मकवानपुर/लामो समयदेखि विद्यालय व्यवस्थापन समिति विहीन रहदै आएको हेटौंडा उपमहानगरपालिकाको सिद्धार्थ माध्यमिक विद्यालयमा सोमबार समिति गठन गरिएको छ ।
एक वर्ष यता विद्यालय व्यवस्थापन समिति विहीन रहदै आएको विद्यालयमा सोमबार सर्वसम्मत नेतृत्व चयन गरिएको विद्यालयका प्रध्यानाध्यापक मोहनप्रसाद शर्माले बताए । सोमबार भएको अभिभावक भेलाले अभिभावकहरु बलराम घिमिरे, सरिता दाहाल, रामचन्द्र बर्तौला, लक्ष्मी श्रेष्ठलाई व्यवस्थापन समितिको लागि चयन गरेको थियो । सदस्य सचिव एवम् विद्यालयका प्रध्यानाध्यापक मोहनप्रसाद शर्मा तथा स्थानीय राजनैतिक दलका आमन्त्रित अतिथीहरुको समेत उपस्थितीमा भएको पहिलो बैठकले पिताम्बर बास्तोला, ज्ञानु परियार र वडा प्रतिनिधिको रुपमा हेटौंडा–२ का वडा सदस्य महेश्वरमान श्रेष्ठलाई मनोनित गर्दै समितिलाई पूर्णता दिइएको छ । पहिलो बैठकले समितिको अध्यक्षमा बलराम घिमिरेलाई सर्वसम्मत चयन गरेको सदस्य सचिव तथा प्रध्यानाध्यापक मोहनप्रसाद शर्माले बताए ।
बिद्यालयको ४४ औं अभिभावक भेलामा बोल्दै हेटौंडा उपमहानगरपालिकाका मेयर हरि बहादुर महतले शिक्षा क्षेत्रमा राजनीति नगर्ने आग्रह गरे । उनले सबै सामुदायिक बिद्यालयले अग्रेजी माध्यममा अध्यापन गराउनका लागि पहल भैरहेको बताए ।

अभिभावक भेलामा कार्यक्रममा हेटौंडा–२ का वडा सदस्यहरु महेश्वरमान श्रेष्ठ, रेणु गुरुङ, समाजवेवीहरु, प्रधानध्यापक, बिद्यालयका शिक्षकहरु लगायतकाको सहभागिता रहेको थियो ।
यसैगरी बैठकले भीम कुमार श्रेष्ठको अध्यक्षतामा शिक्षक अभिभावक संघ (पीटीए) पनि गठन गरेको छ । पीटीएका सदस्यहरुमा विष्णुप्रसाद न्यौपाने, रेखा रिजाल, गणेशप्रसाद हुमागाई, राजन घिमिरे चयन गरिएको छ । बाँकी सदस्यरु आगमी बैठकले मनोनित गर्ने अध्यक्ष घिमिरेले बताए ।
गत बैशाखमा विद्यालय व्यवस्थापन समिति गठनको तयारी हुँदा राजनैतिक हस्तक्षेपको कारण समिति बन्न सकेको थिएन । विद्यालय व्यवस्थापन समिति नहुँदा विद्यालयको विभिन्न नियमित क्रियाकलापमा समेत अफ्ठ्यारो परिस्थिती सामना गर्दै आउनु परेको विद्यालयमा प्रध्यानाध्यापक शर्माले बताए । झण्डै १ हजार ८ सय विद्यार्थी अध्ययनरत यो विद्यालय प्रदेश सरकारको बिग स्कुल कार्यक्रमको लागि छनौट भएको विद्यालयका अंग्रेजी माध्यम संयाेजक शिक्षक गणेश हुमगाईले बताए ।
नेपाली कांग्रेसका अधिकांश शीर्ष नेता आगामी स्थानीय तह निर्वाचनमा सत्ता गठबन्धनमा आबद्ध दलबीच चुनावी तालमेलको पक्षमा उभिएका छन् ।
कांग्रेस सभापतिसमेत रहेका प्रधानमन्त्री शेरबहादुर देउवा चुनावी तालमेलका पक्षमा प्रस्ट छन् । उनले गठबन्धन आबद्ध दलबीच आवश्यकताको सिद्धान्तका आधारमा तालमेल हुने बताउँदै आइरहेका छन् । यो विषयमा शीर्ष नेताले जारी केन्द्रीय समिति बैठकमा मुख खोल्दै गएका छन् ।
सभापति देउवासँगै नेता रामचन्द्र पौडेल, प्रकाशमान सिंह, डा. शशांक कोइराला, कृष्णप्रसाद सिटौला र नेतृ सुजाता कोइराला पनि सत्ता गठबन्धन आबद्ध दलबीच चुनावी तालमेलको पक्षमा उभिएका छन् ।
तर, कांग्रेसको गत मंसिरमा सम्पन्न १४औं महाधिवेशनबाट संस्थापन इतर पक्षको नेतृत्व सम्हाल्दै आएका नेता डा. शेखर कोइराला भने कांग्रेस कसैसँग तालमेल नगरी एक्लै निर्वाचनमा अघि बढ्नुपर्नेतर्फ जोड दिँदै आइरहेका छन् । उनले कांग्रेसले अरूको साथ खोजेर अघि बढ्ने हो भने भारतीय कांग्रेस पार्टी कांग्रेस आईको जस्तो अवस्थामा खुम्चिन पुग्ने चेतावनीसमेत दिँदै आएका छन् ।
यसैगरी १४औं महाधिवेशनमा सभापतिको उम्मेदवार बनेर मैदानमा होमिएका नेता विमलेन्द्र निधिसमेत तालमेलको विपक्षमा छन् । उनले कांग्रेसले कसैसँग तालमेल नगरी एक्लै निर्वाचनमा अघि बढ्नुपर्ने धारणा राखेका छन् ।
सभापति शेरबहादुर देउवासँगै नेता रामचन्द्र पौडेल, प्रकाशमान सिंह, डा. शशांक कोइराला, कृष्णप्रसाद सिटौला र नेतृ सुजाता कोइराला सत्ता गठबन्धनमा आबद्ध दलबीच चुनावी तालमेलको पक्षमा उभिँदा शेखर कोइराला पक्षले भने कसैसँग तालमेल नगरी एक्लै निर्वाचनमा अघि बढ्नुपर्ने धारणा राख्दै आएको छ । विमलेन्द्र निधि पनि तालमेलको विपक्षमा उभिएका छन् ।
स्थानीय तह निर्वाचनको तयारी, दलबीच तालमेल, संसदीय समिति गठनलगायतका विषयमा कांग्रेसले गत शुक्रबारबाट केन्द्रीय समिति बैठकमा छलफल गर्दै आइरहेको छ ।
बैठकमार्फत नै कांग्रेसले आगामी निर्वाचनमा कसरी अघि बढ्ने भन्ने विषयमा स्थानीय तह निर्वाचनका लागि ७७ वटै जिल्लामा पार्टीका तर्फबाट खटिएका केन्द्रीय प्रतिनिधिसँग पनि राय लिइरहेको छ ।
यसैगरी, कांग्रेसले सातै प्रदेशका पार्टीका प्रदेश सभापतिसँग समेत स्थानीय तहको निर्वाचनमा कसरी अघि बढ्ने भन्ने विषयमा राय लिएको छ ।
महानगरमा केन्द्रबाटै तालमेल, अन्यमा तलैबाट
नेपाली कांग्रेसले स्थानीय तहको सबैभन्दा ठूलो संरचना महानगरपालिकामा केन्द्रबाटै चुनावी तालमेल’काे निर्णय गर्ने तयारी गरेको छ । कांग्रेस केन्द्रीय समितिलाई विधानले समेत त्यो अधिकार दिएको छ ।
यसैगरी, उपमहानगरपालिका, नगरपालिका तहमा पनि केन्द्रीय नेतृत्वसँगको रायबाट उम्मेदवार तय गर्ने विषयमा कांग्रेस अघि बढेको छ भने गाउँपालिका तहमा स्थानीय राजनीतिक नेतृत्वसँगको सहमतिका आधारमा तालमेल’ निर्णय गर्ने कांग्रेसको तयारी छ ।
कांग्रेस विधानअनुसार महानगरपालिका प्रमुख–उपप्रमुखको केन्द्रीय संसदीय समितिले, नगरपालिका र उपमहानगरपालिका प्रमुख–उपप्रमुखको प्रदेश संसदीय समितिले, गाउँपालिका प्रमुख–उपप्रमुखको जिल्ला संसदीय समितिले र वडाध्यक्ष तथा सदस्यको प्रतिनिधिसभा क्षेत्र संसदीय समितिले उम्मेदवारको टुंगो लगाउनुपर्छ ।
विधानअनुसार संसदीय समितिले गर्ने निर्णयलाई सम्बन्धित कार्यसमितिले अनुमोदन गर्नुपर्छ । संसदीय समितिमा सम्बन्धित कार्यसमितिका पदाधिकारीका साथै सभापतिको प्रस्तावमा निश्चित संख्यामा सदस्य मनोनित गर्ने व्यवस्था छ ।
कांग्रेसले महानगरपालिका, उपमहानगरपालिका, नगरपालिका तथा गाउँपालिकाका उम्मेदवार छान्न संसदीय बोर्ड बनाउँदै छ । विधानले १ सय ६५ प्रतिनिधिसभा निर्वाचन क्षेत्र, ७७ जिल्ला, ७ प्रदेश र केन्द्रमा संसदीय समितिको परिकल्पना गरेको छ । कांग्रेस विधानअनुसार निर्वाचनका लागि उम्मेदवार छान्ने सबैभन्दा शक्तिशाली संरचना संसदीय समिति नै हो । यी विभिन्न तहमा गठन हुने समितिले तहगत रूपमा निर्वाचनका लागि उम्मेदवार छान्ने अधिकार राख्छन् ।
कांग्रेस विधानको धारा ३३ मा संसदीय समितिको गठन’ उल्लेख छ । सो धाराको (१)मा कुनै पनि तहको प्रत्यक्षतर्फको उम्मेदवार मनोनयन दर्ता हुने मितिभन्दा एक महिनापूर्व उम्मेदवारको अन्तिम निर्णय गरिसक्नुपर्ने उल्लेख छ । ती समितिले निर्वाचनका लागि उम्मेदवारी दर्ता हुनु एक महिनापूर्व नै अन्तिम निर्णय गरिसक्नुपर्ने विधानमा उल्लेख छ ।
कांग्रेस विधानअनुसार संसदीय समितिमा पुग्नुअघि तल्लो तहको कार्यसमितिले प्रत्येक पदमा एक महिलासहित ३ जनाको नाम सिफारिस गर्नुपर्छ । कांग्रेसका तल्ला तहबाट प्रक्रियागत रूपमा सिफारिस भएर आएका नाममध्येबाट उम्मेदवार चयन हुने व्यवस्था विधानमा छ । राजधानी दैनिकबाट
मकवानपुर । मकवानपुरको पिप्ले युवा क्लबले सर्लाहीमा भएकाे छैठौं राजर्षी गोल्डकपको उपाधि हात पारेकाे छ । राजर्षी गाेल्डकपकाे पाचाैं संस्करणकाे विजेता पिप्लेले लिग विजेता मछिन्द्र फुटबल क्लबलाई सडन डेथमा पराजित गर्दै उपाधि जितेकाे हाे ।
९० मिनेटको निर्धारित समय गोलरहित बराबरी भएपछि खेल पेनाल्टीतर्फ धकेलिएको थियो । पेनाल्टीमा पनि ३–३ गोलको बराबरी भएपछि सडन डेथको पहिलो प्रहारमै पिप्ले विजयी भएको हो । सडन डेथमा मच्छिन्द्रका छिरिङ गुरुङको प्रहार क्रसबारमा लागेर फर्किएपछि पिप्लेका रुपमबहादुर लामाले प्रहार गरेको गोल नै निर्णायक सावित भयो ।
पिप्लेका गोलरक्षक अशोक बरालको उत्कृष्ट बचाउसँगै पिप्ले लगातार दोस्रो पटक उपाधि जित्न सफल भएको हो । उपाधिसँगै पिप्ले युवा क्लबले नगद १० लाख रुपैयाँ जितेको छ भने उपविजेता मच्छिन्द्रले ५ लाख रुपैयाँ प्राप्त गरेको छ । ‘ए’ डिभिजन क्लब
पेनाल्टीमा मच्छिन्द्रको तर्फबाट बिमल घर्ती मगरको पहिलो प्रहार नै रोक्न सफल पिप्लेका गोलरक्षक अशोक बरालले पेनाल्टीमा पछि परेको स्थितिमा मच्छिन्द्रका देवेन्द्र तामाङको अन्तिम प्रहार पनि रोकेका थिए । मच्छिन्द्रको तर्फबाट सुजल श्रेष्ठ, विजय धिमाल र अफ्रिकी खेलाडी करिमको प्रहार गोलमा परिणत भएको थियो ।
पिप्ले युवा क्लबका अशोक खवास, समीरराज थोकर र अमीर श्रेष्ठको प्रहार गोलमा परिणत हुँदा कुलदीप कार्कीको प्रहार क्रसबारभन्दा माथिबाट बाहिरियो । यस्तै अफ्रिकी खेलाडी मार्टिन्सको प्रहार मच्छिन्द्रका गोलरक्षक विशाल श्रेष्ठले रोकेका थिए । फाइनल खेलको म्यान अफ द म्याच पिप्ले युबा क्लबका गाेलकिपर अशोक बराल भएका थिए ।
प्लेयर अफ द टुर्नामेन्ट पिप्ले युवा क्लबका रुपबहादुर लामा घोषित भएका छन् । उनले ५१ हजार रुपैयाँ नगद प्राप्त गरेका छन् । यस्तै प्रतियोगिताको उत्कृष्ट प्रशिक्षक पिप्लेका सुविन घिमिरे, उत्कृष्ट स्ट्राइकर मच्छिन्द्रका बिमल घर्ती मगर, उत्कृष्ट गोलरक्षक मच्छिन्द्रका विशाल श्रेष्ठ, उत्कृष्ट डिफेन्डर बागमती युवा क्लबका अमर श्रेष्ठ र उत्कृष्ट मिडफिल्डर मच्छिन्द्रका सुजल श्रेष्ठ घोषित भए ।

मकवानपुर । नेपाल र चीनबीच शनिबार ९ वटा समझदारी तथा सम्झौतापत्रमा हस्ताक्षर भएको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा नेपाल र चीनको विदेशमन्त्री स्तरीय बैठक भएकाे थियाे । बैठक पछि दुई देशका सम्बन्धित अधिकारीले ती समझदारी तथा सम्झौतापत्रमा हस्ताक्षर गरेका हुन् ।
परराष्ट्रमन्त्री डा नारायण खड्का र चिनियाँ विदेशमन्त्री वाङ यीको उपस्थितीमा सम्बन्धीत अधिकारीले ती समझदारी तथा सम्झौतापत्रमा हस्ताक्षर गरेका थिए । शनिबार हस्ताक्षर भएका सम्झौतामा आर्थिक तथा प्राविधिक सहयोगसम्बन्धी सम्झौता, चीन–नेपाल क्रस बोर्डर रेलवे परियोजनाको सम्भाव्यता अध्ययनका लागि चिनियाँ सहायता, ऊर्जा तथा जलस्रोत क्षेत्रमा सहयोग सम्झौता (चीन–नेपाल पावर ग्रिड इन्टरकनेक्शनको सम्भाव्यता अध्ययन), भन्सारको सामान्य प्रशासन सम्बन्धी प्रोटोकल (नेपालबाट चीनमा सुरक्षित तवरमा हेलेज निर्यात) रहेका छन् ।
यसैगरी भन्सार छुट गराउने सम्बन्धी एक्सचेन्ज पत्रमा हस्ताक्षर, अरनिको राजमार्ग मर्मतसम्भार परियोजनाको हस्तान्तरण, रेल क्षेत्रमा सहयोग अभिवृद्धि गर्ने, चीनको नेशनल रेलवे प्रशासनले नेपालको रेल क्षेत्रमा सहयोग बढाउने र नेपाललाई कोभिड–१९ खोप वितरण र स्वीकृति प्रमाणपत्रमा हस्ताक्षर रहेका छन् ।
मकवानपुर । प्रथम बागमती प्रदेश खेलकुद प्रतियोगता अन्तर्गत महिला फुटबलकाे उपाधी मकवानपुरले जितेको छ । प्रदेश खेलकुद विकास परिषद् बागमती प्रदेशको आयोजनामा भएकाे खेलकुदमा मकवानपुरले धादिङलाई पराजित गर्दै महिला फुटबलकाे उपाधी हात पारेकाे हाे ।
काभ्रेस्थित धुलिखेल खेलमैदानमा भएको फालइन खेलमा मकवानपुरले धादिङलाई १–० गोल अन्तरले पराजित गरेकाे हाे । निकै प्रतिस्पर्धात्मक फाइनल खेलका पहिलो हाफ र दोस्रोमा दुबै टोली गोल गर्न सकेनन् । दोस्रो हाफको इन्जुरी समयमा गोल गर्दै मकवानपुरले पहिलो उपाधी जितेको हो । मकवानपुरका लागि सञ्जिता बोम्जन (साम्भा) ले गोल गरिन् । उनले खेलको इन्जुरी समयमा गरेको गोल जितकाे लागि निर्णयक बनेकाे हाे । खेलकाे म्यान अफ द म्याच मकवानपुरकी सञ्जिता भइन् ।
प्रदेश खेलकुद प्रतियोगिता अन्तर्गत यसअघि हेटौंडामा सम्पन्न पुरुष फुटबलतर्फ ललितपुरलाई ट्राइब्रेकरमा पराजित गर्दै उपाधि जितेको थियो । प्रतियोगिता अन्तरगत चितवनमा भएकाे पुरुषतर्फको क्रिकेट खेलकाे उपाधि समेत मकवानपुरले हात पारेको थियाे । खेलको समापन कार्यक्रम १२ गते शनिबार काभ्रेको धुलिखेलमा हुनेछ ।