मकवानपुर । लाेक सेवा आयाेगले शाखा अधिकृतको नतिजा प्रकाशन स्थगित गरेकाे छ । लाेक सेवा आयोग केन्द्रीय कार्यलय अनामनगरले भदाै २८ गते सूचना प्रकाशित गर्दै आयोगले २०७६ सालमा विज्ञापन गरेको व्यवस्थापिका संसद, परराष्ट्र, प्रशासन र लेखापरीक्षण सेवाका शाखा अधिकृतको अन्तिम याेग्यतक्रम सम्बन्धी नतिजा प्रकाशन स्थगित गरेको जनाएकाे छ ।
सर्वोच्च अदालतले कर्मचारी समायोजन सम्बन्धमा दिएका आदेशलाई कारण देखाउँदै आयोगले सबै परीक्षा लिइसकेको शाखा अधिकृतको योग्यताक्रम प्रकाशन र सिफारिस स्थगित गरेको हो । यसअघि प्रदेश र स्थानीय तहमा समायोजन भएका शाखा अधिकृतहरुलाई उनीहरुले रोजेको संघमा समायोजन गर्न सर्वोच्चले आदेश दिएसँगै लोकसेवा आयोगको संसद, परराष्ट्र, प्रशासन र लेखापरीक्षण समूहका परीक्षाका सम्पूर्ण चरण पार गरी अन्तिम नतिजाको पर्खाइमा रहेका परीक्षार्थी समस्यामा परेका छन् ।
‘आयोगबाट प्रकाशित वि नं १६६९४–१६७००/०७६–७७ सम्मका व्यवस्थापिका संसद, परराष्ट्र, प्रशासन र लेखा परीक्षण सेवाका राजपत्रांकित तृतीय श्रेणी शाखा अधिकृत वा सो सरह (अप्राविधिक) पदको योग्यताक्रम प्रकाशन तथा सिफारिस स्थगित भएको व्यहोरा आयोगको मिति २०७८÷०५÷२८ को निर्णयअनुसार सम्बन्धित सबैको जानकारीको लागि यो सूचना प्रकाशन गरिएको छ’ आयोगको सूचनामा भनिएको छ ।
लोक सेवा आयोगले मिति २०७६ मंसिरमा शाखा अधिकृतमा बढुवा तथा खुला समेत गरी सामान्य प्रशासन समूहका ५ सय ६० रिक्त पदमा पदपूर्तिको लागि विज्ञापन प्रकाशन गरेको थियो । उक्त विज्ञापनमध्ये ३० प्रतिशत बढुवातर्फ छुट्याएको १ सय ६८ पद सोही वर्ष नै पदपूर्ति भइसकेको छ । बाँकी खुला तथा समावेशीतर्फ छुट्याएको ३ सय ९२ पदको परीक्षा भने काेराेना भाइरस (कोभिड-१९) का कारण गत भदौ ५ गतेमात्र सबै चरण सम्पन्न भएको आयाेगले जनाएकाे छ ।

उत्सव चाैलागाईं
म गाउँ आएपछि
मसँगै आए धेरै बालस्मृतिहरू ।
त्यो बूढो सिमलको रुख
गाउँमा फैलिएको चमेलीको बास्ना
कखरा पढेको पाठशाला
आँखामा ठोकिएको हिमाल
मलाई नै पर्खिरहेका रहेछन् ।
सहरको उकुसमुकुस
अलिकति बौद्धिकताको भ्रम
दुईचार कफीगफ
कदापी मलाई गाउँ बिर्साउने
हतियारहरू भएनन् ।
मैले गाउँका धेरै स्वादहरू छुटाएछु
किञ्चित मलाई सहर प्रिय भएन
गाउँको कुलोमा कति पानीहरू बगिसकेछन्
कतिपटक घाम खसिसकेछ क्षितिजबाट
तर मलाई सहरले
बन्दक बनाएर राख्यो यतिञ्जेल ।
मलाई अङ्ग्रेजी शिक्षाको लोभ देखायो
मोटरगाडीको लोभ देखायो
कृतिम सुखको लोभ देखायो
र घाँटी थिचेर राख्यो ।
म गाउँबाट कहिल्यै बिमुख भइनँ ।
आज धेरैपछि
आफैँसँग बिद्रोह गरेर
गाउँ आएको छु ।
प्रिय गाउँ
मलाई तिम्रो काखमा अलिकति ठाउँ देऊ
प्रियजन
मलाई मनमा अलिकति ठाउँ दिनोस् ।
मैले सहरमा
गाउँको बदख्वाइँ गरेको छैन
मैले गाउँको बुढीऔलाहरू सहरमा बेचेको छैन
प्रिय गाउँ
म तिम्रै काखमा उदाएँ
म तिम्रै आँगनमा प्रकाश छरूँ
र तिम्रै काखमा निदाऊँ ।
हेटाैडा, मकवानपुर
प्रमुख प्रतिक्षी दल नेकपा एमालेले आइतबार पनि प्रतिनिधि सभाको बैठकमा अवरोध गरे । तर, पछिल्ला केही दिनको तुलनामा प्रतिनिधिसभाको आइतबारको बैठकको दृश्यमा केही फरक देखियो । यसले संवादको वातावरण बन्दै गएको संकेत मिलेको छ ।
अघिल्ला दिनमा मर्यादापालक र सांसदहरूबीच घम्साघम्सी देखिएको थियो । प्रतिस्थापन बजेट पेस गर्ने क्रममा एमाले सांसदहरूले काँधमा चढेर रोस्टम पुग्ने प्रयास गरेका थिए । मर्यादापालकहरूले पनि एमाले सांसदहरूलाई वेलको आधा भागमा रोकेका थिए । तर, आइतबारको बैठकमा एमाले सांसदहरूले वेल घेराउ गर्दै नारा लगाए पनि कुनै घम्साघम्सी भएन । प्रतिनिधि सभाको बैठक अघि एमाले दलका नेता केपी शर्मा ओलीले मर्यादित भएर प्रस्तुत हुन आफ्ना सांसदहरूलाई निर्देशन दिएका थिए ।
अघिल्लो बैठकमा मर्यादापालकहरूले सभामुख बस्ने स्थानअघिको खाली ठाउँको आधा भागमा मात्र प्रतिपक्षीलाई रोकेका थिए । तर, आइतबार उनीहरूले पुरै वेल खुला छाडेका थिए । बैठकमा सभामुख अग्नि सापकोटाले संवादतर्फ अग्रसर हुन सांसदहरूलाई आग्रह गरिरहे । ‘आखिरमा हामीले सहकार्य र समन्वयमा जानैपर्छ । संवादतिर जान सत्तापक्ष र प्रतिपक्षले पहल गर्नुपर्छ । म विनम्रतापूर्वक आग्रह गर्दछु । वातावरण सहज बनाउने भूमिका खेलौं,’ सापकोटाले भने, ‘बैठक सहज ढंगले सञ्चालन गर्ने वातावरण बनाउन विपक्षी दलका सांसदहरूलाई अनुरोध गर्छु । सत्तापक्ष, विपक्ष र संसद्मा प्रतिनिधित्व गर्ने सबै दलका नेताहरू जनताको सर्वोच्च प्रतिनिधि संस्थालाई मर्यादित बनाउन संवादतिर अग्रसर होऔं ।’
आइतबारको बैठकमा पनि नेकपा एमालेका सांसदहरूले नाराबाजी जारी राखेका थिए । उनीहरूले पार्टी फुटाउने षड्यन्त्र मुर्दावाद, संसदीय मर्यादा कायम गर, पक्षपातपूर्ण व्यवहार मुर्दावादजस्ता नारा लगाएका थिए । सभामुख अग्नि सापकोटाले नियमित अवरोधले अन्य सांसदहरूले आफ्नो कुरा राख्न नपाएको उल्लेख गरे । उनले अदालतमा विचाराधीन विषयमा छलफल संविधानमा निषेध गरेको सम्झाए । तर, एमाले सांसदहरूले नाराबाजी कायम राखे । एमाले सांसदहरूले माधव नेपालसहित १४ सांसदलाई कारबाहीको सूचना सभामखुले प्रकाशित नगरेकोमा प्रश्न उठाउँदै आएका छन् । उनीहरूले गैरसांसदलाई प्रवेश निषेध गर भन्दै नारा लगाएका थिए ।
आइतबारको वेल घेराउमा प्रमुख प्रतिपक्षी दलका नेता अध्यक्ष केपी शर्मा ओली पनि उभिएका थिए । अघिल्ला दिनमा उनी कुर्सीमा बस्ने गरेका थिए । तर, उनी आइतबारको बैठकमा वेलमै उभिए । आइतबारको दोस्रो बैठकमा पनि नेकपा एमालेका सांसदले अवरोध गरेपछि सभामुख सापकोटाले मंगलबार १ बजेसम्मका लागि बैठक स्थगित गरेका छन् । पहिलो बैठक बसेर १५ मिनेटका लागि स्थगित भएको बैठक पुनः सुचारु भएलगत्तै बैठकमा एमाले सांसदले नाराबाजी गरेपछि बैठक स्थगित भएको हो । १४ सांसदलाई सभामुखले कारबाही नगरेको भन्दै उनीहरूले नाराबाजी गरेका हुन् ।
यसअघि बैठक खुलाउन सभामुख अग्नि सापकोटाको नयाँ बानेश्वरस्थित संसद् भवनको कार्यकक्षमा एमालेका प्रतिनिधिसँग छलफल गरेका थिए । छलफलमा सभामुख सापकोटासँगै नेकपा एमालेका प्रमुख सचेतक विशाल भट्टराई, सचेतक शान्ता चौधरी र एमालेका सांसद खगराज अधिकारी सहभागी थिए । त्यस्तै, सरकारका तर्फबाट कानुनमन्त्री ज्ञानेन्द्रबहादुर कार्की बैठकमा सहभागी रहेको सभामुख सापकोटाका प्रेस संयोजक श्रीधर न्यौपानेले जानकारी दिए ।
प्रतिनिधि सभाको नवौं अधिवेशनको पहिलो बैठकबाट नै एमालेले अवरोध गर्दै आएको छ
पार्टी सांसदको विरोध शैलीप्रति ओली असन्तुष्ट
प्रमुख प्रतिपक्षी दल नेपाल कम्युनिस्ट पार्टी (एमाले)का अध्यक्ष केपी शर्मा ओलीले संसद्मा विरोध गर्ने कार्यक्रम जारी नै रहने बताएका छन् ।
एमाले संसदीय दलको आइतबार बसेको बैठकलाई सम्बोधन गर्दै अध्यक्ष ओलीले मर्यादित तरिकाले विरोधका कार्यक्रम जारी राख्न सांसदहरूलाई निर्देशनसमेत दिए । एमाले संसदीय दलका नेतासमेत रहेका अध्यक्ष ओलीले सभामुखको आलोचना गर्दै विरोधका कार्यक्रम नरोकिने बताए ।
‘सभामुखको व्यवहार र आचरणका कारण विरोधका कार्यक्रम जारी नै रहन्छ । तर, विरोधका कार्यक्रम मर्यादित तरिकाले हुनुपर्छ,’ अध्यक्ष ओलीले भने, ‘सभामुख सभामुखको कुर्सीमा बस्न लायक छैनन् । उहाँको पदीय गरिमा, मर्यादा र निष्पक्षता कायम गर्न सक्नुभएन भन्ने कुरा जगजाहेर छ ।’
एमाले विभाजन गराउने कुरामा सभामुखको षड्यन्त्रमूलक सहभागिता देखिएको आरोप ओलीले लगाए । सांसदलाई संसद्मा मर्यादित भएर प्रस्तुत हुन भन्दै उनले सीमाभन्दा बाहिरका व्यवहार नगर्न निर्देशन दिए ।
‘कतिपय माननीयज्यूलाई लागेको हुन सक्छ, अवरोध गर्न हुन्छ कि हुँदैन । अवरोध गर्नुपर्छ,’ उनले भने, ‘यस्तो सभामुख जसले प्रमुख प्रतिपक्षी पार्टी फुटाउने षड्यन्त्र गर्छ । त्यसमा प्रत्यक्ष संलग्न हुन्छ र त्यस पदको दुरुपयोग गरिन्छ । त्यसमा गम्भीर प्रश्न नउठ्ने भन्ने कुरा हुन सक्दैन । त्यो गम्भीर प्रश्न उठ्छ ।’
अमर्यादित तरिकाले एमाले सांसदहरू संसद्मा प्रस्तुत भएपछि आलोचना भएको थियो । सोही विषयलाई उल्लेख गर्दै ओलीले भने, ‘हाम्रो लिमिटेसनभन्दा बाहिरका कुरा अर्थात् काँध चलेरमाथि जान खोज्ने कुरा नगरौं । किनभने, त्यो देखाउने कुरा मात्रै हुन्छ । के हामीले साँच्चै मर्यादापालकको घेरा तोड्नै खोजेको हो ? तोड्नै खोजेको भए हामी बेग्लै ढंगले प्रस्तुत हुन्थ्यौं होला नि । मर्यादापालकको घेरा तोड्न खोजेको होइन ।’
उनले तोकिएको नारा मात्रै लगाउन निर्देशन दिँदै भने, ‘म माननीयज्यूहरूलाई आग्रह गर्न चाहन्छु, संसदीय मर्यादाभित्र तोकिएका नारा मात्र लागोस् । त्योभन्दा फाल्तु नारा हामी लगाउँदैनांै ं। हामीले तोकेका व्यवहार छन् । हामी वेलमा जान्छौं र नारा लगाउँछौं । नारा लगाउने तरिका हुन सक्छ । अलि सामान्य अवस्था आयो भने विस्तारै विस्तारै नारा लगाउने । अलि बढी एग्रेसिभ भएर सभामुख आउँदा वा सत्ता पक्ष एग्रेसिभ भएर आउँदा अलि चर्को आवाजमा नारा लगाउने हुन सक्छ । तर, हामीले नारा लगाउने र वेलमा जानेभन्दा बाहिर त्यो मर्यादाभन्दा बाहिर जानुहुँदैन ।’
आफूले कतिपय सांसदहरूले सभामुखलाई माइक हान्ने योजना थियो भनेर सुनेको तर त्यस खालका योजना नभएकाले त्यस्तो कुरा मिडियामा नभन्न उनले आग्रह गरेका थिए । सरकारले सर्वसाधारणले बोल्न पाउने अभिव्यक्ति स्वतन्त्रता खोसेको ओलीले आरोप लगाए ।
सभामुखले बोलाए सर्वदलीय बैठक
सभामुख अग्निप्रसाद सापकोटाले संसद् अवरोध अन्त्य गर्ने विषयमा शीर्ष नेतालाई सोमबार छलफलमा बोलाएका छन् । प्रमुख विपक्षी दल नेकपा एमालेले लगातार संसद् अवरोध गरेपछि सभामुख सापकोटाले सोमबार दिउँसो साढे २ बजे संसद्मा भएका प्रमुख दलका शीर्ष नेतालाई छलफलका लागि बोलाएको उनका प्रेस सल्लाहकार श्रीधर न्यौपानेले जानकारी दिए ।
आफूले गरेको १४ सांसदको कारबाहीलाई सभामुखले मान्यता नदिएको विरोधमा नेकपा एमालेले लगातार संसद् अवरोध गर्दै आएको छ । सभामुख सापकोटाले आइतबार कानुन, न्याय तथा संसदीय मामिलामन्त्री र नेकपा एमालेका सांसदहरूसँग छलफल गरेका थिए । छलफलका क्रममा एमालेले सभामुखबाट विश्वासको वातावरण नबनाएसम्म संसद् अवरोध कायमै राख्ने अडान लिएका थिए । ‘हामीमा गरिएको अन्यायबारे प्रस्ट नपारेसम्म संसद् चल्न दिन्नौं,’ एमाले प्रमुख सचेतक विशाल भट्टराईले भने । एमाले विभाजनमा भूमिका सभामुख सापकोटाले खेलेको एमाले नेताहरूले आरोप लगाए ।
प्रमुख सचेतक भट्टराई, सचेतक शान्ता चौधरी, नेता खगराज अधिकारी सभामुख सापकोटासँगको छलफलमा बसेका थिए । ‘सभामुखले पार्टी फुटाउने मतियारको भूमिका खेलेको कुरा प्रस्ट भन्यौं,’ भट्टराईले भने । सभामुख सापकोटाले विश्वासको वातावरण बनाउने बताएका थिए । तर, कानुनमन्त्री कार्कीले उच्च राजनीतिक तहमा नै यसबारे छलफल गरिनुपर्ने प्रस्ताव गरेका थिए । यसपछि सभामुख सापकोटाले उच्च तहमा संवाद अगाडि बढाउने बताए । राजधानी दैनिकमा प्रकाशित समाचार साभार
प्रतिनिधिसभाको शुक्रबारको बैठकमा प्रमुख प्रतिपक्षी एमालेको अवरोधबीच बजेटसम्बन्धी विधेयक प्रस्तुत भएको छ। मार्सल प्रयोग गरेर बजेट अध्यादेश स्वीकृत गरी प्रतिस्थापन विधेयक प्रस्तुत गरियो। नियम निलम्बन नगरी सदनमा यसरी आर्थिक विधेयक पेस भएको पहिलो पटक हो।
प्रतिस्थापन विधेयक संसद् सचिवालयमा दर्ता भएपछि परिपक्व हुन पाँच दिन लाग्छ। तर आर्थिकसम्बन्धी प्रतिस्थापन विधेयक भएका कारण प्रतिनिधिसभाको नियम २०७५ को १४९ को उपनियम १ र ५ प्रयोग गरी ल्याइएको छ। यो विधेयक अघिल्लो केपी ओली नेतृत्वको सरकारले ल्याएको बजेटलाई संशोधन गर्न ल्याइएको हो।
जसका कारण एमालेका सांसदले नाराबाजी गर्दै टेबुल नै तोडफोड गरेका छन्। एमाले सांसदहरूले अर्थमन्त्रीलाई रोस्ट्रममा पुग्न नदिन जबरजस्त प्रयास गरे पनि असफल भए। एमाले सांसदको जोरजुलुमले बैठकस्थल अस्तव्यस्त देखिन्थ्यो। रोस्ट्रममा उभिएर बजेटसम्बन्धी विधेयकमा रहेका नयाँ व्यवस्थामाथि प्रकाश पार्ने क्रममा अर्थमन्त्री जनार्दन शर्मा निकै हतासमा देखिन्थे।
नियमावलीको नियम १४९ को उपनियम १ मा वार्षिक आय–व्यय अनुमान प्रस्तुत भलगत्तै बसेको बैठकमा अर्थमन्त्रीले सरकारको अर्थसम्बन्धी प्रस्ताव कार्यान्वयन गर्न बनेको आर्थिक विधेयक प्रस्तुत गर्ने उल्लेख छ। यसैगरी उपनियम ५ मा आर्थिक विधेयक सम्बन्धमा यस नियममा उल्लेख गरिएदेखिबाहेक सभामुखले उपयुक्त ठहर्याएको कार्यविधि अपनाइनेछ भन्ने उल्लेख छ।
प्रतिनिधिसभाको शुक्रबार नै बसेको दोस्रो बैठकमा बजेटसम्बन्धी अध्यादेश स्वीकृत गरी तेस्रो बैठकमा बजेटसम्बन्धी प्रतिस्थापन विधेयक प्रस्तुत गरिएको हो। बजेटसम्बन्धी प्रतिस्थापन विधेयक अब संसद्को दुवै सदनबाट ३१ गतेभित्र पारित गर्नुपर्नेछ। यसरी पारित भएपछि मात्रै यो वर्षको वार्षिक बजेट पूर्ण रूपमा कार्यन्वयनमा आउनेछ।
प्रतिनिधिसभाको पहिलो बैठक एमालेले नाराबाजी गरेपछि कार्यसूचीमा प्रवेश नगरीकन १५ मिनेटका लागि स्थगित गरिएको थियो। दोस्रो बैठकमा मार्सल प्रयोग गरेर कार्यसूचीको कारबाही अघि बढाइएको थियो। पहिलो बैठक निर्धारित समयभन्दा १५ मिनेटपछि सबा १ बजे सुरु भएको थियो। बैठक सुरु हुनासाथ एमालेका सांसद्ले सभामुखको रोस्ट्रम अगाडिको वेलमा गएर नाराबाजी गर्न थालेपछि कार्यसूचीमा प्रवेश नगरीकनै १५ मिनेटका लागि स्थगित गरिएको थियो।
उनीहरूले सभामुख अग्नि सापकोटाविरुद्ध नाराबाजी गरेका थिए। दोस्रो बैठक बसेपछि पनि नाराबाजी भइरह्यो। नाराबाजीकै क्रममा सभामुखले कार्यसूचीमा रहेको बजेटसम्बन्धी तीन अध्यादेश आर्थिक अध्यादेश २०७८, राष्ट्र ऋण उठाउने अध्यादेश २०७८, विनियोजन अध्यादेश २०७८ लाई अघि बढाएका थिए। आर्थिक अध्यादेशमा अस्वीकारको प्रस्ताव दर्ता गराएका नेमकिपाका प्रेम सुवालले प्रतिपक्षका माग सम्बोधन गर्नुपर्ने र रोस्ट्रममा गएर मात्र अस्वीकार प्रस्ताव प्रस्तुत गर्ने बताएका थिए। सभामुख सापकोटाले सुवाललाई आफ्नै स्थानमा उठेर बोल्न समय दिँदा उनले अस्वीकार गरेका थिए।
त्यसपछि सभामुखले अर्थमन्त्री शर्मालाई रोस्ट्रममा बोलाए। अर्थमन्त्री शर्मा दौड्दै मर्यादापालकको सहायतामा रोस्ट्रममा पुगे। उनी दौडिएको निकै रोचक देखिएको थियो। सुवालले अस्वीकारको प्रस्ताव पेस नगरेपछि सभामुख अलमलिएका थिए। पछि उनले सुवालको प्रस्ताव पेस नभएकाले फिर्ता लिएसरह मानेर निर्णयार्थ प्रस्तुत गर्नुनपर्ने भन्दै आर्थिक अध्यादेश स्वीकृतिका लागि पेस गर्न अर्थमन्त्रीलाई अनुमति दिएका थिए।
प्रस्तुत आर्थिक अध्यादेश विधेयक निर्णयार्थ प्रस्तुत गर्दा कांग्रेस, माओवादी केन्द्र, नेकपा एकीकृत समाजवादी र जसपाका सांसदको समर्थनमा बहुमतले स्वीकृत भयो। सांसद सुवालले राष्ट्र ऋण उठाउने अध्यादेश २०७८ र विनियोजन अध्यादेश २०७८ मा आफूले दर्ता गराएको अस्वीकारको प्रस्ताव आफ्नो स्थानबाटै प्रस्तुत गरेका थिए।
एमाले सांसदले भने नाराबाजी गर्दै होहल्ला गरिरहेका थिए। एमाले सांसद तथा मर्यादापालकबीचको घम्साघम्सीमा सत्तापक्ष कांंग्रेसका सांसद बस्ने पहिलो ‘रो’ को टेबुल भाँचियो। अर्थमन्त्री रोस्ट्रममा गएपछि एमाले सांसद झन् आक्रामक भएका थिए। प्रधानमन्त्री शेरबहादुर देउवा, एमाले अध्याक्ष केपी ओली, माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधव नेपाल भने आआफ्नो स्थानमा बसेर हेरिरहेका थिए।
उग्र बनेका एमाले सांसद रोस्ट्रमतर्फ बढ्न खोज्दा मर्यादापालकले घेराबन्दीमा पारेर रोकेका थिए। त्यसपछि एमाले सांसदले टेबुल लडाएका थिए। सत्तापक्षको पहिलो ‘रो’ मा कांग्रेस सांसद शशांक कोइराला, प्रकाशमान सिंह र सीतादेवी यादव थिए। घम्साघम्सीमा कांग्रेसका सांसदलाई जोगाउन दिलेन्द्रप्रसाद बडु र देवप्रकाश तिमल्सिना अगाडि सरेका थिए। टेबुल भाँचिएपछि कोइराला, सिंह र यादव पछिको ‘रो’ मा गएर बसेका थिए।
तेस्रो बैठकमा पनि एमाले सांसदले नाराबाजी गरे। सभामुखले अर्थमन्त्री शर्मालाई प्रतिस्थापन विधेयक पेस गर्न अनुमति दिए। अर्थमन्त्रीलाई मर्यादापालकले रोस्ट्रममा पुर्याएका थिए। अर्थमन्त्री शर्माले दोस्रो बैठकमा स्वीकृत भएका आर्थिक अध्यादेश २०७८, राष्ट्र ऋण उठाउने अध्यादेश २०७८, विनियोजन अध्यादेश २०७८ लाई प्रतिस्थापन (रिप्लेसमेन्ट) गर्ने विधेयक प्रस्तुत गरे।
उनले पूर्ववर्ती ओली सरकारले ल्याएको बजेट अध्यादेशलाई परिमार्जनसहित पेस गरे। अध्यादेशलाई परिमार्जन गरिएको अर्थमन्त्री शर्माले रोस्ट्रमबाट बताएपछि एमाले सांसद थप उत्तेजित भएका थिए। उनीहरू मर्यादापालकलाई ठेलेर रोस्ट्रमतर्फ अघि बढ्न खोजेका थिए। एमाले सांसद नारदमुिन राना थारु, आशा विक र नरबहादुर धामी अन्य सांसदको बुई चढेर रोस्ट्रमतर्फ जान खोजेका थिए। उनीहरूलाई रोक्न मर्यादापालकलाई हम्मेहम्मे परेको थियो। नागरिक दैनिकमा प्रकाशित समाचार साभार
प्रधानमन्त्री शेरबहादुर देउवा पहिले मन्त्रिपरिषद् विस्तार गरेर अमेरिकी सहयोग नियोग मिलेनियम च्यालेन्ज कर्पोरेसन (एमसीसी)बारे निर्णयमा पुग्ने तयारीमा रहेको उनी स्रोतले जानकारी दिएको छ ।
एमसीसी परियोजना, सरकार विस्तार, संसद् सञ्चालन, बजेट अध्यादेश र बजेट प्रतिस्थापन विधेयकका विषयमा छलफल गर्न शुक्रबार बसेको सत्ता गठबन्धनको बैठकमा प्रधानमन्त्रीले पहिले मन्त्रिपरिषद् विस्तार गर्ने संकेत गरेका हुन् ।
त्यसका लागि प्रधानमन्त्री देउवाले गठबन्धन आबद्ध दलका शीर्ष नेताहरूसँग आआफ्नो दलबाट मन्त्री बन्नेहरूको नाम मागेका छन् ।
‘प्रधानमन्त्री पहिले मन्त्रिपरिषद्लाई पूर्णता दिने सोचमा पुग्नुभएको छ, आइतबार या सोमबारसम्म मन्त्रिपरिषद् विस्तार गर्ने र त्यसपछि एमसीसीका विषयमा छलफल गर्ने गरी उहाँ अघि बढ्नुभएको छ,’ बैठकमा सहभागी एक नेताले राजधानीसँग भने ।
कांग्रेस महामन्त्री पूर्णबहादुर खड्काले गठबन्धन आबद्ध दलको बैठकमा सरकार विस्तार, संसद् सञ्चालन, बजेट अध्यादेश र बजेट प्रतिस्थापन विधेयकका विषयमा छलफल भएको जानकारी दिए ।
बैठकमा प्रधानमन्त्री देउवाले मन्त्रिपरिषद्लाई पूर्णता दिन ढिला भएको भन्दै छिटो मन्त्रीको नाम दिन गठबन्धनका नेतासँग आग्रह गरेको राष्ट्रिय जनमोर्चाकी उपाध्यक्ष दुर्गा पौडेले जानकारी दिइन् ।
कांग्रेस नेता मीन विश्वकर्माले एमसीसीको विषयलाई दफाबार छलफल गरेर टुंग्याइनुपर्ने बताए । ‘एमसीसीका विषयमा दफाबार छलफल हुनुपर्छ, पोका देखाएर यसमा यो छ भनेर अनुमान गरेर हुँदैन, बृहत् छलफल गरिनुपर्छ, प्रधानमन्त्री पनि मन्त्रिपरिषद् विस्तारपछि एमसीसीमा टुंगोमा पुग्ने गरी अघि बढ्नुभएको छ,’ विश्वकर्माले थपे ।
कांग्रेस नेताहरूका अनुसार प्रधानमन्त्री देउवाले पहिले मन्त्रिपरिषद् विस्तार गर्ने र त्यसपछि अर्थविज्ञसँग एमसीसीबारे छलफल गरेर धारणा लिनेछन् । त्यसपछि राजनीतिक दलका नेताहरूसँग प्रधानमन्त्रीले एमसीसीबारे छलफल गर्ने योजना बनाएका छन् । सबैसँगको छलफलपछि प्रधानमन्त्री देउवाले एमसीसीलाई संसद्मा पेस गर्ने रणनीति बनाएका छन् ।
२९ असारमा प्रधानमन्त्री नियुक्त भएका देउवाले दुई महिनाको अवधिमा पनि मन्त्रिपरिषद्लाई पूर्णता दिन सकेका छैनन् । अहिले सरकारमा चार मन्त्री र एक राज्यमन्त्री मात्र छन् । मन्त्रिपरिषद्लाई चाँडो पूर्णता दिन प्रधानमन्त्री देउवालाई पार्टीभित्रबाट दबाब छ ।
शुक्रबारको गठबन्धन आबद्ध दलको बैठकमा प्रधानमन्त्री देउवा, नेकपा (माओवादी केन्द्र)का अध्यक्ष पुष्पकमल दाहाल, नेकपा (एकीकृत समाजवादी)का अध्यक्ष माधवकुमार नेपाल, जनता समाजवादी पार्टी नेपाल (जसपा)का अध्यक्ष उपेन्द्र यादव र राष्ट्रिय जनमोर्चाकी दुर्गा पौडेल सहभागी थिए । राजधानी दैनिकमा प्रकाशित समाचार साभार