मकवानपुर । अख्तियार दुरुपयोग अनुसन्धान आयोगको कार्यालय, हेटौंडाले यातायात व्यवस्था कार्यालय अधिकृतस्तरका कर्मचारी र लेखापढी व्यवसायीलाई नियन्त्रणमा लिएकाे छ ।
यातायात व्यवस्था कार्यालय हेटौंडाका अधिकृत छैटौं तहका कर्मचारी अमृत भेटुवालले सवारी सरुवा सहमतिकाे कामकाे लागि सेवाग्राहीसँग घुस/रिसवत माग गरेकाे सूचना तथा उजुरीका आधारमा उनीहरुलाई नियन्त्रणमा लिएकाे अख्तियारले जनाएकाे छ ।
अख्तियार हेटौडाकाे टोलीले बिचौलिया लेखापढी व्यवसायी खगेन्द्र पौडेलले सेवाग्राहीबाट ११ हजार ५ सय रुपैयाँ घुस/रिसवत लिएकाे अवस्थामा यातायात कार्यालय परिसरबाट मंगलबार उनीहरुलाई नियन्त्रमा लिएकाे जनाएकाे छ । उक्त रकम तथा ३ थान मोबाइल सेटसहित पौडेल र भेटवाललाई नियन्त्रणमा लिई थप अनुसन्धान भइरहेको अख्तियार दुरुपयोग अनुसन्धान आयोगले विज्ञप्ति प्रकाशित गरी जनाएकाे छ ।
मकवानपुर । मकवानपुरको बागमती गाउँपालिका–८ स्थित तल्लो भवानीमा मोटरसाइकल दुर्घटना हुँदा चालकको मृत्यु भएको छ ।
बागमती गाउँपालिकाको फापरबारीबाट बकैया गाउँपालिकाको हात्तीसुडेतर्फ आउँदै गरेको बा प्र ३–०२–००५ प १००८ नम्बरको मोटरसाइकल सोमबार राती मदन भण्डारी लोकमार्गअन्तर्गत बागमती गाउँपालिका–८ स्थित तल्लो तल्लो भवानीमा नालामा खसेको थियो ।
उक्त दुर्घटनामा मोटरसाइकल चालक मकवानपुरको बकैया गाउँपालिका–८ बस्तीपुरका ४० वर्षीय प्रेमबहादुर गोलेको मृत्युु भएको जिल्ला प्रहरी कार्यालय मकवानपुरले जनाएको छ । दुर्घटनामा गम्भीर घाइते भएका गोलेको हेटौँडा अस्पतालमा उपचारका क्रममा मृत्यु भएको प्रहरीले जनाएको छ ।
मकवानपुर । धादिङमा बस दुर्घटनामा ज्यान गुमाएका १९ जनाकै पहिचान खुलेकाे छ । सोमबार बेनिघाट रोराङ गाउँपालिका–५ भैसीगौडास्थित पृथ्वी लोकमार्गमा बस दुर्घटनामा १९ जनाको मृत्यु भएको थियो।
सोमबार बिहान पोखराबाट काठमाडौंतर्फ जादैं गरेको ग १ ख १४२१ नम्बरको बस त्रिशूली नदीमा खसेर थियाे । उक्त दुर्घटनामा मृत्यु भएका १९ जनाकै सनाखत भएको जिल्ला प्रहरी कार्यालय धादिङले जनाएकाे छ ।
मकवानपुर । राष्ट्रिय स्वतन्त्र पार्टी (रास्वपा) मकवानपुरका सभापति भरत पराजुली कांग्रेस प्रवेश गरेका छन् ।
रास्वपा हेटौंडामा आज विशेष भेला राखेको छ । भेलाको पूर्वसन्ध्यामा उनी कांग्रेस प्रवेश गरेका हुन् । त्यसअघि जिल्ला सभापति पराजुलीले सर्लाही पुगेर कांग्रेस केन्द्रिय सभापति गगन थापासँग भेट गरेका थिए ।
पराजुलीले आफू कांग्रेसमा फर्किएको बताएका छन् । सामाजिक संजाल फेसबुकमा स्टाटस पोष्ट गर्दै उक्त कुरा पुष्टि गरेका हुन् ।
भरत पराजुलीले फेसबुकमा लेखेका छन्
सबैमा नमस्कार।
म विगत करिब ३० वर्षदेखि नेपाली कांग्रेसको राजनीतिमा सक्रिय रूपमा समर्पित रहँदै आएको थिएँ। त्यसपछि २०७९ साल साउनदेखि राष्ट्रिय स्वतन्त्र पार्टीमा आबद्ध भई संगठन निर्माण र विस्तारमा निरन्तर लागिपरेँ।
जहाँ रहे पनि म सधैं भुईँमान्छेको सेवकका रूपमा जनताको सेवामा समर्पित रहन प्रयासरत थिएँ। २०७९ सालको प्रतिनिधि सभा निर्वाचनमा मकवानपुर क्षेत्र नं. २ जस्तो बिकट क्षेत्रबाट १२ हजारभन्दा बढी मत प्राप्त गर्नु मेरो लागि जनविश्वासको प्रमाण थियो।
तर समयक्रममा पार्टीभित्र देखिएका प्रवृत्तिहरूले मलाई गम्भीर रूपमा सोच्न बाध्य बनायो। हामीले जुन उद्देश्य, मूल्य र आदर्शका साथ पार्टीलाई बुझेका थियौं, व्यवहारमा त्यसको ठीक विपरीत अवस्था विकसित हुँदै गएको महसुस भयो। सीमित व्यक्तिहरूको प्रभाव, चाकरीवाद, आलोचनालाई अस्वीकार गर्ने संस्कार तथा आन्तरिक लोकतन्त्र कमजोर हुँदै गएको अवस्थाले निराश बनायो। मैले सधैं इमानदारी, निष्ठा र जनसेवाको भावनाका साथ राजनीति गरेँ। कुनै व्यक्तिको चाकरी गर्ने, व्यक्तिगत स्वार्थका लागि सम्झौता गर्ने वा आर्थिक प्रभावका आधारमा अघि बढ्ने प्रवृत्तिसँग म सहमत हुन सकिनँ।
यस निर्णयलाई कसैले अन्यथा अर्थ लगाउन सक्लान्, तर मेरो लागि मूल कुरा पार्टी स्थापना गर्दा अघि सारिएको उद्देश्य र व्यवहारबीचको अन्तर हो। जब आदर्शभन्दा फरक बाटो समातिएको महसुस भयो, तब आत्मसम्मान र मूल्यको आधारमा अलग हुने निर्णय गरेको छु।
रास्वपामा मलाई माया, साथ र विश्वास गर्ने सम्पूर्ण साथीहरूमा हार्दिक कृतज्ञता व्यक्त गर्दछु। म पार्टीमा नरहँदा केही सीमित व्यक्तिहरूलाई सुखानुभूति हुन सक्ला, तर भविष्यमा कसैले पनि मेरो जस्तो नियति भोग्न नपरोस् भन्ने कामना गर्दछु।
रास्वपा पार्टीको जिल्ला सभापति पदमा रहँदा विभिन्न कोणबाट प्रत्यक्ष तथा अप्रत्यक्ष रूपमा सहयोग गर्नुहुने सम्पूर्ण साथीहरू, शुभेच्छुकहरू तथा कार्यकर्ताहरूमा हार्दिक आभार प्रकट गर्दछु। तपाईंहरूको साथ, समर्थन र विश्वास नै मेरो राजनीतिक यात्राको बलियो आधार रहनेछ।
हाल नेतृत्व तहको मूल्यांकन गर्ने शैली र व्यवहारका आधारमा भविष्यमा पनि आफू तथा आफ्ना हितैषीहरूको उचित कदर नहुने सम्भावना देखिएको छ। साथै, यही प्रवृत्ति कायम रहे जनताको हित, कार्यकर्ताको उचित मूल्यांकन तथा संरक्षण हुन नसक्ने अवस्था देखिएकाले स्थापना कालदेखि आबद्ध रहेको पार्टीबाट आजकै मितिदेखि अलग रहने निर्णय गरेको सम्वन्धित सबैमा जानकारी गराउँदछु।
आगामी दिनहरूमा पनि म सदाझैं जनताको सेवामा समर्पित रहने प्रतिबद्धता व्यक्त गर्दछु। धन्यवाद।
मकवानपुर । बागमती प्रदेशका कृषि तथा पशुपन्छी विकास मन्त्री मधुसूदन पौडेलले किसानहरूले लामो समयदेखि परम्परागत रूपमा एकै किसिमको बाली लगाउँदै आएका कारण उत्पादनमा ह्रास आएको बताएका छन् ।
चितवनको भण्डारामा आयोजित मन्त्रालय मातहतका कार्यालयहरुको आर्थिक वर्ष २०८२/०८३ को अर्धवार्षिक प्रगति समीक्षा गोष्ठीको उद्घाटन सत्रलाई सम्बोधन गर्दै उनले प्रदेश भित्र माटो परिक्षणलाई अभियानको रुपमा संचालन गरिने जानकारी दिए ।
“माटोमा अत्यधिक मात्रामा अम्लीयपन बढ्दै गएको छ, जसले उत्पादकत्व घटाएको छ,” मन्त्री पौडेलले भने, “अब माटो परीक्षणलाई अनिवार्य र अभियानकै रूपमा अघि बढाइनेछ।”
परीक्षणले मात्र उत्पादन वृद्धिलाई वास्तविक सहयोग पुर्याउने बताउदै उनले भने “मन्त्रालयले वितरण गर्दै आएको अनुदान प्रणालीमा ठूलो हेरफेर गरिने छ बताए ।” वितरणमुखी अनुदानले किसानलाई अल्छी बनाएको टिप्पणी गर्दै उनले अबदेखि उत्पादन, ब्याज अनुदान र नवयुवा लक्षित अनुदानलाई मात्र प्राथमिकता दिइने स्पष्ट पारे।
“उत्पादनमा आधारित नभएका अन्य सबै प्रकारका अनुदानहरु अब बन्द गरिनेछन्,” मन्त्री पौडेलले भने “हाम्रो लक्ष्य वास्तविक किसानलाई प्रोत्साहन गर्ने र कृषिमा युवा सहभागिता बढाउने हो।”
कार्यक्रममा मन्त्रालयका सचिव बैकुण्ठ अधिकारीले प्रदेश सरकारको लगानीमा निर्माण भएको धुलोदुध कारखाना सञ्चालनका लागि ठोस कार्ययोजना (मोडालिटी) आवश्यक रहेको बताए। उनले कारखाना सञ्चालनको स्पष्ट मोडालिटी तयार गर्न दुग्ध विकास बोर्डका निर्देशकलाई निर्देशनसमेत दिए ।
मन्त्रालयको वित्तीय अवस्थाप्रति चासो व्यक्त गर्दै सचिव अधिकारीले कृषि निर्देशनालयको हालसम्मको वित्तीय प्रगति सन्तोषजनक नरहेको उनको भनाइ थियो।
मन्त्रालय मातहतका कार्यालयहरूको कुल ८६ करोड रुपैयाँ बेरुजु रहेकोमा पशुपन्छी तथा मत्स्य निर्देशनालयको मात्र ३८ करोड रुपैयाँ रहेकोले तत्काल प्रभावकारी काम गर्न निर्देशन दिएका छन् ।
गोष्ठीको पहिलो जिल्ला स्थित कार्यालय र निर्देशनालयहरूले आफ्नो अर्धवार्षिक प्रगतिको प्रतिवेदन प्रस्तुत गरेका थिए। आज सोमबारसम्म चल्ने गोष्ठीमा बागमती प्रदेश मातहतका जिल्लास्थित कार्यालयका प्रमुख तथा प्रतिनिधिहरू, तालिम केन्द्रका प्रमुखहरू र निर्देशनालयका प्रमुखहरूको उपस्थिति रहेको छ।