मकवानपुर । बागमती प्रदेशकाे राजधानी हेटाैडामा मुख्यमन्त्री राजेन्द्र प्रसाद पाण्डेकाे राजिनामा मागिएकाे छ । अखिल नेपाल किसान महासंघ बागमती प्रदेश कमिटीले मुख्यमन्त्री पाण्डेको राजिनामा माग गरेकाे हाे ।
नेकपा एमाले निकट महासंघले मगलबार प्रदेश सरकारलाई ज्ञापन पत्र प्रस्तुत तथा विरोध कार्यक्रम गर्दै मुख्यमन्त्री पाण्डेकाे राजिनामा मागेकाे हाे । मंगलबार हेटौडास्थित मुख्यमन्त्री तथा मन्त्रिपरिषद् कार्यालय अगाडी विरोध प्रर्दशन गर्दै सहभागीहरुले मुख्यमन्त्री कार्यालयको गेटमा धर्ना समेत दिएका थिए । महासंघले प्रदेश सरकारले किसानलाई समयमा मल उपलब्ध गराउन नसकेको भन्दै मुख्यमन्त्रीकाे राजिनामा माग गरेको हो ।
अखिल नेपाल किसान महासंघ बागमती प्रदेश कमिटीका संयोजक सुरेन्द्र मोहन शर्माले अहिले किसानलाई मल आवश्यक पर्ने समयमा मल उपलब्ध नहुनु प्रदेश सरकारको कमजोरी रहेको बताए । धानबाली र मकैलाई मल चाहिने समय अहिले भए पनि प्रदेश सरकारले किसानलाई मल उपलब्ध गराउन नसकेको आराेप लगाउँदै मुख्यमन्त्रीकाे राजिनामा मागिएकाे उनले बताए । उनले किसानलाई मल समेत सयममा उपलब्ध गराउन नसक्ने प्रदेश सरकार मुख्यमन्त्रीले राजिनामा दिनुपर्ने बताए । बिरोध प्रर्दशनमा सहभागीहरुले ‘किसानलाई तुरन्त मल उपलब्ध गर’, ‘किसानलाई मल उपलब्ध गराउन नसक्ने प्रदेश सरकार मुर्दावाद’, ‘मुख्यमन्त्री राजिनामा दे’, ‘किसान परिचय पत्र लागु गर’, ‘सबै किसान एक हौँ’ नारा लगाएका थिए ।
किसान महासंघले प्रदेश सरकारलाई मल उपलब्ध गराउन ध्यानाकर्षण पत्र बुझाएको छ । मुख्यमन्त्रीको उपस्थिति नभएकाले प्रदेश सरकारका निमित्त सचिव यमलाल भुषालले ज्ञापनपत्र बुझेका हुन् । ज्ञापन पत्र प्रस्तुत तथा विरोध कार्यक्रममा किसान महासंघका केन्द्रीय सदस्य शम्भु सुवेदी, बिनोद पौडेल, प्रदेश सचिव अरुण कुमार र किसान महासंघका पदाधिकारीहरुको उपस्थिति रहेको थियो ।
मकवानपुर । हेटाैडा उपमहानगरपालिका वडा नम्बर १६ हटिया स्थित जनप्रिय माध्यामिक विद्यालयमा गणित विषयकाे प्रयाेगशाला स्थापना भएकाे छ । जिल्लाकै पहिलो नमूना विद्यालय जनप्रियमा गणित विषय शिक्षणका लागि प्रयाेगशालाकाे मंगलबार उद्घाटन गरिएकाे हाे ।
विद्यालयका गणित विषय विभागका शिक्षक तथा विद्यार्थीहरुकाे सक्रियतामा निर्माण गरिएको ल्यावको हेटौंडा १६ का वडा अध्यक्ष रामकृष्ण कोईरालाले उद्घाटन गरेका हुन् ।
गणित विषय दैनिक जीवनसंग प्रत्यक्ष जोडिएको विषय हुँदाहुँदै पनि त्यसको मूर्त धारणा बसाउन प्रयाेगशालाकाे अभावमा बालबालिकाले कठीनाई महशुस गर्ने गरेकाेले गणित ल्याव स्थापना गरिएकाे गणित विषय विभागका संयाेजक भूपेन्द्र चौलागाईले बताए । ल्यावको निर्माण र प्रयोगपछि जस्तासुकै अमूर्त विषयलाई पनि गर्दै र सिक्दै पद्दती एवम् अभ्यासबाट सुत्रतर्फ लैजान सकिने चौलागाईले बताए । ल्यावको प्रयोगबाट बालबालिकामा वैज्ञानिक सोचतर्फ उन्मूख गराउन खास धारणा निर्माण गर्न सकिने पनि उनले बताए ।
छोटो समयमा गणित प्रयाेगशाला निर्माण गरिएकाले यस्को अझै विस्तार गरिने र विद्यालयले बालबालिकाको पठनपाठनमा आवश्यक कुनैपनि सामग्री अपुग हुन नदिने प्रधानाध्यापक नमराज अर्यालले बताए । गणित प्रयोगशाला निर्माण कार्यबाट भाइबहिनीहरूमा रचनात्मक क्षमताको विकास हुने र आउँदा दिनहरूमा अंग्रेजी तथा सामाजिक प्रयोगशालाहरूलाई पनि व्यवस्थित गर्दै अगाडी बढ्ने अर्यालले बताए ।
हेटौंडा १६ का वडा अध्यक्ष कोईरालाको प्रमुख आतिथ्यता एवम् विद्यालय व्यवस्थापन समितिका सदस्य कृष्ण प्रसाद पनेरुको अध्यक्षतामा भएको उद्घाटन समारोहमा कोईरालाले जनप्रिय मावि यस्ताखाले गतिविधीले गर्दा पनि नमूना बन्न सफल रहेको बताए । आगामी दिनमा पनि विगत जस्तै स्थानीय सरकारका तर्फबाट होस् वा ब्यक्तिगत तर्फबाट जुनसुकै सहयोग गर्न तयार रहेको उनले बताए ।
विद्यालयले सिर्जनात्मक क्रियाकलापमार्फत् अध्यापन कार्य गर्न गराउनु समेत उनले आग्रह गरेका छन् । उनले शिक्षक विद्यार्थिको यो उत्साहजनक कार्यका लागि गणित विषय ल्यावको कोषमा रहनेगरि ब्यक्तिगत रुपमा १० हजार रकम समेत कार्यक्रममा सिनियर म्याथ क्लवकी संयोजक सलिना गुर्मछानलाई हस्तान्तरण गरेका छन् । यसैगरी व्यवस्थापन समिति सदस्य कृष्ण पनेरुले पनि ब्यक्तिगत रुपमा रु ५ हजार रकम ल्याव कोषमा रहनेगरी हस्तान्तरण गरेका हुन् ।
कार्यक्रममा कक्षा १० की छात्रा द्वय स्नेहा दाहाल र सुरक्षा घिमिरेले गणित विषय सम्वद्ध सामग्रीको नमूना प्रस्तुती समेत गरेका थिए । कक्षा १० मा अध्ययनरत छात्र नविन श्रेष्ठले स्वागत गरेको कार्यक्रमलाई छात्राकृतिका बरालले सहजिकरण गरेको कार्यक्रममा रोटरी क्लव मकवानपुरका अध्यक्ष रामप्रसाद शर्मा शिक्षक अभिभावक संघ का सदस्य बुद्धप्रसाद दाहाल प्रधानाध्यापक अर्याल, सहायक प्रअ रामआशिष मण्डल, समाजसेवी धीरज कार्की, हटिया जनप्रिय बहुमुखी क्याम्पसका क्याम्पस प्रमुख विजय नेपाल, शिक्षकहरु लक्ष्मी श्रेष्ठ, रविन श्रेष्ठ, कल्याणकृष्ण प्याकुर्याल, सम्प्रस पौडेल, उमा श्रेष्ठ, अभिनन्द सुब्बा,युक्तलाल विश्वकर्मा, सुनिल गौतमलगायतको उपस्थिती रहेको थियो ।
मकवानपुर । जिल्ला समन्वय समिति (जिसस) मकवानपुरको निर्वाचनका लागि उम्मेदवारले साेमबार मनोनयन दर्ता भएको छ । यस अघी प्रकाशित जिसस निर्वाचन तालिका अनुसार सोमबार हेटौंडा २ मा रहेकाे मुख्य निर्वाचन अधिकृतको कार्यालयमा प्रमुख, उपप्रमुख र सदस्य पदका लागि १२ जनाले उम्मेदवारी मनोनयन दर्ता गराएका हुन् ।
९ सदस्यीय जिल्ला समन्वय समितिमा प्रमुख तथा उप- प्रमुख र ७ जना सदस्य रहने प्रावधान रहेको छ । प्रमुख पदमा सत्तारुढ गठबन्धनको तर्फबाट नेकपा माओवादी केन्द्रका ललितबहादुर घलानले मनोनयन दर्ता गराएका छन् । घलान स्थानीय तह सदस्य निर्वाचन, २०७९ बाट हेटौंडा उपमहानगरपालिका वडा नम्बर १२ को वडा अध्यक्ष निर्वाचित भएका थिए । त्यस्तै प्रमुख पदमा नेकपा एमालेबाट इन्द्रसरोवर गाउँपालिकाका बुद्धिराम डिम्डुङले मनोनयन गराएका छन् । डिम्डुङ स्थानीय तह सदस्य निर्वाचन, २०७९ बाट इन्द्रसराेवर ३ काे वडा सदस्यमा निर्वाचित भएका हुन् ।
उप–प्रमुख पदमा भने गठबन्धनको तर्फका नेपाली कांग्रेसबाट मनहरी गाउँपालिकाका सानुकाजी लुइँटेलले मनोनयन गराएका छन् । सो पदमा उनले मात्रै मनोनयन गराएको मुख्य निर्वाचन अधिकृतको कार्यालयले जनाएको छ । लुइँटेल स्थानीय तह सदस्य निर्वाचन, २०७९ बाट मनहरी गाउँपालिका ३ काे वडा सदस्यमा निर्वाचित भएका थिए ।
त्यस्तै जिसस सदस्यमा ३ जना महिला रहने प्रावधान भएकाेमा ४ जनाले मनोनयन दर्ता गराए छन् । उक्त पदका लागि निर्वाचन हुने भएको छ । महिला सदस्य पदमा नेपाली कांग्रेसबाट क्रमशः तारा ढुंगाना, विष्णुमाया थपलिया, सुमित्रा थिङ र नेकपा एमालेकी बिनाकुमारी थिङ लामाले उम्मेदवारी दिएका हुन् ।
त्यस्तै दलित तथा अल्पसंख्यक सदस्यतर्फ नेकपा एकीकृत समाजवादीबाट सुनिता दर्नाल परियारले मात्रै उम्मेदवारी दर्ता गराएकी छिन् । अन्य खुल्ला सदस्यहरुमा नेकपा एकीकृत समाजवादीबाट विरेन्द्र कुमार लामा, नेकपा माओवादी केन्द्रका सुवर्ण गोपाली माओवादीकै खड्गबहादुर पुलामी र एमालेका तोयानाथ तिमल्सिनाले उम्मेदवारी दिएका हुन् । खुल्ला सदस्य ३ जना हुने व्यवस्था भएपनि ४ जनाको उम्मेदवारी परेकोले सो पदमा पनि निर्वाचन हुने भएको हो ।
भोलि ३१ गते मनोनयन दर्ता गराएका उम्मेदवारमाथि दावी विरोधको समय रहेको मुख्य निर्वाचन अधिकृत डिल्लिरत्न श्रेष्ठले जानकारी दिए । उनका अनुसार भोलि नै मनोनयन पत्रको जाँच र उजुरी परेमा त्यसउपर निर्णय गरिने, उम्मेदवारको नामावली प्रकाशन गर्ने, कसैले उम्मेदवारी फिर्ता लिन चाहेमा लिन सकिने र नलिएको अवस्थामा अन्तिम नामावली प्रकाशन हुनेछ । असार १ गते उम्मेदवारहरुलाई निर्वाचन चिन्ह प्रदान गरिने र २ गते मतदान हुने कार्यसूचि रहेको जनाइएको छ ।
मकवानपुरमा १ उपमहानगरपालिका, १ नगरापलिका र ८ वटा गाउँपालिका रहेका छन् । कानून अनुसार सबै पालिकाको प्रमुख र उपप्रमुख गरी कूल २० जनाले जिससको लागि मतदान गर्न पाउनेछन् । स्थानीय तह सदस्य निर्वाचन,२०७९ बाट निर्वाचित जनप्रतिनिधिहरु मध्ये पालिका प्रमुख र उप प्रमुखमा कांग्रेसको ९, माओवादी केन्द्रको ७, नेकपा एमालेको ३ र एकीकृत समाजवादीको १ जना मतदाता रहेका छन् ।
मकवानपुर । हेटौंडामा भइरहेकाे चौथो संस्करणको स्थानीय तह सहिद स्मृति मकवानपुर गोल्डकप प्रतियोगिताको फाइनल खेल जेठ ३० गते साेमबार हुँदैछ । प्रतियोगिताको उपाधी लागि घरेलु टोली विजय युथ क्लब हेटाैडा र विभागीय टाेली नेपाल आर्मी क्लब भिड्दै छन् ।
यस अघिको तेस्रो संस्करणको मकवानपुर गोल्डकपमा पनि आर्मी र विजय युथ बीच नै फाइनल भिडन्त भएको थियो । फाइनलमा आर्मी विजेता बनेको थियो भने विजय युथ उपविजेता बनेको थियो । हेटौंडा–५ स्थित पिप्ले क्याम्पा रंगशालामा हुने दुई टोली बीचको खेल दिउँसो ३ बजेर ३० मिनेटमा हुनेछ । विजय युथ क्लब समुह ‘ए’ को टोली विजेता बन्दै फाइनल प्रवेश गरेको हो । आर्मी समुह ‘बी’ को टोली विजेता बन्दै फाइनल प्रवेश गरेको छ। विजय युथले नव जनजागृती युवा क्लब सिमरा र नेपाल पुलिस क्लबलाई पराजित गरेको थियो । यस्तै आर्मीले नेपाल एपिएफ र क्यामरुनी टोली एभिनियर एफसीलाई पराजित गर्दै फाइनल प्रवेश गरेको हो ।
प्रतियोगितामा प्रथम हुने टिमले नगद १५ लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले नगद १० लाख रुपैयाँ प्राप्त गर्नेछन् । यस्तै विधागत उत्कृष्ट खेलाडीले नगद २५–२५ हजार रुपैयाँ प्राप्त गर्नेछन् भने सर्बोकृष्ट खेलाडीले रोयल इनफिल्ड बाइक प्राप्त गर्नेछ ।
आइतबार जेठ २९ गते भएकाे प्री म्याच कन्फ्रेन्समा प्रतियोगिताको उपाधी हात पार्ने योजनासहित आफ्नो टिम मैदान उत्रने नेपाल आर्मीका प्रशिक्षक नवीन न्यौपानेले दाबी गरेका छन् । ‘घरेलु टोलीसँग खेल्न पाउँदा धेरै खुशी लागेको छ’ न्याैपानेले भने ‘घरेलु टोलीको दर्शकको मन जितेर उपाधी हात पार्छाै ।’ उनले फाइनल खेलमा आफ्नो टिममा नयाँ खेलाडी थप नहुने जानकारी दिए ।
आर्मीका कप्तान भरत खवासले फाइनलसम्म पुग्दा खुशी लागेको र फाइनल खेलका लागि पुरा तयारी रहेको बताए । घरेलु टोलीसँग खेल्दा केही असहज हुने र घरेलु टोलीलाई नै सर्मथन, हौसला मिल्ने उनको भनाई छ । कप्तान खवासले घरेलु दर्शकलाई मैदान आएर मनपर्ने टिमलाई हौसला प्रदान गरेर माया गरिदिन आग्रह समेत गरेका छन् ।
यस्तै विजय युथ क्लबका कप्तान अशोक बरालले उपाधी जित्ने गरी खेल्ने बताए । आफुहरु भन्दा सिनियर टिमले भरिएको आर्मीसँग खेल्न भने केही असहज हुने उनले बताए । राम्रै मिहेनत गरेर फाइनल पुगेको र फाइनलसम्म पुग्नु पनि ठुलो उपलब्धी हाे तर पनि फाइनल खेल जित्ने लक्ष्यका साथ मैदानमा उत्रन्छाैं बराल भने ।
चौथौं मकवानपुर गोल्डकपको संयोजक प्रताब विष्टको सभाध्यक्षतामा भएको प्री म्याच कन्प्रेन्समा जिल्ला खेलकुद विकास समितिका कार्यालय प्रमुख राजन दाहाल लगायत जिल्ला फुटबल संघका पदाधिकारीहरुको आतिथ्यता रहेको थियो ।
मकवानपुर । हेटौंडा उपमहानगरपालिकाका १९ वटै वडामा पुस्तकालय स्थापना गर्न आगामी आर्थिक वर्षमा बजेट विनियोजन गरिने भएको छ । पुस्तकालय अभियान समूह मकवानपुरले अभियानको प्रथम वार्षिकोत्सवको अवसरमा आइतबार उपमहानगरपालिकाकै सभाहलमा आयोजना गरेको कार्यक्रममा सहभागी नगर प्रमुख मीना कुमारी लामा, उपप्रमुख राजेश बानियाँसहित वडा अध्यक्षहरुले पुस्तकालय स्थापनाका लागि बजेट विनियोजन गर्न सहमति जनाएका हुन् ।
पुस्तकालय अभियान समूहले पुस्तकालय स्थापनाका लागि सञ्चालित अभियानको विषयमा जानकारी गराउँदै नगर प्रमुख र उपप्रमुखलाई अनुरोध पत्र समेत बुझाएको छ । पुस्तकालय अभियान समूहका सदस्य निमेष निखिल र प्रतिमा श्रेष्ठले नगर प्रमुख र उपप्रमुखलाई अनुरोधपत्र बुझाएको हो । पुस्तकालय अभियान समूहका सदस्य सुरेश श्रेष्ठले अभियानका बारेमा जानकारी गराएका थिए । सचेत र जागरुक नागरिक समाज निर्माणका लागि पुस्तकालयको आवश्यकता महसुस गरी अभियान नै सञ्चालन गरिएको र अब स्थानीय सरकारले पुस्तकालय अभियानको विस्तार र विकासमा ध्यान दिनुपर्ने श्रेष्ठले बताए । स्थानीय सरकारले पुस्तकालय स्थापना, सञ्चालन तथा व्यवस्थापनसम्बन्धी कानुन नै बनाएर कार्यान्वयन गर्नुपर्नेमा उनले सुझाव समेत दिएका छन् ।
अनुरोधपत्र बुझेपछि नगरप्रमुख मीना कुमारी लामाले पुस्तकालय स्थापना र सञ्चालनका लागि नागरिकस्तरबाट आएको प्रस्ताव महत्वपूर्ण रहेको बताउँदै पुस्तकालय स्थापनाको योजनालाई आगामी आर्थिक वर्षको बजेटमा समावेश गरेर कार्यान्वयन गरिने बताइन् । पुस्तकालय सञ्चालन र व्यवस्थापन गर्नु जटिल विषय भएको औँल्याउनुहुँदै नगरप्रमुख लामाले पुस्तकालय अभियान समूहसँगको सहकार्य र समन्वयमा नगरका सबै वडामा पुस्तकालय स्थापना गरिने प्रतिवद्धता व्यक्त गरिन् ।
नगर उपप्रमुख राजेश बानियाँले सभ्य समाज निर्माणका लागि पठन संस्कृतिको विकास गर्नुपर्ने उल्लेख गर्नुहुँदै इतिहास जान्न पढ्नुको विकल्प नभएको र पढ्नका लागि पुस्तकालय आवश्यक भएको बताए । बानियाँले हाम्रो समाजमा अध्ययन संस्कृति नभएको स्वीकार गरदै धन भए ज्ञान चाहिँदैन भन्नेको बाहुल्य भएको समाजमा अब परिवर्तन जरुरी रहेको बताए । वडा अध्यक्षहरुको तर्फबाट १ नम्बर वडा अध्यक्ष सविन न्यौपानेले सकारात्मक सोँचको विकास गर्न पुस्तकालय आवश्यक भएको बताए । उनले हरेक वडाले पुस्तकालय स्थापना, सञ्चालन र व्यवस्थापनमा सहयोग गर्ने बताए ।
एक वर्षको अवधिमा पुस्तकालय अभियान समूह मकवानपुरले जिल्लामा १२ वटा तथा बारा र रौहतटमा एक/एक वटा गरी कुल १४ वटा पुस्तकालय स्थापना गरिसकेको छ । आगामी दिनमा पनि पुस्तकालय स्थापना गरी पठन संस्कृतिको विकास गरिने पुस्तकालय अभियान समूहका सदस्य सुशील राज गिरीले जानकारी दिए । पुस्तकालय अभियान समूहले २०७८ साल जेठ २९ गते पहिलो पुस्तकालय स्थापना गरेको एक वर्ष पूरा भएको दिन मकवानपुरको भीमफेदी गाउँपालिका र मनहरी गाउँपालिकामा अभियानअन्तर्गत नै स्थापित पुस्तकालयहरुले पनि स्थानीय सरकारसँग पुस्तकालय स्थापना, सञ्चालन र व्यवस्थापन सम्बन्धमा छलफल गरेको छ ।
