मकवानपुर । मकवानपुर जिल्लामा संचालन गरिएकाे पशु आहार अभियान कार्यक्रम सकिएकाे छ । जिल्ला दुग्ध उत्पादक सहकारी संघ मकवानपुरको समन्वय तथा प्रदेश दुग्ध विकास बोर्ड बागमती प्रदेशको आयोजनामा सप्ताहव्यापी पशु आहार अभियान समापन भएको हाे ।
अभियानकाे एक सातामा मकवानपुर जिल्लाको ६३ वटा सहकारीको २२५ जना सहभागीलाई विभिन्न ८ स्थानमा प्रशिक्षण गराईएको थियोे । किसानलाई दान उत्पादन, युरिया, मोलासेस, मिनरल ब्लक, परालमा युरिया उपचार,साईलेज बनाउने प्रविधी जस्ता विषयमा प्रशिक्षण गराइएको थियो ।
सैद्धान्तिकभन्दा प्रयोगात्मक सिकाइ गर्दा व्यवहारमा परिवर्तन गर्न प्रयास गरेको प्रदेश दुग्ध विकास बोर्ड निमित्त निर्देशक सजिता ज्ञवलीले बताइन् । पशु स्वास्थ पशु आहार नश्ल सुधार, बजारलाई व्यवस्थापन गर्न बोर्ड लागि परेको उनले बताइन् । पशु व्यवसायलाई बजारमा प्रतिस्पर्धा गर्न सक्षम बनाउन बोर्डले ध्यान दिएको उनले बताइन् । सिकेको सीप छिमेकी किसान र सहकारीका सदस्यबिचमा समेत हस्तान्तरण गर्न उनले सहभागीलाई आग्रह गरिन ।
गाउँ र पाखामा प्राप्त हुने मौसम घाँसलाई सन्चित गरेर सन्तुलित पशु आहार बनाउने साप्ताहव्यापी कार्यक्रम गरिएको जिल्ला दुग्ध उत्पादक सहकारी संघ अध्यक्ष हरिप्रसाद कंडेलले बताए । आहार सन्तुलित भएमा थोरै लगानीबाट पनि धेरै नाफा लिन सकिने अध्यक्ष कंडेलले बताए । एकातिर दूध नबिकेर हैरानी अर्को तिर पशु आहारको मूल्य वृद्धि भएका कारण आजित किसानलाई यस्तो तालिम उपलब्धि पूर्ण भएको कंडेलले बताए । किसानले आफैले घरैमा दाना उत्पादन गर्न सक्यो भने बजारबाट दाना किन्न गर्नुपर्ने लगानी घटाउन सकिने र दुधको पैसा नउठ्दाको पीडा कम गर्न राहत मिल्ने उनले बताए ।
दान किन्नुपर्ने बाध्यता र लागत घटाएर दाना बनाउन र सन्तुलन दाना बनाउन खुवाउन सकिने बारे सिकाइ भएको मनकामना दुग्ध उत्पादक सहकारी संस्था अध्यक्ष अर्जुन दाहालले बताए । सहकारीको प्रतिनिधि सहभागीभन्दा व्यवसायीक किसानलाई यस्तो तालिम आवश्यक भएको दाहालले बताए । किसान केन्द्रित भएर बोर्डले काम गर्नुपर्ने उनले बताए । पाखोबारीमा पोषिलो घाँस रोप्ने सन्तुलन आहार निर्माण गर्न पनि प्रेरणा मिलेको दाहालले बताए ।
पशु आहारा कसरी खुवाउने, आर्थिक लगानी र उपार्जनमा राहत कसरी लिने भन्ने सिकाइ र बुझाई भएको मनहरी साना किसान कृषि सहकारी अध्यक्ष बिमला कार्कीले बताइन् । सहभागीहरुलाई डाक्टर सन्तोष घिमिरे, शिवहरी घिमिरे, सत्रुधन साहले सहजीकरण गरेको बोर्डका पशु सेवा प्राविधिक प्रदिप सापकोटाले बताए ।
मकवानपुर । बागमती प्रदेशसभाको बर्खे अधिवेशन वैशाख ३१ गतेकाे लागि आह्वान गरिने भएको छ । बिहीबार बसेको बागमतीकाे मन्त्रिपरिषद् बैठकले वैशाख ३१ गते दिउँसो १ बजेका लागि बर्खे अधिवेशन आह्वान गर्न प्रदेश प्रमुख समक्ष सिफारिस गर्ने निर्णय गरेको हाे ।
बजेट अधिवेशन समेत भनिने बर्खे अधिवेशनमा सरकारको नीति तथा कार्यक्रमका साथै आगामी आर्थिक वर्षको बजेट संसदमा पेस गरिने छ । मन्त्रिपरिषदकाे सिफारिसमा प्रदेश प्रमुखबाट गत वैशाख १२ गते राती १२ बजेदेखि प्रदेशसभाको हिउँदे अधिवेशन अन्त्य गरिएको थियो ।
मन्त्रीपरिषद्ले बिहीबार गरेका निर्णयहरुः
१. २०८१ वैशाख ३१ गते दिनको १ वजे लाइ प्रदेश सभाको अधिवेशन आह्वान गर्न सिफारिस गर्ने
२. प्रदेश नीति तथा योजना आयोगको सदस्यमा श्री दिपेन्द्र श्रेष्ठलाइ नियुक्त गर्ने
३. नमुना वडा समाजवादी कार्यक्रम कार्यान्वयन कार्यविधि, २०८०को पहिलो संशोधन स्वीकृत गर्ने
४. लैङ्गिक समानता तथा सामाजिक समावेशीकरण परिक्षण मापदण्ड, २०८१ स्वीकृत गर्ने
५. प्रदेश प्राविधिक तथा व्यावसायिक शिक्षा एवं तालिम परिषद स्थापना हुने स्थान, सङ्गठन तालिका, दरवन्दी तेरिज, कार्यविवरण, छाप र साइन बोर्ड स्वीकृत गर्ने
६. वन क्षेत्र प्रयोग तथा रुख कटान गर्ने
७. कार्यालय स्थानान्तरण गर्ने
८. खरको छानामुक्त बागमती प्रदेश कार्यक्रम संचालन (पहिलो संशोधन) कार्यविधि, २०८१ स्वीकृत गर्ने
मकवानपुर । नेकपा (एकीकृत समाजवादी) मकवानपुरले जिल्लाका पालिकाहरुमा इन्चार्ज तथा सहइन्चार्ज ताेकेकाे छ । पार्टीकाे नवौं जिल्ला अधिवेशनपछि बुधबार बसेको बैठकले विभिन्न पालिकामा इन्चार्ज तथा सहइन्चार्ज तोकेको छ ।
एसले हेटौंडा उपमहानगरपालिकाको इन्चार्जमा पार्टी सचिव धुव भुजेललाई ताेकेकाे छ । यस्तै उनले पार्टी संगठन विभागको समेत जिम्मेवारी पाएका छन् । उपमहानगरपालिकाकाे सहइन्चार्जमा उपसचिव कविन पन्त, सदस्यहरुमा राजु अधिकारी, ज्ञानेन्द्र देवकोटा, देवराज गौतम र शुक्रदेवी बललाई ताेकिएकाे छ ।
यसैगरी थाहा नगरपालिकाको इन्चार्जमा सानुकाजी गोपाली, सहइन्चार्जमा वीरबहादुर तामाङ र सर्मिला जिम्बालाई जिम्मेवारी ताेकिएकाे छ ।मनहरी गाउँपालिकाको इन्चार्जमा उपसचिव किशोर बर्तौला, सहइन्चार्जमा शिवकुमार काशी र देवीमाया तामाङलाई ताेकिएकाे छ । इन्द्रसरोबर गाउँपालिकाको इन्चार्जमा कुन्छान लामालाई जिम्मेवारी ताेकिदा राक्सिराङ गाउँपालिका इन्चार्जमा ज्ञानेन्द्र तामाङ र सहइन्चार्जमा कृष्णबहादुर तामाङलाई जिम्मेवारी दिइएकाे छ ।
कैलाश गाउँपालिकाको इन्चार्जमा उपसचिव टंक मोक्तान र सहइन्चार्जमा कालु ढकाल रहेका छन् । मकवानपुरगढी गाउँपालिका इन्चार्जमा दुर्गा दहाल र सहइन्चार्जमा शिवराज देवकोटा रहेका छन् । बैठकले तिलक अधिकारीलाई कार्यालय सचिवको जिम्मेवारी प्रदान गरेको छ भने रामकुमार एलनलाई सूचना तथा सञ्चार विभाग प्रमुखको जिम्मेवारी ताेकिएकाे छ ।
यसैगरी पार्टीले मनोज कुमार वाइवालाई जनजाति महासंघ, अरुण बर्तौलालाई विद्यार्थी, शान्तिप्रिय बन्दनालाई राष्ट्रिय जनसांस्कृतिक महासंघ, दीपक बस्नेतलाई एकीकृत ट्रेड युनियन इन्चार्ज र अलि हुसेनलाई मुस्लिम इत्तेहाद संगठनको इन्चार्जको जिम्मेवारी दिएको छ ।
मकवानपुर । बागमती प्रदेशमा तामाङ र नेवारी भाषाले सरकारी कामकाजको मान्यता पाएको छ ।
बागमती प्रदेश सरकारी कामकाजको भाषा ऐन, २०८० शुभारम्भ घोषणा भए संगै सोमबारबाट तामाङ र नेवारी भाषाले सरकारी कामकाजको भाषाको मान्यता पाएको हो ।
भाषा दिवस २०८१ को उपलक्ष्यमा बागमती प्रदेश सरकारी कामकाजको भाषा ऐन, २०८० सुभारम्भ घोषणा प्रधानमन्त्री प्रचण्डले काठमाडौको बसन्तपुरमा सोमबार गरे ।
प्रधानमन्त्री प्रचण्डले भाषा शुभारम्भ घोषणा कार्यक्रममा उत्पीडित वर्ग, जाति र समुदायले आफ्नो असली प्रतिनिधिको पहिचान गरेर अधिकारको रक्षा गर्न अपिल गरे । उनले नयाँ संविधानमा पहिचान र अधिकार स्थापित गर्न मुख्य रूपमा सङ्घर्ष गर्दै आए पनि अझै पूर्णता पाउन नसकेको बताए ।
बागमती प्रदेश सरकारले ल्याएको सरकारी कामकाजी भाषा ऐन २०८० सोमबारबाट कार्यान्वयन भएको छ । प्रधानमन्त्रीले शुभारम्भ गरेसंगै औपचारिक रूपमा प्रदेश सरकारी कामकाजी भाषा कार्यान्वयनमा आएको हो ।
२२ असोज २०८० मा बागमती प्रदेशसभाबाट ‘प्रदेश सरकारी कामकाजको भाषा सम्बन्धमा व्यवस्था गर्न बनेको ऐन, २०८०’ पारित गरिएको थियो भने कार्तिक २३ गतेका दिन प्रदेश राजपत्रमा प्रकाशित भएको थियो । राजपत्रमा प्रकाशित भएको १८० औँ दिनमा ऐन कार्यान्वयन हुने व्यवस्था बमोजिम सोमबारबाट लाागू भएको हो ।
प्रदेशको संस्कृति, पर्यटन तथा सहकारी मन्त्रालयले काठमाडौँको वसन्तपुरमा औपचारिक कार्यक्रम गरि ऐन कार्यान्वयनको घोषणा गरेको हो ।
नेवा: समुदायको राष्ट्रिय संगठन नेवा: देय् दबू र तामाङ समुदायको राष्ट्रिय संगठन तामाङ घेदुङको व्यवस्थापनमा वसन्तपुरबाट स्थानीय नेवा: र तामाङ समुदायको सांस्कृतिक भेषभुषा एवं बाजागाजा सहित सांस्कृतिक ऱ्याली, कुमारीको रथयात्रा परिक्रमासहित ऎन घोषणा भएको थियो ।
भाषा ऐन कार्यान्वयन घोषणा पश्चात् बागमती प्रदेश सरकार मातहत र प्रदेशका ११९ स्थानीय तहको नाम ४ भाषामा लेखिने मन्त्रालयले जनाएको छ । अब कार्यालयको बोर्ड र लेटर हेडमा नेपाली, अङ्ग्रेजी, तामाङ र नेपाल भाषामा नाम रहने छ ।
भाषा ऐन कार्यान्वयन एक ऐतिहासिक उपलब्धि भएकाले भन्दै प्रदेश मन्त्रिपरिषद्को गत बैशाख १२ गतेको निर्णयबमोजिम नेपाली भाषाको अतिरिक्त तामाङ भाषा र नेपाल भाषालाई पनि बागमती प्रदेशमा सरकारी कामकाजको भाषाको रूपमा लागू हुने दिनमा सार्वजनिक बिदा दिने निर्णय गरेको थियो ।
मकवानपुर । मकवानपुरको भीमफेदी गाउँपालिकामा बस दुर्घटना हुँदा ५ जना घाइते भएका छन् । भीमफेदी–कुलेखानी–काठमाडौं सडकखण्ड अन्तरगत भीमफेदी वडा नं.६ जुरीखेतमा चित्लाङबाट हेटौंडातर्फ आउदै गरेको ना.५ ख १५९० नम्बरको बस आइतबार आफै अनियन्त्रित भइ दुर्घटना भएकाे थियाे ।
उक्त दुर्घटनामा ५ जना घाइते भएको बागमती प्रदेश प्रहरी कार्यालय हेटौंडाले जनाएको छ । घाइते हुनेमा भीमफेदी गाउँपालिका–६ जुरीखेत बस्ने ९१ वर्षीय मान बहादुर डिङडुङ, सोही स्थानका २० वर्यीय रोजी राना मगर, बारा कलैया उपमहानगरपालिका–२ बस्ने ५८ वर्यीष ओमरावती देवी कुर्मी, रौतहट देवाई गोनाही नगरपालिका–४ बस्ने ३६ वर्षीय मातृका प्रसाद कुर्मी र हेटौंडा उमहानगरपालिका–१८ हर्नामाडी बस्ने ५० वर्षीय सावित्री बिश्वकर्मा रहेकाे प्रहरीले जनाएकाे छ । कुमी प्रहरी सहायक हवाल्दार समेत रहेकाे बताइएकाे छ ।
प्रदेश प्रहरीका अनुसार डिङडुङको स्वास्थ चौकी भिमफेदी, मगर र कुर्मीको हेटौंडा अस्पतालमा उपचार भइरहेको छ भने बिश्वकर्माको मकवानपुर सहकारी अस्पतालमा उपचार भइरहेको छ । बस चालकलाई प्रहरीले नियन्त्रणमा लिएको बताइएकाे छ ।
मकवानपुर । बागमती प्रदेश सरकारले २ वटा निर्णय गरेकाे छ । आइतबार बसेकाे मन्त्रिपरिषद्काे बैठकले प्रदेश उच्च शिक्षा ऐन २०७८ लाई संशोधन गर्न अध्यादेश जारी गर्ने तथा आगलागीमा परेर निधन भएका परिवारलाई एक लाख रुपैया दिने निर्णय गरेकाे हाे ।
सरकारका प्रवक्ता एवम् आन्तरिक मामिला तथा कानुन मन्त्री गंगानारायण श्रेष्ठका अनुसार उक्त ऐनको दफा १३ को (५) लाई संशोधन गर्न अनुकूल देखिएकाले अध्यादेश ल्याउने निर्णय गरिएको हो । उक्त दफामा रहेकाे प्रदेश विश्वविद्यालयको संरक्षक समिति (बोर्ड अफ ट्रष्टी) को पदावधि निर्धारणका विषयलाई स्पष्ट पार्न अध्यादेश जारी गर्ने निर्णय गरिएको उनले जानकारी दिए ।
संरक्षण समिति (बोर्ड अफ ट्रष्टी) का पदाधिकारीहरूको पहिलोपटक पदावधि कायम गर्दा २ जनाको पदावधि २ वर्ष, ३ जनाको पदावधि ४ वर्ष र ३ जनाको पदावधि ६ वर्ष गोला प्रथाद्वारा कायम गरिने व्यवस्था रहेकोमा उक्त व्यवस्थालाई संशोधन गरी समितिमा मनोनीत भएका पदाधिकारीहरूको पहिलोपटक पदावधि कायम गर्दा गोला प्रथाद्वारा ५ जनाको पदावधि ४ वर्ष र ३ जनाको पदावधि ६ वर्ष कायम गरिने व्यवस्था गर्नकाे लागि अध्यादेश जारी गर्ने निर्णय भएकाे हाे ।
यसै गरी आइतबारकाे मन्त्रिपरिषद्काे बैठकले आगलागीमा परेर निधन भएका ३ जनाकाे परिवारलाई १/१ लाख रुपैयाँ दिने निर्णय गरेकाे छ । केही दिनअघि प्रदेशको ललितपुरमा २ जना र रामेछाप जिल्लामा १ जना वनका लागेको आगो नियन्त्रणमा लिने क्रममा मृत्यु भएकाे थिए । उक्त रकम आन्तरिक मामिला तथा कानुन मन्त्रालयको विपद् व्यवस्थापन कोषमार्फत् उपलब्ध गराइने प्रवक्ता श्रेष्ठले बताए ।
उनी धाराप्रवाह बोल्दै थिए , “गगनचुम्बी महल छेउ पुग्दा यहाँहरुकै पसिना र मेहनतको गन्ध आइरहे जस्तो लाग्छ । होटेल कलकारखाना उद्योग निर्माण र संचालनका संवाहक यहाँहरु नै हुनुहुन्छ । यहाँहरुको इमानदारीता धैर्यता अथक प्रयासको जति बयान गरेपनि कमै हुन्छ । यहाँहरुलाई गाँस बास कपास शिक्षा स्वास्थ्य रोजगारीको व्यबस्था गर्न मेरो व्यक्तिगत तर्फबाट सक्दो प्रयास गर्नेछु । सम्बन्धित ठाउँमा आवाज उठाउँनेछु । म आफ्नो गाँस काटेर भएपनि तपाईं र तपाईंका परिवार भोको रहन दिन्न।” तालीको गडगडाहटले सभाहल गुन्जायमान भयो ।
बाहिर रुखो स्वभाव देखाए पनि मनमा हरिको बास भएका र’छन् , मनमनै ऊ दङ्ग भयो। त्यो उत्साह पलभरमै गायव भयो जब वक्ता र उसका चार आँखा एकाकार भए ।
डराउँदै घर फर्कियो । ऊ भन्दा स्वास्नी ज्वरोले झन् थल्लिएकि थिई । परिवार सबै ओछ्यान परेपछि उसलाई निको हुन कर लागेको थियो । भान्सामा पस्यो पकाउँनलाई चामलको मुठ्ठी रहेनछ । हिजो बिहानको कोदोको खोलेले छोडिसकेको थियो । उता सानी छोरी भोक लाग्यो भनेर रुँदै थिई । अघिनै ख्याल गरेको भए ‘औषधीको सट्टा अलिकति चामल किनेर ल्याउँथे मनमनै पछुतायो ।’
केही उपाय नलागेपछि ऊ साहूको घरतिर लाग्यो । एक हप्तादेखि काममा नआएको भनेर साहुनीले बेस्सरी झपारिन् । अवस्था बेलिबिस्तार लगाएपछि एक कटौरो सरौलो झुम्रामा पोको पारिदिइन्।
बिदा हुनै लाग्दा साहू पनि कार्यक्रमस्थल बाट टुप्लुक्क आइपुगे । ऊ काममा नआएकोले भट्टामा ईटा पोल्न नपाएर उनी रिसाएका थिए । मजदुर दिवस मनाउँन गएको ….?भन्दै एक थप्पड मारे । मेडिकलमा गएको थिएँ । मालिकको भाषण छ भन्ने सुनेर मात्र एकैछिन कार्यक्रमस्थल पसेको सुनायो । ‘अझै बाठो हुन्छ्स्? गाईलाई दिन छोडेर किन दिएको त्यो सरौलो यो बैगुनीलाई ?´ मालिक कड्किए ।
जुन दिवस आएपनि “कागलाई बेल पाक्यो हर्ष न बिस्मात् !´´ अमिलो मन लिएर ऊ घर फर्कियो । बाटोभरि गुन्दै हिड्यो, ‘साहूको छोराले फालेको खिर मागेको भए पनि त छोरी अघाउँथी ।´
सभापोखरी – १,संखुवासभा ।
मकवानपुर । मकवानपुर प्रहरीले हेटौडा उपमहानगरपालिकाबाट लागुऔषध गाँजासहित १ जनालाई नियन्त्रणमा लिएकाे छ । पूर्व–पश्चिम राजमार्ग अन्तर्गत हेटौँडा–१५, रातोमाटेबाट प्रहरीले लागुऔषध गाँजासहित कैलाश गाउँपालिका १० का ४० वर्षीय पाल्साङ्क मुक्तानलाई नियन्त्रणमा लिएकाे हाे ।
बैशाख १९ गते प्रहरी चौकी रातोमाटे मकवानपुरबाट खटिएको प्रहरी टोलीले हेटौंडाबाट पथलैयातर्फ जाँदै गरेको ना ५ ख ५२६७ नम्बरको बसलाई रोकी सुरक्षाजाँच गर्दा बसमा सवार मुक्तानको साथबाट ५ किलो लागुऔषध गाँजा बरामद गरेको थियो । लागुऔषध गाँजासहित मुक्तानलाई नियन्त्रणमा लिई मकवानपुर जिल्ला अदालतबाट १० दिनको म्याद अनुमति लिई अनुसन्धान भईरहेको जिल्ला प्रहरी कार्यालय मकवानपुरले जनाएकाे छ ।
मकवानपुर । राष्ट्रिय तेक्वान्दो संघ नेपाल जिल्ला कार्य समिति मकवानपुरको अध्यक्षमा मदन कुमार श्रेष्ठ चयन भएका छन् । संघकाे बुधबार भएको नवौं साधारण सभा तथा तेश्रो अधिवेशनबाट श्रेष्ठकाे अध्यक्षतामा ११ सदस्यीय कार्य समिति गठन भएको हाे ।
यसैगरी संघकाे उपाध्यक्षमा केशव बहादुर कार्की, राज कुमार थापा र भोजराज पराजुली, सचिवमा रविन्द्र राई, सहसचिवमा रावण किष्म राई, कोषाध्यक्षमा दीपेन्द्र नेपाली चयन भएका छन् । यस्तै सदस्यहरूमा अनिता मिश्र, समीर भुजेल, ईश्वर कुमार श्रेष्ठ र जनकलाई चयन गरिएकाे छ ।
साथै बुधबारकाे भेलाले संदेश गौतमको नेतृत्वमा ७ सदस्यीय हेटौडा नगर समिति समेत गठन गरेको छ । नगर समितिकाे उपाध्यक्षमा अन्तेश्वर कापर, सचिवमा सन्तोष बस्नेत, कोषाध्यक्षमा अभिषेक बानियाँ, सदस्यहरु रिमेश अधिकारी, सुजन गोले र प्रकाश घिमिरे चयन भएका छन् ।
मदन कुमार श्रेष्ठकाे सभाध्यक्षमा भएकाे कार्यक्रममा जिल्ला खेलकुद विकास समिति मकवानपुरको सदस्य आलोक स्याङतानको प्रमुख आतिथ्यता तथा हेटौडा उपमहानगर पालिका ७ नम्बर वडा सदस्य राधिका विकको विशेष आतिथ्यतामा भएकाे हाे । हेटौडा नगर खेलकुद विकास समिति सदस्य संगीता केसी तथा राष्ट्रिय तेक्वान्दो संघ नेपाल केन्द्रीय सदस्य नारायण सिंङ थिङको आतिथ्यता रहेकाे कार्यक्रमकाे सहजिकरण भोजराज पराजुलीले गरेका थिए ।
मकवानपुर । सिस्नुपानी नेपाल मकवानपुरले २ जना स्रष्टालाई सम्मान गरकाे छ । सिस्नुपानी नेपालकाे स्थापना दिवसमा बैशाख १९ गते बुधबार सिस्नुपानी मकवानपुरले दाङका उत्तमकृष्ण मजगैयाँ र मोरङका अनिल पौडेललाई सम्मान गरेकाे हाे ।
सिस्नुपानी नेपाल मकवानपुरका पूर्व अध्यक्ष डा.गणेशकुमार पौडेल स्मृति हास्यव्यङ्ग्य सम्मान २०८० बाट दाङका मजगैयाँलाई सम्मान गरिएकाे सिस्नुपानी नेपाल मकवानपुरका अध्यक्ष राजकुमार लामिछाने जानकारी दिए । उक्त सम्मानकाे राशी २५ हजार १ सय रुपैया रहेकाे छ । यसैगरी मकवानपुरे हास्यव्यङ्यकार आरसी रिजालले स्थापना गरेकाे आरसी रिजाल हास्यव्यङ्ग्य सम्मान २०८० मोरङका पौडेललाई प्रदान गरिएकाे हाे । उक्त सम्मानकाे राशी १५ हजार रुपैया रहेकाे लामिछानेले जानकारी दिए ।
सम्मानित दुवै स्रष्ट्रालाई प्रमुख अतिथि सिस्नुपानी नेपालका अध्यक्ष लक्ष्मण गाम्नागेले पुरस्कारसहित सम्मानित गरेका हुन् । स्थापना दिवसकाेअवसरमा सिस्नुपानी नेपालले आयोजना गरेकाे हास्यव्यङ्ग्य रचना वाचन कार्यक्रममा हास्यव्यङ्य रचना तथा प्यारोडी गीत प्रस्तुत भएकाे थियाे ।
संस्थाका अध्यक्ष राजकुमार लामिछानेको सभाध्यक्षतामा भएको कार्यक्रममा हेटौँडा उपमहानगरपालिका वडा नम्बर ४ का अध्यक्ष नवीन सिग्देल, नेपाल लेखक संघका केन्द्रीय सदस्य ह्यग्रिव आचार्य, सर्जक सञ्जाल मकवानपुरका संयोजक निमेष निखिल कवि शान्ति प्रिय वन्दनालगायतकाकाे उपस्थिति रहेको थियो ।