मकवानपुर/कोरोना भाइरस (कोभिड–१९)को माहामारीपछि वैदेशिक रोजगारबाट फर्किएका युवाहरुलाई स्वदेशमै टिकाउन रोजगारीको व्यवस्था गर्न माग भइरहेको बेला बागमती प्रदेश सरकारले यसतर्फ ध्यान दिएको छ ।
बागमती प्रदेश सरकारले उत्पादन तथा रोजगारी सिर्जना गर्न सहुलियतपूर्ण ब्याजदरमा ऋण उपलब्ध गराउने भएको हो । बुधबार बसको मन्त्री परिषदको बैठकले कृषि, उद्योग, व्यापार व्यवसायसँग सम्बन्धित कार्यक्रमका लागि ऋण लगानी कार्यक्रमलाई व्यवस्थित, सरल, सहज, प्रभावकारी र पारदर्शी रुपमा सञ्चालन कार्यविधि समेत पास गरेको छ । कार्यविधि अनुसार स्थानीय तहले सिफारिस गरेका आर्थिक रूपमा विपन्न, सीमान्तकृत समुदाय तथा लक्षित वर्गका लागि सहुलियतपूर्ण ३ अर्ब ऋण लगानी गरीने आर्थिक मामिला तथा योजनामन्त्री कैलाश ढुगेलले जानकारी दिए । कृषि विकास बैंक मार्फत हुने लगानीले देशमा रोजगार र व्यवसाय बढ्ने सरकारले अपेक्षा गरेको छ । ग्रामिण भेगका बारीहरु प्रयोग विहिन रहेपछि प्रदेश सरकारले यस्ता जग्गा उपयोग गर्नको लागि यसअघि नै विभिन्न कार्यक्रममार्फत प्रेरित गर्दै आएको छ ।
बुधबार भएको निर्णय अनुसारको लगानी पश्चात सरकारले बेरोजगार युवा जनशक्तिहरुलाई रोजगारमा आवद्ध गर्ने, फोहरमैला व्यवस्थापन गर्ने, महिला तथा दलित समुदायको उद्यमशीलतालाई प्रवद्र्धन गर्ने, उत्पादनशील कार्यक्रमको लागि लगानी प्रवर्द्वन गर्ने, कोरोना भाइरसबाट प्रभावित कृषि, पर्यटन एवंम् जगारीमूलक घरेलु तथा लघु उद्योग व्यवसायीलाई पुनर्उत्थान गरीने मन्त्री ढुगेलले जानकारी दिए ।
सहुलियतपूर्ण व्याजदरमा ऋण लगानी कार्यक्रम कार्यान्वयनको नीतिगत विषयमा आवश्यक निर्देशनका लागी सम्बन्धित मन्त्रालयका मन्त्री संयोजक हुनेगरी निर्देशक समिति रहने छ । यसैगरी ऋण लगानी प्रकृया सहजीकरण तथा समन्वय गर्नका लागि सम्बन्धित मन्त्रालयका सचिव संयोजक रहनेगरी समिति बनाइएको मुख्य मन्त्रीका प्रेस संयोजक प्रकाश दाहालले जानकारी दिए ।
प्रदेशले कृषि व्यवसाय सम्बन्धी उत्पादन, प्रशोधन, भण्डारण र बजारीकरण सम्बन्धी, उद्योग व्यवसाय,पर्यटन प्रवद्र्धन, व्यापार व्यवसाय, वन तथा वातावरण जन्य उद्योग,महिला उद्यमशीलता,दलित समुदाय व्यवसाय विकास र फोहरमैला व्यवस्थापन तर्फ ऋण लगानी गर्ने भएको छ ।
यसै गरी बिहीबार बसेको बैठकले नै प्रहरी इकाई भवन निर्माणार्थ बजेट निकासा गर्न स्वीकृत गर्ने पनि निर्णय गरेको छ । यसैगरी प्रदेश विश्वविद्यालयको भौतिक पुर्वाधार, विधेयक, सङ्गठानात्मक संरचना, तथा पाठ्यक्रमको आधारभुत संरचना समेतका लागि सिफारिस गर्न कार्यदल गठन गरी काम कर्तव्य र अधिकार स्वीकृत गर्ने निर्णय समेत गरेको प्रवक्ता मन्त्री ढुङ्गेलले जानकारी दिए ।
प्रदेश सरकारको यो निर्णयले विपन्न तथा बेरोजगार युवाहरुलाई स्वदेशमै काम गर्ने अवसर सिर्जना गर्ने भएकोलो चाँडै कार्यन्वयन गर्न र यस्ता कार्याक्रममा राजनीतिक भागबण्डा नगरि सबै नागरिकलाई सामान अवसर प्रदान गर्नु पर्ने मकवानपुरका युवा जयराम खड्काले सहीखबसँग बताए । ‘प्रदेश सरकारको यो निर्णयले आशा त जगाएको छ, तर भोली यसैले निराशा नल्याओस’ उनले भने ।
मकवानपुर । सरकारले निजामती कर्मचारीहरूको आधिकारिक ट्रेड युनियनको निर्वाचन स्थगित गर्ने निर्णय गरेको छ । मङ्गलवार प्रधानमन्त्री निवास बालुवाटारमा बसेको बैठकले आगामी असोज २४ गतेलाई तोकिएको कर्मचारीको निर्वाचन स्थगित गर्ने निर्णय गरेको हाे ।
साउन ५ गते सरकारले कानुनका सहसचिव कलानिधि पौडेललाई प्रमुख निर्वाचन अधिकृत तोक्दै असोज २४ गतेको निर्वाचन सम्पन्न गर्ने जिम्मेवारी दिएको थियो । ट्रेड युनियन निर्वाचनकाे कानुनी अड्चनकाबिच कार्यतालिका प्रकाशित गरी निर्वाचनका लागि आवश्यक सबै तयारी र प्रक्रियाहरू पुरा भई सकेकाे बताइएकाे छ ।

सारिएको मिति नतोकिएकोले यसपछि निर्वाचन कहिले हुने भन्ने अन्यौल छ । मन्त्रालयले सोमबार पठाएको प्रस्तावमा निजामती कर्मचारीहरूको आधिकारिक ट्रेड युनियनको म्याद अर्को चुनाव नहुन्जेलसम्म या बढीमा २०७८ वैशाख मसान्तसम्म थप्ने उल्लेख छ ।
युनियनकाे चुनाव राेक्न माग गर्दै मधेसी निजामती कर्मचारी मञ्चले साेमबार सर्वाेच्च अदालत मा रिट दर्ता गरेकाे थियाे । साेमबार नै प्रदेश नं २ का मुख्यमन्त्री लालबाबु राउतले संघीय मामिला तथा सामान्य प्रशासन मन्त्रालयलाई निर्वाचन स्थगित गर्न पत्राचारसमेत गरेका थिए ।
मकवानपुर । कर्मचारीहरूको आधिकारिक ट्रेड युनियनको चुनाव रोक्न सर्वोच्चमा मुद्दा दर्ता भएको छ । नेपाल मधेसी निजामती कर्मचारी मञ्चले निजामती कर्मचारीहरुको आउदो असोज २४ गते हुने निर्वाचन रोक्न मुद्दा दायर गरेको हो ।
प्रधानमन्त्री तथा मन्त्रिपरिषद्को कार्यालय, सामान्य प्रशासन मन्त्रालय, श्रम तथा रोजगार मन्त्रालय, कानून, न्याय तथा संसदीय व्यवस्था मन्त्रालय, श्रम विभाग र निजामती कर्मचारीहरूको आधिकारीक ट्रेड युनियन, प्रमुख निर्वाचन अधिकृतको कार्यालयलाई विपक्षी बनाइ मञ्चले मुद्दा दर्ता गरेको हो ।
मञ्चले थ्रेस होल्ड १० प्रतिशतबाट झारेर तीन प्रतिशत कायम गर्नुपर्ने, स्वास्थ्य सेवा समूह र स्थानीय तहका कर्मचारीलाई मतदानबाट वञ्चित गराउन नहुने, संघीय कानून नै नबनिसकेको अवस्थामा चुनाव हुन नसक्ने र कोरोना संक्रमणका कारण प्रचार प्रसार गर्न अफ्ठेरो हुने भएकोले सरकारले असोज २४ गतेलाई तोकेको निर्वाचन रोक्न मुद्दा हालेको हो मन्चले बताएको छ । सर्वोच्चका मुख्य रजिष्टारको तोक आदेशमा दर्ता भएको रिटको सुनुवाइ असोज ६ गते मंगलबारलाई तोकिएको छ । प्रमुख निर्वाचन अधिकृतको कार्यालयले चुनावी तयारीलाई तीव्रता दिएको छ । देशैभर स्थापित एक सय सात वटा निर्वाचन अधिकृतको कार्यालयबाट चुनावका लागि आवश्यक सबै तयारीहरू पुरा भइसकेको बताइएको छ ।
मकवानपुर / नेकपा मकवानपुरकी अध्यक्ष तथा बागमती प्रदेश सभा सदस्य मुनु सिग्देलले नेकपा पार्टी नेपालीहरुको सबैभन्दा भरपर्दो पार्टी भएको बताएकी छिन् । मकवानपुरको मनहरी गाउँपालिकामा बुधबार नेपाली काँग्रेस र नयाँ शत्तिका कार्यकर्ताहरुले पार्टी त्याग गरी नेकपामा प्रवेश गरेकाहरुलाई स्वागत गर्दै उनले यस्तो बताएकी हुन् ।
नेपाली काँग्रेस र नयाँ शत्ति आवद्ध रहदै आएका १ सय ३६ जनाले विगतमा आवद्ध रहदै आएको पार्टी त्याग गरेर बुधबार नेकपामा प्रवेश गरेका हुन् । मनहरी गाउँपालिका एक नम्बर वडामा नेपाली काँग्रेस तथा नयाँ शक्तीबाट विमल स्याङतान र पवित्रा कार्कीको नेतृत्वमा उनीहरु नेकपा प्रवेश गरेका हुन् । पार्टी प्रवेश गर्नेहरुलाई स्वागत गर्दै सिग्देलले नेकपा सबै वर्गको प्रतिनिधित्व गर्ने जनताको पार्टी भएको बताईन् । उनले सरकार सञ्चालन र पार्टी भित्रको सानातिना समस्यालाई बाहिर ठुलो समस्या भन्दै प्रचार गरेको बताउँदै त्यस्तो भ्रममा नरहन कार्यकर्ताहरुलाई आग्रह समेत गरिन् । नेकपाले जहिले पनि किसान, मजदुरको सर्वहारा वर्गको मुद्दा उठाईरहेको भन्दै जनताको हितमा सँधै लाग्ने बताएकी हुन् ।
नेकपा मनहरी गाउँपालिका १ नम्बर वडाका वडाध्यक्ष पोषण विष्टको अध्यक्षतमा भएको कार्यक्रममा बोल्दै नेकपा मकवानपुरका सचिव तथा प्रदेश सभा सदस्य प्रेम बहादुर पुलामीले चुनाव जित्न युवाहरुलाई डोजरको सपना देखाएर मकवानपुरमा केहि ठेकेदारले युवाको परिवार ध्वस्त पारेको भन्दै सचेत भएर अगाडी बढ्नु पर्ने बताए । उनले राजनीति जनताको पक्षमा गर्नु पर्ने भन्दै पैसाको भरमा राजनीति गर्ने ठेकेदार, व्यापारीहरुले जनताको कुरा नउठाउने बताएका थिए । कार्यक्रममा बागमती प्रदेश सभा सदस्य ओम बहादुर ग्लान, नेकपा मकवानपुरका सचिवालय सदस्य बनस्थम थिङ, नेकपा मनहरी गाउँपालिका अध्यक्ष रामप्रसाद कालाखेती सहित नेता कार्यकर्ताहरुको उपस्थिती रहेको थियो ।


तस्बिरहरू साैजन्य: पत्रकार शिवकुमार काशी
काठमाडौं । बिहीबार बिहान ११ बजेका लागि तय भएको नेकपाको सचिवालय बैठक दिउँसाे ३ बजे बस्ने गरी सारिएकाे छ । नेकपाका प्रचार विभाग उपप्रमुख सूर्य थापाका बिहीबार बिहान बस्ने तय भएको बैठक दिउँसो ३ बजेका लागि सरेको हो ।
आज बस्ने बैठकमा नेकपा कार्यदलको प्रतिवेदनमाथिको छलफल हुने बताइएकाे छ । कार्यदलले बुझाएको प्रतिवेदनमाथि छलफल गर्न भदौ १३ गते सचिवालय बैठक बोलाइएको थियो । गृहमन्त्री रामबहादुर थापा बादल र रक्षामन्त्री ईश्वर पोखरेल आइसोलेसनमा बस्नुपर्ने भएपछि बैठक १८ गते बस्ने गरी स्थगित गरिएको भनिए पनि अध्यक्षद्वय केपी शर्मा ओली र पुष्पकमल दाहालबीचको छलफलपछि बिहीबारका लागि सारिएको थियो ।
बिहीबारको बैठकमा पार्टीभित्रको आन्तरिक विवाद समाधानका लागि कार्यदलले बुझाएको प्रतिवेदनमाथि छलफल हुने बताइएको छ । त्यस्तै बिहीबारको बैठक राष्ट्रिय सभाको रिक्त एक जना मनोनीत सदस्यमा कसलाई लैजाने भन्नेमा केन्द्रित हुने भएको छ। नेकपा अध्यक्ष एवं प्रधानमन्त्री केपी शर्मा ओली र र अर्का अध्यक्ष पुष्पकमल दाहालबीच बुधबार साँझ भएको दुई घण्टा लामो भेटमा राष्ट्रिय सभामा कसलाई लाने भन्नेमा कुरा नमिलेपछि यो विषयले प्राथमिकता पाउने भएको हो ।
प्रधानमन्त्री ओलीले अर्थमन्त्री युवराज खतिवडालाई नै अर्थमन्त्रीमा निरन्तरता दिन चाहेकाले भदौ २० गतेभित्र राष्ट्रिय सभा सदस्य बनाइसक्नुपर्छ । पार्टी अध्यक्ष दाहाल पार्टी सचिवालयको निर्णयअनुसार बामदेव गौतमलाई राष्ट्रिय सभा सदस्य बनाउनुपर्ने पक्षमा उभिएकाले सचिवालय बैठकमा निर्णय गरेर मन्त्रिपरिषद् बाट मनोनयनका लागि उम्मेदवार सिफारिस गर्ने सहमति अध्यक्षद्वयबीच भएको छ ।
आजको सचिवालय बैठकले लामो समयदेखि स्थगित स्थायी कमिटी बैठक पनि बोलाउन सक्ने बताइएकाे छ । नेकपा भित्रको आन्तरिक विवादका कारण लामो समयदेखि स्थायी कमिटी बैठक र सचिवालय बैठक अवरुद्ध हुँदै आएको छ । विशेष गरी नेकपा शीर्ष नेतृत्वहरुले प्रधानमन्त्री केपी शर्मा ओलीलाई अध्यक्ष र प्रधानमन्त्री मध्ये एक पदबाट राजीनामाको माग गरेपछि विवाद चर्किँदै गएको थियो ।
अध्यक्ष प्रचण्ड र प्रधानमन्त्री ओलीबीच पटक पटक भेटवार्ता हुँदा पनि सहमति जुट्न सकेको छैन । उक्त विवाद सुल्झाउन महासचिव विष्णु पौडेलको नेतृत्वमामा ६ सदस्यीय कार्यदल गठन गरिएको थियो । कार्यदलले दुबै अध्यक्षलाई भदौ ६ गते प्रतिवेदन बुझाएको थियो ।