मकवानपुर । हाल देशमा पश्चिमी वायुको सामान्य प्रभाव रहेको जल तथा मौसम बिज्ञान बिभागको मौसम पूर्वानुमान महाशाखाले जनाएको छ ।
महाशाखाका अनुसार शुक्रबार दिउँसो प्रदेश १, बागमती र गण्डकीका पहाडी भूभागमा आंशिक बदलीको सम्भावना छ । बाँकी भूभागमा मौसम सामान्यतया सफा रहनेछ ।
राति प्रदेश १ र गण्डकी प्रदेशका पहाडी भूभागमा आंशिक बदली रहनेछ ।
शनिबार सुदूरपश्चिम, कर्णाली र प्रदेश १ का पहाडी भूभागमा आंशिक बदलीको सम्भावना छ महाशाखाले जनाएको छ। महाशाखाका अनुसार पछिल्ला दुई दिनमा प्रदेश १ र गण्डकीका केहि स्थानमा हल्का वर्षाको सम्भावना छ ।
प्रदेश १, बागमती र गण्डकीका हिमाली भूभागमा हल्का हिमपातको पनि आकलन गरिएकोले महाशाखाले पर्वतारोहण र पदयात्रामा जाँदा सतर्कता अपनाउन भनेको छ ।
मकवानपुर । मंसिर ४ गते एकै चरणमा हुने प्रतिनिधि सभा तथा प्रदेश सभा सदस्य निर्वाचनको सम्पूर्ण तयारी पूरा भएकाे निर्वाचन आयोगले जनाएकाे छ । निर्वाचनमा देशभर १ करोड ७९ लाख ८८ हजार ५ सय ७० मतदाताले आफ्नाे मताधिकार प्रयाेग गर्ने भएका छन् । उनीहरुले १० हजार ८ सय ९२ मतदान स्थलमा रहेका २२ हजार २ सय २७ मतदान केन्द्रबाट मताधिकार प्रयोग गर्ने आयाेगले जानकारी दिएकाे छ ।
यसैगरी १४१ अस्थायी मतदान केन्द्र र आफूलाई पायक पर्ने तथा आफू खटिएका मतदान केन्द्रबाट करिब ४ लाख ५० हजार अस्थायी मतदाताले प्रतिनिधि सभाको समानुपातिक निर्वाचन प्रणालीतर्फ मतदान गर्ने निर्वाचन आयाेगले विहीबार गरेका पत्रकार सम्मेलनमा बताएकाे छ । निर्वाचनमा प्रतिनिधि सभातर्फ पहिलो हुने निर्वाचित हुने निर्वाचन प्रणालीका लागि २ हजार ४ सय १२ जना उम्मेदवार चुनावी प्रतिस्पर्धामा रहेका छन् । यसैगरी प्रतिनिधि सभाको समानुपातिक निर्वाचन प्रणालीतर्फ २ हजार १ सय ९९ उम्मेदवारको नाम अन्तिम बन्द सूचीमा कायम गरिएको आयाेगले बताएकाे छ ।
प्रदेश सभातर्फ पहिलो हुने निर्वाचिन हुने निर्वाचन प्रणालीका लागि ३ हजार २ सय २४ जना उम्मेदवार चुनावी प्रतिस्पर्धामा रहेकाेमा प्रदेश सभाको समानुपातिक निर्वाचन प्रणालीतर्फ ३ हजार ७ सय ८ जना उम्मेदवारको नाम अन्तिम बन्द सूचीमा कायम रहेकाे बताइएकाे छ । यसरी आसन्न निर्वाचनमा प्रतिनिधि तथा प्रदेश सभाको पहिलो हुने निर्वाचित हुने निर्वाचन प्रणालीका लागि कूल ५ हजार ६ सय ३६ उम्मेदवार चुनावी प्रतिस्पर्धामा रहेकाेमा प्रतिनिधि तथा प्रदेश सभाको समानुपातिक निर्वाचन प्रणालीतर्फ ५ हजार ९ सय ७ उम्मेदवारको नाम अन्तिम बन्द सूचीमा कायम गरिएको छ ।
प्रतिनिधि सभा तथा प्रदेश सभाको पहिलो हुने निर्वाचित हुने निर्वाचन प्रणालीका लागि ३ करोड ९९ लाख ६२ हजार ५ सय मतपत्र र प्रतिनिधि सभा तथा प्रदेश सभाको समानुपातिक निर्वाचन प्रणालीका लागि ४ करोड ६ लाख ५ हजार गरी कूल ८ करोड ५ लाख ६७ हजार ५ सय मतपत्र सम्बन्धित जिल्जामा पठाइसेकाे आयाेगले जनाएकाे हाे ।
मंसिर ४ काे निर्वाचनसम्बन्धी काम कारवाहीको पर्यवेक्षणद्वारा निर्वाचनको विश्वसनीयता अभिवृद्धि गर्न भारत, भुटान, बंगलादेश र माल्दिभ्सका प्रमुख निर्वाचन आयुक्त र श्रीलंका र दक्षिण कोरियाका निर्वाचन आयुक्तसहितको टोलीले निर्वाचन पर्यवेक्षण गर्ने भएका छन् । नेपालस्थित १८ वटा कुटनीतिक नियोगहरूबाट समेत मतदानको दिनको अवलोकन गरिने भएको छ । अनुमति प्राप्त ४४ वटा राष्ट्रिय संस्थाबाट ७ हजार २ सय ७ र २ वटा अन्तर्राष्ट्रिय संस्थाबाट १२ जना गरी ७ हजार २ सय १९ जनालाई आयोगले पर्यवेक्षण परिचय पत्र उपलब्ध गराएकाे जनाएकाे छ । पर्यवेक्षकहरूले प्रतिनिधि सभाको पहिलो हुने निर्वाचित प्रणालीको १ सय ६५ निर्वाचन क्षेत्र र प्रदेश सभाको पहिलो हुने निर्वाचित निर्वाचन प्रणालीको ३ सय ३० वटै निर्वाचन क्षेत्रमा निर्वाचन पर्यवेक्षण गर्ने छन् ।
मतदानका लागि मतपत्र र निर्वाचन सामग्रीसहित करिब २ लाख ४६ हजार ९ सय ६० कर्मचारी एवं आवश्यकता अनुसारका सुरक्षाकर्मी मतदान स्थलमा पुगिसकेकाे आयाेगकाे दावी छ । मतदान केन्द्रमा पुगेका मतदान अधिकृतबाट सर्वपक्षीय बैठक राख्ने, मतदान केन्द्रको क्षेत्र तोक्ने, प्रचारप्रसार गर्न निषेध गरेको सूचना प्रकाशन गर्ने, शान्ति भंग गर्न निषेध गरेको सूचना प्रकाशन गर्ने, मादक पदार्थ निषेध गर्ने तथा हातहतियार लिएर हिँडन वा प्रयोग गर्न नदिने लगायत विषयमा आवश्यक तयारी विहीबारबाटै सुरु गर्ने समेत आयाेगले पत्रकार सम्मेलनमा जनाएकाे हाे ।
त्यसैगरी आगामी दुई दिनभित्र मतदानमा खटिएका कर्मचारी एवं सुरक्षाकर्मीबाट मतदान केन्द्रको निर्माण कार्य सम्पन्न हुनेछ । मतदान केन्द्र निर्माण गर्दा लैंगिक समावेशी, अपांगता मैत्री तथा सुत्केरी, गर्भवती, ज्येष्ठ नागरिक, बिरामी र अशक्त मतदाताका लागि सहज हुने गरी बनाउन आवश्यक निर्देशन दिइएको छ । मतदान शुरू हुने दिन भन्दा ४८ घण्टा अघिदेखि मतगणना सम्पन्न नभएसम्म मदिरा बिक्री वितरण तथा सेवन गर्ने/गराउने कार्यलाई पूर्ण रूपले निधेष गर्ने व्यवस्था मिलाउन जिल्ला आचारसंहिता अनुगमन समिति र स्थानीय प्रशासनलाई सक्रिय बनाइएको आयाेग बताउँछ ।
नेपाल प्रहरी, सशस्त्र प्रहरी बल, राष्ट्रिय अनुसन्धान विभाग, अन्य सरकारी निकायका स्थानीय तहमा रहेका कार्यालय तथा निर्वाचन सुरक्षामा खटिएका सुरक्षाकर्मीलाई मदिरा बिक्री वितरण, ओसार पसार तथा सेवन गर्ने/गराउने कार्यको सूक्ष्म अनुगमन गरी आवश्यक कारवाहीको व्यवस्था मिलाउन पनि निर्देशन दिइएको छ । मतदान हुने दिन भन्दा ४८ घण्टा अघिदेखि मतगणनाको काम पूरा नभएसम्म निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा सम्मेलन, कार्यशाला गोष्ठी तथा मस्तिस्क मन्थन लगायतका कुनै पनि विधि, प्रक्रिया वा माध्यमबाट मत माग्न र निर्वाचन प्रचारप्रसार गर्न नपाइने आयाेगले जनाएकाे छ ।
त्यसैगरी यस अवधिमा सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसार सामग्री पोष्ट वा शेयर गर्न वा गराउन समेत नपाइने व्यवस्था छ । त्यसैले आयोगले सामाजिक सञ्जाल तथा अनलाइनमार्फत गरिएका निर्वाचन प्रचारप्रसार सम्बन्धी विज्ञापन हटाउन निर्देशन दिइसकेको छ भने यस्ता विज्ञापनको अनुगमन गर्न विज्ञापन बोर्डलाई निर्देशन दिइएको छ ।
कसैले कसैलाई धाक, धम्की, डर वा त्रास देखाई वा अन्य कुनै किसिमले अनुचित प्रभावमा पारी कुनै निर्वाचन क्षेत्र वा मतदान केन्द्रमा निर्वाचनको कुनै काम वा मतदानको कामको निष्पक्षता र स्वतन्त्रतामा असर पु¥याउने काम गरेमा निर्वाचनको काममा खटिएका कर्मचारी, सुुरक्षाकर्मी, अनुगमनकर्ता, पर्यवेक्षक वा जो कोहीले आफ्नो कर्तव्य सम्झी सूचना दिन, त्यस्तो कार्य रोक्न वा कानून बमोजिम कारवाही गर्न विशेष निर्देशन समेत आयाेगले दिइएको छ ।
मतदानको दिनभन्दा अगाडि र मतदान सम्पन्न भएपछि अन्तिम नतिजा नआउँदासम्म निहीत राजनीतिक स्वार्थले निर्वाचनको निष्ठालाई आघात पुर्याउने गरी देशभित्र र बाहिरबाट सामाजिक सञ्जालमार्फत फैलिन सक्ने मिथ्या सूचना, दुष्प्रचार र द्वेषपूर्ण अभिव्यक्तिका कारण निर्वाचन व्यवस्थापन तथा सञ्चालन प्रभावित हुन सक्नेतर्फ आयोग सचेत रहेको समेत जनाएकाे छ । सामाजिक सञ्जालमार्फत मिथ्या सूचना, दुष्प्रचार एवं द्वेषपूर्ण अभिव्यक्तिका माध्यमबाट निर्वाचनको निष्ठामाथि प्रश्न उठाउने अवस्था आउन नदिन आयोग संवेदनशील रहेकाे बताइएकाे छ ।
निर्वाचनलाई स्वच्छ, स्वतन्त्र, निष्पक्ष, भयरहित, पारदर्शी एवं विश्वसनीय बनाउन आयोगले आवश्यक सुरक्षा प्रबन्ध मिलाइसकेको जनाएकाे छ । निर्वाचन बिथोल्ने वा बहिष्कार गर्ने, बुथ कब्जा गर्ने, मतदातालाई मतदानको अवसरबाट वञ्चित गर्ने, डर, धाक, धम्की दिने लगायतका कार्यहरू गरी निर्वाचनको स्वच्छतामा असर पुर्याउने कुनै पनि गतिविधिहरू रोक्न आवश्यक सुरक्षा रणनीतिसहित सुरक्षाकर्मी परिचालन गरिएको आयाेगले जनाएकाे छ । निर्वाचन सुरक्षाका लागि प्रत्येक मतदान केन्द्रमा आवश्यक सुरक्षाकर्मीसहित तीन घेराको सुरक्षा व्यवस्थाका अतिरिक्त ३० मिनेटभित्र पुग्न सक्ने गरी पर्याप्त सुरक्षाकर्मीको रिजर्भ फोर्सको व्यवस्था गरिएको आयाेगले जानकारी दिएकाे छ । निर्वाचन सुरक्षा जोखिमका आधारमा आवश्यकता अनुसार सुरक्षा गस्ती परिचालन तथा क्षेत्रगत संवेदनशीलतालाई मध्यनजर गरी पर्याप्त मात्रामा अधिकार सम्पन्न घुम्ती टोली परिचालन गर्ने व्यवस्था मिलाइएको छ ।
‘आयोगले निर्वाचनको सञ्चालन र व्यवस्थापनसम्बन्धी सम्पूर्ण व्यवस्थापकीय कार्य सम्पन्न गरिसकेको छ’ प्रमुख निर्वाचन आयुक्त दिनेश थपलियाले भने ‘आवश्यक सुरक्षा व्यवस्था मिलाइ सकिएकाले मतदाताहरूलाई कसैको डर, धाकधम्की, प्रलोभनमा नपरी आफूलाई मन परेको राजनीतिक दल तथा उम्मेदवारको निर्वाचन चिन्हमा मतदान गरी आफ्नो मताधिकार प्रयोग गर्न आग्रह गर्दछु ।’
मकवानपुर । मंशिर ४ गते हुने प्रतिनिधि सभा र प्रदेशसभा सदस्य निर्वाचनका लागि मतदानस्थल रहेका शिक्षण संस्थाहरु मंसिर २ गतेदेखि ५ गतेसम्म ३ दिन विदा हुने भएकाे छ । सरकारी कार्यालय र सार्वजनिक संस्थानहरु भने मंसिर ४ र ५ गते २ दिन मात्र विदा हुने भएकाे छ ।
गृहमन्त्रालयले मंगलबार सार्वजनिक विदा सम्बन्धी सूचना जारी गरी विदासम्बन्धी जानकारी दिएको हो । गृह मन्त्रालयका प्रवक्ता फणिन्द्रमणि पोखरेलले जारी गरेको सूचनामा सरकारी कार्यालय र सार्वजनिक संस्थानहरु ४ र ५ गते तथा मतदानस्थल रहेका शिक्षण संस्थाहरु २ गतेदेखि ५ गतेसम्म बन्द हुने उल्लेख छ ।
आगामी मंसिर ४ गते देशभर एकैचरणमा प्रतिनिधि सभा र प्रदेश सभा सदस्यको निर्वाचन हुँदैछ । निर्वाचनमा सरकारी विद्यालयका शिक्षक तथा निजामति संघ संस्थानका कर्मचारीलाई खटाइएको छ ।

मकवानपुर । आसन्न प्रतिनिधिसभा तथा प्रदेश सभा निर्वाचनमा राष्ट्रिय प्रजातन्त्र पार्टी कमजाेर नभएकाे मकवानपुर क्षेत्र नम्बर १ प्रदेश सभा ख का उम्मेदवार गुञ्जन बहादुर न्यौपाने बताएका छन् । राप्रपा कमजोर छैन प्रदेश सभा र प्रतिनिधि सभा दुवै जित्छौ हेटौडा उपमहनागरपालिकामा भएकाे चुनावी प्रचार प्रसारमा न्यौपानेले भने ‘मकवानपुरे जनताको आशा र भराेसा भएकाे पार्टी राप्रपा हाे । जनताका इच्छा र आकाङक्षा पूरा गर्न राप्रपा प्रतिबद्व छ ।’
‘न भ्रष्टाचार गरिन्छ न भ्रष्टाचार गर्न दिईन्छ’ भन्दै न्यापानेले भने ‘सके प्रदेश खारेज गरेर स्थानीय तह र केन्द्रीय सरकार बलियो र लोककल्याणकारी बनाईन्छ । नसके जनताको रगत, पसिनाको राजस्व र करको दुरुपयोगमा खबरदारी गरिन्छ ।’ आफ्नाे पार्टीकाे स्पष्ट बिचार रहेकाेले लप्पन छप्पन नभएकाे उनले बताए । उनले सरकार र व्यबस्थाको नाममा लुट धन्दा मच्चाउनु र परिवार पोस्न राजनीतिमा नआएकाे बताए । उनले भने ‘राजनीति मेरो सेवा हो मलामी कमाउने भन्दा माथिको स्वार्थ छैन ।’
‘जनतामा गएको छु जनजनको पिर, मार्का र व्यथा बुझेको छु । कहिले काहि देशको स्थिति देखेर एकान्तमा भक्कानिएर रोएको पनि छु’ उनले भने ‘हेटौडाकाे हुप्र चाैरमा १३ तले भ्युटावर बनाउनु सट्टा हेटौडा अस्पतालमा १३ तल्ले भवन (अस्पताल) हेटौंडा उप-महानगरपालिकाले बनाइनु पर्छ ।’ न्याैपानेले मकवानपुरको लागि सपना देखेको र साकार पार्ने संकल्प बोकेरे हिडेको बताए ।
जनतालाई भेडा भन्ने एक जमात र जनतालाई दास ठान्ने राजनीतिक दलहरुलाई बिवेक पुर्याउने बेला निर्वाचन आएको भन्दै उनले मकवानपुरको जनता जाग्ने बेला भएकाे बताए । नयाँ ईतिहासको उदय हुनेमा ढुक्क छु जनताको सेवक बनेर काम गर्नेछु उनले भने ।
मकवानपुर । मकवानपुरमा आसन्न प्रतिनिधि सभा तथा प्रदेश सभा सदस्य निर्वाचनकाे सन्दर्भमा उम्मेदवारहरु विभिन्न कार्यक्रममा व्यस्त रहन थालेका छन् । उद्याेगी व्यवसायी शैक्षिक युवा लगायतका संघ संस्थाहरुले निर्वाचन प्रचार प्रसारकाे समयमै उम्मेदवारहरुसँग अन्तरक्रिया समेत गर्दै आएका छन् ।
‘वर्तमान शैक्षिक समस्या समाधानमा संघ र प्रदेश सरकारको भूमिका विषयक’ कार्यक्रमा मकवानपुर निर्वाचन क्षेत्र नम्बर १ को प्रदेशसभा (क) का उम्मेदवार प्रेम बहादुर पुलामी (छिन्तु) ले मुलुकको समृद्धिका लागि गठबन्धन निर्माण भएकाले शैक्षिक क्षेत्रमा देखिएका समस्या हल गर्न पहल गरिने आश्वासन दिएका छन् । मकवानुरकाे बकैया गाउँपालिकामा भएकाे अन्तर्क्रिया कार्यक्रममा उनले भने ‘आफू बिजयी भए प्रदेश सरकारबाट आवश्यक नीति निर्माण गरी अस्थायी शिक्षकहरुलाई स्थायी प्रक्रियामा ल्याउने पहल सहित प्रतिबद्धता व्यक्त गर्दछु ।’
यस अघी समेत साेही क्षेत्रबाट प्रदेशसभा सदस्यमा निर्वाचित भएका नेकपा माओवादी केन्द्रबाट गठबन्धन तर्फका उम्मेदवार छिन्तुले आफू यस अघी प्रदेश सभामा रहँदा पनि शैक्षिक क्षेत्रको विकासका उल्लेखनीय कार्य गरेकाे बताए । कार्यक्रममा बकैया गाउँपालिकाका गठबन्धनतर्फका शिक्षक संघ संगठनका प्रतिनिधिहरुले निजामती कर्मचारी र शिक्षकबीचको विभेद अन्त्य गरी समान व्यवहार हुनुपर्नेमा जोड दिएका थिए ।
उनीहरुले राहत, अनुदान, निजी लगायत विभिन्न नाममा विभाजित शिक्षकहरुलाई दरबन्दीमा रुपान्तरण गर्दै आवश्यक प्रक्रिया पु¥याएर स्थायी गरिनुपर्ने उम्मेदवार छिन्तु समक्ष माग गरेका थिए । छिन्तुले शिक्षक संगठनकाे माग पछि भने दाेहाेर्याएर निर्वाचित भए तपाईहरुकाे मागलाइ सम्मबाेधन गर्दै निजामती कर्मचारी र शिक्षकबीचको विभेद अन्त्य गरि शैक्षिक क्षेत्रकाे विकृति अन्त्य गर्न नीति निर्माण तहमै काम गर्नेछु । सरकारले संघिय शिक्षा ऐन जारी गरी शिक्षा र शिक्षकको समस्या समाधान गर्न तथा शैक्षिक वर्षको सुरुवातसंगै नयाँपाठ्यपुस्तक प्रयाप्तता हुनेगरी व्यवस्था गर्न पनि संगठनले माग गरेका छन् ।
यसैबिच लोकतान्त्रिक बाम गठबन्धनतर्फका बकैया गाउँ कमिटीका शिक्षक संघ संगठनका प्रतिनिधिहरुले प्रदेशसभा सदस्य उम्मेदवार प्रेम बहादुर पुलामी (छिन्तु) लाई शिक्षकको पेशागत हकहित र समस्या समाधानमा पहल गर्न ध्यानाकर्षण पत्र समेत बुझाएका छन् । शनिवार नेपाल शिक्षक संघ, एकिकृत अखिल नेपाल शिक्षक संगठन र प्रगतीशिल नेपाल राष्ट्रिय शिक्षक संगठनका प्रतिनिधिले गाउँपालिका अध्यक्ष धर्मराज लामिछाने र उपाध्यक्ष भक्त बहादुर खत्रीको रोहवरमा उम्मेदवार छिन्तुलाई ध्यानाकर्षणपत्र बुझाएका हुन् ।
एकिकृत अखिल नेपाल शिक्षक संगठन बकैया गाउँ कमिटी अध्यक्ष मदन दाहालको अध्यक्षतामा भएको कार्यक्रममा नेकपा माओवादी केन्द्रका केन्द्रिय सदस्य विजय गौतम, गठबन्धनतर्फका क्षेत्र नम्बर १ प्रचारप्रसार संयोजक दामोदर खनाल, माओवादी केन्द्रकी समानुपातिक उम्मेदवार लक्ष्मी पाख्रिन लगायतको उपस्थिती रहेको थियो ।
