मकवानपुर / बागमती प्रदेश मुख्यमन्त्री तथा मन्त्रिपरिषद्को बैठकले सामाजिक विकास मन्त्रालय बागमती प्रदेश र शहीद गङ्गालाल हृदय रोग प्रतिष्ठान बिच प्रदेशभित्रका हृदयघातबाट प्रभावितहरूको उपचारमा निरन्तरता दिने र हृदयघात भएका बिरामीलाई १२ घण्टाभित्रै उपचारको लागि प्रदेश सरकारले शहीद गङ्गालाल हृदय रोग प्रतिष्ठानसम्म पुर्याउने सहमति भएको प्रदेश सरकारका प्रवक्ता कैलाशप्रसाद ढुङ्गेलले जानकारी दिए ।
बैठकले प्रदेशकाे यातायात व्यवस्थापन बोर्डको कार्यकारी निर्देशकमा जगदिशचन्द्र ढुङ्गानालाई नियुक्त गरेको छ ।
बैठकले विभिन्न विधेयक तर्जुमाको लागि आवश्यक समितिमा पठाउने निर्णय गरेको पनि आर्थिक मामिला तथा योजनामन्त्री तथा प्रवक्ता ढुङ्गेलले बताए । यसैगरी उक्त बैठकले स्थानीय निकायमार्फत प्रदेशका विभिन्न कानून कार्यान्वयन गराउन कृषि भूमि व्यवस्था तथा सहकारी मन्त्रालयलाई जिम्मेवारी दिने सहमति गरिएको पनि प्रवक्ता ढुङ्गेलले जानकारी दिए । सोही बैठकले प्रदेशभित्रका सङ्घीय प्रहरी एकाइमा सवारी साधन उपलब्ध गराउने निर्णय गरेको छ ।
वाग्मती प्रदेश सरकारले प्रदेशभित्र भएका नेपाल प्रहरीका विभिन्न एकाइलाई ३४ वटा सवारीसाधन उपलब्ध गराउने निर्णय गरेको छ ।
प्रदेश मन्त्रिपरिषद्को आज बसेको बैठकले प्रहरीका लागि १२ गाडी र २२ मोटरसाइकल उपलब्ध गराउने निर्णय गरेको सरकारका प्रवक्ता एवं प्रदेशका आर्थिक मामिला तथा योजनामन्त्री कैलाशप्रसाद ढुङ्गेलले जानकारी दिए ।
बैठकले स्थानीय तहमार्फत कार्यक्रम कार्यान्वय गराउने तथा विभिन्न खालको योगदान दिने निर्णय गरेको छ । त्यस्तै सरकार स्थापनाको तीन वर्ष पुगेका अवसरमा भोलि मनाउन लागिएको तेस्रो वार्षिकोत्सव कार्यक्रम धुमधामसँग मनाउने निर्णयसमेत गरेको मन्त्री ढुङ्गेलले जानकारी दिए । बैठकले प्रदेशभित्रका नागरिकलाई हृदयघात भएमा तत्काल उपचार गर्नेसम्बन्धी गङ्गालाल हृदय रोग केन्द्रसँग सहकार्य गर्नेलगायत निर्णय गरेको उनले बताए ।
मकवानपुर । कोरोना भाइरस (कोभिड-१९) का कारण बुधबार मृत्यु शून्य भएकाे छ । यो सँगै माघ महिनामा तेस्रोपटक काेराेनाकाे कारण शून्य मृत्यु भएको हाे ।
मंगलबारसम्म नेपालमा कोरोनाका कारण मृत्यु हुनेको संख्या दुई हजार ४७ पुगेको थियो । विगत चौबीस घण्टामा ३ हजार ५ सय ६७ जनाको पीसीआर परीक्षण गरिएकामा १ सय ३४ जनाको रिपोर्ट पोजेटिभ आएको स्वास्थ्य तथा जनसंख्या मन्त्रालयले जनाएकाे छ । योसँगै नेपालमा कोरोना संक्रमितको संख्या २ लाख ७२ हजार ३ सय ४९ पुगेको छ ।
त्यस्तै गएको चौबीस घण्टामा १ सय १८ जना संक्रमणमुक्त भएका छन् । योसँगै देशमा कोरोनामुक्त हुनेको संख्या २ लाख ६८ हजार ५ सय ४९ पुगेको छ । हाल क्वारेन्टिनमा ८८ जना छन् भने आइसोलेसनमा १ हजार ७ सय ५३ जना रहेको मन्त्रालयले जनाएको छ ।
मकवानपुर । अदालतबाट सवारी ज्यान मुद्दा र लागूऔषध मुद्दामा दोषी ठहर भई तोकिएको कैद तथा जरिवानाको सजाय भुक्तान नगरी फरार रहेका दुईजनालाई मकवानपुर प्रहरीले पक्राउ गरेको छ ।
तत्कालिन पुनरावेदन अदालत हेटाैडा (उच्च अदालत पाटन हेटौडा इजलास) को २०५८ साल जेठ ३२ गतेको फैसलाले सवारी ज्यान मुद्दामा ३ महिना कैद र २ हजार जरिवाना भुक्तान गर्न बाँकी रहेका हेटाैडा उपमहानगरपालिका १४ ( चुरियामाइ गाविस वडा नं. १) बस्ने वर्षा ५९ काे कुल नरसिंह गोङवा तामाङ लाई पक्राउ गरिएकाे जिल्ला प्रहरी कार्यालयका प्रवक्ता इन्द्र बहादुर रानाले जानकारी दिए ।
मकवानपुर जिल्ला अदालत मकवानपुर २०६८ माघ ३० गतेको फैसालाले लागुऔषध गाँजा चरेस मुद्दामा ४ वर्ष कैद र पचास हजार जरिवाना भुक्तान गर्न बांकी रहेका फरार प्रतिवादी मनहरी गाउँपालिका वडा नं ०९ बस्ने वर्ष ५१ को दिनेश उप्रेतीलाई पक्राउ गरिएकाे प्रवक्ता रानाले बताए ।
माघ २७ गते मंगलबार गोङवा तामाङ लाई हेटौडा १५ बाट तथा उप्रेतीलाई मनहरी ९ ज्यामिरेबाट पक्राउ गरी कैद तथा जरिवाना भुक्तानको लागि अदालतमा उपस्थित गराउने कार्य भईरहेको मकवानपुर प्रहरीले जनाएकाे छ ।
मकवानपुर । नेकपाको प्रचण्ड–नेपाल समूहले तेस्रो चरणको आन्दोलन अन्तरगत आज काठमाडौंमा शक्ति प्रदर्शन गर्ने भएको छ। यही माघ ९ गते काठमाडौंमा आमसभा गरेको सो समूहले आज शक्ति प्रदर्शन गर्न लागेको हो।
यसको तयारीका लागि यो समूहले यसकै पूर्वसन्ध्यामा सभा व्यवस्थापनका लागि खटिने स्वयंसेवकले मार्चपास गरेको थियो। मंगलबार कोटेश्वरको पेरिसडाँडामा बसेको समूहको बैठकमा शक्ति प्रदर्शनमा तीन लाख बढी मानिस सहभागी हुने जानकारी गराएका छन्।
प्रतिनिधि सभा विघटन भएसँगै नेकपा ओली र प्रचण्ड–नेपाल समूहमा विभाजित भएको छ। दुवै समूहले छुट्टाछुट्टै राजनीतिक कार्यक्रम गरेर एक अर्काविरुद्ध आक्रामक अभिव्यक्ति दिइरहेका छन्।
प्रतिनिधि सभा विघटन गरेर प्रधानमन्त्री ओली असंवैधानिक कदम चालेको भन्दै त्यसविरुद्ध प्रचण्ड–नेपाल समूह आन्दोलित भएको हो। यता ओली समूह निर्धारित मितिमा चुनाव हुने भन्दै तयारीमा जुटेको बताएको छ। साे समूह हिजो निर्वाचन आयोगमा पुगेर दुई चरणमा निर्वाचन गर्ने जिल्ला र प्रदेशको नाम पनि टुंगो लगाएको छ। ओली समूहले पनि यही माघ २३ नारायणहिटी दरबार अगाडि आमसभाको आयोजना गरेको थियो।
मकवानपुर / नेपाल बंगलादेश बैंक, आर एण्ड डी इनोभेटिभ सोलुसन प्रालि मकवानपुर र मकवानपुर गढी गाँउपालिका सहकारी समान्वय समितिको सहकार्यमा किसान कृषि लोन कार्डको योजना सुरु भएको छ ।
मकवानपुरगढीका साना किसानलाई पशुपन्छी पालन तथा कृषि उद्यम गर्न वित्तीय, प्रावधिक, बजार व्यवस्थापनलगायत कार्यमा सहजीकरण तथा समन्वय गर्न सहयोग गर्ने उद्देश्यले लोन कार्ड सुरु गरिएको बैंकले जनाएको छ ।
नेपाल बंगलादेश बैंकका नायब प्रमुख कार्यकारी अधिकृत सुरेन्द्र भूषण श्रेष्ठ र सहायक महाप्रबन्धक सलोनिका सिंह, आर एण्ड डी इनोभेटिभ सोलुसन प्रालिका सुनिता न्हेम्हाफुकी, मकवानपुरगढी गाँउपालिकाका अध्यक्ष विदुर हुमागाईं र मकवानपुरगढी गाउँपालिका सहकारी समन्वय समितिका सह संयोजक कल्पना श्रेष्ठले उक्त चौपक्षीय सम्झौता पत्रमा हस्ताक्षर गरेका छन् ।