मकवानपुर । हेटाैंडा उपमहानगरपालिका ४ नं. वडाध्यक्ष नवीन सिग्देलले वडालाई विकासमा नमूना र अग्रणी वडा बनाउन लागि परेकाे बताएका छन् । वडा कार्यालयबाट गरेकाे कार्यकाे समीक्षा र आगामी याेजनाकाे लागि सुझाव संकलन भेलामा उनले यस्तो बताएका हुन् ।
वडाध्यक्ष सिग्देलले भाैतिक पूर्वाधारसंगै शिक्षा, स्वास्थ्य, खेलकुद, भाषा साँस्कृतिकाे विकास, विभिन्न सामाजिक अभियान सञ्चालन गरि वडालाई चाैतर्फी विकास गर्न अग्रसर रहेकाे बताए । ‘टाेलबासीहरूले दिनु भएकाे सुझावलाई आगामी कार्ययाेजनामा समावेश गरि समस्याहरू प्राथमिकताकाे आधारमा समाधान गर्दै जाने प्रतिबद्वता व्यक्त गर्दछु’ उनले भने ।
हेटाैंडा र बागमती प्रदेशकाे राजधानीकाे मध्ये भाग र घनाबस्ती रहेकाे वडा भएकाेले सफा, उज्यालाे, हरियाली र सुरक्षित सुविधा सम्पन्न वडाकाे रूपमा विकास गरिरहेकाे उनले भेलामा जानकारी दिएका थिए । भेला सहभागी टाेल विकास संस्था, विभिन्न सामाजिक संस्था र विभिन्न क्षेत्रका अगुवाहरूले वडा कार्यालय मार्फत हालसम्म भएकाे कार्यप्रति सन्तुष्टि व्यक्त गर्दै अबकाे विकासमा शहरीकरणसँगै वातावरण, सरसफाइ, शिक्षा, आधारभूत स्वास्थ्य, सचेतना मूलक कार्यक्रमलगायतका थप कार्यहरू अगाडि बढाउन सुझाव दिएका छन्। उनीहरूले विकासलाई चौतर्फी रूपमा अगाडि बढाउन साथ र सहयोग रहने प्रतिबद्धता जनाएका छन् ।
२६ वटा टाेल विकास संस्था रहेकाे वडामा २७ बैशाखमा एक चरण र २९ बैशाखमा दुई चरणमा वडाका विकास निर्माण लगायतका कार्य तथा योजनाका सम्बन्धमा टोल विकास संस्था र सरोकारवालाहरुसँग छलफल गरेकाे हाे ।
भेला वडा सदस्य गीता त्रिपाठीकाे अध्यक्षतामा भएकाे थियाे । भेलामा टाेल विकास संस्था वडा समन्वय समिति अध्यक्ष राजेन्द्र बस्ताकाेटी, वडा सचिव रामप्रसाद गुरागाईं, श्रमिक माविका प्रअ तथा शैक्षिक सुधार गुणस्तर समितिका संयाेजक श्रीराम दाहाल, विद्यालय व्यवस्थापन समितिका अध्यक्ष विवेक कार्कीलगायतकाे उपस्थिति रहेकाे थियाे ।
मकवानपुर । बागमती प्रदेश प्रमुख दीपक प्रसाद देवकोटाले आज परेको उभौली पर्व र बुद्ध जयन्तीको अवसर शुभकामना सन्देश व्यक्त गर्नुभएको छ ।
प्रदेश प्रमुख देवकोटाले सोमबार छुट्टाछुट्टै शुभकामना सन्देश प्रकाशन गर्नुहुदै प्रदेशवासीलगायत सबैमा समृद्धिको कामना गर्नु भएको हो ।
“प्रकृतिका पुजारी किराँत समुदाय अन्तर्गतका सुनुवार, राई, लिम्बु र याक्खा जातिको पवित्र पर्व उभौलीको पावन अवसरमा सम्पूर्ण प्रदेशवासीहरू तथा देश विदेशमा रहनुभएका सम्पूर्ण नेपाली विशेष गरी किरात समुदायका दाजुभाइ तथा दिदीबहिनीहरूमा सुख, शान्ति र सम्मृद्विको हार्दिक शुभकामना व्यक्त गर्दछु” उहाँले भन्नुभएको छ ।
कृषिजन्य उत्पादन राम्रो होस्, दैवीप्रकोप र विपत्तिहरू नआउन्, सबैमा सुस्वास्थ्य, सुख र शान्ति होस् भनी पूजा गरेर उभौली पर्व मनाइन्छ ।
“उभौली पर्वले केवल मौसमको परिवर्तन र उभो अर्थात् लेकतिरको यात्रालाई मात्र संकेत गर्दैन, यसले पुर्खाप्रतिको श्रद्धा, प्रकृतिप्रतिको सम्मान र सामाजिक एकताको गहिरो सन्देश पनि बोकेको हुन्छ” उहाँले सन्देशमा भन्नुभएको छ ।
यो पर्व किरात समुदायको सांस्कृतिक पहिचान, मेलमिलाप, चाडपर्वप्रतिको निष्ठा र सहअस्तित्वको दर्शन झल्काउने महत्वपूर्ण परम्परा हो । यो पर्व किराँत समुदायले आफन्त भेटघाट, खानपान, शुभकामना आदानप्रदान तथा नाचगान गरेर हर्सोल्लासका साथ मनाउने गर्दछन् ।
विविधता बोकेका सम्पूर्ण जातजाति र समुदायका हाम्रा मौलिक चाडपर्वहरूले समाजमा प्रेम, मेलमिलाप, आपसी सद्भाव, सहिष्णुता र विविधतामा एकताको भावना बलियो बनाउने कार्य गरेका छन् । देवकोटाले मौलिक पर्व र संस्कृतिको संरक्षण र प्रवर्द्धनमा लाग्न सबैलाई आह्वान गर्नुभएको छ ।
यसैगरी आजै परेको बुद्ध जयन्तीको अवसरमा पनि प्रदेश प्रमुख देवकोटाले शुभकामना सन्देश प्रकाशन गर्नु भएको छ ।
शान्तिका अग्रदूत, बौद्ध धर्मका प्रवर्तक, ज्ञान र करुणाका स्रोत भगवान गौतम बुद्धको जन्म, ज्ञान प्राप्ति र महापरिनिर्वाण भएको यस पवित्र दिन हो बुद्ध जयन्ती ।
बैशाख पूर्णिमाको दिन चैत्य, गुम्बा र बिहारहरूमा बिशेष प्रार्थना, ध्यान, पूजाअर्चना र प्रवचनलगायतका विविध कार्यक्रमहरू गरि भगवान बुद्धप्रति श्रद्धाभाब प्रकट गरिन्छ । आजको दिनलाई विश्व शान्तिको प्रतीक बोकेको दिनको रूपमा लिइन्छ । बुद्धले दिनुभएको अहिंसा, करुणा र समता जस्ता अमूल्य सन्देश मानव जगतलाई सुमार्गमा डोर्याउने आधारशिला हुन् । शान्तिका दूत भगवान गौतम बुद्धको जन्म नेपालमा हुनु सबैको लागि गौरबको कुरा भएको उहाँले सन्देशमा भन्नुभएको छ ।
“बुद्धको शिक्षालाई आत्मसात् गर्दै सभ्य, सहिष्णु, समावेशी र समृद्ध समाज निर्माणमा एकजुट हुने दृढ संकल्प हामी सबैमा जागृत होस् भन्ने कामना गर्दछु” देवकोटाले सन्देशमा भन्नुभएको छ ।
<विश्व परिवेशमा भैरहेका अशान्ति, हतियार होड, द्वन्द, युद्ध र युद्धउन्मुख परिदृश्यले बुद्धमार्गको अपरिहार्यताको बोध गराएको उहाँले उल्लेख गर्नु भएको छ। “भगवान बुद्धको आदर्शले सबैलाई शान्ति, सत्य, प्रेम, संयम र सदाचारको बाटोमा अग्रसर हुने प्रेरणा प्रदान गरोस्” देवकोटाले सन्देशमा भन्नुभएको छ ।
मकवानपुर । हेटौंडा उपमहानगरपालिका ४ नं. वडाध्यक्ष नवीन सिग्देलले विकासमा जनताको सहभागिता र अपनत्व हुनुपर्ने बताएका छन्। शनिबार टोल विकास संस्थासँग विकास निर्माणका समीक्षा तथा योजना तर्जुमा सम्बन्धी सुझाब संकलन गर्न आयोजना गरिएकाे छलफलमा उनले यस्तो बताएका हुन् ।
हेटौंडा ४ स्थित पशुपति मन्दिरकाे हलमा ९ वटा टोल विकास संस्थाका अध्यक्ष तथा सदस्यहरुसँग भएकाे छलफलमा भौतिक पूर्वाधार, शिक्षा, स्वास्थ्य, खेलकुद, धार्मिक पर्यटन, भाषा–संस्कृतिको प्रवर्द्धन, वातावरण संरक्षण र सामाजिक अभियान क्षेत्रमा प्राथमिकताका साथ वडाले कार्य गरिरहेको अध्यक्ष सिग्देलले जानकारी दिए। उनले ४ नं. वडा नगरको मुटु भएकाले नगरमै प्रतिनिधिमूलक कार्य अगाडि बढाउन वडा अग्रसर भएको बताए।
कार्यक्रममा सहभागीहरूले वडा कार्यालयले गरेको कार्यप्रति सन्तुष्टि व्यक्त गर्दै अबकाे विकासमा शहरीकरणसँगै वातावरण, सरसफाइ, शिक्षा, आधारभूत स्वास्थ्य, सचेतना मूलक कार्यक्रमलगायतका थप कार्यहरू अगाडि बढाउन सुझाव दिएका छन्। उनीहरूले विकासलाई चौतर्फी रूपमा अगाडि बढाउन साथ र सहयोग रहने प्रतिबद्धता जनाएका छन् ।
वडा सदस्य गीता त्रिपाठीको अध्यक्षतामा भएकाे छलफल कार्यक्रममा समाजसेवी प्रदीप कोइराला, टोल विकास संस्था वडा समन्वय समितिका अध्यक्ष राजेन्द्रकुमार बस्ताकोटी, टोल विकास संस्थाका अध्यक्षहरू नीरु अर्याल सुवेदी (गर्दोही), शान्ति बराल (लक्ष्मी), गणेश श्रेष्ठ (चिल्ड्रेन पार्क), गंगा अर्याल (चिसापानी), राजु अर्याल (हरियाली), सुदर्शन ढकाल (प्रतिभानगर), स्वेता कोइराला (प्रजातान्त्रिक), आशा विष्ट (वीरेन्द्रनगर) र सुन्दर न्यौपाने (श्रद्धानगर) लगायत टोलबासीहरूको उपस्थिति रहेको थियो।
अन्य टोल विकास संस्थाहरूको भेला वैशाख २९ गते सोमबार हुने बताइएकाे छ ।
मकवानपुर । मकवानपुरको हेटौंडामा रहेको हेटौडा सामुदायिक आँखा अस्पतालमा महिला बिरामीले अब महिनावारी प्याडको सुविधा पाउने भएका छन् ।
अस्पतालमा आउने महिला बिरामीहरुको लागि लक्षित गर्दै प्याड भेन्डिग मेसिन जडान गरिएको छ । युक्ति फाउण्डेशन काठमाडौंले अस्पतालमा यो मिसेन सहयोग गरेको हो । बिहीबारबाट अस्पतालमा आउने बिरामीले सेवा पाउने अस्पतालका संरक्षक सिद्धिलाल श्रेष्ठले बताए । संरक्षक श्रेष्ठ सहित अस्पताल प्रमख डा. सुनिल थकालीलाई फाउण्डेशनको तर्फबाट पेमा डोल्मा लामाले मेसिन हस्तान्तरण गरेका हुन् । “अब अस्पतालमा आउने महिला बिरामीहरु महिनावारी भएमा सेनिटरी प्याड किन्न बजारमा जानु पर्दैन” श्रेष्ठले भने ।
मेसिनमा आवश्यक सेनेटरी प्याड पञ्चसिद्धि फाउण्डेशनबाट सहयोग गर्नेछ । युक्ति फाउण्डेशनको तर्फबाट पेमा डोल्मा लामाले विदेशमा महिला दिदी बिहिनीहरुलाई महिनावारीको समयमा पर्न सक्ने समस्याको लागि विभिन्न स्थानमा यस्तो मेसिन हुने गरेको र नेपालमा पनि आफ्नो दिदी बिहीनीहरुलाई पर्न सक्ने समस्याको हल गर्न मेसिन विभिन्न स्थानमा डोनेशन गर्ने गरेको बताइन् । हेटौडा सामुदायिक आँखा अस्पतालमा सहयोग गर्न पाउँदा आफू गौरवान्वित भएको उनले बताइन् ।
मकवानपुर । मकवानपुरकाे हेटौंडा उपमहानगरपालिका–१६ र १७ को सिमानास्थित गैरीगाउँको भित्री सडकखण्डमा जमिन भासिएर हराएको गाडी अझै फेला परेको छैन । गत शुक्रबार ना ४ च ४८३३ नम्बरको सिंगल क्याब बोलेरो गाडी जमिनमुखी भासिएको थियोे ।
घटनाको अध्ययनका लागि मंगलबार आएको खानी तथा भूगर्भ विभागको टोलीले प्रारम्भिक अनुसन्धान गरी बुधबार काठमाडौ फर्किएको छ । भूगर्भविद् नारायण अधिकारीको नेतृत्वमा आएको टोलीले घटनास्थलको माटोको बनावट, भूगर्भीय अवस्था, भूमिगत जल तथा चुम्बकीय क्षेत्रको परीक्षण गरेको थियो ।
बुधबार बागमती प्रदेशसभा सदस्य एवं पुर्व मन्त्री एकालाल श्रेष्ठले घटनास्थलमै पुगेर खानी तथा भूगर्भ विभागको टोलीको प्रारम्भिक अनुसन्धानको बारेमा जानकारी लिएका छन् । प्रारम्भिक अनुसन्धानबारे जानकारी लिदै पुर्वमन्त्री श्रेष्ठले यस क्षेत्रको जोखिमको अवस्था समेतलाई समेटेर विस्तृत भुगर्भीय जानकारी सहितको रिपोर्ट तयार पार्न विभागको टोलिलाई आग्रह गरेका छन् ।
पछिल्लो समय विकसित शहरको रुपमा अघि बढिरहेको यस क्षेत्रमा भुगर्भीय हिसाबले जोखिमको अवस्था कस्तो छ भनी विस्तृत अध्ययनको लागी समेत विभागको ध्यानाकर्षण गराए । प्रारम्भिक अनुसन्धानबारे प्रदेश सभा सदस्य श्रेष्ठलाई जानकारी गराउदै विभागका भुगर्भविद कृष्ण पाण्डेले उक्त क्षेत्र वरपरका जमिन तरलिकृत रहेको बताए ।
जमिनको माथिल्लो तह केही मिटर चिम्ट्याईलो रहेको र तल्लो तहको माटोमा बालुवा र पानी मिश्रित रहेको पाईएको टोलीले जनाएकाे छ । टोलिले ६ मिटर गहिराईसम्मको माटोको नमुना संकलन गरेको छ । संकलन गरिएको माटोको विभागको ल्याबमा परीक्षण पश्चात् यस क्षेत्रको भुगर्भीय रिपोर्ट तयार पारिने बताए । ‘हामीले २ वटा विधीबाट यस क्षेत्रको अध्ययन गरेका छौं । एउटा चुम्बकीय विधि र अर्को जमिनमुनि रड हालेर हेरिरहेका छौं । चुम्बकीय विधिबाट हेर्दा जमिनमुनि करिब ३ दशमलव ४ मिटर तल केही फलामजन्य धातु रहेको जानकारी प्राप्त भएको छ । तर उक्त वस्तु हराएको भनिएको गाडी नै हो वा अरु कुनै उपकरण हो भन्ने एकिन हुन सकेको छैन’ उनले भने ।
टोलिले अपनाएको अर्को विधीबाट पनि हराएको गाडी जमिनको कुन भाग र कति तल छ भन्ने यकिन समेत हुन सकेको छैन ।‘उक्त क्षेत्रको जमिनको माटो तरलिकृत छ । सङ्गै ठूलो क्षेत्रमा फैलिएको माछा पोखरीहरु पनि छन् जसले गर्दा यस क्षेत्रमा ‘सिंक होल’ को जोखिम बढी देखिएको छ । हामीले विभिन्न स्थानको माटोको नमुना लिएका छौं’ अधिकारीले भने ।
२ दिन घटनास्थलको अध्ययन र माटोको नमुना संकलन गरि विभागको टोलि आज काठमाडौं फर्केको हाे । टोलीले संकलन गरेका तथ्य र नमुनाको प्रयोशाला परीक्षणपछि मात्र दोस्रो चरणको अध्ययन हुने जानकारी दिएको छ ।पाँच दिन बितिसक्दा पनि गाडी फेला नपरेको अवस्थामा अनुसन्धान थप चासोको विषय बनेको छ ।