वरिष्ठ नेता माधवकुमार नेपाल पक्षको माग अनुसार अध्यक्ष केपी शर्मा ओली २ जेठ २०७५ मा फर्किन सहमत भएमा ४६ जना केन्द्रीय सदस्य नेकपा (एमाले) केन्द्रीय कमिटीबाट बाहिरिनेछन्।
३ जेठ २०७५ मा नेकपा एकीकरण हुँदा एमालेबाट २४१ र नेकपा (माओवादी केन्द्र)बाट २०० गरी ४४१ जना केन्द्रीय कमिटीमा परेका थिए। एमालेले ४६ जना थपेर २४१ जनालाई केन्द्रीय कमिटीमा पठाएको थियो।
नेपाल पक्षले एमालेका सबै कमिटीहरू २ जेठमा फर्किए मात्रै आन्तरिक विवाद समाधान हुने बताएको छ।
यो पक्षको माग पूरा हुँदा ३ जेठ २०७५ मा थपिएका खगराज अधिकारी, गोकुल बाँस्कोटा, युवराज खतिवडा, महेश बस्नेत, रामेश्वर फुँयाल, देवी ज्ञवाली, नरेश खरेल लगायत केन्द्रीय कमिटीमा पर्दैनन्। थपिएकामध्ये अधिकांश ओली पक्षका छन्।
३ जेठमा थपिएका केन्द्रीय सदस्यहरूः
१) खगराज अधिकारी २) गोकुल बाँस्कोटा ३) महेश बस्नेत ४) विष्णु रिजाल ५) नरुलाल चौधरी
६) डोरमणि पौडेल ७) तिलकुमार मेन्याङ्बो ८) राजेन्द्र गौतम ९) आनन्द पोखरेल
१०) कैलाश ढुंगेल ११) गुरुप्रसाद बराल १२) युवराज खतिवडा १३) बलराम बाँस्कोटा
१४) केशवलाल श्रेष्ठ १५) रामेश्वर फुँयाल १६) कृष्ण राई १७) वसन्त मानन्धर १८) निरज आचार्य
१९) रवीन्द्र अधिकारी (नवलपुर) २०) विनोद ढकाल २१) महेश रेग्मी २२) भानुभक्त जोशी
२३) गौरी ओली ४) समिम मियाँ अन्सारी २५) प्रमोदनारायण यादव २६) लीला भण्डारी
२७) अइन्द्रसुन्दर नेम्वाङ २८) चन्द्रबहादुर शाही २९) देवेन्द्र दाहाल ३०) अच्युत मैनाली
३१) देवी ज्ञवाली ३२) रामेश्वर रानामगर ३३) नरेश खरेल ३४) विनोद श्रेष्ठ ३५) श्रीनाथ बराल
३६) एकबहादुर राना ३७) लक्ष्मण ज्ञवाली ३८) शारदा सुवेदी ३९) गोविन्दविक्रम शाह
४०) उमा कोइराला ४१) लालबहादुर विश्वकर्मा ४२) दीपक देवकोटा ४३) राजेन्द्रसिंह रावल
४४) विमला घिमिरे ४५) नारायण सिलवाल ४६) दिलकुमारी पन्त
https://www.himalkhabar.com/news/124753
मकवानपुर । एमाले मकवानपुर नेता खेमराज सापकोटासहित ७ जना कांग्रेस प्रवेश गरेका छन् ।
सापकाेटा सहित एमाले जिल्ला सदस्य कृष्णप्रसाद ढुंगाना, रामजी घिमिरे, गाउँ कमिटी सदस्य देवराज सापकोटा, युवा संघका केन्द्रीय सदस्य रामचन्द्र रेग्मी, जिल्ला सचिवालय सदस्य रामचन्द्र रेग्मी र एमाले संगठित सदस्य तिर्थराज हुमागाई शुक्रबार कांग्रेस प्रवेश गरेका हुन् ।
पार्टी प्रवेश कार्यक्रममा उनीहरूलाई नेपाली कांग्रेस बागमती प्रदेश संसदीय दलका नेता एवं मकवानपुर सभापति इन्द्रबहादुर बानियाँले पार्टीको सदस्यता प्रदान गरेका थिए । कार्यक्रममा नगरसभापति आनन्दराम पराजुली, हेटौंडा-६ का वडा अध्यक्ष अर्जुनप्रसाद चौलागाईं, नेताहरू उत्सव इटेनी, विष्णु खनाल लगायतको उपस्थिति रहेको थियो ।
निर्वाचन आयोगलाई अर्थ मन्त्रालयले ७ अर्ब ७२ करोड दिने सहमती भएकाे छ ।अर्थ मन्त्रालयले प्रतिनिधिसभा सदस्य निर्वाचनका लागि आयोगलाई ७ अर्ब ७२ करोड ८३ लाखसम्म खर्च गर्न दिने भएको हाे ।
प्रतिनिधि सभा सदस्य निर्वाचन २०७८ को सञ्चालन निर्वाचन सामग्री लगायत अन्य सामाग्रीहरु खरिद तथा निर्वाचन व्यवस्थापनमा अर्थबाट प्राप्त रकम खर्च हुने बताइन्छ ।
२०७८ कार्तिक २६ गते शुक्रवार पहिलो चरण र मंसिर ३ गते शुक्रवार दोस्रो चरण गरी दुई चरणमा सम्पन्न हुने प्रतिनिधिसभा सदस्य निर्वाचनका लागि आवश्यक पर्ने रकमको कुनै अभाव हुन नदिने गरी अर्थ मन्त्रालयले उक्त सहमति दिएको बताइएको छ ।
नेपाल कम्युनिस्ट पार्टी (एमाले)ले १०औं महाधिवेशन आयोजक कमिटी विघटन गरेको छ । प्रधानमन्त्री निवास बालुवाटारमा बसेको महाधिवेशन आयोजक कमिटीको बुधबारको बैठकले आयोजक कमिटी विघटन गर्ने स्थायी कमिटीको निर्णय अनुमोदन गरेको छ ।
एमाले सचिव एवं प्रवक्ता प्रदीप ज्ञवालीका अनुसार आयोजक कमिटी विघटन गरेर १८ असार (शुक्रबार) केन्द्रीय कमिटीको बैठक बस्दै छ । १०औं महाधिवेशन आयोजक कमिटी विघटन गरेपछि नवौं महाधिवेशनबाट निर्वाचित पदाधिकारीसहितको केन्द्रीय कमिटी सक्रिय भएको छ ।
बैठकले आठ जना नेतालाई स्थायी कमिटीमा मनोनित गर्ने निर्णय गरेको छ । पूर्वमाओवादी केन्द्रतर्फका चार र एमालेका चार गरी आठ जना नेतालाई स्थायी कमिटीमा मनोनीत गरिएको हो । यी आठै जना नेता एमाले र माओवादी केन्द्रबीच एकता भएपछि स्थायी कमिटीमा रहेका थिए ।
स्थायी कमिटीमा मनोनित हुनेमा माओवादी केन्द्रतर्फका रामबहादुर थापा, टोपबहादुर रायमाझी, लेखराज भट्ट र मणि थापा र एमालेतर्फका रघुजी पन्त, रघुवीर महासेठ, डा. बेदुराम भुषाल र विष्णु रिमाल रहेका छन् ।
स्थायी समितिमा मनोनित महासेठ र रिमाल प्रधानमन्त्रीसमेत रहेका एमाले अध्यक्ष केपी शर्मा ओली पक्षका हुन् । पन्त र भुसाल भने वरिष्ठ नेता माधवकुमार नेपाल पक्षका हुन् ।
यस्तै, वरिष्ठ नेता नेपाल, झलनाथ खनाल, भीम रावल, रामकुमारी झाक्रीसहित ११ नेताहरूलाई गरिएको कारबाही स्वतः निष्क्रिय भएको प्रवक्ता ज्ञवालीले बताए । महाधिवेशन आयोजक कमिटीलाई सर्वोच्च अदालतले मान्यता नदिएको र पार्टी एकताका लागि समेत आधार भइरहेकाले महाधिवेशन आयोजक कमिटी विघटन गरेर केन्द्रीय कमिटीलाई नै सक्रिय बनाइएको छ ।
मंगलबार बसेको एमाले स्थायी कमिटी बैठकले महाधिवेशन आयोजक कमिटीलाई विघटन गर्ने निर्णय गरेको हो । वरिष्ठ नेता नेपाल समूहका साथै उपाध्यक्ष वामदेव गौतमले समेत आयोजक कमिटी विघटन गर्दै २ जेठ २०७५ मा फर्किनुपर्ने अडान लिँदै आइरहेका थिए । गत २३ फागुनमा सर्वोच्च अदालतले एमाले ब्यँताएपछि २ जेठ २०७५ कै पार्टी कमिटी, विधान र नेतृत्व कायम हुनुपर्ने माग पार्टीभित्र भइरहेको थियो ।

ओली फेरि उल्टो बाटोमा हिँडे: शाक्य
एमाले अध्यक्ष केपी शर्मा ओली महाधिवेशन आयोजक कमिटी विघटन गर्दै केन्द्रीय कमिटी पूर्ववत् अवस्थामा फर्काउने निर्णय गरेपछि साझा धारणा बनाउन वरिष्ठ नेता नेपाल समूहको बैठक आज बिहीबार बस्दै छ ।
एमाले उपाध्यक्ष अष्टलक्ष्मी शाक्यले विकसित राजनीतिक घटनाक्रमबारे छलफल गर्न आफ्नो समूहको बैठक बस्न लागेको बताइन् । उपाध्यक्ष शाक्यले अध्यक्ष ओली २ जेठमा फर्कने भनेर प्रचार गरे पनि व्यवहारमा त्यस्तो नदेखिएको टिप्पणी गरेकी छन् ।
एमाले बाग्मती प्रदेश इन्चार्जसमेत रहेकी शाक्यले पार्टी अध्यक्ष ओली फेरि उल्टो बाटो हिँडेको प्रतिक्रिया दिएकी छन् । एमालेको महाधिवेशन आयोजक कमिटी भंग गरेर केन्द्रीय कमिटी बैठक बोलाइएको र स्थायी कमिटी सदस्यहरू थप गरिएको निर्णयका सन्दर्भमा उनले यस्तो प्रतिक्रिया दिएकी हुन् ।
‘मिलेर जाने भनेपछि केपी ओली र माधव नेपालबीच छलफल हुनुपथ्र्यो । २०७५ जेठ २ को स्थायी कमिटी बोलाएर केके गर्ने भन्ने छलफल गर्नुपथ्र्याे । त्यसलाई पारित गरेर केन्द्रीय कमिटी बैठक तय गर्नुपथ्र्यो । यो सुल्टो हुन्थ्यो । अवैध कमिटीबाट निर्णय गरेर उहाँबाट फेरि उल्टो काम भयो,’ शाक्यले भनिन् ।
ओलीले सर्वोच्च अदालतको आदेश नमानेर अवैध कमिटीको बैठक बोलाउनै नहुने बताइन् । एक पक्षीय ढंगले अघि बढेर ओलीले एकता भाँड्न खोजेको बताइन् । नेपाल समूहका नेता बेदुराम भुषालले जुन कमिटी आफंै अवैध छ । त्यसले गरेको निर्णय कुनै पनि अर्थमा वैध हुन नसक्ने बताए ।

नेपाल पक्षीय नेताहरू बैठकमा आउनुहुनेछ: पौडेल
नेकपा एमालेका नेता विष्णुप्रसाद पौडेलले आगामी केन्द्रीय कमिटीको बैठकमा माधवकुमार नेपाल पक्ष सहभागी हुने अपेक्षा गरेका छन् । उनले नेपाल पक्ष नआउनुपर्ने कुनै कारण नभएको बताएका छन् ।
एमालेले १०औं राष्ट्रिय महाधिवेशन आयोजक कमिटी खारेज गर्दै एकता पूर्वको केन्द्रीय कमिटी ब्युँताएको भन्दै उनले शुक्रबारको बैठकमा नेपाल पक्षीय नेताहरू नआउनु अनुचित हुने पनि बताए ।
‘आजका मितिदेखि कारबाहीका प्रसंग सकियो, नेकपाभन्दा अघिको पदीय हैसियतका साथ बैठकमा सहभागी हुन आह्वान गरिसकेपछि बैठकमा नआउनु सर्वथा अनुचित कुरा हुन्छ । म आशा गर्छु उहाँहरू आउनुहुनेछ,’ उनले भने ।
आगामी दिनमा पार्टी, पार्टी निर्णयका आधारमा चल्ने सुनिश्चितता गर्न आगामी केन्द्रीय कमिटीको बैठक बस्न लागेको पौडेलले बताए । राजधानी दैनिकबाट साभार
नेपाली कांग्रेसको महाधिवेशन नजिकिँदै जाँदा महाधिवेशनको सबैभन्दा महत्वपूर्ण पक्ष मानिएको क्रियाशील सदस्यताको छानबिन विषय पेचिलो बनेको छ ।
देशभरबाट आएका क्रियाशील सदस्यता छानबिन गरी सदस्यताको टुंगो लगाउनेगरी कांग्रेसले नेता रमेश लेखकको संयोजकत्वमा छानबिन समिति बनाएको छ । तर, सो समितिले छानबिनको मापदण्ड नपाउँदा सदस्यतासम्बन्धी छानबिन र विवादमा तदारुकताका साथ काम गर्न सकेको छैन ।
सदस्यता छानबिनसम्बन्धी विषयमा कांग्रेसभित्र विवाद रहँदै आएको छ । सदस्यताको विषय लिएर कांग्रेसभित्रका संस्थापन पक्ष र संस्थापन इतर पक्षले आआफ्नो अडान लिँदै आइरहेका छन् ।
संस्थापन पक्षले सदस्यताको विषयलाई सहमतिबाटै टुंग्याउने प्रयत्न गरिरहेको छ भने इतर पक्षले जथाभावी रूपमा सदस्यता बाँडिएको भन्दै कडा छानबिनको माग गर्दै आइरहेको छ । इतर पक्षका हरेकजसो नेताहरूको बैठकमा यो विषय उठ्दै आइरहेको छ ।
सदस्यता छानबिन समितिका सदस्य नेता जीवन परियारले मापदण्ड नबन्दा छानबिनमा समस्या देखिएको बताए । ‘अहिलेसम्म मापदण्ड बनेको छैन, एक दुई दिनभित्र टुंगो लगाउने आश्वासन शीर्ष तहबाट आएको छ, त्यसपछि हामी काम टुंग्याउँछौं,’ समितिका सदस्य रहेका नेता परियारले राजधानीसँग भने ।
कांग्रेसमा विजयकुमार गच्छदार नेतृत्वको लोकतन्त्रिक फोरम, राप्रपा परित्याग गरी कांग्रेस प्रवेश गरेका सुनिलबहादुर थापा नेतृत्वको समूह र अन्य पार्टीबाट प्रवेश गरेकाहरूलाई पार्टीमा समायोजन गर्न र उनीहरूलाई दिएको क्रियाशील सदस्यताको विषयमा धेरै विवाद देखिएको छ ।
कांग्रेस पार्टी कार्यालयका अनुसार हालसम्म कांग्रेस केन्द्रीय कार्यालयले बनाएको अनलाइन प्रणालीमा ८ लाख २० हजार क्रियाशील सदस्यता इन्ट्री भइसकेको छ । त्यसमध्ये ३ लाख ९२ हजार पुराना र बाँकी नयाँ हुन् । करिब ६ लाख क्रियाशील सदस्यता निर्विवाद छन् भने र २ लाख २० हजार सदस्यता छानबिन क्रममा छन् ।
४ असारमा बसेको कांग्रेस केन्द्रीय कार्यसमिति बैठकले २० असारसम्म क्रियाशील सदस्यता विषय टुंगो लगाएर सभापति शेरबहादुर देउवालाई बुझाउने कार्यादेश क्रियाशील सदस्यता छानबिन समितिलाई दिएको थियो ।
तर, अझै पनि बर्दिया, बारा र सिन्धुपाल्चोकको सदस्यता नामावली पार्टी केन्द्रीय कार्यालयको सर्भरमा इन्ट्री भएको छैन । जसका कारण सो समयभित्र समितिले काम सक्ने सम्भावना अब न्यून हुँदै गएको छ ।
केही दिनअघि मात्रै समितिले मापदण्ड नबन्दा विवाद समाधान गर्न समस्या भएको भन्दै शीर्ष नेताहरूलाई ध्यानाकर्षण गराएको थियो । कांग्रेसको क्रियाशील सदस्यताको विवाद सबैभन्दा बढी प्रदेश २ मा देखिएको छ ।
छानबिन समितिलाई शतप्रतिशतभन्दा बढी नयाँ सदस्यता फाराम भरेका वडामा कसरी विवाद मिलाउने भन्ने समस्या परेको छ । यस्तै, तहगत रूपमा सिफारिस भएर आउनुपर्नेमा कुनै तह छुटाएर आएकालाई कसरी हेर्ने ? नेपाल लोकतान्त्रिक फोरमभित्रको समयोजनको विवादलाई के गर्ने ? र अन्य पार्टीबाट आएका भनिएकाहरूको विवादलाई कसरी समाधान गर्ने भन्ने विषयमा पनि समस्या देखिएको छ । समितिले यही आधारमा मापदण्डको प्रारम्भिक मस्यौदा बनाएर शीर्ष नेतृत्वलाई बुझाएको थियो ।
निधि, कोइराला र सिंहले केन्द्रीय सदस्यसँग छलफल गर्ने
नेपाली कांग्रेसका उपसभापति विमलेन्द्र निधि, महामन्त्री शशांक कोइराला र पूर्वमहामन्त्री प्रकामान सिंहले महाधिवेशनबारे पार्टीका केन्द्रीय सदस्यहरूसँग छलफल गर्ने भएका छन् ।
नेता सिंहको ठमेलस्थित निवासमा मंगलबार बसेको तेस्रो चरणको छलफलपछि तीनै नेताहरू अबको छलफल केन्द्रीय सदस्यसँग गर्ने निर्णयमा पुगेका हुन् ।
नेता सिंहले अबको छलफल केन्द्रीय सदस्यसँग हुने जानकारी दिए । ‘हामी तीन चरणको छलफलमा बस्यौं अब केन्द्रीय सदस्यहरूसँग हामी छलफल गर्छाैं, त्यसपछि नेतृत्वबारे कसरी अघि बढ्ने भन्ने निष्कर्षमा पुग्छौं,’ नेता सिंहले बैठकपछि राजधानीसँग भने ।
सिंहका अनुसार आगामी शुक्रबार महामन्त्री कोइरालाको टोखास्थित निवासमा केन्द्रीय सदस्यहरूसँग छलफल आयोजना हुनेछ । केन्द्रीय सदस्यसँगको छलफलपछिको अर्को चरणमा भने १४औं महाधिवेशनमा सभापतिका आकांक्षी रहेका नेताहरूसँग पनि छलफल गरिने नेता सिंहले जानकारी दिए ।
तीन नेताबीच निरन्तर महाधिवेशन लक्षित समीकरणका विषयमा छलफल हुँदै आइरहेको छ । उनीहरूबीच हाल पार्टीभित्र रहँदै आएका गुट अन्त्य गर्ने र १४औं महाधिवेशनलाई एकताको महाधिवेशन बनाएर अघि बढ्ने विषयमा छलफल हुँदै आइरहेको छ ।
नेता त्रयबीच सकेसम्म साझा उम्मेदवार बनाएर सहमतिमा नै यसपटक नेतृत्व चयन गर्ने विषयमा छलफल भइरहेको छ । सो रणनीतिअनुसार सबै आकांक्षीबीच छलफल गर्ने र सहमति हुने सम्भावना भए स्वीकार्ने विषयमा उनीहरूबीच छलफल भइरहेको हो ।
नेता त्रयबीच यसअघि महामन्त्री कोइरालाको निवास महाराजगन्जमा ११ असारमा छलफल भएको थियो भने त्यसअघि ७ असारमा उपसभापति निधिको मध्यबानेश्वरस्थित निवासमा छलफल भएको थियो । कांग्रेसको १४औं महाधिवेशन १६ देखि १९ भदौसम्म काठमाडौंमा हुँदै छ । राजधानी दैनिकबाट साभार