सुमित्रा सुमी
तिमी निसास्सिएर,
सिकार खोसिएको बाघले झैँ झम्टन्छौ,
आफ्ना क्रुर पन्जाले मलाई चिथोर्छौ,
मेरो मुलायम छाती गिद्धले झैँ लुछ्छौ ,
लाखेका झैँ डरलाग्दो आँखाले हेर्छौ ,
सजिलै मेरो भावानाको निर्मम हत्या गर्छौ,
आफ्नो मनको सारा भोक मेट्छौ,
अनि
निर्विवेक मेरै निर्दोष मुटुमा
लात बजार्दै फर्कन्छौ ,
बस् …..
यत्ती सहनकै लागि,
म स्वास्नी बन्न सक्दिन ।
ज्यूँदो भएर पनि मैले
ज्यूँदो हुनुको पराकाष्ठा त्याग्नुपर्छ,
आफैँलाई तिलान्जली दिएर बाँच्नुपर्छ,
तिमीलाई निर्विरोध जवानी पिलाएर,
हरपल मैले आँसुले तीर्खा मेट्नुपर्छ ,
यदि यस्तै-यस्तै नियत स्वीकार गर्दै,
तिम्रो आरामदायी बिछ्याउना मात्र
बनिदिनुपर्ने हो भने …..
भयो,
म स्वास्नी बन्न सक्दिन ।
शब्दकोषमा स्वास्नीको अर्थ सुवासिनी लेखिएजस्तै,
प्रेमले बोलिने प्रेमिका र शास्त्रमा मानिने अर्धाङ्गिनीजस्तै,
जिवनको आवश्यकता जीवनसाथी,
तर..
जो साथै भएकाबाट पनि
पाउनुपर्ने सहारा मिल्दैन भने,
भो महासय,
तिम्रो कामुकता मेटाउन मात्र …
म स्वास्नी बन्न सक्दिन ।
हर कोही नारीको जिन्दगी तयारी चाउचाउ होइन
भोक लागेको बेला काँचै खान,
र होईन पनि बाँदरको सिरानी ….
निद पुर्याएर च्यात्ने फाल्ने ,
त्यसैले त ,
मलाई स्वयं म हुनुको अर्थ खोज्नुछ ,
भयो अब
खोक्रो तिम्रो देखावटी रक्षाशास्त्र आफैंसँगै राख ,
जर्जर समाजको सामन्ती बकपत्र सुन्नुछैन मलाई ,
निदाउनकै लागि स्लीपिङ ट्याब्लेट खानुपनि छैन,
मलाई त केबल,
निर्दयी मान्छेका बन्द आँखा खोलेर,
अन्धो धृतराष्ट्रलाई,
नारीभित्रकी आमा, प्रीया, छोरी चिनाउनु छ,
प्रेम, आफ्नोपन र मानवीयता पढाउनुछ ,
त्यसैले ….
माफ गर प्रीय
म कोही कसैको भोक र मृगतृष्णा मेटाउन मात्र
स्वास्नी बन्न सक्दिन ,
जरुर, म स्वास्नी बन्न सक्दिन।
नुवाकोट
मकवानपुर । मकवानपुरका प्रगतिशील नेता एवम् थाहा आन्दाेलनका प्रणेता स्वर्गिय रुपचन्द्र बिष्टको देखाएकाे बाटाेमा आफू हिड्न तयार रहेकाे संघीय सांसद महेश कुमार बर्ताैलाले बताएका छन् । जनताका कुरा संसदमा पुर्याउने र संसदका नीतिका विषयमा जनतालाई जानकारी गराउने रुपचन्द्रको ब्यवहार आफूले समेत आत्मसात गर्ने उनले बताए ।
नेकपा एमालेबाट मकवानपुरकाे प्रतिनिधि सभा क्षेत्र नम्बर २ मा निर्वाचित बर्ताैलाले थाहानगरपालिकाका मतदातालाई धन्यवाद सहित तथा सुझाव संकलन सुरु गर्नु अघी विष्टकाे शालिकमा माल्यार्पण गरेका थिए । धन्यवाद ज्ञापनकाे सुरुवातमा रुपचन्द्रका छोरा रणसंग्राम बिष्टले भावुक हुँदै बुबाले देखाएको बाटोतर्फ लाग्न बर्तौलालाई सुझाब दिएका छन् । जनताबाट संसद र संसदबाट जनतालाई जगाउँदै जानकारी गराउने रुपचन्द्रको ब्यवहार भएकाले सांसद महेशबाट त्यस्तै अपेक्षा गरिएकाे रणसंग्रामले सुझाब दिएका छन् ।
बर्तौलालाई कार्यकालको शुभकामना र बधाइ ज्ञापन गर्दै अहिलेका यो अवस्थामा रुपचन्द्रका काम र व्यवहार ताजै रहेको र त्यसै अनुसार काम गर्नका लागि थाहा नगरका वासिन्दाहरुले सुझाब दिएका छन् । रुपचन्द्र विष्टले गरेका काम र उनको व्यवहार जिल्लाभरी र देशैभरी अहिले पनि उत्तिकै चर्चित रहेको छ ।
३९ वर्षकै उमेरमा नेकपा एमालेबाट मकवानपुर क्षेत्र नम्बर–२ मा प्रतिनिधी सभाको रुपमा निर्वाचित भएपछी पहिलेको भन्दा केही नयाँ र यस भेगका नागरिकका निम्ति पाँच वर्ष काम गर्ने योजनाका साथ बर्तौला अगाडी बढेका छन् । निर्वाचित भएकाे प्रमाणपत्र लिए पछी बर्ताैला आफ्नाे क्षेत्रकाे मतदातालाई धन्यवाद दिदै सुझाव संकलनमा व्यस्त रहेका छन् ।
मकवानपुर । नेपाली कांग्रेस मकवानपुरले गत मंसिर ४ गते भएको निर्वाचनमा लोकतान्त्रिक बाम गठबन्धनका उम्मेदवारमाथि अन्तरघात नभएको बताएकाे छ । पार्टीले निर्वाचनमा अन्तरघात भएकाे प्रमाण भेटिए कारबाही गरिने समेत बताएको छ ।
पार्टीले आइतबार पत्रकार सम्मेलन गर्दै गठबन्धनका उम्मेदवारलाई अन्तरघात भएको सामाजिक सञ्जाल र केही सञ्चार माध्यममा प्रकाशित भएकाे समाचार आधारहीन कुरामा विश्वास नगर्न पार्टी र गठबन्धका नेता कार्यकर्तामा आग्रह गरेको हो । विशेष गरी प्रतिनिधि सभा क्षेत्र नम्बर १ की उम्मेदवार महालक्ष्मी उपाध्याय डीना र १ (ख) का उम्मेदवार आनन्दराम पराजुलीमाथि गठबन्धन दल र पार्टीबाटै अन्तरघात भएको भनी आधारहीन प्रचार गरिएको पार्टीले जनाएको छ ।
‘हामी सबै पार्टी र गठबन्धनका उम्मेदवार जिताउन प्रतिवद्ध भएर लागेका थियौं । सबैको प्रयास हुँदा हुँदै पनि उहाँहरुको पराजय भयो, हामी दुखित छौं’ पार्टी जिल्ला सभापति बुद्ध लामाले भने । ‘केही माध्यमबाट पार्टीका जिम्मेवार व्यक्तिहरुकै नाम लिएर अन्तरघात गरियो भनेर कुप्रचार भएकाे छ’ लामाले भने पार्टी र गठबन्धनभित्र निर्वाचनको समीक्षा हुनै बाँकी छ, यदि कतै कसैले कमजोरी गरेको रहेछ भने हामी त्यसपछि के गर्नुपर्छ हामी गर्छौं ।’
पार्टीका उम्मेद्वारहरुको पराजयका सम्बन्धमा भएको प्रचार प्रसारप्रति ध्यानाकर्षण भएको भन्दै नेपाली कांग्रेस जिल्ला कार्यसमिति मकवानपुर एवम् नेपाली कांग्रेस मकवानपुरका जिल्ला सभापति, बागमती प्रदेश सभापति लगायत जिल्ला तहका नेताहरु गठबन्धनको मर्म÷भावना अनुसारका क्रियाकलापहरुमा संलग्न भएको पार्टी जिल्ला प्रवक्ता अर्जुन चौलागाईले प्रष्ट पारे ।
मकवानपुर । मकवानपुर जिल्लास्तरीय भलिबल प्रतियोगिता हुने भएको छ । बसामाडी जेसीजको आयोजनामा लक्ष्मीमाया बज्राचार्य स्मृति जिल्लास्तरीय खुला रनिङशिल्ड भलिबल प्रतियोगिता मंसिर २८ गतेबाट हुने भएको हो । जेसीजले आइतबार हेटौंडामा पत्रकार सम्मेलन गरि २० औं संस्करणको भलिबल प्रतियोगिता मसिर २८ देखि पुष २ गतेसम्म संचालन गरिने जानकारी गराएको हो ।
प्रतियोगितामा १० देखि १२ वटा टिमको सहमागिता रहने आयोजक जेसिसका अध्यक्ष चिराग अग्रवालले बताए । हेटौंडाको हुप्रचौरमा हुने प्रतियोगिताको विजेताले ६५ हजार र उपविजेताले ३० हजार रुपैयाँसहित ट्रफी, मेडल र प्रमाणपत्र प्राप्त गर्ने अध्यक्ष अग्रवालले जानकारी दिए । प्रतियोगितामा सहभागी हुन चाहने टिमले मंसिर २६ गते सम्म टिम दर्ता गराउन सक्ने बताइएको छ ।
यस्तै प्रतियोगिताभर विधागत उत्कृष्ट खेलाडीलाई समेत नगदसहित ट्रफीको व्यवस्था गरिएको आयोजकले जनाएको छ । भलिबल प्रतियोगिताको लागि करिब साढे २ लाख रुपैयाँ खर्च हुने आयोजकको अनुमान छ । प्रतियोगितालाई हेटौंडाको स्वर्ण भण्डारका सञ्चालक ज्योतिरत्न बज्राचार्यले प्रायोजन गर्दै आएका छन् ।
पत्रकार सम्मेलनमा बसामाडी जेसीजका पूर्व अध्यक्ष सरोज अधिकारी, कार्यक्रम संयोजक बसामाडी जेसीजका कार्यकारिणी उपाध्यक्ष सरोज पौडेल, सहसंयोजकमा उपाध्यक्षद्वय अनिल भण्डारी र असिमराज ढुंगाना लगाएतको उपस्थिति रहेको थियो ।
हेटौडामा अग्रज साहित्यकार तुल्सी थापालाई अभिनन्दन
Tags: No Comments
मकवानपुर । मकवानपुरका अग्रज साहित्यकार तुल्सी थापालाई हेटौडामा अभिनन्दन गरिएकाे छ । बुढ्यौली साहित्य समाज मकवानपुरकाे बार्षिक उत्सवमा थापालाई शनिबार नगद २ लाख रुपैयाँसहित अभिनन्दन गरिएकाे हो ।
साहित्यका कथा, कविता, दाना कविता र नाटकमा विशेष कलम चलाउनु हुने थापाले शिक्षा, स्वास्थ्य र सामाजिक सेवाको क्षेत्रमा योगदान पुर्याएकाेमा मकवानपुरका १७ वटा साहित्यिक संघ, संस्थाले संयुक्तरुपमा अभिनन्दन गरेको हो । यस्तै कार्यक्रममै अभिनन्दन ग्रन्थको रुपमा तुल्सी थापाकै विषयमा विभिन्न व्यक्तिकाे लेख समेटिएको पुस्तक पनि सार्वजनिक गरिएको छ । अभिनन्दन ग्रन्थमा थापाको व्यक्तित्व, कृतित्वका साथै उन विषयमा तयार पारिएका रचनासहित ३६ वटा लेख समेटिएको छ ।
लामाे समय शिक्षण सेवामा सेवारत थापा निवृत्त भएपछि साहित्य लेखनमा क्रियाशील थापाकाे सम्मानमा बुढ्यौली साहित्य समाज मकवानपुरले २ लाख रुपैयाँ बराबरको अक्षयकोष समेत स्थापना गर्ने भएकाे छ । अक्षयकोष स्थापना गरेर समाजले तुल्सी सरको सम्मानमा साहित्यकारलाई पुरस्कृत गरिने अध्यक्ष आरसी रिजालले जानकारी दिए ।
भक्तपुरका साहित्यकार कविराज घिमिरेको बुढ्यौली खण्डकाव्य समेत विमोचन गरिएकाे कार्यक्रममा सुदर्शन अधिकारी, निमेष निखिल, प्रताप विष्ट र पुरुषोत्तम आचार्यले थापाको कृतित्व तथा व्यक्तित्वबारे चर्चा गरेका थिए ।
बुढ्यौली साहित्य समाज मकवानपुरका अध्यक्ष आरसी रिजालको सभाध्यक्ष तथा हेटौंडा उपमहानगरपालिकाकी प्रमुख मीना कुमारी लामाको प्रमुख आतिथ्यमा भएको कार्यक्रममा हास्यव्यङ्ग्यकार एवम् एजिङ नेपालका अध्यक्ष कृष्णमुरारी गौतम (चट्याङ मास्टर) को विशिष्ट आतिथ्य रहेकाे थियाे ।