग्नु भएको उप्रेतीले २० दिनपछि राजीनामा स्वीकृत भएको खबर सार्बजनिक हुनुलाई फुटकै असरको रुपमा हेरिएको छ । उपाध्यक्ष पार्टी फुटपछि कुनै पनि गुटमा खुल्नु भएको छैन । उहाँ पूर्व एमाले पक्षधरहरुकै सल्लाहमा आफू रहने बताउँदै आइरहनु भएको छ भने अध्यक्ष उप्रेती मनहरीमा आयोजित पूर्व एमालेको भेलामा अतिथि, हेटौँडामा आयोजित मोर्चा संगठनहरुको भेलामा अतिथि हुनुहुन्थ्यो ।
अध्यक्षमाथि दबाब
गाउँपालिका अध्यक्ष उप्रेतीमाथि यतिखेर उपाध्यक्षको राजीनामा आएको हो कि होइन ? भनेर कार्यपालिका सदस्यहरु (खासगरी वडाध्यक्षहरु) ले दबाब दिएको बताइन्छ । वडाध्यक्षहरु पनि उपाध्यक्षसँग रुष्ट हुनुहुन्छ । अध्यक्षले वडाध्यक्षहरुको दबाब थेग्न नसकिएको बताउने गर्नु भएको छ । त्यसैगरी राजीनामाको बिषयबारे प्रमुख बिपक्षी दल नेपाली काँग्रेसले समेत ध्यानाकर्षण गरी आन्दोलनको चेतनावनी दिएको बताइन्छ । यसरी अध्यक्ष चौतर्फी चेपुवामा परेको एउटा दृष्टान्त छ भने उपाध्यक्षलाई अर्काे खेमाको आरोप लगाएर ओली पक्षधर नेताहरुले ‘राजीनामा स्वीकृति’ का निम्ति दबाब दिएको बुझ्न सकिन्छ । यद्यपि उपाध्यक्ष कुनै पनि गुटमा खुलिसकेको अबस्था छैन ।
गाउँपालिकाको बेथिति
यी घटनाक्रमले गाउँपालिकाभित्र बेथिति प्रस्ट्याउँछ भने अध्यक्ष र उपाध्यक्षको विवादको फाइदा कर्मचारीहरुले उठाइरहेको देखिन्छ । जस्तो कि, गाउँपालिकाका कर्मचारीहरुले तेहोरो भत्ता लिने गरेको, १० बजे कार्यालय नपुग्ने गरेको, पूरा दिन काम नगरी हतार हतार फर्कने गरेकोजस्ता गुनासाहरु यसअघि नै सार्बजनिक भइसकेका छन् । हेटौँडा घर भएका अधिकाँश कर्मचारीहरु नेताहरुका फोर्स लगाएर नजिकै रहेको मनहरी गाउँपालिकामा जागीरका लागि आउने गरेका छन् । कर्मचारी अभावकै कारण खासगरी पशु, कृषि शाखाको प्रगतिमा क्षेत्रको विकासमा उल्लेख्य सुधार हुन सकेको छैन । गत आर्थिक बर्षमा कृषिको १ करोड बजेट फ्रिज भएको थियो ।
अब के होला ?
यो घटनाले मनहरी गाउँपालिकामा रमिता नै देखिन्छ । उपाध्यक्षले राजीनामाको कुरा स्वीकार गर्नु भएको छैन भने कार्यपालिकाको निर्णय र बिज्ञप्तीले ती भ्रमहरुलाई खारेज गरिसकेको कुरामा अडिग रहने सम्भावना देखिन्छ । उहाँले आफूबारे अनेक समाचार र हल्लाहरु आएपनि नियमित रुपमा गाउँपालिकामै रहेर काम गरिरहेको सामाजिक सञ्जालमा लेख्नु भएको छ । कार्यपालिकाको निर्णय र विज्ञप्तीसहित उहाँले कानूनी लडाइँ लड्न सक्ने अनुमान गर्न सकिन्छ ।
पार्टी कार्यकर्ताको भावना बुझ्न सकेनन् जनप्रतिनिधिले
पूर्व एमालेतर्फबाट निर्बाचित अध्यक्ष र उपाध्यक्षलाई सरकार चलाउन, जनताको मनोदशाबाट उतार्नका लागि निर्वाचित गरिएको हो । पार्टीकै टिकटबाट र सक्रियताबाट निर्बाचन जितेका अध्यक्ष र उपाध्यक्षहरुको यति धेरै विवाद देखिए पनि बसेर सल्टाउनुपर्नेमा दुबै जना आफ्नै पाराले चल्नाले परिस्थिति दुर्घटनातिर गएको कार्यकर्ताहरु बताउँछन् । ‘न त राजीनामा दिनेले पार्टीमा छलफल गरे, न त स्वीकृत गरे भन्नेले पार्टीको आधिकारिक कमिटीमा छलफल गरे’, पूर्व एमालेका युवाहरुले दुबैसँग गुनासो गरेका छन् । पार्टी कमिटीको बैठक राखेर कुनै पनि निर्देशन वा सल्लाह सुझाव दिन नसक्नुले मनहरी गाउँपालिकाको नेपाल कम्युनिष्ट पार्टीका अध्यक्ष रामप्रसाद कालाखेती र सचिव हेमलाल उप्रेती पनि यो मुद्दामा दोषी भएको नेकपाका कार्यकर्ताहरुले बिश्लेषण गरेका छन् । मनहरीलाइभकाे सहयाेगमा
मकवानपुर/ बागमती प्रदेश प्रदेश सभाको बैठक आगामी माघ ७ गते बस्ने भएको छ । आज शुक्रबार बसेको बागमती मन्त्रीपरिषद्को बैठकले यस्तो निर्णय गरेको हो । मन्त्रीपरिषद्को बैठकले प्रदेश प्रमुखको कार्यालयलाई प्रदेश सभाको बैठक बोलाउन सिफारिस गर्ने निर्णय गरेको हो ।
कोरोना भाइरसको संक्रमणको भयले लामो समयदेखि बस्न नसकेको प्रदशे सभा बैठक आगामी माघ ७ गते भने प्रदेश सरकारले बाध्य भएर बस्दैछ । प्रदेश सभाको नियमावली अनुसार चलेको देखाउन मात्रै प्रदेशसभाको बैठक आह्वानको लागि प्रदेश प्रमुखको कार्यालयमा सिफारिस गरेको देखिन्छ । प्रदेश सभा नियमावली अनुसार संसद अधिवेशन सकिएको ६ महिना भित्रमा अर्को अधिवेशन बोलाउनु पर्ने व्यवस्था रहेको छ ।
बागमतीमा प्रदेश सभाको बैठक गत साउन ८ गतेदेखि बसेको छैन । गत साउन ८ गते प्रदेशसभा सचिवालयको छैटौं अधिवेशन अन्त्य भएको घोषणा गरेको थियो । माघ ८ गते घोषणाको ६ महिना पुग्दैछ । ६ महिना पुग्न एक दिन मात्रै अगाडी संसद बैठक आह्वान गरिनुले पनि प्रदशे सरकारकारले प्रदेश सभाको नियमावलीको मात्रै सम्बोधन गर्न लागेको प्रष्ट देखिन्छ ।
सदनको अधिवेशन अन्त्य भएर अर्को अधिवेशन बोलाउनका लागि मन्त्रिपरिषद्को सिफारिसमा प्रदेश प्रमुखले आह्वान गर्ने प्रावधान रहेको छ । बागमती प्रदेश सरकार गठनदेखि नै विवादमा रहेको नेकपा संसदीय दलभित्रको विवाद केन्द्रमा भएको विवादले झन बढेपछि प्रदेश सरकारले संसद छल्दै आईरहेको थियो ।
यता बागमती प्रदेश सभाको बैठक चल्ने मिति तोकिएता पनि संसदमा विधेयक माथि भने खासै छलफल नहुने देखिएको छ । बागमती प्रदेश सभा सचिवालयका अनुसार सचिवालयमा ‘विजनेस’को रुपमा हालसम्म जम्मा दुईवटा मात्रै विधेयक रहेको छ । भौतिक मन्त्रालयको सिफारिमा आएको सडक विधेयक र नेकपाका प्रचण्ड–नेपाल समुहले मुख्यमन्त्री डोरमणि पौडेल विरुद्धमा गरेको अविश्वास प्रस्ताव दुइ वटामात्रै विषय छलफलका लागि तयार छन् ।