मकवानपुर । मंसिर ४ को चुनावमा मकवानपुर जिल्लामा ३ लाख ७ सय ३३ जनाले मतदान गर्ने भएका छन । मकवानपुर जिल्लामा २ प्रतिनिधी सभा क्षेत्र र ४ प्रदेश सभा क्षेत्र निर्वाचनमा ३ लाख ७ सय ३३ जना मतदाताले मतदान गर्ने भएका हुन् ।
६२ वटा मतदान स्थलमा १ सय ७२ वटा मतदान केन्द्र रहेकाे मकवानपुर क्षेत्र नम्बर–१ मा १ लाख ५० हजार १ सय ५५ जना मतदान गर्ने छन् । जस मध्यमा पुरुष मतदाता ७४ हजार ९ सय ३० जना रहेका छन् । यस क्षेत्रमा महिला मतदाता ७५ हजार २ सय २१ जना रहेका छन् । यस क्षेत्रमा अन्य ४ जना मतदाता रहेका छन् ।
क्षेत्र नम्बर १ मा १४ वटा राजनीतिक दलका १४ जना उम्मेदवार र २ जना स्वतन्त्र गरी कुल १६ जना उम्मेदवार रहेका छन् । जसमा १ जना महिला र १५ जना पुरुष उम्मेदवार रहेका छन् । निर्वाचन आयाेगका अनुसार उम्मेदवार मध्ये आदीवासी जनजाती ४३.७५ प्रतिशत र खसआर्य ५६.२५ प्रतिशत रहेकाे छ ।
१ सय ५ वटा मतदान स्थलमा १ सय ९२ वटा मतदान केन्द्र मकवानपुर क्षेत्र नम्बर–२ मा १ लाख ५० हजार ५ सय ७८ जनाले मतदान गर्ने छन् । जस मध्यमा पुरुष ७८ हजार ५ सय ९८ जना रहेका छन् । यस क्षेत्रमा महिला मतदाता ७१ हजार ९ सय ७९ जना रहेका छन् । अन्य १ जना मतदाता छन् ।
यस क्षेत्रमा ९ वटा राजनीतिक दलका ९ जना उम्मेदवार रहेका छन् भने स्वतन्त्र १ जना गरी कुल १० जना उम्मेदवार बिचमा प्रतिस्पर्धा रहेको छ । आयाेगका अनुसार उम्मेदवार मध्ये आदीवासी जनजाती ३० प्रतिशत र खसआर्य ७० प्रतिशत रहेकाे छ ।

मकवानपुर क्षेत्र नम्बर १ को प्रदेश सभा क मा ७७ हजार ९ सय ८९ जनाले मतदान गर्ने छन् । जसमा पुरुष ४० हजार १ सय ११ जना तथा महिला ३७ हजार ८ सय ७७ जना रहेका छन् । अन्यमा १ जना रहेका छन् । मकवानपुर क्षेत्र नम्बर–१ को प्रदेश सभा ख ७२ हजार १ सय ६६ जनाले मतदानमा भाग लिने छन् । जसमा पुरुष ३४ हजार ८ सय १९ जना छन् । महिला ३७ हजार ३ सय ४४ जना रहेका छन् । अन्यमा ३ जना रहेका छन् । क्षेत्र नम्बर–१ को प्रदेशसभा क पुरुष मतदाता तथा प्रदेश ख मा महिला मतदाता बढी रहेका छन् ।
मकवानपुर क्षेत्र नम्बर–२ को प्रदेश सभा क मा ८३ हजार ९९ जनाले मतदान गर्दैछन् । यस क्षेत्रमा पुरुष ४२ हजार ८ सय ४३ जना छन् । महिला ४० हजार २ सय ५५ जना छन् । अन्यमा १ जना छन् । क्षेत्र नम्बर–२ को ख मा कुल मतदाता ६७ हजार ४ सय ७९ जना रहेका छन् । यस मध्यमा पुरुष ३५ हजार ७ सय ५५ जना छन् । महिला ३१ हजार ७ सय २४ जना रहेका छन् । क्षेत्र नम्बर–२ को दुवै प्रदेशसभा क्षेत्रमा पुरुष मतदाता बढी रहेका छन् ।
मकवानपुर । नेकपा एमाले मकवानपुर अध्यक्ष हुन् एकलाल श्रेष्ठ । पहिलाे चुनावी मैदानबाटै दाैड जित्ने तयारीमा रहेका उनी मङ्सिर ४ गते हुने प्रतिनिध सभा तथा प्रदेश सभा सदस्य निर्वाचनमा पहिलोपटक उम्मेदवार रहेका छन् । मकवानपुरकाे क्षेत्र नम्बर १ प्रदेश सभा ख का उम्मेदवार श्रेष्ठ जनप्रतिनिधि बन्न चुनावी प्रचार प्रसारकाे दाैडधुपमा छन् ।
२०४४ सालदेखि विधिवत रुपमा कम्युनिस्ट राजनीतिमा प्रवेश गरेका एकालाल श्रेष्ठ मकवानपुर तथा हेटौंडाबासीका लागि कुनै नौलो नाम हैन । बुवा भिमलाल श्रेष्ठ र आमा चन्द्रकुमारी श्रेष्ठको जेठाे छाेरा एकलालकाे जन्म २०२७ साल साउन १७ गते भएकाे हाे । एकालाल पूर्णलालिन राजनीति र समाजसेवामा समर्पित छन् । हेटौंडाको सिद्धार्थ माविमा कक्षा ८ मा पढ्दै गर्दा अखिल नेपाल राष्ट्रिय स्वतन्त्र विद्यार्थी युनियनको सदस्यता लिएर २०४४ सालबाट राजनीतिमा पाइला राखे ।
पञ्चायत कालमा राजनीति गर्न पक्कै पनि सहज थिएन तर पनि त्यो चुनौतीपूर्ण अवस्थाको सामना गर्दै उनी निरन्तर राजनीतिमा सकृय रहे । २०४५ सालमा अनेरास्ववियु जिल्ला कमिटी सदस्य क्रमशः सचिव, उपाध्यक्ष हुँदै २०५२ सालमा अनेरास्ववियुको जिल्ला कमिटी अध्यक्ष बन्न सफल भए । जिल्ला अध्यक्षको जिम्मेवारी पाउनु पनि निरन्तर विद्यार्थी राजनीतिमा उर्जाशिल भएर लागेको प्रतिफल रहेकाे उनी बताउँछन् । हेटौंडामा नै जन्मिएका एकालालले पछिल्लो समयमा देशमा भैरहेको धेरै राजनीतिक उथलपुथल नजिकबाट नियाल्ने अवसर पनि पाए । राजनितीलाई व्यवसाय हैन सेवा बनाउनुपर्छ भावना उनीमा विद्यार्थीकालदेखि नै जागृत थियो ।
निरंकुश निर्दलीय पञ्चायत विरुद्ध २०४६ सालमा भएको आन्दोलनमा श्रेष्ठले पनि सक्रीय भएर भाग लिएका थिए । उनीसँग हेटौंडामा हुने हरेक आन्दोलनमा अग्रपंक्तिकाे माेर्चा सम्हालेकाे अनुभव छ । विद्यार्थीको नेतृत्व गर्दै आन्दोलनमा लागिरहँदा उनले जेलजीवनको पनि सामना गर्नुपरेको थियो । यी यावत कुराहरु सम्झिदा जहिले पनि देश जोगाउनको लागि हरेक कुराको सामना गर्न सक्नुपर्छ भन्ने उर्जा प्राप्त हुने उनी बताउँछन् । अनेरास्ववियुको मकवानपुरको अध्यक्ष हुँदैगर्दा दुई कार्यकाल केन्द्रीय सदस्य, सचिवालय सदस्य समेत हुने मौका पाए । केन्द्रिय सचिवालय सदस्य भएपछि केन्द्रिय राजनीतिमा पनि उनको सम्पर्क बढ्दै गयो ।
एकलालसँगै त्यसबेला विद्यार्थी राजनीति सँगै गरेका ठाकुर गैरे, भानुभक्त ढकाल, शेरधन राई, विशाल भट्टराई, खिमलाल भट्टराई, योगेश भट्टराईहरु लगायतका नेताहरू एमालेकाे केन्द्रिय तहामा नै छन् । विभिन्न आरोह अवरोहलाई छिचोल्दै एकालाल अहिले नेकपा एमाले मकवानपुर जिल्ला कमिटी अध्यक्षको जिम्मेवारीमा छन् । तत्कालीन समयमा अनेरास्ववियुको मध्यमाञ्चल प्रमुख समेत भएर काम गरेका श्रेषठले २०४८ सालमा एमालेको पार्टी सङ्गठित सदस्यता प्राप्त गरी नेकपा एमालेको राजनीतिमा पाइला टेकेका हुन् ।
२०४९ सालमा तत्कालीन हेटौंडा नगरपालिका वडा नम्बर १ को नेकपा एमाले पार्टी कमिटीको पहिलो अध्यक्ष हुने सौभाग्य पनि उनकै नाममा छ । २०५० सालमा हेटौंडा नगर कमिटीको सदस्य हुदै २०६१ सालमा एमाले मकवानपुरको जिल्ला कमिटी सदस्य भएका थिए । पार्टी राजनीतिमा धैर्य र संयमता अपनाए अवसर आउँछ भन्ने उनको मनमा लागिरह्यो । २०६२–०६३ को मकवानपुरको आन्दोलनमा सक्रीय रुपमा सहभागि हुँदै गर्दा उनले ठाउँठाउँको आन्दोलनको नेतृत्व गरेका थिए ।
त्यसरी आन्दोलनको अगुवाइ गर्दा पटक–पटक सरकारले दमन गरी पक्राउ समेत गरेको थियो । निरन्तर नेकपा एमालेकै विभिन्न क्षेत्रमा सक्रीय एकालाल २०७२ सालमा नेकपा एमाले मकवानपुरको सचिव भए । नेकपा एमाले र नेकपा माओवादी केन्द्र मिलेर नेकपा बनेपछि भएका विभिन्न घटनाक्रमलाई नजिकबाट अवलोकन गरेका एकालाल पार्टीलाई सङ्कट परेको अवस्थामा नेतृत्व लिएर २०७७ साल पुस २५ गते पार्टीको अध्यक्ष बने । त्यसको एकवर्षपछि पुन २०७८ साल पुस २५ गते भएको नेकपा एमालेको जिल्ला अधिवेशनबाट एमाले मकवानपुरको अध्यक्षका रुपमा निर्वाचित भए एकलाल ।
यस्तै नेपाल बुद्धीचाल संघको केन्द्रिय कमिटीको विभिन्न जिम्मेवारीमा रही महासचिब हुँदै २०७२ चैत्र १३ गते केन्द्रीय अध्यक्षका रुपमा चयन भए । बुद्धिचाल खेलमा राम्रो अनुभव रहेका एकालालले नेपालमा पनि यो खेलको राम्रो आकर्षक छ भन्ने विदेशमा चिनाउने काम गरे । नेपालका बुद्धिचाल खेलका सन्दर्भमा नेपालका धेरै जिल्लाका साथै विभिन्न देशहरुमा समेत उनले नेपालको प्रतिनिधित्व गराउन सफल भएका छन् । एसियायी चेस महासङ्घको अध्यक्षको सल्लाहकार सन २०१८ देखि हालसम्म , विश्व बुद्धिचाल महासङ्घको बिकास आयोगको सदस्य सन् २०१५–२०१८ सम्म काम गरेर अन्तर्राष्ट्रिय खेलकुद क्षेत्रमा पनि आफ्नो अनुभव सङ्गालेका छन् ।
निर्माण ब्यवसायी महासङ्घ मकवानपुरको दुई कार्याकाल महासचिव, मकवानपुर उद्योग वाणिज्य सङ्घको सल्लाहकार भैसकेका छन् एकालाल । यस्तै मकवानपुरको पुस्तकालय स्थापना एबम सामुदायिक बनहरुको अभियानमा समेत उनी जोडीएका छन् । यस्तै राजनीतिक अभियान सँगै सहकारी अभियानमा पनि उनी जोडिएका छन् । सहकारी संस्थाहरुको विभिन्न भूमिकामा गाँसिएका एकालालमा आजसम्म कुनै दाग लागेको छैन । श्रीलंका, नर्बे, अजरबैजान, जर्जिया, युएइ, बंगलादेश र भारतलगायतका देशहरु भ्रमण गरेका उनले विदेशी नीति र विकालाई पनि नियाल्ने मौका पाएका छन् ।
लामो समय राजनीति र समाजसेवामा सक्रिय एकालालमा युवा जोश छ अनि जाँगर छ । जनप्रतिनिधिका लागि पहिलोपटक प्रतिस्पर्धामा उत्रिए पनि उनिसँग अन्य धेरै कुराको अनुभव छ । सामाजिक, आर्थिक र खेलकुद क्षेत्रमा जोडिएका उनमा केही नयाँ गर्ने उत्साह छ । यो उत्साहलाई कायम राख्न हामी हेटौंडाबासीको एकालाललाई अमुल्य साथ रहने विश्वासका साथ उनी मकवानपुर क्षेत्र नम्बर १ को (ख) बाट नेकपा एमालेको तर्फबाट प्रदेश सभा सदस्यको उम्मेदवार बनेकाे बताउँछन् ।

मकवानपुर । नेकपा (एकीकृत समाजवादी)का स्थायी समिति सदस्य बिराेध खतिवडाले संबिधानको रक्षा गर्न गठबन्धनको आवश्यकता रहेकाे बताएका छन् । मकवानपुर क्षेत्र नं. २ का प्रतिनिधि सभा सदस्य उम्मेदवार खतिवडा समानुपातिक, समाबेशीता, धर्म निरपेक्षता, संघीयता र गणतन्त्रलाई संस्थागत गरेको संविधानकाे रक्षा गर्न गठबन्धनकाे जीत आवश्यक रहेकाे बताएका छन् ।
मकवानपुरको थाहा नगरपालिकामा बाम लोकतान्त्रिक गठबन्धनको चुनावी सभामा संबिधानको र लोकतन्त्रको रक्षाको लागि गठबन्धनका उम्मेदवारलाई मतदान गर्न आग्रह गर्दै खतिवडाले गठबन्धन सरकार बनेपछि यस क्षेत्रको बिकासका लागि बजेटमै समेटेर काम गरिने बताए ।
मंगलबार भएको सभामा नेकपा (माओबादी केन्द्र)की पोलिटब्युरो सदस्य, मकवानपुर ईञ्चार्ज कुमारी मोक्तानले आफू प्रदेश सरकारमा रहँदा सरकारको तर्फबाट यस क्षेत्रमा बिकासका योजनाहरुले प्राथमिकता पाएकाे बताइन् । मकवानपुर २ प्रदेश सभा क उम्मेदवार मोक्तानले आफ्नो प्राथमिकतामा यस क्षेत्रको सडक, शिक्षा, स्वास्थ्य, खानेपानी लगायत रहेकाे बताइन् । आफ्नाे क्षेत्रकाे बिकासको लागि प्रतिबद्ध भएको बताउँदै उनले स्थायी र प्रभावकारी बिकास गर्नको लागि आफू लगायत गठबन्धनका उम्मेदवारलाई मतदान गरी बिजयी गराउन अनुरोध गरिन् ।
मकवानपुर । मकवानपुर प्रतिनिधिसभा क्षेत्र नम्वर २ प्रदेशसभा ख का उम्मेदवार ईन्द्रबहादुर बानियाँले गरिब, निमुखा जनताको पक्षमा काम गर्ने बताएका छन । लोकतान्त्रिक बाम गठबन्धनका उम्मेदवार बानियाँले गठबन्धनको सरकार बनेपछि गरिब निमुखा जनताको पक्षमा प्राथमिकता दिइने बताए ।
गठबन्धनले कैलाश गाउँपालिकामा आयोजना गरेको चुनावी सभालाई सम्बोधन गर्दै नेता बानियाँले गरिबमुखी, न्यायमुखी वातावरण सिर्जना गरी जनताको आधारभूत आवश्यकता पूरा गर्दै शिक्षा, स्वास्थ्य रोजगार, पूर्वाधार विकास, ग्रामिण विद्युतीकरण, खानेपानीलगायत जनहितका कामलाई प्राथमिकता दिइने बताए ।
उनले बागमती प्रदेशका गरिब निमुखा जनताको लागि ५ वर्षको अवधिमा १० हजार घर बनाएर हस्तान्तरण गरिने बताए । प्रदेशमा १० महिना गठबन्धनले सरकारको नेतृत्व गर्दा कैलाश गाउँपालिकाको पूर्वाधार विकासमा करोडौँ बजेट विनियोजन गरेको भन्दै आगामी दिनमा जनताको अवस्था सुधार गर्न गठबन्धनले सरकारको नेतृत्व गर्नुपर्ने बताए ।
एमालेले साढे ३ वर्ष सरकारको नेतृत्व गर्दा सो क्षेत्रको विकास निर्माणको कामलाई उपेक्षा गरेको भन्दै उनले अब जनताले एमालेलाई विश्वास नगर्ने बताए । जनताको त्याग तपस्या र बलिदानीबाट प्राप्त संघीय लोकतान्त्रिक गणतन्त्र र संविधानमाथि नै प्रहार गरेको भन्दै बानियाँले अबको निर्वाचनबाट जनताले प्रतिगमनकारीहरुलाई परास्त गर्ने बताए ।
गठबन्धनका कैलाश गाउँपालिका संयोजक तेजबहादुर ब्लोनको अध्यक्षतामा भएको कार्यक्रममा गठबन्धनका विभिन्न दलका नेताहरु ओमबहादुर घलान, गोविन्दराम चेपाङ, सन्त चेपाङ र सरु थापा, ललित बस्नेत, बालकुमार मल्ल, राजेन्द्र घिसिङ, टंकबहादुर मोक्तान, कांग्रेस नेता पदमबहादुर तितुङ, सीता पुलामी, लगायतको उपस्थिति रहेको थियो ।
मकवानपुर । मकवानपुर क्षेत्र नम्बर–२ मा एमालेका उम्मेदवार महेश कुमार बर्तौलाले युवालाई स्थानीयस्तरमै स्वरोजगारकाे अवसर दिलाउने बताएका छन् । युवाहरु सामान्य रोजगारीका लागि पनि खाडी मुलुक जाने गरिरहेकाेमा अब स्थानीयस्तरमै स्वरोजगार बनाउने उनले बताए ।
मंगलबार मकवानपुरको पश्चिमि क्षेत्रमा चुनावी सभालाई संबोधन गर्दै बर्ताैलाले ‘स्थानीय स्तरमा युवा लक्षित बिभिन्न स्वरोजगार मुलक कार्यक्रम ल्याएर रोजगारीको सृजना गरिने बताए । मकवानपुरकाे मनहरी, हाडीखोला, राक्सिराङ गाउँपालिकामा भएकाे चुनावी प्रचार प्रसारकाे क्रममा उनले स्थानीय स्तरमा रहेका शिक्षा, स्वास्थ्य, खानेपानी, बिजुलीलगायतकाे आधारभूत आवश्यककाे समस्या सधैको लागि समाधान गर्ने आश्वासन समेत दिएका छन् ।
यसैगरी मनहरी गाउँपालिका क्षेत्रमा निकुञ्ज तथा नदीकाे समस्या कानून संशोधन गरेर सधैका लागि हल गर्ने बताए । यस क्षेत्रमा सडक पूर्वाधारको समस्याका कारण सदरमुकाम आउन र जानका लागि समस्या हुन नदिने उनले दावी गरे ।