मकवानपुर । ठाकुरदत्त खतिवडाकाे नेतृत्वमा ट्रेड युनियन महासंघ हेटाैडा उपमहनगर कमिटि गठन गरिएकाे छ । नेकपा माओवादी केन्द्र निकट अखिल नेपाल ट्रेड युनियन महासंघ हेटौंडा उपमहानगर कमिटिको शनिबार हेटौंडामा भएको भेलाले खतिवडाको अध्यक्षतामा २१ सदस्यीय उपमहानगरपालिका कमिटी गठन गरेको हो ।
कमिटिको उपाध्यक्षमा बलराम पौडेल, सचिव लक्ष्मण छतकुली, सहसचिव नकुल अगस्ती, कोषाध्यक्ष केदार खड्का, सदस्यहरुमा सागर चौलागाई, बद्रि लोप्चन, सरोज पौडेल लगायत चयन भएका छन् । नेकपा माओवादी केन्द्र बागमती प्रदेश कमिटि सदस्य ललित घलानको प्रमुख आतिथ्यतामा भेला भएकाे हाे ।
भेलामा जिल्ला सचिवालय सदस्य तथा प्रचार विभाग प्रमुख कमानसिं पाख्रिन (पृथक), अखिल नेपाल ट्रेड युनियन महासंघ मकवानपुरका अध्यक्ष गंगा भट्टराई, उपाध्यक्ष रामशरण घिमेरे, औद्योगिक मजदुर संघका अध्यक्ष ज्ञानेन्द्र लामिछाने, अखिल नेपाल सेक्युरिटी संघ मकवानपुरका अध्यक्ष रबीन्द्र केसी, निर्माण मजदुर संघ मकवानपुरका अध्यक्ष मन कुमार लो लगायतको आतिथ्यता रहेको थियो ।
सत्तारुढ गठबन्धनका शीर्ष नेताहरुको बैठक बालुवाटारमा बसिरहेको छ । मन्त्रिपरिषदलाई पूर्णता दिन र अन्य समसामयिक विषयमा छलफल गर्न बैठक बसेको बसिरहेको प्रधानमन्त्रीका स्वकीय सचिव भानु देउवाले जानकारी दिए ।
बैठकमा प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा (एकीकृत समाजवादी) का अध्यक्ष माधवकुमार नेपाल सहभागी छन् ।
जसपाका अध्यक्ष उपेन्द्र यादव काठमाडौं उपत्यकाबाहिर रहेकाले बैठकमा उपस्थित नरहेको स्वकीय सचिव देउवाले बताए ।
सत्ता गठबन्धनका नेताहरुको बैठकले मन्त्रिपरिषदबारे टुंगो लगाउन नसकेपछि शीर्ष नेतालाई टुंग्याउन जिम्मेवारी दिइएको छ ।
सत्ता गठबन्धनमा मन्त्रालय संख्या र कुन कुन मन्त्रालय लिने भन्ने विषय टुंगिन सकेको छैन । जसका कारण मन्त्रिमण्डलले पूर्णता पाउन सकेको छैन । rajdhanidaily.com बाट
मकवानपुर । नेपाली कांग्रेस मकवानपुरको भदौ २० गते हुने वडा अधिवेशनका लागि खटिने १ सय २ वडा निर्वाचन अधिकृतका लागि अनुशिक्षण सम्पन्न भएको छ । कांग्रेसकी केन्द्रीय सदस्य महालक्ष्मी उपाध्याय डिनाको प्रमुख आतिथ्यता वडा अधिवेशनका लागि खटिने निर्वाचन अधिकृतका लागि शुक्रबार १ दिने अनुशिक्षण कार्यक्रम सम्पन्न भएको हो ।
जिल्ला निर्वाचन अधिकृत गोपि शर्मा सुवेदीको सभाध्यक्षतामा कार्यक्रम भएको हो । कार्यक्रममा जिल्ला सहायक निर्वाचन अधिकृत र वडा निर्वाचन अधिकृतहरूलाई प्रमाणपत्र वितरण गरिएको थियो भने निर्वाचन सामग्री हस्तान्तरण गरिएको थियो ।
कार्यक्रममा पार्टीका जिल्ला उपसभापति विष्णुप्रसाद लामिछाने, सचिव बुद्ध लामा, प्रवक्ता प्रदिप कोइराला, सल्लाहकार अशोक शाक्य, जिल्ला सदस्य राजिव सुवेदी, क्षेत्रीय सचिव सुवातसिं थिङ, शिक्षक संघ बागमती प्रदेशका बरिष्ठ उपाध्यक्ष दिपकलाल श्रेष्ठ, जिल्ला अध्यक्ष रामकुमार अधिकारी, प्राध्यापक संघका अध्यक्ष राजबाबु पहाडी, डिएलए मकवानपुरका अध्यक्ष कृष्णप्रसाद न्यौपाने लगायतको उपस्थिति रहेको थियो ।
मकवानपुर । नेकपा एमाले निकट अखिल नेपाल महिला संघ (अनेमसंघ) बकैया गाउँपालिकाको अध्यक्षमा जिमि स्याङतान लो चयन भएकी छन् ।
शुक्रबार बकैया-७ मा रहेकाे धनेश्वर पार्कमा भएको भेला तथा सम्मेलनले स्याङतानको नेतृत्वमा ४७ सदस्यीय कमिटी गठन गरिएको बकैया गाउँपालिका उपाध्यक्ष एवं एमाले मकवानपुरको जिल्ला सदस्य सरला बोलखेले जानकारी दिईन् ।
कमिटिको उपाध्यक्षमा सुनिता घिमिरे ढकाल,सचिवमा सानुमाया वाईवा,उपसचिवमा शिव कुमारी राई,कोषाध्यक्षमा ज्वोती भ्लोन सर्वसमत चयन भएको सदस्य बोलखले बताईन् । नेकपा एमाले बागमती प्रदेश सदस्य एवं अखिल नेपाल महिला संघको केन्द्रीय सचिवालय सदस्य पद्मा पौडेलको प्रमुख आतिथ्यतामा कार्यक्रम भएको हो ।
कार्यक्रममा नेकपा एमाले जिल्ला सदस्यहरु दल बहादुर वाईवा,कृष्ण चौलागाई, सुस्मिता घोरासैनी,अनेमसंघ बागमती प्रदेश सदस्यहरु सिता खनाल,लक्ष्मी चौलागाई,अनेमसंघ मकवानपुरको अध्यक्ष सुमित्रा काफ्ले,बकैया-७ का वडा अध्यक्ष रामकाजी लामिछाने,युवा संघ बकैया संयोजक विजय वाईवा लगाएतको उपस्थिति रहेको थियो ।
कार्यक्रममा हिन्दु महिलाहरूकाे पर्व हरितालिका तीज विषेश शुभकामना आदनप्रदान गरिएको थियो । कार्यक्रममा करिब ५ सय महिलाहरुको सहभागिता रहेको थियो ।
पार्टी विभाजनपछि एमाले अध्यक्ष केपी शर्मा ओली र नेकपा (एकीकृत समाजवादी) का अध्यक्ष माधवकुमार नेपालले नेता–कार्यकर्ता आफूतिर तान्न होडबाजी गरिरहेका छन्। एमाले अध्यक्ष ओलीले १० बुँदे सहमति कार्यान्वयनमा लैजाने र पार्टी संगठनका खाली पदमा विगतमा नेपाल समूहमा लागेका तर हाल एमालेमै रहेका नेता–कार्यकर्तालाई स्थान दिने बताइरहेका छन् भने नेपालले एमालेमा रहँदा अन्यायमात्रै हुने भएकाले नवगठित नेकपा एस मा आउन आग्रह गरिरहेका छन्।
ओलीले केन्द्रीय समितिमा रिक्त ५५ सदस्यमा तत्कालीन वरिष्ठ नेता नेपाल पक्षका नेताहरूमध्येबाटै राख्ने भएका छन्। २०७५ जेठ २ अघिको २०३ सदस्यीय केन्द्रीय कमिटीका ५५ जना नेकपा एस मा लागेपछि ती पद रिक्त भएका हुन्। खाली स्थानमा विगतमा नेपाल खेमामा रहेका नेताहरूलाई मनोनयन गरिने भएपछि धेरै नेता नेकपा एस मा नजाने आकलन गरिएको छ। रिक्त ५५ केन्द्रीय सदस्यको सिफारिस नेपाललाई छाडेर एमालेमा रहेका १० स्थायी कमिटी सदस्यले गर्नेछन्। ‘पार्टीमा आएको समस्या हल गर्ने सम्बन्धमा सबै नेता लागेका छन्, समस्या हुँदैन। अहिलेको अवस्थामा रिक्त पदमा कसरी मनोनयन गर्ने भन्ने सम्बन्धमा छलफल जारी छ’, एमाले स्रोतले भन्यो।
केन्द्रीय समितिमा ५५ सदस्य सिफारिस गर्ने जिम्मेवारी उपाध्यक्ष भीम रावल र स्थायी कमिटी सदस्य सुरेन्द्र पाण्डेले पाएका छन्। उनीहरूले देशभरका नेता–कार्यकर्तासँग छलफलपछि सिफारिस गर्ने भएका छन्। एमाले कार्यालय सचिव शेरबहादुर तामाङका अनुसार रिक्त सदस्य र १० बुँदे सहमतिअनुसार केन्द्रीय कमिटीमा मनोनयन गरिने १० प्रतिशत सदस्यको टुंगो विधान अधिवेशनअघि नै लगाइनेछ। ‘प्रक्रिया अघि बढिसकेको छ, केही दिनमै टुंगो लाग्छ’, तामाङले भने, ‘विधान अधिवेशनअघि रिक्त ५५ र मनोनयनमा पर्ने २० पदमा गरी ७५ जनालाई केन्द्रीय कमिटीमा मनोनयन गर्ने तयारी छ।’ उनका अनुसार निर्वाचन आयोगले दल रोज्न दिएको समय सकिएपछि मनोनयनले पूर्णता पाउनेछ।
एमाले सम्बद्ध अर्को स्रोतका अनुसार नेकपा एस तिर नेता–कार्यकर्ता नजाऊन् भन्नका लागि अहिलेसम्म सबैलाई सम्पर्क गरेर पार्टीमा उचित जिम्मेवारी दिने तयारी थालिएको छ। नेकपा एस का अध्यक्ष नेपालले पनि एमालेमा छँदा आफू निकट नेतालाई नयाँ पार्टीमा आउन र जिम्मेवारी सुनिश्चित गर्ने वचन दिएका छन्।
उनले अहिलेको सत्ता गठबन्धन निर्वाचनसम्म नै कायम रहने भएकाले नेकपा एस मा आउने नेतालाई निर्वाचनमा जिताउने आश्वासनसमेत दिएको स्रोतको दाबी छ। प्रदेशसभाका सदस्यहरूले नेकपा एस रोज्ने क्रम जारी छ। स्थानीय तहमा भने कति प्रतिनिधिले पार्टी परिवर्तन गरे भन्ने कुनै तथ्यांक आइसकेको छैन। बिहीबारसम्म गण्डकीबाहेक ६ वटा प्रदेशका ४७ जना सांसदले नेकपा एस रोजेका छन्। सबैभन्दा बढी वाग्मती प्रदेशमा १२ सांसदले नेकपा एस रोजेका छन्। वाग्मती प्रदेशसभामा एमालेका ५६ सांसदमध्ये १२ जना नेकपा एस मा लागेका छन्। प्रदेश २ मा शत्रुधन महतोसहितका ११ सांसदले नेपाल नेतृत्वको नेकपा एस रोजेका छन्।
सुदूरपश्चिम प्रदेशसभामा एमालेका २४ सांसद निर्वाचित थिए। तीमध्ये १० जना नेकपा एस मा लागेका छन्। प्रदेश १ का पनि १० सांसद नेकपा एस मा गएका छन्। कर्णाली प्रदेशका तीनजना नेकपा एसमा गएका छन्। कर्णाली प्रदेशमा एमालेका २० सांसद निर्वाचित थिए। लुम्बिनी प्रदेशमा भने एमालेकी एक महिला सांसदले मात्रै नेकपा एस रोजेकी छन्। उपसभामुख रमा घर्तीमगर नेकपा एसमा प्रवेश गरेकी हुन्।
नेकपा एसले प्रदेशबाट अन्य सांसद पनि आफूतिर आउने दाबी गरेको छ। उसले स्थानीय तहमा निर्वाचित धेरैजसो प्रतिनिधि र नेता–कार्यकर्ता पनि आफूतिर आउने दाबी लिएको छ। नेकपा एस हाइकमान्डका सदस्य वेदुराम भुसालले भने, ‘२२ गतेपछि हाम्रो पार्टीमा धेरै जनप्रतिनिधि र नेता–कार्यकर्ता आउनेछन्। एमाले उच्च तहका नेताहरू पनि हाम्रो पार्टीमा प्रवेश गर्नेछन्।’
अहिले दुवै पार्टीको ध्यान स्थानीय तहका जनप्रतिनिधितर्फ मोडिएको छ। निर्वाचन आयोगले दल छान्न दिएको २१ दिनको समय सकिन लाग्दा जिल्ला तहमा रहेका नेता–कार्यकर्ता र जनप्रतिनिधिलाई फकाउन दुवैतिरका केन्द्रीय नेता परिचालित छन्। ओलीले पार्टीबाट नेता–कार्यकर्ता र जनप्रतिनिधिलाई नेकपा एसमा जानबाट रोक्न र नेपालले एमालेबाट आफूतिर तान्न केन्द्रीय नेतालाई परिचालन गरेका हुन्।
एमालेले स्थानीय तहमा दुई महानगरपालिका, ७ उपमहानगरपालिकासहित १२३ नगरपालिकामा प्रमुख जितेको छ। त्यस्तै, उसले १७१ गाउँपालिकामा अध्यक्ष जितेको छ। एमालेले ७५३ स्थानीय तहमध्ये ३३१ ठाउँमा उपाध्यक्ष जितेको छ। उसले २५६० वडामा अध्यक्ष जितेको छ। nagariknews.nagariknetwork.com बाट साभार